Ezodu 12:1-51
12 Tawamhã Ezitu ãma, Mozési norĩ zahadu simasisi zahuré ré, te duré ꞌRe ihâimana uꞌâsi mono hã tãma roti zahuré, ãne Arãhã me:
2 — Ã aꞌamo hã te za oto wahum naꞌrata zaꞌratazém na hã aima ꞌre hâimana zaꞌra waꞌwa.
3 Tawamhã te za ãne uburé Izaraéu nhihudu norĩ ma, tãma ĩzadawa wasuꞌu zaꞌra waꞌwa: Tô ã hã aꞌamo na, dia 10 na te za damama mono bâ tinhimizama hã misi si te te pisutu, poneꞌẽrebâ zéré mapure ꞌra hã, niha wamhã, poneꞌẽrebâ zéré uzé ꞌra hã.
4 Tawamhã niꞌwam norĩ hã ꞌri ꞌre umro na ꞌre ihâimana zaꞌra mono norĩ, wahuré romnhi te te siwi ꞌrẽne waihuꞌu õ wamhã, te za duré siwaptoma ꞌri tãma ꞌre isimasa mono norĩ me sitẽme tisa hã ãma tihu. Tawamhã isaiꞌmahâpãrĩ suꞌu õ norĩ mono bâ te za tãma te te waꞌõtõ zaꞌẽtẽ zaꞌra, tite bâ tisa te te ãma huri mono da hã. Duré tisa te te ꞌre iꞌmahâpãrĩ suꞌu zaꞌra mono norĩ ma hã te za suru na te te waꞌõtõ zaꞌra, te te ihuri mono da hã.
5 Tinhimizama poneꞌẽrebâ zéré mapure ꞌra hã, niha wamhã, poneꞌẽrebâ zéré uzé ꞌra hã te za misi ãma iwahu mono hã te te pisutu, ꞌri mono bâ, iwẽ si isiwamnarĩꞌõ si.
6 Tawamhã dia 14 bâdâ ipisutu pe ihâimanazéb u te za aimawi isõré waꞌwa, simasab da. Duré tô taha bâtâ na te za hâiwahâ pesere, uburé Izaraéu nhihudu norĩ hã tinhimizama te te simro.
7 Tawamhã te za iwapru na te te ãma ꞌridawa zapré zaꞌra, rowi hawi ꞌridawa zadaꞌréi baba isadaꞌré siꞌuiwa na duré hâimomhã, tinhimizama na tisa ꞌri ꞌre, te te ãma ihuri mono zéb ãma si.
8 Tawamhã tô taha mara na te za romnhi hã te te sebre, unhama na. Taha na te za tisa te te huri, duré iꞌuꞌẽtẽ duptoiꞌõ na zama. Duré, wesuirã te te ꞌre idazadaiꞌré waꞌre zaꞌra mono na zama, te za tisa hã te te huri.
9 Tawamhã romnhi hã téb ré, ꞌre huri aba mono õ di za. Duré â na hã isebre nai õ di za. Unhama na te za wahuré si isebre aba mo, hu ãna, ꞌrãi ré, para ré, duré prub ré.
10 Romnhi isiꞌazahâri mono na hã ãma awẽ mono õ di za. Uburé pese te za izata zaꞌra waꞌaba mo unhama na, zata proꞌa mono da.
11 Tawamhã te za asiꞌuza wẽ siromo aba mo. Te za duré asiparaꞌuza wẽ siromo aba mo. Duré te za asiwã asibꞌratamhã itété siromo zaꞌra aba mo, aiꞌabaꞌré na iré asaihuri aba mono da, õne haré marĩ zô apâ aꞌãsi zaꞌra waꞌaba ãna aiwairébé aba da. Ãne te za Pascowa na asa hã ihuri aba mo ĩma, Uburé Danhibꞌapito uptabi ma.
12 — Tawamhã tô taha mara na wa za Ezitu na romnhisi nhisi baba ꞌre mo. ꞌRe ĩmorĩ wamhã, aibâ dama ipotoꞌrata zaꞌra mono hã wa za te dawi hâ zaꞌra, dawi siꞌutõrĩ mono da. Duré danhimizama zama wa za te dawi hâ zaꞌra, aibâ na dama ipotoꞌrata zaꞌra mono hã, taha zama dawi siꞌutõrĩ mono da. Tawamhã hâiwa ãma, waihuꞌu pese uptabi newa, ãma ꞌre idawata zaꞌra mono norĩ zama wa za hâ zaꞌra. E marĩ wa, wa za hâ zaꞌra. Tô sena, wa hã ꞌRe ihâimana uꞌâsi mono, Uburé Danhibꞌapito uptabi wa.
