Ezodu 15:1-27
15 Tawamhã Mozési, Izaraéu nhihudu norĩ me, Uburé Danhibꞌapito ãma hã ma tô tinhoꞌre zaꞌra ãne:Uburé Danhibꞌapito ma, wa za tãma ꞌre ĩnhoꞌre uꞌâsi.E marĩ wa. Õ hã te te daꞌãma aiꞌuté wẽ dâꞌâsina;Õ hã ma tô awaru norĩ hã, duré awaru na isiꞌwapéiꞌwa norĩ hã, â u hã sãmra.
2 Uburé Danhibꞌapito hã siptete na ĩꞌwawi ꞌre isimapa mono ꞌwa;Õ hã ma tô ĩnhoꞌreptu.Õ hã, ĩte ꞌRe ihâimana uꞌâsi mono wa, wa za ãma ĩwata.Õ hã duré, ĩmama te ꞌRe ihâimana uꞌâsi mono.Iwaihuꞌu pese na zama ĩnhoꞌre na hã wa za duré ãma ꞌre ĩwata uꞌâsi.
3 Uburé Danhibꞌapito hã isiꞌwapéiꞌwa;isisi hã Uburé Danhibꞌapito.
4 Õ hã ma tô Ezitu te dasiꞌwapéi ꞌmanharĩꞌwa norĩ hã, duré wedewara zapore na dasiꞌwapézé hã, â u hã sãmra;duré dasiꞌwapéi ꞌmanharĩꞌwa norĩ nhibꞌihâꞌa iwẽ hã, ma tô Âpré na â nhisi na hã asisi.
5 Ma tô â ꞌrehâ uptabi hã suwa zaꞌra;ẽtẽ ne, ma tô duré â ꞌrehâ uptabi u hã asisi.
6 Uburé Danhibꞌapito asibꞌrata nhimire niwĩmhã,asiptede hã saꞌẽtẽ uptabi di;ta hã ma tô asitobꞌru norĩ hã te te nhinhizu pese zaꞌra.
7 E niha iwẽ uptabi daꞌãma iꞌaiꞌutézé hã!Asitobꞌru norĩ ãma aiꞌuté zaꞌra wa, sada iꞌasitiꞌrui watobro zaꞌra zarina,ma tô duré a hã amnho teihi ꞌré ne hã ãma isazu zaꞌra.
8 A hã â saꞌuri wamhã, ma tô â hã tiꞌâtâ;ma tô isitõmo siꞌuiwa na taré tiꞌrãihâ zahuré,duré ma tô â ꞌrehâ uptabi ꞌrowimhã â uꞌẽtẽ ne â hã titete.
9 Tahawa, te wanhitobꞌru norĩ hã nharĩ zaꞌra ãne:“Isarina wasiꞌabaꞌréi wamhã, wa za wasiwi sasãmri zaꞌra ni za;tawamhã marĩ tãma ihâimana zaꞌra wa te tiwi iwaibu zaꞌra hã,te za uburé wama tihâimana zaꞌra.Tawamhã duré wate sibꞌézé ꞌwa pa na hã wa za wasiwi uprosi ni za.”
10 Tane nherẽ, a hã Uburé Danhibꞌapito, â saꞌuri wa,ma tô â hã suwa zaꞌra, ezipsiu norĩ hã;duré marĩ pire zém ne hã ma tô â zaꞌẽtẽ ꞌrowimhã asisi.
11 Uburé Danhibꞌapito, niꞌwa asine hã hâimana õ di, ãma ꞌre idawata zaꞌra mono hã!E ꞌwa te asine ipire uptabi hã ꞌre hâimana, iwasétéꞌõ hã.E ꞌwa hã te za duré dama iwaihuꞌuꞌõ hã te te ꞌre abꞌmanharĩ, a hã marĩ ꞌre iꞌabꞌmanharĩ mono ne.
12 Asibꞌrata nhimire hâimo wẽ wamhã,waꞌruiꞌwa norĩ wei wazarina isisaꞌrei mono hã, ma tô tiꞌa hã suwa zaꞌra.
13 Asimizawizé aima ꞌre ihâimana mono zarinaa hã isõꞌreptu zaꞌra norĩ hã ma tô iꞌanhimroi mo;asiptede saꞌẽtẽ na aima ꞌre ihâimana mono zarina, ma tô duré asiptiꞌa iwazéb zahi u hã idaꞌanhimroi mo.
14 Tawamhã dazaꞌrui mono bâ aꞌuwẽ ꞌre ihâimana zaꞌra mono, asimiꞌmanharĩzé te te wapari zaꞌra wamhã, ma tô pahi te hã tirẽrẽꞌẽ zaꞌra. Duré Filistéa ãma aꞌuwẽ norĩ hã ma tô tãma tipẽꞌẽwara pese zaꞌra.
15 Edomita norĩ nhibꞌihâꞌa norĩ hã ma aꞌrãmi zaꞌra,moabita norĩ siptete na ꞌre ihâimana zaꞌra mono hã ma tô sibꞌru haimani zaꞌra,duré uburé cananeu norĩ hã, ma tô tãma tipopoꞌo zaꞌra.
