Ezodu 14:1-31
14 Tawamhã Uburé Danhibꞌapito te Mozésihi ma tinha, ãne:
2 — Maꞌãpé Izaraéu nhihudu norĩ apâ siꞌabaꞌré da hã tãma nharĩ zaꞌra na, Pi-Hairote na ꞌri waꞌõtõ nhisi nhoꞌre te te duré sima ꞌri nhoré zaꞌra da Baau-Zefõ ꞌrata, Migdo norĩ waꞌwa Âpré na â poré nhisi me hã.
3 Ãne wamhã, te za apito Faraꞌo ãma rosaꞌrata zaꞌra, Izaraéu nhihudu norĩ rop si ꞌre irosaꞌwari mono te te tiwi romnhitob zaꞌra wa, siwaꞌru ꞌre inomro mono na hã.
4 Wa hã wa za apito Faraꞌo pẽꞌẽ tete na hâimana da hã tãma ꞌmanha, asarina zaꞌra waꞌaba ꞌre morĩ da aꞌâ. Tane nherẽ, apito ãma duré ite dasiꞌwapéi ꞌmanharĩꞌwa norĩ ãma hã wa za aiꞌuté zaꞌra, ãne na ĩwaihuꞌu pese zé hã te tãma hâiꞌré zaꞌra da. Ãhã wamhã, te za ezipsiu norĩ siwi ĩwaihuꞌu, wa hã Uburé Danhibꞌapito ꞌre ĩhâimana mono na hã.
Tawamhã Izaraéu nhihudu norĩ ma tô imreme zarina ꞌmanharĩ zaꞌra.
5 Tawamhã Ezitu te apito Faraꞌoho ma, Izaraéu nhihudu norĩ isimani zaꞌra zé, da te tãma wasuꞌu zaꞌra wamhã, ma tô tite romhuriꞌwa norĩ me tinhimirosaꞌrata na ãma saprĩ zaꞌra, ãne:
— E marĩ wa tô bété ꞌmanharĩ zaꞌra ni! Izaraéu nhihudu norĩ pawaꞌâbâ ãna romhuri na wama ꞌre hâimana zaꞌra mono zahã, wa tô taré wahawi isimani zaꞌra da hã tãma rowairébé zaꞌra ni!
6 Tahawa, apito Faraꞌo tite awaru na wedewara zapore na dasiꞌwapézé, da te ãma tãma wasisi da hã, ma tô dama tiꞌru. Tahawa, tite dasiꞌwapéi ꞌmanharĩꞌwa norĩ hã ma tô te te siré simro.
7 Tawamhã uburé Ezitu ãma awaru na wedewara zapore na dasiꞌwapézém na ma tô wairé. Iwẽ si hã 600 na dasiré hã, iwadaꞌuriꞌwai mono bâ hã.
8 Uburé Danhibꞌapito, apito Faraꞌo pẽꞌẽ tete na aꞌâ hâimana da hã, ma tô tãma ꞌmanha. Tahawa, ma tô Izaraéu nhihudu norĩ zarina hã mo, te te ãma aiꞌuté zaꞌra wẽ te, siwamnhasi sina iwairébé zarina hã.
9 Tawamhã ezipsiu norĩ, uburé tite awaru na, awaru na wedewara zapore na dasiꞌwapézéb ré na duré awaru na ꞌre isiꞌwapé zaꞌra mono na, Izaraéu nhihudu norĩ zarina iwairébé hã, ma tô Âpré na â poré nhisi zaihâ na te te sima iꞌri nhoré zaꞌra zéb ãma siwi sasãmri zaꞌra, Pi-Hairote na romnhisi norĩ ꞌrata, Baau-Zefõ na romnhisi ꞌrata me.
10 Tawamhã Izaraéu nhihudu norĩ, apito Faraꞌo tite dasiꞌwapéi ꞌmanharĩꞌwa norĩ me te te ꞌwapé zaꞌra da, sisõré pese na te te iropãrĩ zaꞌra mono na te te ꞌmadâꞌâ zaꞌra wamhã, ma tô tãma tipẽꞌẽwara pese zaꞌra. Tahawa, ma tô Uburé Danhibꞌapito te te pawaptob zaꞌra da hã mreme ꞌrãihâ na tiwi rowaptẽrẽ zaꞌra.
11 Tahawa, ma tô Mozésihi ma nharĩ zaꞌra ãne:
— E Ezitu ãma da te ꞌre idanheme mono zé abꞌre hâimana ã bâ, ma tô rop si ꞌre irosaꞌwari mono ãma wasiꞌutõrĩ da, we ãwamhã bété iwanhimroi mo. E marĩ ma tô wama iꞌmanharĩ zaꞌra, we iwazani zaꞌra zém na hã.