13 Tahawa, Izaraéu nhihudu norĩ, poneꞌẽrebâire wapru na ãma iꞌridawa zapré zaꞌra waꞌaba mono, ta hã te ãma iꞌa pibui pese mono zéb da hã, taha ꞌri ꞌre, ꞌre iꞌaihâimana zaꞌra waꞌaba mono zém na, te awaihuꞌu da. Tawamhã ĩma pibui pese na, wa za te asaꞌréi waré zaꞌra waꞌwa, Ezitu nhisi baba ꞌre ĩmorĩ wamhã, ezipsiu norĩ te hâ zaꞌra mono wamhã. Dazu aiꞌutõrĩ aba mono tõ da, wa za ĩnhimihâzé hã aima baꞌa zaꞌra waꞌwa, Izaraéu nhihudu norĩ ma hã.
14 Tawamhã taha bâtâ na te za ĩnhimiꞌmanharĩzém na ꞌre ato zaꞌra waꞌaba mo, wahup sidâpâsi ãma ꞌre asipoꞌre puꞌu uꞌâsi zaꞌra waꞌaba mono da. Tawamhã ãne te za ãma asima ꞌre iromhuꞌu uꞌâsi zaꞌra waꞌaba mo, Pascowa na dasaihurizém nhisi na hã. Asihudu norĩ zama te za aiꞌuirĩ na zaꞌra waꞌaba hã ãma ꞌre toi uꞌâsi zaꞌra, ĩnhimihâzé te tãma ibaꞌa zaꞌra zém na.
Datoi wa, iꞌuꞌẽtẽ duptoiꞌõ da te ꞌre ihuri mono zé wasuꞌu
15 Tawamhã te duré Mozési norĩ ma, ꞌRe ihâimana uꞌâsi mono hã waihuꞌu zahuré ãne:
— Ãne te za duré Izaraéu nhihudu norĩ ma, ĩzadawa wasuꞌu waꞌwa. Tawamhã bâdâ 7 na siꞌutõrĩ mono ré, te za asa hã ihuri aba mo, iꞌuꞌẽtẽ duptoiꞌõ na. Tahawa te za dia 1 bâdâ isãnaꞌrata hawi, iꞌuꞌẽtẽ duptozé hã rob u isani zaꞌra waꞌaba mo, ꞌri para isimiꞌwara mono hã. E marĩ wa, te za rob u isaꞌra aba mo. Niꞌwa hã bâdâ 7 mara u, romhâimana õ ré, iꞌuꞌẽtẽ duptoi ré hã te te ꞌrẽne wamhã, za Izaraéu nhihudu siré ꞌre hâimana mono õ dâꞌâsina.
16 Tawamhã dia 1 bâdâ imorĩꞌrata na duré dia 7 bâdâ te ipisutu amo na hã te za asiꞌrãꞌõtõ ꞌwa, ĩꞌãma aiwata zaꞌra waꞌaba da hã. Tawamhã niꞌwa hã taha bâtâ na romhuri amoi u hã te te romhuri õ di za. Mram ꞌmanharĩ na si te za iromhuri zaꞌra waꞌaba mo, bâdâ hã te ipisutu amoi u.
17 Tawamhã ato te za ꞌre iꞌmanharĩ zaꞌra waꞌaba mo wahup sidâpâsi, iꞌuꞌẽtẽ duptoiꞌõ na asa ꞌre ihuri aba mono zém na. Ezitu hawi te asani zaꞌra waꞌaba zé bâtâ na te za asa hã ꞌre ihuri uꞌâsi aba mo, uburé a norĩ waꞌwa hã, Izaraéu ꞌra nhihudu mono bâ. Asihudu zaꞌra waꞌaba mono sidâpâsi te za te te siwi ꞌre ꞌmanharĩ uꞌâsi, ãma ꞌre sipoꞌre puꞌu uꞌâsi zaꞌra mono da hã.
18 Tawamhã aꞌamo zaꞌratazém naꞌrata na, dia 14 bâtâ na hâiwahâ pesere te za iꞌuꞌẽtẽ duptoiꞌõ na asa ꞌre ihuri naꞌrata aba mo. Bâdâ te ipisutu amoi u te za duré ihuri ꞌrãsutu aba mo, dia 21 bâtâ u. Tô taha bâtâ na hâiwahâ pesere te za asa hã ihuri ꞌrãsutu ꞌwa, iꞌuꞌẽtẽ duptoiꞌõ na hã.
