Ezodu 16:1-36
16 Tawamhã uburé Izaraéu nhihudu norĩ, Erĩ na rowamri hawi oto wairébé wamhã, ma tô Sĩ na rop si ꞌre irosaꞌwari mono nhisi u hã aiꞌabaꞌré, Eri na rowamri norĩ waꞌwa, ẽne Sinaꞌi na isisi waꞌwa ihâimana u hã. Tamomo aꞌamo isãnaꞌre wãiwa dia 15 na ma tô oto aihutu, Ezitu hawi wairébé parimhã.
2 Tame rop si ꞌre irosaꞌwari mono ãma, uburé Mozésihi ma, duré Arãhã ma, siwapsari zaꞌra wamhã,
3 ma tô ãne tãma nharĩ zahuré ni:
— Ezitu ãma, Uburé Danhibꞌapito te te waꞌuprosi ꞌwaꞌâhã, aré tô iwẽ! Tamemhã wa wazahâ na ꞌre wasiꞌubumro, romnhi duré aimawi dasa hã wasima iwẽ na wa te ꞌre huri mono da hã. Tane nherẽ, a norĩ waꞌwa, ã hã rop si ꞌre irosaꞌwari mono u hã ma tô we iwanhimroi waꞌaba mo, ã hã uburé norĩ hã mram na si uprosi aba da.
4 Tahawa, Uburé Danhibꞌapito te Mozésihi ma tinha ãne:
— Hâiwa hawi dasa, tã ne aima ꞌre aꞌa zaꞌra waꞌaba mono da hã wa za te aima abꞌmanharĩ ꞌwa. Tahawa, awẽ sidâpâsi te za uburé pese rob u hã sô ꞌre dawairébé, misi bâtâ na dahâiba mono bâ da te dasisa ꞌre ubumroi mono da. Ãne wa za dapibu zaꞌra, dama ĩnhimiroti zaꞌra zé, da te ꞌre wapari pese zaꞌra mono zô.
5 Tawamhã romhuri ꞌrãsutu bâtâ ãma, te za dasisa da te ꞌre ꞌrãꞌõtõ, ãma isisiwi na bâtâ amoi u da zama.
6 Tawamhã Mozési norĩ, Arãhã me, te dama nharĩ zahuré ãne:
— Ãhã na hâiwahâ te za Uburé Danhibꞌapito Ezitu hawi te te iꞌasani zaꞌra waꞌwa hã asiwi iwaihuꞌu ꞌwa.
7 Awẽ wi mararé te za Uburé Danhibꞌapito hâiba na rowaꞌa hã iꞌmadâꞌâ zaꞌra waꞌwa, iwẽ uptabi hã. E marĩ wa. Sada aihâimana zaꞌra waꞌaba wa, tãma iꞌaiwapsari zaꞌra waꞌaba zé hã te te wapari wa. Wazada hã aihâimana zaꞌra waꞌaba õ di. Õhõ da, aihâimana zaꞌra waꞌaba wa, ma tô aiwapsari zaꞌra waꞌwa. E marĩ ꞌmanharĩꞌwa pâ bété, wa norĩ hã wama iꞌaiwapsari zaꞌra waꞌaba da hã.
8 Tawamhã te zahadu Mozési dama tinha ãne:
— Uburé Danhibꞌapito, te za hâiwahâ sidâpâsi romnhi ꞌre ihuri aba mono da hã te te aima ꞌre sõmri zaꞌra waꞌwa, duré mararé sidâpâsi iꞌuꞌẽtẽ wapu asima iwẽ na ꞌre ihuri aba mono da zama. E marĩ wa. Uburé Danhibꞌapito zada, aihâimana zaꞌra waꞌaba wa, iꞌaiwapsari zaꞌra waꞌaba zé hã te te wapari wa. Wazada hã aihâimana zaꞌra waꞌaba õ di. Õhõ zada aihâimana zaꞌra waꞌaba wa, ma tô tãma aiwapsari zaꞌra waꞌwa. E marĩ ꞌmanharĩꞌwa pâ bété wa norĩ hã wama iꞌaiwapsari zaꞌra waꞌaba da hã.
9 Tawamhã Mozési, Arãhã ma, te tinha ãne:
— Maꞌãpé uburé dama nharĩ, we ãwa dasiꞌabaꞌré da hã, Uburé Danhibꞌapito nhoꞌre dahâimana zaꞌra da. E marĩ wa. Õ hã tãma idasiwapsari zaꞌra zé hã ma tô wapa.
10 Tawamhã Arã te te dama nharĩ zaꞌra ré, ma tô rop si ꞌre irosaꞌwari mono u hã robꞌmâdâꞌâ zaꞌra ni. Taha ré, Uburé Danhibꞌapito hawi rowaꞌa hã ma tô hâiwaꞌa na sihâiꞌré.
