Ezodu 18:1-27
18 Tawamhã Zetru, sasedoti, Mozésihi maprewa, Midiã na romnhisi ãma ꞌre ihâimana mono hã, ma tô ꞌRe ihâimana uꞌâsi mono, uburé Mozésihi ma, duré Izaraéu nhihudu norĩ ma, te te ꞌre iꞌabꞌmanharĩ wẽ mono zé hã waihuꞌu. Duré Ezitu hawi te te isani zaꞌra zéb zama ma tô waihuꞌu.
2 Tahawa, Mozésihi hâimanazéb u hã ma tô mo. Mozésihi mro Zipora hã te siré saprõ. Mozési, ma tô aré Ziporaha ma robꞌru, iꞌra maparane norĩ ré, Zetru nhorõwa u morĩ da hã.
3 Isisi hã Gésõ na. E marĩ wa. Mozési hã te te nharĩ wa ãne: “Wa hã, wa tô wasiré aꞌuwẽꞌõ norĩ nhiptiꞌai ãma ꞌre ĩhâimana.”
4 Ihâiba amo nhisi hã, Eriézé* na. E marĩ wa. Mozési te te nharĩ wa ãne: “Ĩmama te, ꞌRe ihâimana uꞌâsi mono ma tô ĩnhoꞌreptu, Ezitu ãma apito Faraꞌoho nhiꞌwa pa wi hã.”
5 Tawamhã Zetru, Mozésihi maprewa, tiꞌra sipiꞌõi ré, maparane iꞌra norĩ ré, ma tô supara ꞌré na ropsi ꞌre iropsaꞌwari mono ãma Mozési te te sima iꞌri nhoré u hã mo, ẽne iwazéb zahi ãma.
6 Ma tô tisiwana tisaꞌõmo ma timreme hã tisõ, za oto tiꞌra sipiꞌõi ré, duré maparane iꞌra norĩ ré iwisi na hã.
7 Tawamhã Mozési, Zetru te te sina uzusi da ma tô watobro. Oto itẽme wisi wamhã, ma tô tãma iwazéb zarina tãma aiwẽꞌẽ. Tobꞌrata hârâ na ma tô duré sawi. Rowẽ zô te duré sadanharĩ zahuré. Taha pari Mozésihi nhorõwa u ma te oto tizasi zahuré siré.
8 Tawamhã timaprebaba ma, Uburé Danhibꞌapito Izaraéu nhihudu norĩ tãma isawi zarina, Ezitu te apito Faraꞌoho ma, duré ezipsiu norĩ ma, uburé marĩ te te tãma iꞌmanharĩ zaꞌra zé hã ma tô tãma wasuꞌu. Duré rom na ꞌre danomro mono ré, ropire dama hâimana zaꞌra wa, te te idaꞌanhoꞌreptu na zama ma tô tãma wasuꞌu.
9 Ãne hã Zetru te te wapari wamhã, tãma hã rowẽ uptabi di, Uburé Danhibꞌapito, Izaraéu nhihudu norĩ ma, te te iꞌmanharĩzéb zabâdâ hã, Ezitu hawi te te isani zaꞌra zém na hã.
10 Tahawa, te ãne tinha:
— Uburé Danhibꞌapito ãma wa ĩwata, ezipsiu norĩ nhibꞌrata hawi, duré ta norĩ nhibꞌapito nhibꞌrata hawi te te aiꞌawazere aba wa!
11 Wa tô oto waihuꞌu ãhã na awaꞌawi na hã Uburé Danhibꞌapito, isiptete uptabi na hã uburé ihâibaꞌõ norĩ nhiptete nhipai u. E marĩ wa. Ta hã Izaraéu nhihudu norĩ, ezipsiu norĩ nhiptetezém hawi te te sõꞌreptu zaꞌra wa, tãma iwazébꞌõ zaꞌra sina, marĩ te te tãma ꞌre ꞌmanharĩ wasété zaꞌra mono ré.
12 Tawamhã Zetru, Mozésihi maprewa, ꞌRe ihâimana uꞌâsi mono ma, ma tô tinhimizama zata na tãma tinhopru. Tahawa, ma tô Arã norĩ hã, uburé Izaraéu nhihudu nhibꞌihâꞌa norĩ me hã ime aiꞌabaꞌré, ꞌRe ihâimana uꞌâsi mono nhoꞌre imaprebaba siré saihuri da hã.
Mozési tipawaptoꞌwa da, te te ipisutu zaꞌra norĩ wasuꞌu
13 Tawamhã awẽ bâtâ na Mozési ma tô dama nhamra, niha na te te dama arowairébé da hã. Taha ré ma tô mararé hawim haré, ãma imarazéb u hã tihâiba, te te dama arowairébé ré.
14 Tawamhã Zetru, Mozési, uburé marĩ te te dama iꞌmanharĩzé te te ꞌmadâꞌâ wamhã, ma tô tãma tinha ãne:
— E marĩ da, ma tô ãne hã iꞌmanha. E marĩ da, ma tô duré asiwaprosi marĩ na hã dama iꞌarowairé. Uburé hâiwi idasimasam norĩ mararé hawim haré, marazéb u hã ma tô dahi zé ãna dasiwi aiꞌuirĩ ni.
