Ezodu 2:1-25
2 Tawamhã Levihi nhihudu zahuré ma tô sina timro zahuré aibâ norĩ hã, piꞌõi me.
2 Tawamhã piꞌõ wasã wamhã, ma tô iꞌra hã tãma podo. Tahawa, ina ꞌwatébrémi na te te ꞌmadâꞌâ wamhã, iwẽ uptabi, iꞌmadâꞌâ ze. Tahawa ma tô siꞌubdatõ aꞌamoi ꞌremhã dawi simiꞌu.
3 Tawamhã te te oto dawi simiꞌuri waihuꞌu õ wa, ma tô ina, séꞌwazaꞌare ne nhamri siꞌõno hã tiꞌâ. Tahawa, isapu hã ma tô te te sada anhito wedewaꞌu tom na, â sisisi tõ da, siꞌõtõ ne ꞌre. Tawamhã ma tô tiꞌra hã tisẽ, iwa. Taha pari ma tô iré tihi, â zadaꞌré ꞌrõꞌrõ waꞌwa.
4 Tahawa, te ꞌwatébrémi hidiba romhâ hawi ꞌmadâ, niha marĩ tãma ihâimana zô.
5 Tawamhã Apito Faraꞌoho ꞌra sipiꞌõ te âi ba mo, siꞌupte da. Taha ré, tãma romhuriꞌwa norĩ sipiꞌõ te âibabamhã ꞌre nomro. Tawamhã siꞌõno ꞌrõꞌrõ wazari ꞌre iwara hã ma tô tisã, Apito Faraꞌoho ꞌra hã. Te te sãmri wi, ma tô tãma iromhuriꞌwa norĩ ma ꞌru zaꞌra, sô ꞌmaimorĩ da.
6 Tawamhã Apito Faraꞌoho ꞌra, ma isidâzé saꞌo. Te te saꞌo wamhã, ma tô aiꞌutére hã ꞌmadâ, wawai ré. Tahawa ma tô ãma tipẽꞌẽzé. Tawamhã te tinha ãne:
— Ã hã ꞌwatébrémi, Izaraéu nhihudu ꞌra.
7 Tawamhã aiꞌuté hidiba te ãma sadanha, apito Faraꞌoho ꞌra hã ãne:
— E asima wẽ õ di, Izaraéu nhihudu nhipiꞌõ zô aima ĩmorĩ da hã, te te aima ꞌmaiwapsõmri da, duré te te aꞌâ aima ꞌmaiprédub da.
8 Tawamhã ma te ãma sadaꞌâ ãne:
— Maꞌãpé, sô aimorĩ, we ꞌmazaprõni da.
Tawamhã azarudu aiꞌuté hidiba ma tô sô mo. Tahawa, aiꞌuté ꞌwatébrémi na uptabi hã ma tô itẽmemhã saprõ, apito ꞌra u.
9 Tawamhã apito Faraꞌoho ꞌra te aiꞌuté na uptabi ma tinha ãne:
— Aiꞌuté ꞌwatébrémi hã maꞌãpé ãma subzari, ĩma warahu da aꞌâ. Tawamhã wa hã wa za iwarahuzém na asimiromhuri hã aima waꞌâ. Tawamhã ma tô ina hã subza apâ, tinhorõwa u. Duré ma tô warahu oto, apito ꞌra ma.
10 Tawamhã ꞌwatébrémi oto prédu wamhã, ma tô apito ꞌra u oto saprõ, te te ãma tãma irotizéb zarina te te tãma sõmri da oto. Tahawa, ma tô ãma tiꞌra oto, tiꞌra uptabi nai õ nherẽ. Ma tô sisi, Mozési* na. Tawamhã te sima tinha ãne:
— Wa hã wa tô â hawimhã waze, aiꞌutére hã. Tahawa, wa tô sisi, Mozési na.
Mozési, Ezitu hawi isimanizé wasuꞌu
11 Tawamhã Mozési ma tô oto siꞌaibâ. Tahawa te nimahã bâtâ na tisiré norĩ te te sabu da oto mo. Morĩ wamhã, ma tô abꞌmadâ, romhuri pire na te te robꞌmaꞌwamarĩ ré hã. Tahawa ezipsiu norĩ siré hã, isiré Izaraéu nhihudu te te iꞌmaiꞌazâri zama hã ma tô ꞌmadâ.
12 Tawamhã Mozési siꞌwawi niꞌwai õ zô, te te ꞌre robꞌmadâꞌâ mono wamhã, niꞌwa hã te te ꞌmadâꞌâ õ di. Tahawa ma tô tiwĩ, ezipsiu hã. Te te wĩrĩ wamhã, supara na ma tô hâiba zuwa, da te dasiwi sãmri tõ da.
13 Tawamhã awẽm na rowaꞌa wi apâ te te sina siri wa, ma tô Izaraéu nhihudu norĩ isiꞌahâri hã ꞌmadâꞌâ zahuré. Tahawa tisiré te te iꞌazâri ma te tãma tinha ãne:
— E marĩ da, ma tô asiré nherẽ iꞌazâ.
