Mare di, dízimo wa te pawaꞌöbö dzaꞌra õ di; duré wanhimiromhuri hã niꞌwa te te waihuꞌu dzaꞌra õ di e ꞌwa ma tô titsõ robꞌuipradzé. E marĩ hã dízimo, duré e marĩ wa Jeová Watsuꞌuꞌwa norĩ te te ꞌmanharĩ õ di taha.

 Duréi hã Höimanaꞌuꞌö ma tô tiꞌru israelita norĩ ma te te pawaꞌöbö dzaꞌra dízimo na. E marĩ aré dízimo. Israelita norĩ tinhibro te öri da tawamhã te ĩpoꞌo 10 waꞌõno, tawamhã mitsi waꞌõno te te ꞌre ĩtsõmri dzaꞌra da tsi Hoimanaꞌuꞌö ma. Tadzahã Bíblia dzarina Höimanaꞌuꞌö nhimirotiꞌrata na Moisés te te ãma ĩrobꞌuiꞌéré hã roti pire na cristão norĩ ꞌre höimana mono õ di oto. — Hebreus 7:5, 18; Colossenses 2:13, 14.

 Jeová Watsuꞌuꞌwa norĩ te natsi tsidzutsi dzaꞌra cristão ĩmoriꞌrata norĩ hã. Wa natsi upari dzaꞌra ni Jeová watsuꞌuꞌwai ubumro robꞌuipradzém na, duré robꞌuipradzé dawi ĩwaptẽrẽ õ wanhimiromhuri da hã.

 Ãne wamhã, wa natsi wapari dzaꞌra ni e marĩ Bíblia te tinha cristão ĩmoriꞌrata norĩ ma hã: “ꞌRöwi aipẽꞌẽ ꞌRe, atsima ĩwaihuꞌu dzaꞌra waꞌaba dzéb dzarina tsi, te dza aihöiba mono bö dama atsõprub dzaꞌra waꞌwa, ãté tsaꞌẽtẽ na, ãté tsuru na. Robdzeiꞌõ nherẽ, dama atsõprub dzaꞌra waꞌaba õ di dza. Duré taré da te aima ĩꞌru dzaꞌra waꞌaba dzéb dzarina, dama atsõprub dzaꞌra waꞌaba õ di dza. Mare di. Atsiꞌuihö na tsi te dza atsima ĩwẽ dzaꞌra waꞌaba dzéb dzarina, dama atsõprub dzaꞌra waꞌwa, ato tsina. Ãne tsi ĩwẽ uptabi hã, ꞌRe ĩhöimana uꞌötsi mono ma hã, dato tsina datsima ꞌre ĩdanhoprub dzaꞌra mono dzé hã.” — 2 Coríntios 9:7.