Ezodu 10:1-29
10 Tawamhã Uburé Danhibꞌapito te Mozésihi ma, duré tãma tinha ãne:
— Apito u, te za apâ aimo. E marĩ wa. Wa hã tite romhuriꞌwa norĩ me apâ tipẽꞌẽ tete na tihâimana zaꞌra na te te ãma uzusi zaꞌra mono da hã, wa tô tãma ꞌmanharĩ zaꞌra, duré aꞌâ nasi ĩnhimiromhõ iwaꞌwab zaꞌra te ꞌmanharĩ zaꞌra da.
2 Ta hã ãne na ĩnhimiꞌmanharĩzé aiꞌra norĩ ma zama ꞌre wasuꞌu zaꞌra waꞌaba mono da, duré asihudu norĩ waꞌaba ma, ezipsiu norĩ simizaꞌreseꞌõ ne ihâimana zaꞌra zém na ĩnhimiromhõsi pipa te tãma ĩꞌmanharĩ zaꞌra zéb zarina. Ãne da, wa tô aꞌâ wa hã nasi ꞌrãnhitob zaꞌra. Ãne zarina te za a norĩ waꞌwa hã duré asiwi ĩwaihuꞌu ꞌwa, wa hã Uburé Danhibꞌapito na hã.
3 Tawamhã Mozési norĩ, Arãhã me, Ezitu te apito u neb zahuré wamhã, ma tô ãne tãma rowasuꞌu zahuré:
— Uburé Danhibꞌapito, hebreu norĩ te ꞌRe ihâimana uꞌâsi mono, te we ãne aima tinha: “E momo te za aiwapu na aihâimana da, asima iwẽꞌõzé aihâimana na ãma iꞌuzusi mono zé ĩnhoꞌremhã tiꞌrãsutu. E niwa te za ĩma aiwairo. Tahawa te za oto ãhã na ĩnhibꞌaꞌuwẽ norĩ ma iwaprosi zaꞌra, ate tiꞌai waꞌõtõ nhoꞌõmo hawi wairébé da, ĩꞌãma si oto ꞌre wata zaꞌra mono hâ.
4 Mare wamhã, awẽ wa za ꞌridi hã ahâ uptabi na ate tiꞌai waꞌõtõ nhoꞌõmo u hã waze.
5 Tawamhã tiꞌa da te dasiwi iꞌmadâꞌâ waihuꞌu da hã mare di za. E marĩ wa. Nemo Ezitu tiꞌai ꞌremhã za te te robꞌrãiꞌré mono wa. Ta hã te za duré tãzâ te te iꞌuprosi mono õ hã te te huri. Wede isiꞌmairẽme norĩ zama te za uburé te te uprosi zaꞌra.
6 Nemo te za tawamhã duré asimiromhurizé ꞌri zaꞌẽne hã siwi ꞌri ꞌre nhito. Duré aima romhuriꞌwa norĩ nhorõwa zama hã, duré asibꞌaꞌuwẽ norĩ nhorõwa zama hã te za uburé te te siwi ꞌri ꞌre nhito. Ã hã aimama norĩ, duré aihiꞌrata norĩ te te ꞌre iꞌmadâꞌâ zaꞌra mono nhipai u te za iwasété uptabi hã aima tihâimana zaꞌra waꞌwa.”
Tawamhã Mozési, ãne na te te tãma rowasuꞌu pari, ma tô õne haré isimiromhurizé ꞌri hawimhã oto watobro.
7 Tawamhã ihawi pusi zaꞌu, te apito nhimiromhurizé ꞌri zaꞌẽtẽ ꞌre, te te tãma ꞌre iromhuri zaꞌra mono tãma nharĩ zaꞌra ãne, apito ma:
— E momo te za ã hã aibâ nhimimnhasizé wama zaꞌra hã tiꞌrãsutu. Maꞌãpé, aibâ norĩ satõrĩ waré zaꞌra na siꞌabaꞌré da, tinhibꞌapito ꞌRe ihâimana uꞌâsi mono ãma, ꞌre wata zaꞌra mono da. E waihuꞌu ã bâ bété, Ezitu ꞌre iropsiwamnarĩ pese zém na hã.
8 Tawamhã Mozési norĩ Arãhã me, apito apâ sô hârâ zahuré wa, te te sina siri zahuré wamhã, ma tô ãne oto tãma robꞌru zahuré:
— Te za oto aiꞌabaꞌréi waꞌwa, Uburé Danhibꞌapito ate ꞌRe ihâimana uꞌâsi mono ãma si ꞌre aiwata zaꞌra waꞌaba mono da. Tane nherẽ, wa tô ĩsima wẽ, te iwaihuꞌu da si, niꞌwam norĩ asiré waꞌaba za isiꞌabaꞌré da hã.
