Ezodu 11:1-10
11 Tawamhã Uburé Danhibꞌapito te Mozésihi ma tinha ãne:
— Ĩnhimihâzé ipipa na wa za Ezitu ãma apito hã azâ oto, ĩnhimihâzé ꞌrãsutu na. Duré ite aꞌuwẽ norĩ hã wa za hâ zaꞌra oto, ĩnhimihâzé ꞌrãsutu na. Taha parip si te za aima rowairébé zaꞌra waꞌwa, isaꞌrui hawi aiꞌabaꞌréi aba da hã. Aihĩni pese te za tô aiꞌabaꞌréi waꞌaba da aima robꞌru zaꞌra waꞌwa.
2 Tahawa maꞌãpé Izaraéu nhihudu norĩ aibâ ma, duré piꞌõ norĩ ma, waihuꞌu zaꞌra na, siwaptoma ezipsiu norĩ ꞌre ihâimana zaꞌra mono norĩ wi, marĩ te te tiwi waptẽrẽ zaꞌra mono da, niha wamhã ẽtẽ waipo prã prata na marĩ ꞌmanharĩ norĩ hã, duré ẽtẽ waipo pré oru na marĩ ꞌmanharĩ norĩ hã.
3 Tawamhã Uburé Danhibꞌapito, ma tô ezipsiu norĩ hâimanazém na hã ãma tiwi saprĩ zaꞌra, Izaraéu nhihudu norĩ te te hâiba wazéb zaꞌra da hã. Tahawa sena na apito ma romhuriꞌwa norĩ, duré uburé aꞌuwẽ ezipsiu norĩ ꞌre ihâimana zaꞌra mono, ma tô Mozési aibâ isaꞌẽtẽ na hã siwi hâimanazé wẽsã.
4 Tawamhã Mozési, apito ma, te ãne ꞌRe ihâimana uꞌâsi mono hã tãma sadawa wasuꞌu:
— Uburé Danhibꞌapito te ãne tinha: “Mara waꞌwa, Ezitu nhisi babamhã wa za we ꞌre mo.
5 Tawamhã we ꞌre ĩmorĩ ꞌremhã, tiꞌai waꞌõtõ nhoꞌu Ezitu ãma uburé dazaꞌrui mono bâ te za daꞌra dama ꞌre ipoto ꞌrata zaꞌra mono hã dawi siꞌutõrĩ, apito ꞌra, timama uirĩ na za dama pire na ꞌre ihâimana mono tẽme, piꞌõ, pawaꞌâbâ ãna marĩ zum na te te ꞌre iromhuri zaꞌra mono norĩ ꞌra u. Tawamhã duré danhimizama da te ꞌre itébré zaꞌra mono norĩ ꞌra zama aibâ na ꞌre ipoto ꞌrata zaꞌra mono hã te za dawi siꞌutõrĩ.
6 Tawamhã Ezitu ãma dazaꞌrui mono bâ te za niwa dahâzé iwana ré ihâimanaꞌõ te te idaduri mono zé te hã ꞌre dazadari zaꞌra. Niwamhã ãne hã ihâimana da hã mare di za.
7 Tane nherẽ, Izaraéu nhihudu norĩ ꞌremhã marĩ sô iwatobro zaꞌra õ zarina, wapsã norĩ, daꞌãma, duré danhimizama norĩ ãma iꞌruꞌru da hã mare di za. Ãne wamhã, te za a norĩ waꞌwa iwaihuꞌu zaꞌra waꞌwa, wa hã Uburé Danhibꞌapito, ezipsiu norĩ ꞌremhã, Izaraéu nhihudu norĩ ꞌre me aiwa romhâimanazébꞌõ hã te tãma iꞌmanharĩ zahuré zém na.”
8 Tawamhã Mozési, te te tãma inharĩzém na hã ma ãma tãma uzusi ãne:
— Ã hã uburé aima romhuriꞌwa norĩ we ĩtẽme isiꞌabaꞌré hã, te za ĩpapara hiꞌrãtitõ ĩnhoꞌremhã asimro, ĩnhibꞌaꞌuwẽ norĩ te oto isimroi mono zé te te ĩwĩ waptẽrẽ zaꞌra da ãne: “Ã hawimhã te za a hã oto aiwato, asibꞌaꞌuwẽ norĩ aime siꞌabaꞌré da.” Ãne te te ĩma nharĩ zaꞌra parip si, wa za wa hã ĩsiꞌuihâ na watobro.
Tawamhã Mozési, apito Faraꞌoho hawimhã ma tô sahi sina watobro.
9 Tawamhã Uburé Danhibꞌapito, te Mozésihi ma tinha ãne:
— Apito te te duré aiwapari aba õ di za, Ezitu ãma ĩnhimiromhõ ipipa te nasi dama iꞌmanharĩzém na hã aꞌâ.
10 Tawamhã Mozési norĩ Arãhã me, ma tô nasi Ezitu te apito nhoꞌremhã ipipa uptabi na nasi tãma romhõsi zahuré. Tane nherẽ, Uburé Danhibꞌapito, pẽꞌẽ tete na tihâimanazém na te te uzusi da hã ma tô ꞌrãnhito. Tahawa Izaraéu nhihudu norĩ tiꞌai waꞌõtõ nhoꞌõmo hawi wairébé da hã te te tãma waprosi zaꞌra õ di.