Ezodu 19:1-25
19 19:1-2 Tawamhã Izaraéu nhihudu norĩ, ma tô Refidĩ na romnhisi hawimhã aiꞌabaꞌré. Ezitu hawi iwairébézém na siꞌubdatõ aꞌamo ãma siꞌutõrĩ zaꞌra pari, tô taha bâtâ na ma tô aꞌubuni wi rop si ꞌre irosaꞌwari mono u hã aihutu, Sinaꞌi ẽtẽ ꞌrãihâ zahâpâ u hã. Tame ma tô isahâpâ ꞌri hã te te sima sõré.
2 ꞌMadâꞌâ 19:1
3 Tawamhã Mozési, ꞌRe ihâimana uꞌâsi mono te te sõpẽtẽ da, ma tô ẽtẽ na saiꞌu. Tawamhã Uburé Danhibꞌapito ma tô ẽtẽ nhisi hawi ꞌmahâ, Mozési hã. Ãne te tãma tinha:
— Zacoho nhihudu norĩ ma, te za tãma inharĩ zaꞌra, Izaraéu nhihudu norĩ ma, ãne:
4 “Wa hã Uburé Danhibꞌapito, ezipsiu norĩ ma, te iꞌmanharĩzé ma tô atõmo na a norĩ waꞌwa hã iꞌmadâꞌâ zaꞌra waꞌwa. Siꞌõmo wawẽ tipaihi na tiꞌra te te ꞌre iꞌupari zaꞌra mono ne, ꞌrâwi te we ĩsitẽme iꞌasimroi waꞌaba mono zéb zama ma tô atõmo na hã iꞌmadâꞌâ zaꞌra waꞌwa.
5 Ãne ãhã na hã wa za aima waihuꞌu zaꞌra waꞌwa. A norĩ waꞌwa hã ꞌre ĩwapari pese zaꞌra waꞌaba mono wamhã, duré ĩnhimiroti na ãma ꞌre uwaimrami zaꞌra waꞌaba mono wamhã, ĩnhibꞌaꞌuwẽ te za ĩma ꞌre aihâimana zaꞌra waꞌaba mo. Ropâ uburé ꞌre idahâimana zaꞌra mono, tô ĩte hã. Tane nherẽ, a norĩ waꞌaba si te za tô ĩnhibꞌaꞌuwẽ na ĩma ꞌre aihâimana zaꞌra waꞌaba mo, te ĩsima aipisutu zaꞌra waꞌaba wa.
6 A norĩ waꞌwa aimawi te za ĩnhibꞌaꞌuwẽ na ĩma si ꞌre aihâimana zaꞌra waꞌaba mo, sasedoti na ĩma ꞌre romhuri zaꞌra waꞌaba mono da.” Ãne te za Izaraéu nhihudu norĩ ma irowasuꞌu zaꞌra.
7 Tawamhã Mozési ma tô apâ ẽtẽ na hã siꞌra. Tahawa, dama iꞌrãnhoꞌõmo norĩ zô te hâ, Uburé Danhibꞌapito te te tãma iwaihuꞌuzé hã te te tãma wasuꞌu zaꞌra da.
8 Tawamhã uburé ma tô aiwapsi ãma sadaꞌâbâ zaꞌra ni ãne:
— Uburé Danhibꞌapito te te iwaihuꞌuzé hã, wa za tô wasiwi ꞌmanharĩ ni uburé.
Tawamhã Mozési, da te ãma isadaꞌâbâ zaꞌra zém na hã, ma tô Uburé Danhibꞌapito ma hã ãma tãma siri apâ.
9 Tahawa, õ hã te duré Mozésihi ma tinha ãne:
— Wa te wasima irobzanhamrizé da te wapari zaꞌra wa, ta hawim haré oto da te dasiwi ꞌre aiꞌumnhasi mono da hã, wa za hâiwa nhirõno iꞌrãdâꞌâ hawi aima tinha.
Tawamhã Mozési, da te ãma isadaꞌâbâ zaꞌra zé, te Uburé Danhibꞌapito ma hã wasuꞌu uburé.
10 Uburé Danhibꞌapito te duré tawamhã tãma tinha ãne:
— Maꞌãpé aimorĩ, dama nharĩ zaꞌra da hã, ã bâtâ na duré awẽmhã dasipese zaꞌra da, ĩꞌãma idawata zaꞌra zéb da hã. Duré daꞌuza hã te za hâꞌupsõ zaꞌra ni za.
11 Tawamhã awẽb amo na da, te za danhimire sina tahâimana zaꞌra ni. Taha bâtâ na wa za Sinaꞌi na ẽtẽ ꞌrãihâ nhisi u hã siꞌra, za da te dasiwi ĩꞌmadâꞌâ da hã.
12 Maꞌãpé duré ẽtẽ zahâpâi baba iwawi na hã ãma uirĩ na, ãma dazaihâ zaꞌra tõ da, iwawizém na hã. Duré dama nharĩ zaꞌra na ẽtẽ na daꞌmazaiꞌuri tõ da, duré ꞌrâwimhã itẽme daꞌmaiwisi tõ da. Niꞌwa duré tipara na te te upi wamhã, za da te dasiwi wĩrĩ õꞌumnhasite.
