ROMNHIHÖDÖ 12
E Niha A hã Dza Höimanaꞌuꞌö Tsiwaihu.
1. Höimanaꞌuꞌö e te natsi wapa uburé rowaptẽrẽ norĩ hã.
Höimanaꞌuꞌö te dadzô hö ĩtẽme datsihutu da rowaptẽrẽ na. (1 João 5:14) Tane nherẽ, te te ꞌre wapari mono õ di uburé rowaptẽrẽ norĩ hã. Ãma ĩtsimiré, aibö timro ma natsi te te ĩrobꞌmanharĩ watsété nhimirowaptẽrẽ ãté te te wapari õ di dza. (1 Pedro 3:7) Israelita norĩ tiwatsédé hã te te ꞌre ꞌmanharĩ uꞌötsi dzaꞌra mono wamhã, Höimanaꞌuꞌö duré te te ꞌre wapari mono õ di ĩtsimirowaptẽrẽ dzaꞌra hã. Tane nherẽ, Höimanaꞌuꞌö te dza wapa duré niꞌwa ĩwatsété dzaꞌẽne te te ĩꞌmanharĩ nhimirowaptẽrẽ, ta hã tiwatsédé te te rẽme wamhã. Ãne wa, rowaptẽrẽ hã Höimanaꞌuꞌö nhibdzari.—Tsõré na Atos 3:19, 20.
ꞌMadöꞌö ĩropodo E Höimanaꞌuꞌö tãma rowẽ uburé rowaptẽrẽ norĩ hã.
2. E niha wa te ĩrowaptẽrẽ dzaꞌra da tsi.
Rowaptẽrẽ hã Höimanaꞌuꞌö ãma dawatadzéb da hã. Taha wa, wa te ĩrowaptẽrẽ dzaꞌra da tsi Wapotoꞌwa hawi tsi, Jeová. (Mateus 4:10; 6:9) Taha nhipai u, ꞌre wawatsété dzaꞌra mono wa, wa te ꞌre ĩrowaptẽrẽ dzaꞌra mono da tsi Jesus nhitsi na, wawatsété dzaꞌra da döꞌö wa. (João 14:14) Jeová te te tsima wẽ õ di wa te tiwi rowaptẽrẽ dzaꞌra da wamreme dzahu uꞌötsi dzaꞌra na wanhimirotsaꞌrata dzaꞌra hawi niwamhã romnhihötö hawi. Te tsima wẽ wa te tiwi ꞌre rowaptẽrẽ dzaꞌra mono da wapẽꞌẽ na tsi.—Tsõré na Mateus 6:7; Filipenses 4:6, 7.
Wapotoꞌwa te te wapari waihuꞌu petse di wa te rowaptẽrẽ dzaꞌra wamhã ariꞌiwi na nherẽ. (1 Samuel 1:12, 13) Õ hã, te natsi dadzô hö da te tiwi rowaptẽrẽ dzaꞌra da tsiwaꞌru bötö na, ãma ĩtsimiré, mararé daꞌutu pari, barana danhotõ wanaré, datsai wanaré, duré da te ꞌre robdzépata dzaꞌra mono wamhã. —Tsoré na 1 Pedro 5:7; Atos 27:35.
3. E marĩ wa cristão norĩ te natsi tsiꞌrãꞌõtõ dzaꞌra.
Höimanaꞌuꞌöhö tẽme datsihutudzé hã wapu õ di ꞌre wahöimana dzaꞌra mono wa daꞌahö ꞌrata ĩtsimidzadze dzaꞌra õ hã Höimanaꞌuꞌö ãma duré ãma ꞌre ĩto dzaꞌra mono hã ĩtsimiropitsutu na romharé na Tiꞌai ãma. (2 Timóteo 3:1, 4; 2 Pedro 3:3, 13) Taha wa, ꞌre watsipawaptob dzaꞌra mono da wa natsi watsiꞌrãꞌõtõ dzaꞌra ni watsitsãnawã norĩ me.—Tsõré na Hebreus 10:24, 25.
Höimanaꞌuꞌö dzawiꞌwa norĩ hã watsiwaihuꞌu dzaꞌra wamhã wa dza ĩtẽme aihutu ni. Jeová Watsuꞌuꞌwa norĩ tsiꞌrãꞌõtõdzém ãma hã, wa dza watsipawaptob dzaꞌra ni wanhiptete dzaꞌra da wanhimidzadze dzaꞌra na hã.—Tsõré na Romanos 1:11, 12.
4. E niha te dza aiwi Höimanaꞌuꞌö tẽme.
Te dza aiwi Jeová tẽme Bíblia na ꞌre ĩwaihuꞌu mono dzém na ãma ꞌre rotsaꞌrata mono wamhã. Ãma ꞌre rotsaꞌrata mono Höimanaꞌuꞌö nhimiꞌmanharĩ, ĩtsimiroti duré ĩtsimiropitsutu na. Rowaptẽrẽ wamhã ãma ꞌre rotsaꞌrata mono tsidöpötsi te dza ĩwaihu Höimanaꞌuꞌö nhimidzawi petse dzé duré ĩtsimirowaihu hã. —Tsõré na 1 Timóteo 4:15, 16.
Te dza aiwi Jeová tẽme atsimidzadzei wamhã. Tane nherẽ, danhimidzadze aiwa robꞌre ne. Robꞌre prédub da hã, te dza ĩdi. Ãne duré, atsimidzadze tsaꞌẽtẽ da ꞌre ĩromnhoré petse mono da tsi duré natsi ꞌre ĩꞌaipoꞌre puꞌu mono da tsi marĩ te te ĩꞌupari dzaꞌra dzém na.—Tsõré na Mateus 4:4; Hebreus 11:1, 6.
5. E marĩ wa aima wẽ di dza Höimanaꞌuꞌö tẽme aiwitsi da hã.
Jeová te rotsaꞌrata te te ꞌre ĩtsawi dzaꞌra mono norĩ ãma. Te dza ꞌmadöꞌö dzaꞌra tsiwaꞌru marĩ norĩ wi te te tiwi ĩwamnarĩ dzaꞌra da ĩtsimidzadze dzaꞌra dzé duré tsô ꞌre ĩtsimipari dzaꞌra mono dzé dahöimanaꞌuꞌötsi dzéb dzô. (Salmo 91:1, 2, 7-10) Te wama watsuꞌu dzaꞌra ꞌre watsiꞌmadöꞌö dzaꞌra mono da dahöimana ĩꞌupai wi duré ĩwatsédé te te wawi wamnarĩ dzaꞌra tõ da wahöiba dzaꞌra wama robdzedzé. Jeová te wama waihuꞌu dzaꞌra dahöimanadzé danhipai u ĩwẽ na.—Tsõré na Tiago 1:25; 4:4, 8.
Ãté aima wẽ di dza taha na duré
E ꞌWAM NORĨ, WA NORĨ HÃ
E marĩ da romnhoré Biblia na.
Daꞌahö uptabi na daro mono bö ma tô waihuꞌu dzaꞌra ĩtsadaꞌöbödzé dadzadanharĩ ĩpire da hã dahöimanadzém na hã Biblia ꞌremhã. E te atsima ĩwẽ tsõpẽtẽ da.