16 Tawamhã ipahi uptabi zaꞌra hã ma tô iwap sisisi.Tawamhã duré ta norĩ aiwaihuꞌu pese na tãma irobꞌmanharĩ zaꞌra zé te te ꞌmadâꞌâ zaꞌra wamhã,ma tô ẽtẽ ne rési ãna simizahâri zaꞌra haré aimasa, asibꞌaꞌuwẽ norĩ te te aꞌâ iroꞌrahâri zaꞌra zéb u, pawaꞌâbâ ãna te te ꞌre iromhuri zaꞌra mono isõꞌreptu zaꞌra hã.
17 Uburé Danhibꞌapito, a hã asibꞌaꞌuwẽ, ẽtẽ nhisiwi ꞌre iꞌaihâimana mono zéb u te za duré iꞌanhimroi mo, ro hã asima ipisutuzéb u, asõrõwa da, ꞌri asima iꞌri u hã.
18 A hã Uburé Danhibꞌapito, te za Danhibꞌapito na hã õne uꞌâ ꞌre aihâimana uꞌâsi mo!
Miriã isõꞌrezé wasuꞌu
19 Izaraéu nhihudu norĩ, âporé waꞌwa tiꞌai ꞌré na ma tô saprĩ zaꞌra. Tane nherẽ, ezipsiu norĩ te wedewara zapore na dasiꞌwapézé hã, ite zaꞌra awaru na dasiꞌwapézé hã, duré awaru na isiꞌwapéi norĩ, â waꞌwa u sisarina sisisi wamhã, ma tô Uburé Danhibꞌapito apâ â tiwi sitob zaꞌra da hã tãma tinha, te te suwa zaꞌra da.
20 Tawamhã ꞌRe ihâimana uꞌâsi mono zadawa ꞌmahârâꞌwa sipiꞌõ Miriã, Arãhã hidiba hã roptaꞌazé tamborĩ na isisi hã ma tô tiꞌâ. Te te âri wamhã, ma tô uburé piꞌõ norĩ hã isiré aiꞌabaꞌré, te te roptaꞌa zaꞌra mono sina, duré iré siꞌwapsisi mono sina.
21 Ãne Miriã, te tawamhã tãma tinhoꞌre zaꞌra:Uburé Danhibꞌapito ma, te za tãma ꞌre asõꞌre uꞌâsi zaꞌra waꞌaba mo, aipẽꞌẽ ꞌre ãma ꞌre aiwata zaꞌra waꞌaba mono sina.E tihai wa. Õ hã iwẽ uptabi na hã te te daꞌãma aiꞌuté wa;Õ hã ma tô awaru hã, duré awaru na isiꞌwapéiꞌwa norĩ hã, â waꞌwa u sãmra.
 isé wasuꞌu
22 Taha pari Mozési, Âpré na â nhisi hawi Su na rop si ꞌre irosaꞌwari mono nhisi u ma tô Izaraéu nhihudu norĩ hã te te oto simro. Tahawa, supara ꞌré si ro ꞌre isaꞌwari mono na siꞌubdatõ bâtâ na siꞌabaꞌré nherẽ, â hã te te siwi ꞌmasãmri waihuꞌu õ di.
23 Tawamhã Mara na rowamri u sihutu wamhã, tamemhã â te te âhuri waihuꞌu õ di, â isé na hã hâimana wa. Tahawa, ta rowamri nhisi hã Mara* na.
24 Tahawa, Mozésihi ma, dasiwapsari zaꞌra wa, ma tô ãne dasiwi sadanharĩ ni:
— E marĩ wa za âhuri ni.
25 Tawamhã Mozési, mreme ꞌrãihâ na Uburé Danhibꞌapito wi te te rowaptẽrẽ wa, ma tô wedehu waré waꞌõno hã tãma hâiꞌré. Ta hã âi ba te te mei wamhã, ma tô â te te iꞌâhuri da hã oto tãma sihiri wẽ zaꞌra.
à hã rob ãma, ma tô Uburé Danhibꞌapito hã Izaraéu nhihudu norĩ ma, tinhimiroti hã tãma sõmri zaꞌra. Tame ma duré oto pibu zaꞌra.
26 Tahawa, te ãne tãma nharĩ zaꞌra:
— Te aima inharĩ zaꞌra waꞌaba zém na ĩwapari pese zaꞌra waꞌaba wamhã, iꞌuwaibaba na marĩ ꞌre ꞌmanharĩ zaꞌra waꞌaba mono wamhã, duré aima ĩnhimiroti zaꞌra waꞌaba zé hã asima ꞌre tété zaꞌra waꞌaba mono wamhã, wa hã aihâzé na te iꞌaihâ zaꞌra waꞌaba da hã mare di za, ezipsiu norĩ te ãma ihâ zaꞌra zém ne hã. Wa hã Uburé Danhibꞌapito, te ꞌre iꞌaipese zaꞌra waꞌaba mono ꞌwa.
27 Taha parimhã Izaraéu nhihudu norĩ, Erĩ na rowamri u hã ma tô aihutu, 12 na â nhanaꞌrada hã, duré 70 na norõsu ne ꞌre ihâimana zaꞌra mono zéb u hã. Tawamhã tame â ihâimana ꞌrata, ma tô sima ꞌri nhoré zaꞌra.
Ĩwaꞌõtõ piꞌreba watsuꞌu mono
^ 15:23 Mara hã Ebreu norĩ mreme na hã “â isé” te wasuꞌu.