13 Niꞌwa, tinhibꞌrata na hã te te upi õ di za. Ẽtẽ na, niha wamhã, duré tiꞌi na te za dasiwi wĩrĩ ni za. Ãne te za dama iꞌmanharĩ zaꞌra waꞌwa, abaze norĩ ma zama. Danhimnhihârâzé hârâ wapsi te za ẽtẽ u hã dasina rotété zaꞌra ni za.
14 Tawamhã Mozési ẽtẽ hawi te te siꞌrai wamhã, ma tô ꞌRe ihâimana uꞌâsi mono ãma dawata zaꞌra da, dasipesezé hã dama tiꞌru. Tahawa, ma tô dasiꞌuzazé hã da te hâꞌupsõ.
15 Tawamhã Mozési te dama tinha ãne:
— Maꞌãpé awẽ amo na da, asimire sina aihâimana zaꞌra waꞌaba, piꞌõ na asiwaihuꞌu na aihâimana zaꞌra waꞌaba ãna.
16 Tawamhã siꞌubdatõ bâtâ ãma mararé ma tô tãirãrã hã, duré tã siꞌubuzi hã watobro. Hâiwa ꞌrãdâ hã ma tô duré ẽtẽ nhisiwimhã sihâiꞌré. Tahawa, ma tô danhimnhihârâzé hârâ hã wapari zaꞌra ni. Tawamhã uburé ꞌri nhoré ãma idahâimana zaꞌra hã ma tô dapahi te tarẽrẽꞌẽ zaꞌra ni.
17 Tawamhã Mozési ꞌri nhoré hawimhã, ꞌRe ihâimana uꞌâsi mono da te dasiwi sõpẽtẽ da, te te oto danhimroi mono wamhã, ma tô ẽtẽ zahâpâ mazahâri zaꞌra ni.
18 Tahawa, romnhizé ma tô Sinaꞌi na ẽtẽ nhisi hã upsi. E marĩ wa. Uburé Danhibꞌapito ẽtẽ nhisiwi unhama waꞌwa te te ãma siꞌrai wa. Romnhizé hã te hâimo siꞌréi mono, robzebrezém hawi unhama nhizé ꞌre isiꞌréi mono ne. Ãhã wa, ma tô aihĩni tãma tarẽrẽꞌẽ zaꞌra ni.
19 Tawamhã danhimnhihârâzém hârâ hã ma tô hârâ nhiptete mono. Tawamhã Mozési te tinha. Ãhã wa, ma tô ꞌRe ihâimana uꞌâsi mono hã tãirãrãꞌã siwaꞌroꞌo sadaꞌâ.
20 Tawamhã Uburé Danhibꞌapito Sinaꞌi na ẽtẽ nhisi u ma tô siꞌra. Te te siꞌrai wamhã, ma tô Mozési hã ꞌmahâ, itẽme morĩ da ꞌrâwi. Tahawa, te te itẽme saiꞌuri wamhã,
21 ma tô Uburé Danhibꞌapito tãma tinha ãne:
— Dapoꞌre puꞌu zaꞌra da hã datẽme siꞌra na, tiꞌai wawizém na hã ãma dazaihâ zaꞌra tõ da, da te dasiwi ĩꞌmadâꞌâ da hã. Ãma dazaihâ zaꞌra wamhã, te za daꞌahâ na tadâꞌâ zaꞌra ni.
22 Sasedoti norĩ zama poꞌre puꞌu zaꞌra na, ta norĩ hã duré sipese zaꞌra da, ꞌrâwi ĩtẽme te te sina rotété zaꞌra da. Dame sipese zaꞌra õ wamhã, wa za uprosi za.
23 Tawamhã Mozési, Uburé Danhibꞌapito ma, te tinha ãne:
— Ẽtẽ u hã dasiꞌabaꞌréi õ di za. E marĩ wa. A hã ma tô wama iwaihuꞌu zaꞌra, ã hã ẽne iwazéb zahi uptabi na ihâiba hã wa te wasiwi wazéb da. Ma tô duré iꞌru, isahâpâi baba tiꞌai wawizé hã hâimana da.
24 Uburé Danhibꞌapito, ma te ãma sadaꞌâ tawamhã ãne:
— Aꞌâ tô siꞌra na. Tawamhã te za Arãhã me we apâ ẽtẽ na isaiꞌuri ꞌwa za. Tane nherẽ, sasedoti norĩ, aꞌuwẽ norĩ me hã, tiꞌai wawi na hã we ãma zaihâ zaꞌra tõ, ĩhâimanazéb u we ĩtẽme te te isaiꞌuri zaꞌra da hã. Ãnei õ wamhã, wa za uprosi.
25 Tawamhã Mozési, idahâimana zaꞌra zéb u te te siꞌrai wamhã, ma tô ꞌRe ihâimana uꞌâsi mono te te inharĩzé hã tãma wasuꞌu zaꞌra.