11 Tawamhã Uburé Danhibꞌapito, te Mozésihi ma tinha ãne:
12 — Wa tô wapa Izaraéu nhihudu norĩ siwapsari zaꞌra zé hã. Tãma nharĩ zaꞌra na, hâiwahâ robzaꞌrã wana ré, za romnhi te te ihuri na hã, duré za awẽ wi mararé iꞌuꞌẽtẽ wapu sima iwẽ na te te ihuri na hã. Tawamhã te za siwi ĩwaihuꞌu za oto, wa hã Uburé Danhibꞌapito, ite zaꞌra ꞌRe ihâimana uꞌâsi mono na hã.
13 Tawamhã hâiwahâ ꞌriꞌripire hã ahâ uptabi na ma tô sihâiꞌré zaꞌra. Ahâ uptabi wa, ma tô ꞌri awã te te siwi upsibi. Duré awẽm na mararé ma tô ꞌri awã monoi baba hã atébré hã te te rowaihi.
14 Oto atébré ꞌré mono parimhã, rop si ꞌre irosaꞌwari mono ãma ma tô marĩ peꞌa hâ ne hã ibaihâ pesere tiꞌa nhisiwimhã simiꞌwara, â iꞌuꞌẽtẽ baihâi pesere ne hã.
15 Izaraéu nhihudu norĩ ã hã te te ꞌmadâꞌâ zaꞌra wamhã, te te waihuꞌu zaꞌra õ di marĩ hã. Tahawa, te ãma sisada nharĩ zaꞌra ãne:
— E marĩ.
Tawamhã Mozési te ãma tãma rowasuꞌu zaꞌra ãne:
— Ã hã dasa huri aba da, Uburé Danhibꞌapito we te te aima isõmri zaꞌra waꞌwa.
16 Ãne, ma tô roti itede aima ꞌmanharĩ zaꞌra waꞌwa: “Aihâiba mono bâ te za asisa iꞌrãꞌõtõ aba mo, asai wabre aba mono bâ, asõrõwa ꞌre aiꞌrã zaꞌrata zaꞌra waꞌaba zarina, maparane litru na aihâiba mono bâ waꞌaba na.”
17 Tawamhã ãne ma tô Izaraéu nhihudu norĩ hã te te waibu, niꞌwam norĩ hã ahâ na duré niꞌwam norĩ umro na.
18 Tawamhã te te oto pibu zaꞌra wamhã, niꞌwam norĩ ahâ na te te iwaibui mono hã, ibâre ma te tô te te sima waibu, iwẽzéb zarina. Duré suru na nherẽ, te te iwaibui mono wi hã tiwi sô roꞌwanhiꞌriti waihuꞌu zaꞌra õ di. Hâiba mono bâ ma tô ibâre sisa te te waibu, te te huri mono da hã.
19 Tawamhã Mozési te ãma tãma nharĩ zaꞌra ãne:
— Niꞌwa hã awẽ bâtâ u da, te te sisa ꞌmaihiri õ di za.
20 Tane nherẽ, niꞌwam norĩ, Mozési te te iwaihuꞌuzé te te wapari zaꞌra õ wa, ma tô dasa hã te te sisa saꞌra. Tawamhã ãma iꞌawẽ zaꞌra mono na hã, ma tô ubu hã ãma tiwi tizasuꞌu zaꞌra. Ma duré tiwi tiware zaꞌra. Tahawa, Mozési, ma te ta norĩ zada tinhitiꞌru zaꞌra.
21 Tawamhã awẽ sidâpâsi ma tô dahâiba mono bâ hã nasi da te waibu, dasai wabre tô taha bâtâ mono na dasa da te nasi ihuri mono da hã. Tawamhã bâtâ ro nasi te te waꞌro zaꞌra wamhã, ma tô nasi tiꞌuwa zaꞌra, tiꞌai wa isimiꞌwara mono hã.
22 Tawamhã duré hâiba mono bâ maparane siꞌuiwa na litru na ãma isisiwi na hã ma tô te te waibu. Tawamhã danhibꞌihâꞌa norĩ ma tô aiꞌabaꞌré, Mozésihi ma te te tãma wasuꞌu zaꞌra da, da te iwaibui mono zé hã.
23 Mozési te ãne tawamhã tãma nharĩ zaꞌra:
— Awẽmhã dawaꞌutuzé, sabadu romhuri ꞌrãsudu iwazéb zahi, Uburé Danhibꞌapito aimawi te te ipisudu. Tahawa, ma ãne tinhimiroti aima sõmri zaꞌra waꞌwa: “Niꞌwam norĩ ã hã dasa sebre zaꞌra waꞌaba da wamhã, maꞌãpé asima sebre zaꞌra waꞌaba; duré ãma asima api zaꞌra waꞌaba da wamhã, maꞌãpé ãma asima asipi zaꞌra waꞌaba. Duré isiꞌmairẽme hã awẽ bâtâ u da, asisa saꞌra waꞌaba mono za.”