15 Tawamhã Mozési ma te ãma tãma waꞌrã ãne:
— We ĩzô danhopré wa, ꞌRe ihâimana uꞌâsi mono marĩ te te sima iwẽzé hã da te waihuꞌu zaꞌra da.
16 Niꞌwam norĩ, marĩ na sisada ihâimana zahuré hã, te za we ĩtẽme tineb zahuré, te ãma tãma rowairébé zahuré da, iꞌuwaibaba na. Tawamhã wa za duré ꞌRe ihâimana uꞌâsi mono nhimiroti na hã uburé ãma tãma rowasuꞌu zahuré za.
17 Tawamhã Zetru, te tãma tinha ãne:
— Marĩ iꞌmanharĩ hã, isarinai õ di.
18 Ãne wamhã, aiwasutu uptabi di za. Duré asiré aꞌuwẽ norĩ zama wasutu uptabi zaꞌra di za. Ã hã romhuri hã pire uptabi di, asiwaprosi iꞌmanharĩ da hã.
19 Awaꞌawi na hã te za ĩwapa, aima ĩnhimirotizém na hã. Tawamhã ꞌRe ihâimana uꞌâsi mono si te za aipawapto za! A hã danhibꞌihâꞌa na te tô robꞌuwaibaba na si ꞌRe ihâimana uꞌâsi mono nhoꞌremhã ꞌre aihâimana mo. Te duré tô robꞌuwaibaba na si niha hã date romreme mono hã tãma ꞌre iꞌaꞌwapéi mo.
20 Tawamhã a hã te za ꞌRe ihâimana uꞌâsi mono nhimiroti na hã ãma tãma ꞌre iꞌarowasuꞌu mo. Duré te za ãma tãma ꞌre iꞌazaprĩ mo isimiroti na hã, za marĩ te te ꞌre iꞌmanharĩ zaꞌra mono zéb da hã, duré niha na za ꞌre ihâimana zaꞌra mono zéb da hã.
21 Te za niꞌwam norĩ aibâ marĩ tãma iꞌmanharĩ waihuꞌu pe hã ipisutu zaꞌra, danhibꞌihâꞌa na dama ꞌre hâimana zaꞌra mono da hã, miu na dahâiba norĩ nhibꞌihâꞌa da hã, 100 na, 50 na, duré 10 na. Aibâ norĩ ꞌRe ihâimana uꞌâsi mono te te ꞌre iwazé pese zaꞌra mono hã, dama iꞌumnhasi zaꞌẽtẽ zaꞌra norĩ, sena na ꞌre ihâimana zaꞌra mono hã.
22 Ta norĩ si te za marĩ na hã te te dama ꞌre rowairébé zaꞌra. Duré te za dama ipire si niha na romreme hã te te aima ꞌre ãwisi zaꞌra. Dama iwapu norĩ na si te za tô õ norĩ hã niha na marĩ na te te dama ꞌre rowairébé zaꞌra. Ane wamhã, te za tô aima tiwapu za. E marĩ wa. Õ norĩ hã te za romhuri ipire na hã te te siwi ꞌre aipawapto.
23 Ane hã a hã ꞌre ꞌmanharĩ mono wamhã, duré ꞌRe ihâimana uꞌâsi mono ãne hã te te aima pisutu wamhã, te za asiptete na sada mono hã ꞌre aihâimana mo. Tawamhã te za uburé dama ꞌre iꞌarowairébé mono zéb ré apâ danhorõwa u hã dato sina da te dasina ꞌre siri zaꞌra za.
24 Tawamhã Mozési, Zetruhu nhimiroti na te te ãma sazei wa,
25 ma tô Izaraéu nhihudu norĩ ꞌremhã aibâ norĩ marĩ tãma iꞌmanharĩ waihuꞌu pese zaꞌra hã pisutu zaꞌra. Tahawa, miu na dahâiba norĩ nhibꞌihâꞌa da hã, 100 na dahâiba norĩ nhibꞌihâꞌa da hã, 50 na dahâiba norĩ nhibꞌihâꞌa da hã, duré 10 na dahâiba norĩ nhibꞌihâꞌa da hã, ma tô oto sõré.
26 Tawamhã ta norĩ hã, marĩ na te te dama ꞌre irowairébé zaꞌra mono na hã, ma tô ãma ꞌre hâimana uꞌâsi zaꞌra. Niha hã marĩ dama ipire si ma tô Mozésihi ma hã niha na romreme hã te te tãma ꞌre ãwisi zaꞌra. Niha hã marĩ iwapu na si, ma tô õ norĩ hã ꞌrâwi te te dama ãma ꞌre rowairébé zaꞌra.
27 Tawamhã Mozési norĩ timaprebaba me sisawi zahuré wamhã, ma tô apâ tinhiptiꞌai u hã mo, Zetru hã.
Ĩwaꞌõtõ piꞌreba watsuꞌu mono
^ 18:4 Eriézé hã hebreu norĩ mreme na “ꞌRe ihâimana uꞌâsi mono ma tô ĩpawapto.” aiwa prã na ne iwapari na hã
