Ezodu 1:1-22
1 Ã hã Zacoho ꞌra norĩ nhisi, Ezitu u isiré isiꞌabaꞌré, ihawi aꞌuwẽ norĩ ré hã:
2 Rubẽ, Simiã, Levi, Zuda,
3 Isaca, Zébulõ, Bẽzami,
4 Dã, Naftali, Gadi, Asé.
5 Zacoho hâiba hawimhã iꞌra norĩ isihudu norĩ me hã 70 na ihâiba zaꞌra hã. Tawamhã Zacoho ꞌra, imro dub amoi wamhã, Zuzé na isisi ma tô Ezitu ãma tisisãnawã norĩ wana tihâiba.
6 Tawamhã wahub ahâ pari, ma tô Zuzé norĩ hã aiꞌutõ, tisisãnawã norĩ me hã. Uburé pese ma tô duré aiꞌutõrĩ ni, isiré ꞌre idahâimana zaꞌra mono hã.
7 Tane nherẽ, Izaraéu nhihudu norĩ ma tô Zuzéhé uirĩ na Ezitu ãma ꞌre hâimana zaꞌra mono ré hã atébré zaꞌẽtẽ zaꞌra, ahâ uptabi na. Tahawa, siptete na duré dama simimnhasi na ma tô ꞌre hâimana zaꞌra. Tahawa dazaꞌrui mono bâ ma tô te te ropé.
8 Tawamhã Zuzéhé uirĩ na Zuzé tãma isaꞌreseꞌõ hã ma tô apito ité hã ãzé, Ezitu ãma.
9 Tawamhã ta hã ma tô tinhibꞌaꞌuwẽ norĩ ma nharĩ zaꞌra ãne:
— Ĩwapari pese zaꞌra waꞌaba. Izaraéu nhihudu norĩ isiptede wanhipai u zaꞌra waptu na ma tô sina hâ.
10 Wanhitobꞌru norĩ, niwamhã te te wazahui wamhã, ãté Izaraéu nhihudu norĩ zama te za wazada dasiré siꞌrãꞌõtõ. Tawamhã te te waꞌwapé zaꞌra parimhã, ãté te za duré wate tiꞌai waꞌõtõ nhoꞌõmo hawimhã wairé. Taha õꞌumnhasite, wa za niha na hã tãma robꞌmanharĩ zaꞌra ni, waptu na sina hâꞌâ pese tõ da.
11 Tawamhã ezipsiu norĩ hã Izaraéu nhihudu norĩ, ma tô te te ꞌre wadaꞌuri pese zaꞌra, romhuri pire na te te ꞌre romhuri pese zaꞌra mono da, pawaꞌâbâ õ nherẽ. Tahawa, ma tô duré ꞌri waꞌõno hã siwi tébré zahuré, Pitõ na ꞌri waꞌõtõ nhisi, Ramesé na ꞌri waꞌõtõ nhisi me. Amnho ubumrozéb da, ma tô Apito Faraꞌoho nhimiwadaꞌuri zarina dasiwi tébré zahuré ni.
12 Tane nherẽ, ezipsiu norĩ, Izaraéu nhihudu norĩ ma, te te ꞌre robꞌmanharĩ wasété zaꞌra mono nherẽ, te we duré ꞌre sitébré uꞌâsi, ipa ꞌrowib zaꞌra nherẽ. Tahawa, ezipsiu norĩ ma tô tãma tipahi zaꞌra.
13 Tahawa saꞌẽtẽ ma tô te te ꞌre wadaꞌuri pese zaꞌra.
14 Te te ꞌre robzépata zaꞌẽtẽ zaꞌra mono da ma tô te te tãma ꞌre ꞌmanharĩ zaꞌra. Tiꞌa uꞌẽtẽ na, ꞌri ꞌmanharĩ na, duré buru na robꞌre na te te ꞌre romhuri zaꞌra mono da hã, ma tô te te ꞌre wadaꞌuri pese zaꞌra. Tawamhã Izaraéu nhihudu norĩ iwadaꞌuri wasété zarina, ma tô uburé marĩ te te ꞌre ꞌmanharĩ zaꞌra.
15 Tawamhã Ezitu te apito, ma tô piꞌõ norĩ ma nharĩ zahuré, Izaraéu nhihudu norĩ ma, aiꞌuté zapariꞌwai ma. Isisi zahuré hã, Sifra na, duré Pua na. Ãne ma tô ta norĩ ma waihuꞌu zahuré:
16 — Izaraéu nhihudu norĩ iwasã ãma ꞌre sépuꞌu zaꞌra mono wamhã, ãne te za tãma ꞌre iꞌarobꞌmanharĩ aba mo: Aiꞌuté ꞌwatébrémi na tãma ꞌre poto zaꞌra mono wamhã, te za ꞌre iꞌmapãrĩ aba mo za. Piꞌõ na tãma ꞌre poto zaꞌra mono wamhã, ꞌre ꞌmapãrĩ aba mono õ di za.
17 Tane nherẽ, aiꞌuté zapariꞌwa norĩ te ꞌRe ihâimana uꞌâsi mono hã te te ꞌre wazé pese zahuré. Tahawa, Ezitu te apito, te te tãma iꞌru zahuré zé hã te te wapari zahuré õ di. Tahawa aibâ na ꞌre ipoto zaꞌra mono hã te te ꞌre aꞌmapãrĩ zahuré mono õ di.
18 Tawamhã apito, aiꞌuté zapariꞌwa norĩ zô ma tô tihârâ zahuré, te te sadanharĩ zahuré da, ãne:
— E marĩ wa, ĩwapari aba õ di. E marĩ wa, aibâ na ꞌre ipoto zaꞌra mono hã ꞌre ꞌmapãrĩ aba mono õ di, aiꞌuté hã.
19 Tawamhã ma ãne ãma sadaꞌâbâ zahuré:
— Izaraéu nhihudu norĩ nhipiꞌõi ãma iwasã ꞌre sépuꞌu zaꞌra mono wamhã, sé hutu na te tãma ꞌre poto zaꞌra, waptu na. Ezipsiu norĩ nhipiꞌõi wasã, ãma ꞌre isépuꞌu zaꞌra mono nei õ di. Ta norĩ wasã si sé hâ uptabi di. Tahawa wawana te aiꞌuté hã tãma ꞌre poto uꞌâsi zaꞌra, ꞌre wasimasisi mono õ ré, itẽmeb zaꞌra hã.
20 1:20-21 Tawamhã aiꞌuté zapariꞌwa norĩ, ꞌRe ihâimana uꞌâsi mono te te ꞌre wazé pese zahuré mono wa, ma tô ꞌRe ihâimana uꞌâsi mono iwẽ hã te te tãma ꞌre anhomri zahuré. Taha zarina ma tô siwabzuri zaꞌẽtẽ zahuré da hã tãma ꞌmanharĩ zahuré.
Tawamhã Izaraéu nhihudu norĩ ma tô sina hâꞌâ pe oto. Siptete na te oto ꞌre hâimana zaꞌra.
21 ꞌMadâꞌâ 1:20
22 Tahawa, apito Faraꞌo tinhibꞌaꞌuwẽ norĩ ma, ma tô ãne tãma roti zaꞌra:
— Maꞌãpé asiwi ĩwapari aba! Izaraéu nhihudu norĩ ꞌwatébrémi na ꞌre poto zaꞌra mono wamhã, te za â ꞌre isãmra aba mo, Nilu na pa nhoꞌõmo nhisi ãma. Tane nherẽ, piꞌõ na ꞌre ipoto zaꞌra mono si, te za wẽ na ꞌre prédub zaꞌra za.