Ezodu 13:1-22
13 Tawamhã Uburé Danhibꞌapito te Mozésihi ma tinha, ãne:
2 — Aibâ na aima ꞌre ipoto ꞌrata zaꞌra waꞌaba mono norĩ hã te za ĩma ꞌre isõmri zaꞌra waꞌaba mo, aimawi ĩte na ĩma ꞌre hâimana zaꞌra mono da. Uburé Izaraéu nhihudu norĩ ma, iꞌra hã aibâ na tãma ꞌre ipoto ꞌrata zaꞌra mono norĩ hã duré isimizama norĩ ꞌra zama aibâ na tãma ꞌre irereꞌe mono norĩ hã ĩte hã za.
Iꞌuꞌẽtẽ duptoiꞌõ na dato hã da te dasima ꞌre iꞌmanharĩ zaꞌra mono zé wasuꞌu
3 Tawamhã Mozési hã ma tô dama robꞌrãzarõtõ, ãne:
— Ã bâtâ ãma ꞌre aipoꞌre siꞌâri zaꞌra waꞌaba mono õ di za, Ezitu hawi iꞌaiwairébé aba zém na hã, aipawaꞌâbâ ãna aré dama ꞌre iromhuri zaꞌra waꞌaba mono zém hawimhã. Ã bâdâ hã Uburé Danhibꞌapito te te we iꞌasani zaꞌra waꞌaba zé, tiwaihuꞌu pese na. Tahawa, iꞌuꞌẽne imapuzém na hã ꞌre huri aba mono õ di za, datozé bâdâ ꞌre ihâimana mono na hã.
4 Ã bâtâ na a norĩ waꞌwa hã ma tô aiwairébé ꞌwa, Ezitu hawimhã, aꞌamo zaꞌratazé hã imorĩꞌrata na Abibe na aꞌamo nhisi na.
5 Uburé Danhibꞌapito tô sena ma tô duréihã aihiꞌrata norĩ waꞌaba ma hã ropisutu, iꞌuirĩ na zaꞌra tiꞌa te te aima sõmri zaꞌra waꞌaba da, cananeu norĩ te hã, hitita norĩ te hã, amoreu norĩ te hã, heveu norĩ te hã, duré zebuzeu norĩ te zama. Ta hã tiꞌa hã iwẽ, duré ãma iropoto wẽ. Tawamhã ꞌRe ihâimana uꞌâsi mono nimahã bâtâ na tiꞌai u te te oto asimroi waꞌaba mono wamhã, tawamhã a norĩ waꞌwa hã te za dato hã ꞌre iꞌmanharĩ zaꞌra waꞌaba mo, wahub sidâpâsi aꞌamo zaꞌratazé imorĩꞌrada iwa ꞌre iwaptãꞌã mono sidâpâsi.
6 Tahawa, 7 na bâdâ hã ꞌre ne mono ré hã te za iꞌuꞌẽtẽ wapu mapu õ hã ꞌre ihuri aba mo. 7 bâtâ na si te za oto dato hã asiwi ꞌre iꞌmanharĩ zaꞌra waꞌaba mo, ꞌRe ihâimana uꞌâsi mono asiwi ꞌre wazéb zaꞌra waꞌaba mono sina.
7 Bâdâ hã 7 na ꞌre ne mono ré hã, te za tô iꞌuꞌẽtẽ wapu mapu õ hã ꞌre ihuri aba mo. Uburé asiptiꞌa zaꞌra waꞌaba ãma iꞌuꞌẽtẽ wapuzé ihâimana da hã mare di za, duré imapuzém na iꞌuꞌẽtẽ ꞌmanharĩ hã.
8 Ã bâtâ mono na hã te za aiꞌra norĩ ma ãne na ꞌre irowasuꞌu zaꞌra waꞌaba mo: “Uburé Danhibꞌapito hã Ezitu hawi iwawairébézém na iwẽ hã te te wama iꞌmanharĩ zaꞌra zéb zarina, wa ãne hã wa te ꞌre ꞌmanharĩ uꞌâsi zaꞌra, dato hã.” Ãne te za aiꞌra norĩ ma, ãma ꞌre irowasuꞌu uꞌâsi zaꞌra waꞌaba mo.