19 Tawamhã 7 bâdâ hâimana ré, iꞌuꞌẽtẽ wapu duptobzé hã asõrõwa aba ꞌre mono hã isimiꞌwara mono da hã mare di za. Rob u te za isani zaꞌra waꞌaba mo za. E marĩ wa. Niꞌwa hã, iꞌuꞌẽtẽ wapu duptobzém na iꞌmanharĩ te te ꞌrẽne wamhã, oto tiꞌai waꞌõtõ nhoꞌõmo ãma Izaraéu nhihudu norĩ siré ꞌre ihâimana mono da hã mare wa za. Duré niꞌwa asiré aba õ nherẽ, Izaraéu nhihudu norĩ siré ꞌre ihâimana mono iꞌuꞌẽtẽ wapu duptobzém na iꞌmanharĩ te te ꞌrẽne wamhã, oto duré Izaraéu nhihudu norĩ siré ꞌre ihâimana mono da hã mare di za. Te za oto duré tiwi ꞌre isawi zaꞌra waꞌaba mo za ihâimanazé hã.
20 Tahawa, ã bâtâ na hã iꞌuꞌẽtẽ duptobzém na iꞌmanharĩ hã huri aba mono õ di za. Tawamhã asõrõwa mono bâ hã te za tô iꞌuꞌẽtẽ duptoiꞌõ na iꞌmanharĩ na si ꞌre asaihuri aba mo.
Pascowa na dasa da te ihuri naꞌrata zé wasuꞌu
21 Tawamhã Mozési hã ma tô Izaraéu nhihudu norĩ ma, ipire norĩ zô hã tihârâ zaꞌra. Tawamhã te tãma roti zaꞌra, Pascowa na za dasa da te ihuri naꞌrata zém na:
— Ãhã na hã asimizama te za ipisutu aba mo, poneꞌẽrebâ ꞌra hã, duré poneꞌẽrebâ zéré uzé ꞌra hã. Ta hã te za ipisutu aba mo, simroi waꞌaba mono da, asõrõwa mono bâ waꞌaba, asa ãma huri aba mono da, Pascowa na datozém nhisi na.
22 Tawamhã pizaꞌa ꞌre nhoꞌa iwaprui ré isimasa mono na te za wesuirã suiro hã nasi sada ãma isutiꞌi zaꞌra waꞌaba mo, rowi hawi ꞌridawa zadaꞌré baba, ãma ꞌridawa zapré zaꞌra waꞌaba mono da. Tawamhã bara na hã aiꞌmaiwatobro aba õ di za, rob u hã.
23 Tawamhã ꞌRe ihâimana uꞌâsi mono hã te za we ꞌre mo, Ezitu nhisi baba, ezipsiu norĩ te te ꞌmapãrĩ mono da hã. Tawamhã we ꞌre morĩ wamhã, ꞌridawa zapré te te abꞌmadâꞌâ mono wamhã, te za te te asaꞌrei waré zaꞌra waꞌwa. Tawamhã hâiwa ãma tãma iromhuriꞌwa hã dapãrĩꞌwa na iwaptẽrẽ hã te za aiꞌãma uwati zaꞌra waꞌwa, asõrõwa u asô zaꞌra waꞌaba, zasi tõ mono da, te te asimroi aba mono tõ da, romhuriꞌwa hã.
24 Tawamhã Pascowa na asaihuri aba mono zéb da hã te aima ipisutu zaꞌra waꞌaba zéb zarina, te za ꞌre iꞌmanharĩ uꞌâsi zaꞌra waꞌaba mo. Asihudu norĩ aba zama, te za aiꞌuirĩ na zaꞌra waꞌaba hã te te ꞌre ꞌmanharĩ uꞌâsi zaꞌra.
25 Tawamhã ꞌRe ihâimana uꞌâsi mono, airob zaꞌra waꞌaba da, te te aima iropisutu aba zéb u, aihutu aba wamhã, tame oto ꞌre airob zaꞌra waꞌaba mono wamhã, te za Pascowa na dasaihurizé hã ꞌre iꞌmanharĩ uꞌâsi zaꞌra waꞌaba mo, õne uꞌâsi.