12 Ezitu ãma hã wa tô aima nharĩ zaꞌra ni aré, ãne: Wawasutu zaꞌra tõ! Wasima iwẽ na wahâimana zaꞌrare. Ezipsiu norĩ ma, wapawaꞌâbâ ãna wa te tô ꞌre romhuri zaꞌra mono! Wama wẽ zaꞌra di aré, ezipsiu norĩ ma, wa te ꞌre iromhuri zaꞌra mono da hã. Oto tô rop si ꞌre irosaꞌwari mono ãmap si iwasété uptabi hã iwasiꞌutõrĩ da hã ãme!
13 Tane nherẽ, Mozési, ma te ãne ãma sadaꞌâbâ zaꞌra:
— Aipahi zaꞌra waꞌaba tõ. Maꞌãpé asiptete na aihâimana zaꞌra waꞌaba. Tawamhã te za iꞌmadâꞌâ zaꞌra waꞌwa, ã bâtâ na Uburé Danhibꞌapito te te iꞌasõꞌreptu zaꞌra waꞌaba zé hã. Tahawa ã hã ezipsiu norĩ, niwamhã ihâiba pibu zahu zaꞌra waꞌaba da hã, mare di za.
14 A norĩ waꞌwa, marĩ hã ꞌmanharĩ zaꞌra waꞌaba dai õ di. Uburé Danhibꞌapito si te za aiꞌãma aiꞌwapé zaꞌra waꞌwa.
15 Tawamhã Uburé Danhibꞌapito, te Mozésihi ma tinha ãne:
— E marĩ da, ma tô te iꞌaipawaptobzé hã ĩwi iwaptẽ. Maꞌãpé dama nharĩ zaꞌra na ꞌri awã tétézé da te sani zaꞌra da, taha pari duré oto dasisarina si dasiꞌabaꞌré da.
16 Maꞌãpé â poré nhisiwi asiwazusizé hã wẽ na hâimo. Tawamhã â isiꞌridawa zarina te za sima aiwãnhiza, Izaraéu nhihudu norĩ tiꞌai ꞌré na â waꞌwaibaba te te ãma saprĩ zaꞌra da hã.
17 Tane nherẽ, wa hã wa za ezipsiu norĩ pẽꞌẽ tete na hâimana zaꞌra da hã tãma ꞌmanharĩ zaꞌra, ta norĩ Izaraéu nhihudu norĩ zarina â waꞌwa u aꞌâ sisisi da hã. Tawamhã apito Faraꞌoho ãma, uburé ite dasiꞌwapéi ꞌmanharĩꞌwa norĩ ãma, ite zaꞌra wedewara zapore na dasiꞌwapézéb ãma, duré awaru na ꞌre isiꞌwapé zaꞌra mono norĩ ãma te iꞌaiꞌuté zaꞌra na hã dama ĩwasuꞌu zaꞌẽtẽ di za.
18 Wa hã ezipsiu norĩ ãma te aiꞌuté zaꞌra wamhã, te za siwi ĩwaihuꞌu, wa hã Uburé Danhibꞌapito na ꞌre ĩhâimana uꞌâsi mono na hã.
19 Tawamhã Hâiwa ãma ꞌRe ihâimana uꞌâsi mono ma Romhuriꞌwa, Izaraéu nhihudu norĩ nhowa ine mono hã ma tô oto te te saꞌu zaꞌra. Duré hâiwaꞌa zarobꞌa pisutu pese zama isõwab zaꞌra ine mono hã ma tô oto te te isaꞌu zaꞌra mono na tihâiba,
20 ezipsiu norĩ waꞌwamhã, Izaraéu nhihudu norĩ me. Tahawa, ezipsiu norĩ ma hã, ma tô hâiwa ꞌrãdâꞌâ pe hã tãma tihâimana zaꞌra. Tane nherẽ, Izaraéu nhihudu norĩ ma hã, ma tô rowaꞌa si tãma tihâimana zaꞌra. Ãne wa, marabâre Ezitu te dasiꞌwapéi ꞌmanharĩꞌwa norĩ, Izaraéu nhihudu norĩ hã te te sina tété waihuꞌu zaꞌra õ di.