14 Tawamhã te tãma tinha asa ãne:
— E ꞌwa hã ma tô wanhibꞌapito da hã waꞌãma ꞌre iꞌarowairebé mono da hã aipisutu. Duré e ma tô asima iwẽ, ĩwĩrĩ da, ezipsiu iwĩrĩ ne.
Tawamhã Mozési ma tô tipahi. Tahawa te tipẽꞌẽ na ꞌrâwi sima tinha ãne: “Ma tô oto dasiwi ĩꞌupsibi me ni, te iꞌmanharĩ wasété zém na hã.”
15 2:15-16 Tawamhã apito Faraꞌo, Mozési te te idaꞌmaiwĩrĩzé hã ma tô waihuꞌu. Tahawa ma tô ãma sima rosaꞌrata, te te wĩrĩ da. Tane nherẽ, tahawa Mozési ma tô aimani. Simani wamhã, ma tô mo, Midiã ãma ꞌre hâimana mono da.
Tawamhã Zetru sasedoti, te Midiã na romnhisi ãma ꞌre sãmra, 7 na iꞌra sipiꞌõ hã. Tawamhã nimahã bâtâ na Mozési â zô abꞌre ꞌrata sãmra ré, ma tô iꞌra norĩ â te te amrami zaꞌra da hã aiꞌabaꞌré, poneꞌẽrebâ te te ꞌre iꞌâhuri mono zéb ꞌre te te â hã tãma azaꞌwari zaꞌra da, timama nhimizama ma.
16 ꞌMadâꞌâ 2:15
17 Tawamhã poneꞌẽrebâ ꞌmadâꞌâꞌwa norĩ hã ma tô duré ãma aihutu, â zô abꞌre u. Sihutu wamhã, ma tô timreme te te tãma ꞌmorõwĩrĩ zaꞌra sina piꞌõ norĩ siꞌabaꞌré da â nhiti sãmra. Tane nherẽ, Mozési ma tô ãma sisaprĩ zaꞌra, piꞌõ norĩ ãma, poneꞌẽrebâ ꞌmadâꞌâꞌwa norĩ wi. Tahawa ma tô nasi tãma amrami zaꞌra â hã, poneꞌẽrebâ te te iꞌâhuri da hã.
18 Tawamhã piꞌõ norĩ, imama ꞌre isãmra mono zéb u apâ sihutu wamhã, ma tô imama hã sadanharĩ zaꞌra ãne:
— Oro ma we apâre aihutu ꞌwa.
19 Tawamhã ma sadaꞌâbâ zaꞌra ãne:
— Ezipsiu norĩ siré hã ma tô waꞌãma sisaprĩ zaꞌra, poneꞌẽrebâ ꞌmadâꞌâꞌwa norĩ wi. Tahawa, ma tô nasi â hã wama amrami zaꞌra asimizama ma, te te iꞌâhuri da hã.
20 Tawamhã Zetru imama zaꞌra hã te ãma sadanharĩ zaꞌra ãne asa:
— E mame te tawamhã nhamra. Zapre we asiwi saprõni aba õ di. Sô aihârâ aba, we morĩ da, wame sa zaꞌra da.
21 Tawamhã Zetru, Mozési te hâiba waptẽ, iꞌrata ꞌre hâimana mono da. Tahawa, ma tô sina saze, tô iꞌrata ꞌre hâimana mono da hã. Tawamhã Zetru ma tô tiꞌra Zipora na isisi Mozésihi ma tisõ, ãma mro da.
22 Tawamhã oto ꞌra wamhã, ma tô sisi Mozési hã, Gésõ na. Te te sisi wamhã, ãne te tinha:
— Wa hã ĩsiré aꞌuwẽꞌõ nhiptiꞌai ãma wa oto ꞌre ĩhâimana.
23 Tawamhã ãma wahub ahâ pari, ma tô Ezitu te apito hã dârâ. Tane nherẽ, te iꞌuirĩ na zahadu Izaraéu nhihudu norĩ hã te te ꞌre robzépata zaꞌra, ezipsiu norĩ te te ꞌre iwadaꞌuri pese zaꞌra mono zéb zarina. Tahawa te mreme ꞌrãihâ na ꞌRe ihâimana uꞌâsi mono wi, te te ꞌre rowaptẽrẽ zaꞌra, te te ꞌre pawaptob zaꞌra mono da hã. Tahawa, ma tô isimirowaptẽrẽ zaꞌra zé hã itẽmemhã ꞌre simasisi, ꞌRe ihâimana uꞌâsi mono u.
24 Tawamhã ꞌRe ihâimana uꞌâsi mono, Izaraéu nhihudu norĩ ꞌre iwazidi zaꞌra mono zé hã ma tô wapa. Tahawa Abraꞌãhã ma, Izaquihi ma, duré Zacoho ma, tinhimiropisutu zahi te te iꞌmanharĩzém na hã, ma tô sina poꞌre puru.
25 Izaraéu nhihudu norĩ, pawaꞌâbâ ãna te te ꞌre iromhuri zaꞌra mono zé hã ma tô ꞌmadâ. Tahawa oto ãma hâtâꞌâ zaꞌra di.
Ĩwaꞌõtõ piꞌreba watsuꞌu mono
^ 2:10 Mozési hã hebreu norĩ mreme na “wa tô waze” aiwa prã na ne iwapari na hã