26 Tawamhã aiꞌra zaꞌra waꞌaba mono hã Pascowa na dasaihurizém nhisi marĩ te te iwasuꞌu na hã, te te ãma ꞌre asadanharĩ zaꞌra waꞌaba mono wamhã,
27 ãhã wa, te za ãne duré ãma tãma ꞌre irowasuꞌu zaꞌra waꞌaba mo za: “Ã hã, danhimizama zata na Pascowa na dato nhisi hã ꞌRe ihâimana uꞌâsi mono, ezipsiu norĩ te te ꞌmapãrĩ mono da, Ezitu nhisi baba ꞌre morĩ wa, te te iwaꞌazaꞌrei waré mono zé, duré tinhimihâzé te te wama ibaꞌa zaꞌra zé. Ta hã, ã hã Pascowa, iwasaihurizé, duré ꞌRe ihâimana uꞌâsi mono ma, wanhimizama, wa te ꞌre isimroi mono zé.” Ãne te za ãma tãma ꞌre irowasuꞌu zaꞌra waꞌaba mo za romhutuꞌõmhã.
Tawamhã te te wapari zaꞌra pari, ma tô Izaraéu nhihudu norĩ hã asimro hiꞌrãtitõ, ãma tãma wata zaꞌra da, Uburé Danhibꞌapito uptabi ãma.
28 Tawamhã taha pari oto apâ siꞌabaꞌréi wamhã, ma tô Mozési norĩ ma, Arãhã me, ꞌRe ihâimana uꞌâsi mono te te tãma iwaihuꞌu zahuré zé hã siwi ꞌmanha, Izaraéu nhihudu norĩ hã.
10 ãma dama robꞌmanharĩ zé wasuꞌu, aibâ dama ipotoꞌrata zaꞌra mono, dawi isiꞌutõrĩ mono zém na
29 Tawamhã mara waꞌwa ma tô ꞌRe ihâimana uꞌâsi mono hã te te dawi uprosi, aibâ dama ipotoꞌrata zaꞌra mono hã, Ezitu ãma ꞌri mono bâ ꞌre ihâimana zaꞌra mono norĩ ꞌra hã, apito ꞌra, timama uirĩ na za dama pire na ꞌre ihâimana mono tẽme, dazazéb ꞌre, imama ꞌre isãmra mono ꞌra u. Daꞌupsãtã mono bâ ma tô uburé pese daꞌra hã aibâ dama ipotoꞌrata zaꞌra mono hã te te dawi uprosi. Duré danhimizama aibâ na ipotoꞌrata zaꞌra mono zama ma tô te te dawi uprosi, ꞌRe ihâimana uꞌâsi mono hã.
30 Tawamhã ꞌri mono bâ daꞌra hã dawi siꞌutõrĩ mono wa, ma tô dawara sina taꞌutu zaꞌra ni, danhimiwaptâ hawi, ezipsiu norĩ hã. Duré Apito Faraꞌoho zama ma tô wara sina udu. Tãma iromhuriꞌwa norĩ zama, ma tô duré tiꞌutu zaꞌra. Tawamhã aihĩni pese te ꞌri mono bâ aiwaꞌõ zaꞌra ni. Dazadari ꞌrãihâ na te saꞌẽtẽ aiwaꞌõ zaꞌra ni.
31 Tawamhã tô ta bara na te apito Faraꞌo hã Mozési norĩ zô tihârâ zahuré, Arãhã me. Tawamhã te oto tãma robꞌru zahuré, saꞌẽtẽ ãne:
— Ã hawi mo oto aiwairébé aba, uburé a norĩ waꞌwa hã Izaraéu nhihudu norĩ me! Ĩte tiꞌai waꞌõtõ nhoꞌu te za oto asiwi ĩré irẽme ꞌwa. Aꞌubuni u te za oto aiꞌabaꞌréi waꞌwa, nasi ĩwi iwaptẽrẽ aba zéb zarina Uburé Danhibꞌapito uptabi ãma aiwata zaꞌra waꞌaba da hã.
32 Tahawa te za asimizama poneꞌẽrebâ zéré mapure, poneꞌẽrebâ zéré uzé, duré powawẽ norĩ hã asiré waꞌaba isimroi waꞌaba mo. Tawamhã ꞌRe ihâimana uꞌâsi mono wi, te za ĩꞌãma irowaptẽrẽ ꞌwa, iwẽ te te ĩma zama ꞌre anhomri mono da.
33 Tawamhã ezipsiu norĩ hã ma tô Izaraéu nhihudu norĩ ma hã tãma robꞌru zaꞌra, tiꞌai waꞌõtõ nhoꞌõmo hawi isaꞌru zaꞌra hawi hã siꞌabaꞌré na oto wairébé da. Tahawa te ãne tãma nharĩ zaꞌra:
— Aiwairébé aba õ wamhã, wa norĩ hã wa za uburé aiꞌutõrĩ ni. Taha õ ré, te za oto aiwairébé ꞌwa.