9 Uburé Danhibꞌapito, tiwaihuꞌu pese na ma tô asani zaꞌra waꞌwa, Ezitu hawimhã. Tahawa, ã hã dato hã ãma ꞌre iꞌasipoꞌre puꞌu zaꞌra waꞌaba mono zéb da hã, te za ꞌre iꞌmanharĩ zaꞌra waꞌaba mo, dasipoꞌre puꞌuzéb da, marĩ hã danhimizu na, niha wamhã duré daꞌuihâ na da te ꞌre iwasisi zaꞌra mono ne. Ãne wa, te za te te ꞌre aipawaptob zaꞌra waꞌwa, ꞌre aipoꞌre siꞌâri zaꞌra waꞌaba mono ãna, asisõꞌa aimreme ꞌrãihâ na ãma ꞌre asiwapari zaꞌra waꞌaba mono da, duré ãma ꞌre romnhoré zaꞌra waꞌaba mono da, ꞌRe ihâimana uꞌâsi mono nhimiroti na hã.
10 Tahawa, ã hã dato ato sina te za ꞌre iꞌmadâꞌâ zaꞌra waꞌaba mo, bâdâ ipisutu zarina, wahup sidâpâsi.
Daꞌra aibâ na dama ipotoꞌrata norĩ wasuꞌu
11 — Uburé Danhibꞌapito, cananeu norĩ nhiptiꞌai u asisisi aba da, te za aima ꞌmanharĩ zaꞌra waꞌwa, te te aima iropisutu zaꞌra waꞌaba zéb zarina, duré aihiꞌrata norĩ ma, te te iropisutuzéb zarina. Tiꞌa te te aima sõmri zaꞌra waꞌaba wamhã,
12 te za Uburé Danhibꞌapito ma, aibâ na aiꞌra aima ꞌre ipoto ꞌrata zaꞌra waꞌaba mono hã tãma ꞌre isõmri zaꞌra waꞌaba mo. Uburé asimizama ꞌra norĩ aibâ na ꞌre ipoto ꞌrata zaꞌra mono hã te za tãma ꞌre hâimana zaꞌra.
13 Awaru poꞌre pore iꞌrare siꞌaibâ ipoto ꞌrada dâꞌâ ãna ꞌre ꞌmaza mono da, asima ꞌre wẽ zaꞌra waꞌaba mono wamhã, te za ꞌRe ihâimana uꞌâsi mono ma, iꞌupana poneꞌẽrebâ zéré mapure iꞌrare na hã ãma tãma ꞌre asõprub zaꞌra waꞌaba mo. Tane nherẽ, duré asima ꞌre wẽ zaꞌra waꞌaba mono õ wamhã, te za awaru poꞌre pore iꞌrare hã ibutu nhiꞌẽ zaꞌra waꞌwa. Tawamhã te za uburé aiꞌra siꞌaibâ norĩ aima ꞌre ipoto ꞌrata zaꞌra waꞌaba mono hã Uburé Danhibꞌapito wi asima ꞌre iwaꞌâbâ zaꞌra waꞌaba mo, apâ aima ꞌre hâimana zaꞌra waꞌaba mono da.
14 Tawamhã niwa aptoꞌoré aiꞌra norĩ, marĩ te te iwasuꞌu na te te ãma ꞌre asadanharĩ zaꞌra waꞌaba mono wamhã, te za ãma ꞌre isadaꞌâbâ zaꞌra waꞌaba mo, ãne: “Uburé Danhibꞌapito tiwaihuꞌu pese na ma tô Ezitu ãma wapawaꞌâbâ ãna wa te ꞌre iromhuri zaꞌra mono zém hawimhã we waꞌawaze.
