Jeová, Höimanaꞌuꞌö hã rowẽ uꞌötsi ꞌre ĩmorĩ hã, te tsima wẽ família norĩ hã te te tsima rowẽ dzaꞌra da. (1 Timóteo 1:11) Õ hã, datsina damro ꞌManharĩꞌwa. Datsina damro roti ꞌremhã ĩpire morĩꞌrada família ꞌremhã rowẽ da hã, te te ꞌmanharĩ wa damama norĩ hã daꞌra norĩ me te te tsima robdze dzaꞌra da duré ꞌre tsitsawi uptabi dzaꞌra mono da. Cristão norĩ hã te te ꞌre ĩwadzéb dzaꞌra mono da tsi dama ĩpire norĩ nhimiroti hã datsina damro na. —Tsõré na Lucas 2:1, 2, 4, 5.

E niha Höimanaꞌuꞌö te rotsaꞌrata datsina damro na hã. Õ hã, te tsima wẽ aibö duré piꞌõ, tsiré ꞌre höimana uꞌötsi dzahuré mono da duré niwa tsirẽme dzahuré tõ da. (Hebreus 13:4) Bíblia hã te tinha: “Õ hã, te te ꞌre ꞌruiꞌwapari datsirẽmedzé hã.” (Malaquias 2:16) Tane nherẽ, cristão norĩ ma te te ꞌre tsaꞌré ꞌre tsirẽme dzaꞌra mono da duré apö tsina ꞌre mro dzaꞌra mono da, ĩmro hã tsiwatsété wamhã tihöiba na.—Tsõré na Mateus 19:3-6, 9.

Jeová ma poto aibö duré piꞌõ, datsina damro ꞌremhã, ꞌre tsipawaptob dzahuré mono da. (Gênesis 2:18) Família nhibꞌapito na, aibö te te we ꞌre ĩꞌupari mono da tsi timro, tiꞌra norĩ duré te te tãma ꞌre ĩrowahutu dzaꞌra mono da tsi Höimanaꞌuꞌö na. Aibö duré piꞌõ ꞌre ĩtsitsawi dzahuré mono da tsi duré ꞌre ĩtsiwadzéb dzahuré mono da tsi. ꞌRe watsété dzahuré mono wa, ꞌre ĩtsiꞌruiwapari dzahuré tõ mono da tsi tãma ꞌre rowẽ dzahuré mono da.—Tsõré na Efésios 4:31, 32; 5:22-25, 33; 1 Pedro 3:7.

Aimrodzé pire wamhã, tsada ꞌre atsiptete aba mono atsimidzawi petse na atsima ꞌre aihöimana aba mono da. (1 Coríntios  13:4, 5) Bíblia hã te te roti õ di tsirẽme dzahuré da taré ꞌre putsi dzahuré mono da ropipa hawi datsina damro ꞌremhã.—Tsõré na 1 Coríntios 7:10-13.

Jeová te tsima wẽ aima ꞌre robdze dzaꞌra waꞌaba mono da. Õ hã, ma titsõ roti ĩwẽ danhipai u petse rowẽ na dahöimanadzém na dahöibaté ꞌremhã. Te tsima wẽ ãma atsima ꞌre rowẽ dzaꞌra waꞌaba mono da aimama norĩ nhimirowaihuꞌu na duré ĩhöimanadzéb dzaꞌra na. (Colossenses 3:20) Jeová, Wapotoꞌwa, duré te tsima wẽ pibu dzaꞌra waꞌaba da robdze hã ĩhöimana hã marĩ norĩ ꞌre ꞌmanharĩ dzaꞌra waꞌaba mono wa, õhõ ma duré Ĩꞌra ma ĩwẽ hã.—Tsõré na Mateus 19:13-15; 21:15, 16.

Tsada ꞌre atsiptete dzaꞌra waꞌaba mono aiꞌra norĩ ma ꞌre tsõmri dzaꞌra waꞌaba mono da datsa, ꞌri duré daꞌudza. (1 Timóteo 5:8) Tawamhã, aiꞌra norĩ ma robdzei uptabi di dza, tãma ꞌre rowahutu dzaꞌra waꞌaba mono waptsi Höimanaꞌuꞌö dzawidzém na duré ĩwaihuꞌudzém na. (Efésios 6:4) ꞌRe höiꞌré dzaꞌra waꞌaba mono wamhã Höimanaꞌuꞌö aima ĩtsawi dzaꞌra waꞌaba na, aiꞌra norĩ hã te dza te te ꞌre atsidzutsi dzaꞌra waꞌwa. Atsimiroti dzaꞌra waꞌwa Bíblia dzarina wamhã, te dza ĩpawaptob dzaꞌra waꞌwa ĩbö na tsimirotsaꞌrata dzaꞌra da. Bíblia te tinha: “Rowaihuꞌu aiꞌuté ma bödödi ãma ĩmorĩdzéb da hã, tawamhã tsiꞌĩhi wamhã ĩhawi watobro õ di dza”. — Provérbios 22:6.—Tsõré na 2 Timóteo 3:15.

Aiꞌra norĩ ma rowẽ di dza ꞌre udze dzaꞌra waꞌaba mono wamhã duré ꞌre tsiptete upari dzaꞌra waꞌaba mono wamhã. Tãma ꞌre ĩpetse dzaꞌra waꞌaba mono da tsi marĩ ĩꞌupa duré tãma ꞌre ĩroti dzaꞌra waꞌaba mono da tsi. Ãne wamhã, te dza tsiꞌmadöꞌö dzaꞌra dahöimana watsété wi te te ꞌre ĩroꞌwaꞌrutu mono rowẽ wi. (Hebreus 12:7, 9) Tane nherẽ, roti niwa ĩpire tõ da tsi niwamhã ĩwatsédé.—Tsõré na Colossenses 3:21.

Jeová Watsuꞌuꞌwa norĩ hã te dama ꞌmanharĩ dzaꞌra ĩhöiwarobo norĩ te te pawaptob dzaꞌra da damama norĩ duré daꞌra norĩ dzama. Ta norĩ hã ĩhöiwarobo Bíblia dzarina hã.—Tsõré na 2 Timóteo 3:16, 17.