21 Tawamhã Mozési â nhisiwi tinhibꞌrada te te oto wẽ wamhã, Uburé Danhibꞌapito, ma tô rowaꞌu isiptede bâtâ pusizém hawi iwatobro da hã tãma robꞌru, â te te isiwasi da hã. Tawamhã marabâre rowaꞌu isiptede te te â wapõrĩ uꞌâsi wa, ma tô â poré waꞌwam nherẽ, sitiꞌaiꞌré. Tahawa, â sima siwãnhizari wamhã,
22 ma tô â nhitõmo siꞌuiwa norĩ waꞌwamhã Izaraéu nhihudu norĩ tiꞌai ꞌré na oto saprĩ zaꞌra.
23 Tawamhã ezipsiu norĩ isarina isiꞌabaꞌré hã awaru na, wedewara zapore na dasiꞌwapézém na hã, duré awaru na ꞌre isiꞌwapé zaꞌra mono hã ma tô uburé â waꞌwa u hã isarina zaꞌra sisaꞌre.
24 Tawamhã awẽ wi unhama roꞌo pisutu pese hawi, duré hâiwaꞌa isarobꞌa pisutu pese hawi, ma tô Uburé Danhibꞌapito, ezipsiu norĩ dasiꞌwapéi ꞌmanharĩꞌwa hã ꞌmadâꞌâ zaꞌra sipapara, iꞌrãiwaihuꞌuꞌõ te te tãma iꞌmanharĩ zaꞌra zarina sitẽme siwaꞌru te te iroꞌrahâri zaꞌra mono zé te te tãma ꞌmanharĩ zaꞌra da.
25 Tahawa, wedewara zapore na dasiꞌwapézé hã sisaꞌrei waihuꞌu õ di. E marĩ wa. ꞌRe ihâimana uꞌâsi mono, tiꞌai waiꞌo na para nhisisi da, te te tãma ꞌmanharĩ zaꞌra wa. Tawamhã te ezipsiu norĩ nharĩ zaꞌra ãne:
— Oto Izaraéu nhihudu norĩ hawimhã wasisaꞌrei waꞌaba mono! Uburé Danhibꞌapito, te ihâiba zaꞌra uꞌâbâ hã wazada tihâimana zaꞌra.
26 Tawamhã Uburé Danhibꞌapito, te Mozésihi ma tinha ãne:
— Asibꞌrada hã, maꞌãpé duré â nhisiwimhã wẽ na, apâ sitẽme sitob da, ezipsiu norĩ hã ite wedewara zapore na dasiꞌwapézé hã, duré awaru na ꞌre isiꞌwapé zaꞌra mono norĩ hã, te te uburé pese suwa zaꞌra da.
27 Tawamhã Mozési â nhisiwi tinhibꞌrada ma tô wẽ. Duré oto awẽ wamhã, ma tô â hã apâ iharé na tihâiba. Tahawa, ezipsiu norĩ â wi sisõꞌreptu zaꞌra da, ma tô aré sisaꞌre. Tane nherẽ, Uburé Danhibꞌapito hã ma tô â waꞌwa u apâ sãmra.
28 Â apâ sitẽme sito wamhã, ma tô wedewara zapore na dasiꞌwapézé hã, awaru na ꞌre isiꞌwapé zaꞌra mono norĩ hã, duré uburé ezipsiu norĩ â na Izaraéu nhihudu norĩ zarina isisaꞌrei mono hã suwa zaꞌra. Hâiba ré hã siꞌmairẽme waihuꞌu õ di.
29 Tane nherẽ, Izaraéu nhihudu norĩ hã ma tô â waꞌwaibaba tiꞌai ꞌré na hã saprĩ zaꞌra, â nhitõmo siꞌuiwa waꞌwamhã.
30 Uburé Danhibꞌapito tô taha bâtâ na ezipsiu norĩ wi, Izaraéu nhihudu norĩ te te sõꞌreptu zaꞌra wamhã, ma tô isiꞌutõrĩ norĩ â zaihâ na supara wa isimiꞌwara mono hã ꞌmadâꞌâ zaꞌra.
31 Tawamhã Izaraéu nhihudu norĩ hã Uburé Danhibꞌapito tiwaihuꞌu pese na ezipsiu norĩ ãma te te iꞌaiꞌuté zaꞌra zé te te ꞌmadâꞌâ zaꞌra wamhã, ma tô ãma itobꞌuzu zaꞌra zéb zarina oto wazéb zaꞌra. Tahawa, ma tô Uburé Danhibꞌapito hã oto siwi umnhasi. Duré tãma romhuriꞌwa Mozésihi zama te oto umnhasi na hã tãma tihâimana zaꞌra.
