‘Taha wa, ĩ̱hiꞌrãtitõ, wa ꞌre ĩ̱tsimatsitsi, Wamama wi te tiwi ꞌre rowaptẽrẽ uꞌötsi mono da, aima dzaꞌra waꞌaba. Õhõ tsi Wamama wa, wa ĩꞌra ꞌre wahöimana dzaꞌra ĩtsadzeiꞌwai mono bö, höiwa ãma Tiꞌai ãma dzama ꞌre ĩwahöimana dzaꞌra mono norĩ hã.’ — Efésios 3:14, 15

E niha atsõrõwa ꞌremhã te dza tsima robdze dzaꞌra.

• Gênesis 1:26-28

  Wa te ĩwaihuꞌu dzaꞌra da tsi Jeová família te te ĩpoto na hã.

• Efésios 5:1, 2

  Dahöiba mono bö família ꞌremhã te te ĩtsidzutsi dzaꞌra da tsi Jeová duré Jesus.

‘Taha wa, aibö norĩ, te dza aimro ꞌre ĩtsawi petse dzaꞌra waꞌaba mo. [...] Duré piꞌõ norĩ, aimro hã te dza ꞌre ĩwadzéb dzaꞌra waꞌaba mo.’ — Efésios 5:33

E niha aibö duré piꞌõ te dza tsima ꞌre höimana dzahuré mono.

• Efésios 5:22-29

  Aibö hã roꞌmadöꞌöꞌwa família ꞌremhã. Timro te te ĩtsawi da tsi, duré piꞌõ te te ĩwadzéb petse da tsi ĩmro nhimipitsutudzé hã.

• Colossenses 3:19; 1 Pedro 3:4

  Aibö hã duré piꞌõ hã ĩhöimana ĩwẽdzéb dzahuré da tsi, ĩtsitsawi dzahuré da tsi duré te te tsiꞌãma ĩrotsaꞌrata dzahuré da tsi.

• 1 Pedro 3:1, 2, 7

  Õ norĩ hã ꞌre tsiwadzéb dzahuré mono da tsi.

• 1 Timóteo 5:8; Tito 2:4, 5

  Aibö hã te te ĩtsõmri da tsi tinhorõwa ꞌre norĩ ma datsa, daꞌudza duré uburé marĩ norĩ hã. Piꞌõ dzama te te ĩꞌmadöꞌö wẽ da tsi tinhorõwa ꞌre norĩ ma.

‘Damama norĩ, aiꞌra ma hã, ꞌre ꞌmanharĩ watsété dzaꞌra waꞌaba mono õ di dza, atsada ꞌre tsahi dzaꞌra waꞌaba mono tõ da. Te dza atsimiroti wẽ na tsi ꞌre ĩpawapto wẽ dzaꞌra waꞌaba mo, Wanhibꞌapito nhimiroti dzarina.’ — Efésios 6:4

E niha damama norĩ te dza pibui petse dzaꞌra tiꞌra norĩ hã.

• Provérbios 1:8 duré 22:6

  Damama norĩ hã, tiꞌra ma aiꞌutére te te ĩrowahutu dzaꞌra da tsi Jeová na. Tsimiꞌẽ na te dza pawaptob dzahuré tiꞌra mono bö Jeová tsiwaihuꞌu da hã.

• 1 Pedro 5:8

  Damama norĩ hã duré dana norĩ hã tiꞌra norĩ ma, te te tãma ꞌre ĩrowahutu dzaꞌra mono da tsi marĩ pipa na ꞌre tsipibui wẽ mono da, ãma ĩtsimiré datsima daꞌwapé danhiptete tsina daꞌãma dahöimana da, niwamhã dama robꞌmanharĩ ĩwatsédé.

• Salmo 78:38; Hebreus 12:9-11

  Damama norĩ hã, daꞌra norĩ tãma ꞌre ĩpetse dzaꞌra waꞌaba mono da tsi marĩ ĩꞌupa, duré tãma ꞌre ĩroti dzaꞌra waꞌaba mono da tsi, tadzahã tsada ꞌre ĩtsitiꞌrui petse dzaꞌra mono tõ da tsi duré ĩwatsédé.

‘Daꞌra norĩ, te dza aimama nhimiroti hã duré ana waꞌaba nhimiroti dzama hã ꞌre ĩwapari petse dzaꞌra waꞌaba mo.’ — Efésios 6:1

Daꞌra norĩ te te ĩwapari petse dzaꞌra da tsi timama duré tina, e marĩ wa.

• Provérbios 23:22-25; Colossenses 3:20

  Jeová duré damama norĩ hã tãma robdze dzaꞌra di dza, daꞌra norĩ te te wapari dzaꞌra wamhã.

• 1 Coríntios 15:33

  Daꞌra norĩ tsiwaihuꞌu norĩ Jeová tsawi dzaꞌra wamhã, wapu di dza te te wapari petse dzaꞌra da duré te te ꞌmanharĩ dzaꞌra da ĩbö na tsi.