9 Tawamhã Mozési ma te ãma tãma waꞌrã ãne:
— Wa norĩ hã uburé aihĩni pese wa za aiꞌabaꞌré ni, aiꞌuté norĩ me, duré ihâiba prédum norĩ me. Waꞌra siꞌaibâ norĩ, waꞌra sipiꞌõ norĩ, uburé pese marĩ wama ꞌre ihâimana zaꞌra mono wanhimizama poneꞌẽrebâ norĩ hã, poneꞌẽrebâ zéré uzé norĩ hã, duré powawẽ norĩ hã, wa za wasiré hã wa te simro zaꞌra, Uburé Danhibꞌapito wama iwazéb zaꞌra zarina dato isaꞌẽne wa te ãma tãma ꞌre iꞌmanharĩ zaꞌra mono zéb da hã.
10 Tawamhã apito te ãne tãma nharĩ zahuré:
— Asibꞌapito waꞌwa hã tô asiré waꞌaba morĩre! Tane nherẽ, wa hã aimro norĩ waꞌwa hã, duré aiꞌra norĩ waꞌwa hã asiré simroi waꞌaba mono da, te aima isaꞌré zaꞌra waꞌaba da hã mare di za. Asimirosaꞌrata waima zarina ĩzada iꞌaihâimana zaꞌra waꞌaba zém na hã wa tô ĩsina aiwaihuꞌu zaꞌra waꞌwa. Ĩma hã waihuꞌu di.
11 Tahawa aihĩni aiꞌabaꞌréi waꞌaba da nherẽ, mare uptabi di za. Aibâ si te za aiꞌabaꞌréi waꞌwa, Uburé Danhibꞌapito ãma aiwata zaꞌra waꞌaba da hã, ãne hã asima iwẽ zaꞌra waꞌaba zéb zarina.
Tawamhã Mozési norĩ Arãhã me, ma tô apito hawimhã rob u oto tãma robꞌru zahuré ni.
12 Tawamhã Uburé Danhibꞌapito te Mozésihi ma tinha ãne:
— Maꞌãpé, asibꞌrada hã Ezitu nhisiwi wẽ na, ꞌridi hã we siꞌréi mono da. Tawamhã ta norĩ hã te za roꞌwanhipré uburé te te huri, tã zâ te te iꞌuprosi siꞌatarẽme mono hã.
13 Tawamhã Mozési, Ezitu nhisiwi tinhiwã te te wẽ wamhã, ma tô Uburé Danhibꞌapito bâtâ pusizém hawi, rowaꞌuꞌu zaꞌẽne tiꞌai waꞌõtõ nhoꞌõmo mono bâ bâtâ bâre duré marabâre te te rowapõrĩ da hã tãma robꞌru. Duré oto awẽ wamhã, ma tô mararé rowaꞌuꞌu zaꞌẽne hã ꞌridi nemo we te te sate.
14 Tahawa, ta norĩ hã Ezitu tiꞌai ꞌre uburé te te iropéi mono hã ma tô ahâ uptabi na nemo te te robꞌrãiꞌré, daro mono bâ. Romhâimana wana ré niwa ãne na ihâimana õ, duré niwa ãne na iromhâimana da hã mare di za oto.
15 Tawamhã tiꞌa te te upsibi mono wamhã, ma tô nemo te te robra. Uburé ma tô wede norĩ, duré robꞌrã norĩ te te siwi uprosi, tãi pĩni nhama na, isiꞌutõrĩꞌõ mono hã. Tahawa, wede norĩ sui mono hã, duré robꞌre sui mono hã, Ezitu ꞌremhã ꞌmasiꞌatarẽme õ di oto.
16 Tawamhã apito Faraꞌo, Mozési norĩ zô Arãhã me, awaꞌawi sô hârâ zahuré wamhã, te ãne tãma nharĩ zahuré:
— Wa hã, tô sena wa tô Uburé Danhibꞌapito, ate zaꞌra waꞌwa ꞌRe ihâimana uꞌâsi mono zada hã ĩwasété. Asada waꞌaba zama wa tô duré ĩwasété.
17 Tahawa ã hã ĩwasété na duré asada aba ĩhâimanazém na hã ĩꞌãma ꞌmadâꞌâ aba õ di za. Te za Uburé Danhibꞌapito, ate ꞌRe ihâimana uꞌâsi mono ma, ĩꞌãma aimreme ꞌwa, tinhimihâzé ipire te te ĩhawimhã wazere da, ĩdâꞌâ tõ da.
18 Tawamhã Mozési, apito Faraꞌoho hawi rob u watobro wamhã, ma tô Uburé Danhibꞌapito ma hã mre, te te tiwi irowaptẽrẽzéb zarina.