34 Tawamhã Izaraéu nhihudu norĩ hã ma tô ꞌri mono bâ iꞌuꞌẽtẽ da iwaiꞌoi wari hã te te ubumro, pizaꞌa ꞌre nhoꞌa ꞌre, uꞌẽtẽ dupto da, da te ꞌre iwazari zaꞌra mono zéb õ na. Tawamhã ma tô te te ubu, zazahâi wawẽ na, sisa te te ꞌwasari da tinhisé, õne haré wairébé da.
35 Tawamhã Izaraéu nhihudu norĩ hã ma tô oto rowaptẽrẽ zaꞌra, ezipsiu norĩ wi. Mozési te te tãma iwaihuꞌu zaꞌra zéb zarina ma tô tiwi rowaptẽrẽ zaꞌra, marĩ hã da te tãma sõmri zaꞌra da, niha wamhã, ẽtẽ waipo pré oru ꞌmanharĩ hã, ẽtẽ waipo prã prata ꞌmanharĩ hã, duré daꞌuza hã.
36 Tawamhã ꞌRe ihâimana uꞌâsi mono, ma tô ezipsiu norĩ ma tãma ꞌmanharĩ zaꞌra, Izaraéu nhihudu norĩ hã te te wazéb zaꞌra da, taha zarina uburé marĩ te te tiwi iwaptẽrẽ zaꞌra zé hã te te tãma sõmri zaꞌra da. Ãne zarina ma tô oto marĩ iwẽ hã te te sima waibu, Izaraéu nhihudu norĩ hã, ezipsiu norĩ wi.
Izaraéu nhihudu norĩ, Ezitu hawi oto iwairébézé wasuꞌu
37 Tawamhã Izaraéu nhihudu norĩ hã ma tô oto wairé, Ramesé na ꞌri nhoꞌõmo nhisi hawi. Para na te zâmo. Tawamhã Sucoti na ꞌri nhoꞌõmo nhisi u ma tô zâwi.
Ãne, Izaraéu nhihudu norĩ zaꞌrata zaꞌra hã, 600 miu na aibâ si hã, isaꞌrata na. Piꞌõ norĩ hã saꞌrata õ di. Duré aiꞌuté norĩ zama saꞌrata zaꞌra õ di. Duré ihi norĩ zama saꞌrata zaꞌra õ di.
38 Tawamhã Izaraéu nhihudu norĩ oto wairébé wamhã, ma tô niꞌwam norĩ hã Izaraéu nhihudu õ norĩ hã dazu wairé. Ma tô duré tinhimizama hã te te siré simro, Izaraéu nhihudu norĩ hã. Simizama ahâ uptabi zaꞌra di, poneꞌẽrebâ norĩ na hã, poneꞌẽrebâ zéré uzé norĩ na hã, duré powawẽ norĩ na hã.
39 Tawamhã Izaraéu nhihudu norĩ hã ma tô iꞌuꞌẽne hã te te sebre, Ezitu hawi te te iꞌwasari hã, iwaiꞌoi wari na hã. Uꞌẽtẽ dupto da, da te ꞌre iwazari zaꞌra mono zéb õ na, ma tô tisa te te huri, rowãiwa isimizahâri zaꞌra mono zéb ãma. E marĩ wa, ma tô iꞌuꞌẽtẽ wapuzém na wazari ãna tisa te te huri. Ezipsiu norĩ waptu na te te tãma robꞌru zaꞌra wa, duré tãma bâtâ zaꞌra õ wa. Tahawa, ma tô tiꞌai waꞌõtõ nhoꞌu Ezitu hawi, wazarizéb ãna iwaiꞌoi wari na iwaptẽrẽ si siré ꞌwasa. Tahawa, te oto taha na si tisa te te huri.
40 Ezitu ãma ꞌre hâimana zaꞌra mono ré, ma tô 430 na ãma tiwahub zaꞌra, Izaraéu nhihudu norĩ ãma hã.
41 Tawamhã tô ta bâtâ na ãma iwahub zaꞌra hã waptãꞌã wi, ma oto Ezitu hawi wairé, ꞌRe ihâimana uꞌâsi mono nhibꞌaꞌuwẽ norĩ hã, Zacoho ꞌra norĩ nhihudu mono bâ.