15 Apito Faraꞌo pẽꞌẽ tete na hâimana wa, te te wama rowairébé zaꞌra õ wamhã, ma tô Uburé Danhibꞌapito, Ezitu ãma uburé daꞌra siꞌaibâ dama ꞌre ipoto ꞌrata zaꞌra mono hã, duré danhimizama ꞌra siꞌaibâ ipotoꞌrata norĩ zama hã uprosi. Tahawa, wa wa norĩ hã Wanhibꞌapito ma hã ãma tãma ꞌre wanhoprub zaꞌra, wanhimizama ꞌra siꞌaibâ norĩ potoꞌrata na hã. Wa duré waꞌra norĩ apâ wama ꞌre ihâimana zaꞌra mono zéb da hã wa te wasima ãma tiwi ꞌre waꞌâbâ zaꞌra.
16 Ã hã Uburé Danhibꞌapito tiwaihuꞌu pese na Ezitu hawi te te iwaꞌawazerezém na te za ãma ꞌre iꞌasipoꞌre puꞌu uꞌâsi zaꞌra waꞌaba mono zéb da hã aima ꞌre hâimana zaꞌra waꞌwa, asibꞌrata na, niha wamhã duré aiꞌuihâ na marĩ ꞌre iwasisi zaꞌra waꞌaba mono ne.”
Hâiwaꞌa norĩ, unhama roꞌo me isimaꞌwarazé wasuꞌu
17 Tawamhã apito Faraꞌo, Izaraéu nhihudu norĩ wairébé da, te te tãma saꞌré zaꞌra wamhã, ꞌRe ihâimana uꞌâsi mono, filisteu norĩ te, tiꞌai waꞌõtõ nhoꞌõmo waꞌwaibaba bâdâdi awaꞌawi na nherẽ, romhutu na te te simroi mono õ di. E marĩ wa. Te te sima rosaꞌrata wa, ãne: “Izaraéu nhihudu norĩ hã dasiꞌwapé te te sina waihuꞌu zaꞌra wamhã, ãté te za tinhimirosaꞌrata na saprĩ zaꞌra, apâ Ezitu u siꞌabaꞌré da hã.”
18 Tahawa, ꞌRe ihâimana uꞌâsi mono, ma tô Izaraéu nhihudu norĩ hã rop si ꞌre irosaꞌwari mono bâdâdi na te te ãma saꞌoto zaꞌra, Âpré na â poré nhisi ꞌre ihâimana mono nhoꞌõmoi baba. Tawamhã Izaraéu nhihudu norĩ Ezitu hawi wairébé wamhã, ma tô dasiꞌwapéi wab da ꞌwamnhasite, siꞌwapé zaꞌra zéb ré hã wairé.
19 Tawamhã Mozési, Zuzéhé hi hã ma tô siré tiꞌâ. E marĩ wa. Zuzé hã, ãne Izaraéu nhihudu norĩ te te siwi ꞌmanharĩ da, te te tiwi waptẽrẽ zaꞌra wa, te te sina tãma iropisutu zaꞌra da hã. Ãne ma tô tãma sina nharĩ siromo zaꞌra tawamhã: “Niwa aptoꞌoré ꞌRe ihâimana uꞌâsi mono ã hawi te te asõꞌreptu zaꞌra waꞌaba wamhã, ĩhi hã maꞌãpé ã hawimhã asiwi duri aba za asiré.”
20 Tawamhã Izaraéu nhihudu norĩ Sucoti na romnhisi hawi oto wairébé wamhã, ma tô Etã na romnhisi ãma romhâ ꞌmanharĩ na sima ꞌri nhoré zaꞌra, rop si ꞌre irosaꞌwari mono zadaꞌré ãma.
21 Tawamhã Uburé Danhibꞌapito te bâtâ sidâpâsi hâiwaꞌa isarobꞌa ipisutu pese ꞌre isõwab zaꞌra hã ne mono, bâdâdi te te tãma hâiꞌré zaꞌra mono da hã. Mara sidâpâsi te duré isõwab zaꞌra unhama roꞌo pisutu pese na, bâdâdi te te tãma uiwẽ zaꞌra mono da hã ne mono, taha zarina si bâtâ na hã, duré mara na hã ãma siꞌabaꞌré da.
22 Tawamhã hâiwaꞌa isarobꞌa pisutu pe hã te õne uꞌâ bâtâ mono na hã isõwab zaꞌra hâimana mono. Duré mara mono na hã te õne uꞌâ unhama roꞌo ne hã isõwab zaꞌra hâimana mono.
