Ezodu 17:1-16
17 Tawamhã Izaraéu nhihudu norĩ, rop si ꞌre irosaꞌwari mono ãma Sĩ na romnhisi hawi ma tô oto wairé. Wairébé wamhã, ma tô ꞌre nomro, ro mono bâ Uburé Danhibꞌapito te te tãma iwaihuꞌu zaꞌra zéb zarina. Refidĩ na romnhisi ãma ma tô tawamhã sima ꞌri nhoré zaꞌra. Tane nherẽ, tamemhã â hã ꞌmaihâimana õ di, te te iꞌâhuri da hã.
2 Tahawa, Mozésihi zada hâimana zaꞌra wa, tãma siwapsari zaꞌra wamhã, ma tô ãne tãma nharĩ zaꞌra:
— Â hã maꞌãpé wama sõmri zaꞌra na, wa te iꞌâhuri da hã.
Tawamhã Mozési, ma ãma sadaꞌâbâ zaꞌra ãne:
— E marĩ wa, te ĩma aiwapsari zaꞌra waꞌwa. Duré e marĩ da, te Uburé Danhibꞌapito hã niha marĩ te te iꞌmanharĩzéb zô asiwi isibꞌraptẽrẽ ꞌwa.
3 Tane nherẽ, ꞌrubu na dahâimana zaꞌra wa, ma tô dasiwapsari na hã ãma uzusi zaꞌra ni. Tahawa, Mozésihi da, dahâimana zaꞌra wa, te saꞌẽtẽ nasi dasiwi ꞌmahârâ ni. Ãne te tãma nharĩ zaꞌra ni:
— E marĩ da, ma tô Ezitu hawimhã we iwaꞌawaze bété. E ꞌrubu na taré wanhimro da bété, duré waꞌra norĩ zama taré wazu ãma simro da, duré wanhimizama norĩ zama taré wazu ãma simro da.
4 Tahawa, Mozési te Uburé Danhibꞌapito wi hã rowaptẽ ãne:
— E marĩ, wa za ã hã aꞌuwẽ norĩ ma hã ꞌmanha. Te za ĩꞌãma sima rosaꞌrata zaꞌra, ẽtẽ na te te siwi ĩwĩrĩ da hã.
5 Tawamhã Uburé Danhibꞌapito, te Mozésihi ma tinha ãne:
— Maꞌãpé danhibꞌihâꞌa norĩ hã ꞌmaipisutu zaꞌra na, ta norĩ siré danhowa ime iꞌaimorĩ zaꞌra da hã. Tahawa te za asiwazusizéb zama asiré hã iꞌâ, panhoꞌu Nilu na isisi ãma iꞌazârizé hã.
6 Tawamhã wa hã wa za ẽtẽ nhisiwimhã asõꞌremhã za, Sinaꞌi na ẽtẽ nhisi ãmamhã. Tawamhã a hã te za ẽtẽ tõmo wawẽ hã iꞌazâ, ihawi â ipuꞌu da hã, da te âhuri da.
Ãne ma tô Mozési hã ꞌmanha, Izaraéu nhihudu nhibꞌihâꞌa norĩ nhoꞌa.
7 Tahawa, Mozési, ã hã ro hã ma tô sisi ãne, isisi maparane ꞌre hâimana mono da, Masa na duré Meriba* na. E marĩ wa. Izaraéu nhihudu norĩ hã, Mozésihi ma siwapsari zaꞌra wa, duré Uburé Danhibꞌapito hã niha marĩ te te iꞌmanharĩzéb zô te te siwi pibui wa, te te ãne siwi sadanharĩ wa:
— Wanhibꞌapito, e te wasiré aihâimana zaꞌra. E mare di.
Amalequita norĩ ꞌwapé zaꞌra zé wasuꞌu
8 Tawamhã amalequita norĩ, ma tô Izaraéu nhihudu norĩ zô hã tipra. Ãhã wa, Refidĩ na romnhisi ãma te oto aiꞌwapé zaꞌra.
9 Tawamhã Mozési, Zozuéhé ma, ma te ãne tãma waihuꞌu:
— Niꞌwam norĩ aibâ hã, maꞌãpé pisutu zaꞌra na, awẽ mararé ime aimorĩ zaꞌra da, amalequita norĩ ꞌwapé zaꞌra waꞌaba da. Tawamhã wa hã wa za ẽtẽ nhisiwi hã za, ĩsiwazusizé ꞌRe ihâimana uꞌâsi mono te te ĩma ipisudu te tété sina.
10 Tawamhã Zozué, Mozési te te tãma iwaihuꞌuzéb zarina, ma tô amalequita norĩ siré te te aꞌwapé da hã mo. Taha ré Mozési norĩ, Arãhã me, Hur na isisi me, ma tô ẽtẽ na siré saiꞌuri zaꞌra.
11 Mozési hã tipaihi hâimo nasi apâ te te sarõtõ wamhã, Izaraéu nhihudu norĩ hã te nasi aré oto tô daꞌãma aiꞌuté zaꞌra. Tane nherẽ, paihi zadâꞌâ wa, te te siꞌrai wamhã, amalequita norĩ te nasi aré oto tô duré asa ãma aiꞌuté zaꞌra.
12 Tawamhã paihi zadâꞌâ wa, Arã norĩ, Hur na isisi me, ma tô ẽne hã tãma ꞌmaihiri zahuré, Mozési ãma isãmrazéb da hã. Tahawa, paihi siꞌuiwa na ma tô paihi upari zahuré hâimom haré. Tawamhã bâdâ isébrézéb u ma tô tipaihi hâimo te te wẽ haré nhamra.
13 Ãne Zozué, amalequita norĩ ãma uburé te te iꞌaiꞌuté zaꞌra zé hã.
14 Tahawa, Uburé Danhibꞌapito Mozésihi ma, te tinha ãne:
— Daꞌãma iꞌaiꞌuté zaꞌra waꞌaba zém na hã maꞌãpé ãma romnhihâtâ, ãma ꞌre iꞌasipoꞌre puꞌu uꞌâsi zaꞌra waꞌaba mono zéb da hã. Duré Zozuéhé ma, ĩzadawa wasuꞌu na, wa hã wa za amalequita norĩ hã uprosi za.
15 Tawamhã Mozési, ma tô ẽtẽ zaꞌra hã ꞌmanha. Tahawa, ma tô ãne sisi: “Uburé Danhibꞌapito, dasiꞌwapé da, zazahâi waré hâimo isipra tẽme ꞌre idasito mono ne, te ĩnhiptetezé hã ĩma tihâiba.”
16 Taha pari te ãne tãma tinha:
— Uburé Danhibꞌapito te, zazahâi waré hâimom haré asiwi tété wẽ uꞌâsi aba! Ta hã te za õne uꞌâ amalequita norĩ hã te te ꞌre aꞌwapé za!
Ĩwaꞌõtõ piꞌreba watsuꞌu mono
^ 17:7 Meriba hã hebreu norĩ mreme na “dasiwapsari” aiwa prã na ne iwapari na hã