42 Tawamhã tô ta bara na ma tô ꞌRe ihâimana uꞌâsi mono hã te te pibu zaꞌra, te te sani wẽ zaꞌra da, Ezitu hawi. Tahawa, te za õne uꞌâ ãma ꞌre sipoꞌre puꞌu uꞌâsi zaꞌra, wahup sidâpâsi. Tô ta bara na wam ne te za tito te te ꞌre ꞌmanharĩ zaꞌra ꞌRe ihâimana uꞌâsi mono ma, uburé pese Izaraéu nhihudu norĩ hã.
Pascowa na ꞌRe ihâimana uꞌâsi mono nhimirotizé wasuꞌu
43 Uburé Danhibꞌapito hã ãne te Mozésihi norĩ ma, Arãhã me hã tãma roti zahuré:
— Ã hã Pascowa na rotizé hã aima waꞌaba hã ãne: Asiré aꞌuwẽꞌõ norĩ hã Pascowa na dasa nhisi na ꞌre isaihuri mono da hã mare di za, zudeuꞌõ norĩ hã.
44 Tane nherẽ, pawaꞌâbâ ãna te te dama ꞌre romhuri zaꞌra mono da, da te ꞌre iꞌuipra zaꞌra mono norĩ hã ꞌre sisihâiwata nhihâri zaꞌra mono parip si, te za ãma ꞌre saihuri, asiré waꞌaba hã.
45 Asiré aꞌuwẽꞌõ norĩ hã tiꞌai waꞌõtõ nhoꞌu asiptiꞌai waꞌaba ãma, ꞌre ihâimana hutu zaꞌra mono norĩ hã duré pawaꞌâbâ ré asiré waꞌaba ꞌre ihâimana zaꞌra mono norĩ hã ãma ꞌre saihuri mono õ di za, Pascowa na dasa nhisi na hã.
46 Ta hã ꞌri ꞌrep si te za tisa hã te te ãma ꞌre huri, Pascowa na dasa nhisi na ãma ꞌre idanhipi zaꞌra mono zéb ꞌrep si. Dasa hã rob u hã te te sima ꞌre isani zaꞌra mono da hã, mare di. Duré asimizama zaꞌra waꞌaba hi hã asima ꞌre isiꞌẽi waꞌaba mono da hã, mare di za duré.
47 Uburé te za Izaraéu nhihudu norĩ hã to sina te te ꞌre ꞌmadâꞌâ zaꞌra, Pascowa hã.
48 Aibâ norĩ hã sihâiwata nhihâri õ nherẽ, dasiré ãma ꞌre isaihuri mono da hã mare di za, ã hã dasa na hã. Tane nherẽ, asiré aꞌuwẽꞌõ norĩ, nima norĩ hã asiré zaꞌra waꞌaba ꞌre ihâimana zaꞌra mono hã ꞌRe ihâimana uꞌâsi mono te te ꞌre iwazéb zaꞌra mono zéb zarina, Pascowa na ꞌre saihuri mono da, te te sima ꞌre wẽ zaꞌra mono wamhã, tawamhã a norĩ waꞌwa hã imorĩꞌrata na te za aꞌâ ꞌre isihâiwata nhihâri zaꞌra waꞌaba mo, uburé isisãnawã norĩ zama, duré iꞌra norĩ zama. Taha parip si te za oto Pascowa na dasa nhisi hã te te ꞌre huri, asiré zaꞌra waꞌaba. Duré Izaraéu nhihudu norĩ nhiptiꞌai ꞌre, ꞌre ipoto zaꞌra mono ne, te za tawamhã oto ꞌre hâimana zaꞌra.
49 Tô õhõ na si, ꞌRe ihâimana uꞌâsi mono nhimiroti hã, Izaraéu nhihudu norĩ ma hã, tiꞌai waꞌõtõ nhoꞌõmo ꞌre, ꞌre ipoto zaꞌra mono norĩ ma hã duré zudeuꞌõ norĩ ma zama asiré zaꞌra waꞌaba, ꞌre ihâimana zaꞌra mono ma hã.
50 Tawamhã uburé Izaraéu nhihudu norĩ hã ma tô te te ꞌre wapari pese zaꞌra, ꞌRe ihâimana uꞌâsi mono hã Mozési norĩ ma, Arãhã me, te te iroti zahuré zéb zarina.
51 Tô taha bâtâ na ma tô Uburé Danhibꞌapito hã Ezitu hawi sani zaꞌra, Izaraéu nhihudu norĩ hã.