19 Tawamhã Uburé Danhibꞌapito rowaꞌuꞌu zaꞌẽne bâtâ zasizém hawi isiptede te te rowapõrĩ da hã ma tô tãma robꞌru. Tahawa, ta hã ma tô apâ ꞌridi hã te te sate. Duré ma tô sãmra, Âpré na â wamri u. Tawamhã uburé Ezitu tiꞌai ꞌremhã ꞌmaihâimana õ di apâ.
20 Tane nherẽ, Uburé Danhibꞌapito, apito tipẽꞌẽ tete na te te ãma uzusi da hã ma tô apâ ꞌrãnhito. Tahawa Izaraéu nhihudu norĩ siꞌabaꞌré da hã te te duré tãma waprosi zaꞌra õ di.
9 ãma robra na dama robꞌmanharĩzé wasuꞌu
21 Tawamhã Uburé Danhibꞌapito te Mozésihi ma, duré tãma tinha ãne:
— Hâiwa u te za oto asibꞌrada hã hâimo iwẽ, Ezitu ꞌre uburé robra ihâzaꞌõtõ si nomro da, aꞌuwẽ ꞌre ihâimana zaꞌra mono tinhibꞌrata na te te ꞌre iꞌupi waihuꞌu pese zaꞌra mono da hã.
22 Tawamhã Mozési tinhibꞌrada hâimo te te wẽ wamhã, ma tô Ezitu ro hã siꞌubdatõ bâtâ na robra hã suwa.
23 Tawamhã ezipsiu norĩ sisãmri waihuꞌu zaꞌra õ wa, taha bâtâ na hã niꞌwa ꞌri hawimhã watobro waihuꞌu õ di. Tane nherẽ, Izaraéu nhihudu norĩ ꞌre isiꞌubumroi mono zéb ãma hã, robra õ di. Rowaꞌa na si ma tô ta norĩ tihâimana zaꞌra dawaprã.
24 Tawamhã apito Faraꞌo te sô hâ, Mozésihi zô. Tahawa te duré tãma tinha ãne:
— Te za oto aiꞌabaꞌréi waꞌwa, Uburé Danhibꞌapito ãma ꞌre aiwata zaꞌra waꞌaba mono da. Aimro norĩ zama, duré aiꞌra waꞌaba norĩ zama te za ãma isimroi waꞌaba mo. Tane nherẽ, asimizama zaꞌra waꞌwa poneꞌẽrebâ norĩ hã, poneꞌẽrebâ zéré uzé norĩ hã, duré powawẽ norĩ hã ãma asiwi simroi waꞌaba mono õ di za, asiré. Rési ãna te za ãme aimasa.
25 Tawamhã Mozési ma tô ãma tãma waꞌrã ãne:
— Mare di. Te za tô wanhimizama zama wama isaꞌré zaꞌra, Uburé Danhibꞌapito, wa te ꞌRe ihâimana uꞌâsi mono ma, ãma tãma ꞌre wanhoprub zaꞌra mono wa, wa te duré tãma ꞌre zata zaꞌra mono da.
26 Tahawa wa za uburé wanhimizama hã wa te ãma wasiré simro. Duré wa te wasiwi iꞌmairẽme da hã mare di za. E marĩ wa. Za wa te wasiwi ꞌmaipisutu dâꞌâsina, ꞌRe ihâimana uꞌâsi mono Uburé Danhibꞌapito ãma ꞌre iwawata zaꞌra mono zéb da hã wa te wasiwi isõmri da hã. Duré ro te te wama ipisutu zaꞌra zéb u zahadu wasihutu õ ré, wa norĩ hã wa te wasiwi iwaihuꞌu da hã mare di, za nimahã Uburé Danhibꞌapito ma wanhimizama zaꞌra na wanhoprubzé wa te tãma isõmri zaꞌra zé hã.
27 Tawamhã Uburé Danhibꞌapito, apito tihâimana wasété na te te ãma uzusi da hã, ma tô ꞌrãnhito, aꞌâ pẽꞌẽ tete na duré hâimana da hã. Tahawa Izaraéu nhihudu norĩ, Ezitu hawi wairébé da hã te te tãma waprosi waihuꞌu zaꞌra õ di.
28 Tawamhã apito sahi sina, te Mozésihi ma, duré tãma tinha ãne:
— Mo oto, aiwatobro ĩhâimanazém hawimhã. Niwamhã we ĩtẽmemhã aimorĩ na sahu tõ. Duré aipoꞌre ãna we ĩzabu na sahu wamhã, te za oto atâ.
29 Tawamhã Mozési ma te ãne ãma tãma waꞌrã:
— Tane tô. Tô iꞌuwaibaba ma te ĩma iwaihu. We tô te asabu na sahu õ di za oto.