24 Tawamhã Mozési te te dama iwaihuꞌu zaꞌra zéb zarina, ma tô isiꞌmairẽme norĩ hã da te dasisa saꞌra awẽ bâtâ u da, ꞌroi mono ãna, duré ubu hã ãma dawi sasuꞌu zaꞌra mono ãna.
25 Te tãma nharĩ zaꞌra ãne duré, Mozési hã:
— Maꞌãpé huri aba mono, ã bâtâ na hã. E marĩ wa. Uburé Danhibꞌapito sabadu dawaꞌutuzé, aimawi te te ipisutu wa, duré ã bâtâ na hã tiꞌai wa isimiꞌwara mono na ꞌmasãmri zaꞌra waꞌaba dai õ wa, ihuri aba mono da hã.
26 6 si bâtâ ꞌremhã ã hã dasa te za tô iwaibui waꞌaba mo. Tane nherẽ, 7 bâtâ ãma dawaꞌutuzé bâtâ na tiꞌai wamhã dasa hã hâimana zahu õ di za.
27 Tawamhã 7 bâtâ ãma niꞌwam norĩ dasa te te waibui mono da hã, ma tô sô wairé aré. Tane nherẽ, te te siwi ꞌmasãmri zahu zaꞌra õ di.
28 Tahawa, Uburé Danhibꞌapito te Mozésihi ma tinha ãne:
— E momo te za ĩnhimirowaihuꞌu na, duré ĩnhimiroti na ĩwapari zaꞌra waꞌaba õ zém na iꞌaihâimana zaꞌra waꞌaba zé hã iꞌrãsutu zaꞌra waꞌwa.
29 Ãma aipoꞌre puꞌu zaꞌra waꞌaba, wa hã Uburé Danhibꞌapito, dawaꞌutuzé bâdâ te aima isõmri zaꞌra waꞌaba zém na hã. Tahawa 6 bâtâ ãma wa tô dasa na hã aima sisiwi zaꞌra waꞌwa, maparane bâtâ ꞌreb da hã. 7 bâtâ ãma te za uburé pese iꞌaihâimana zaꞌra waꞌaba zép ꞌremhã aihâimana zaꞌra waꞌwa, niꞌwa rob u hã watobro ãna.
30 Ãne wa, Izaraéu nhihudu norĩ 7 bâtâ ãma hã te te romhuri zaꞌra õ di.
31 Tawamhã Izaraéu nhihudu norĩ, ã hã dasa hã ma tô siwi sisi, mana* na. Ta hã aiwa romnhamare ne hã irã uptabi, duré ise hã aiwa ropĩni na bolu ꞌmanharĩ ne hã.
32 Tawamhã Mozési te tãma nharĩ zaꞌra ãne:
— Uburé Danhibꞌapito ma tô wama ꞌru zaꞌra, mana hã maparane litru na niwa aptoꞌoré wab da, wa te wasiwi hiri da wasisa hã, wanhihudu norĩ dasa wa te huri da, supara ꞌré si ro ꞌre irosaꞌwari mono ãma te te wama isõmri hã te te ꞌre ꞌmadâꞌâ zaꞌra mono da, Ezitu hawi we te te waꞌawazere wamhã.
33 Mozési, te tawamhã Arãhã ma tinha ãne:
— Simhi hã âri, maparane litru na mana hã iwa ꞌmanherẽ da, Uburé Danhibꞌapito nhoꞌre duré iré sãrĩ da, wanhihudu norĩ ma ropibu ma, iré ꞌre sa mono da.
34 Tawamhã Arã, Mozésihi ma, Uburé Danhibꞌapito te te tãma iwaihuꞌuzéb zarina ma tô ꞌmanha. Simhi mana ré hã ma tô ꞌRe ihâimana uꞌâsi mono te, wedehâꞌre nhoꞌremhã tisã, tame ꞌre sa mono da, iré hã.
35 Izaraéu nhihudu norĩ hã 40 na wahub ꞌre, ma tô mana hã te te ꞌre huri, tiꞌai wa, ꞌre idahâimana siromo zaꞌra mono ꞌre isihutuzéb u, Canaꞌã tiꞌa zadaꞌré ãma u.
36 Tawamhã mana hã dahâiba mono bâ ma da, ma tô 10 sina isaꞌrata ãma 20 litru na iꞌmasisi na hã tihâiba.
Ĩwaꞌõtõ piꞌreba watsuꞌu mono
^ 16:31 Mana hã Ebreu norĩ mreme na “E marĩ, ã hã”, aiwa prã na ne iwapari na hã
