Ezodu 24:1-18
24 Tawamhã Uburé Danhibꞌapito te Mozésihi ma tinha ãne:
— A hã, Arã, Nadabe, Abiu, duré 70 na Izaraéu nhihudu nhibꞌihâꞌa norĩ me hã, te za ẽtẽ na isaiꞌuri zaꞌra waꞌwa, ĩhâimanazéb u we ĩtẽme aiꞌabaꞌréi waꞌaba da. Tawamhã zahadu romhâ na prãi ré te za aihiꞌrãtitõ ĩꞌãma aiwata zaꞌra waꞌaba da hã asimroi waꞌwa.
2 Mozési, aiwétési te za ꞌrâwimhã ĩtẽmemhã aiwi; asiré norĩ hã mare di za. Duré aꞌuwẽ norĩ te te asiré hã saiꞌuri zaꞌra õ di za, ẽtẽ na hã.
3 Tawamhã Mozési ma tô mo, Uburé Danhibꞌapito mreme uburé isimiroti hã te te dama waihuꞌu da. Tahawa, Izaraéu nhihudu norĩ, ma tô simisutu uburé ãma sadaꞌâbâ zaꞌra ãne:
— Uburé wa za ꞌmanharĩ zaꞌra ni, Uburé Danhibꞌapito marĩ te te wama iwaihuꞌu zaꞌra zé hã.
4 Tawamhã Mozési, Uburé Danhibꞌapito nhimiroti na ma tô uburé ãma robꞌuiꞌéré. Tawamhã awẽ bâtâ na mararé ẽtẽ ꞌrãihâ zahâpâ ma tô danhimizama zatazéb da, sisiwipsi ẽne hã saꞌra. Te te saꞌra wamhã, ma tô duré 12 na ẽtẽ waré hã hâiwi te te anhoré, Izaraéu nhihudu norĩ hâiba zaꞌrata mono bâ.
5 Tawamhã Mozési, niꞌwam norĩ aiꞌreputu ma, Uburé Danhibꞌapito ma danhoprubzéb da, danhimizama te te zata zaꞌra da, ma tô tãma ꞌru zaꞌra. Powawẽ ibaꞌõmo zama ma tô tãma ꞌru zaꞌra, danhoprubzé ãma irowẽ zaꞌẽtẽ zé te te siwi simro da.
6 Tawamhã Mozési, danhimizama wapru aiwa ãma isipoꞌo na ma tô pizaꞌa ꞌre nhoꞌa ꞌreptõ wa tisẽ. Tawamhã ma tô iꞌapoꞌo amo hã ẽtẽ zaꞌra nhisiwimhã saꞌwa.
7 Taha pari, Uburé Danhibꞌapito tinhibꞌaꞌuwẽ norĩ me isisaze zaꞌra zém na ibaihâ nhisi ma tô tiꞌâ, isimiroti na robꞌuiꞌéré ré hã. Te te âri wamhã, mreme ꞌrãihâ sina te dama sõré. Tawamhã te ãne nharĩ zaꞌra ni:
— Uburé Danhibꞌapito mreme hã wa za wa te ꞌre wapari pese zaꞌra za. Wa za uburé wa te ꞌre ꞌmanharĩ zaꞌra, te te wama iꞌru zaꞌra zé hã.
8 Tawamhã Mozési, danhimizama waprui ré pizaꞌa ꞌre nhoꞌa ma tô tiꞌâ. Ma tô duré danhisi te te aꞌa. Taha sina te dama tinha ãne:
— Ã hã danhimizama wapru, Uburé Danhibꞌapito me iꞌasisaze zaꞌra waꞌaba nhitobzé, tinhimiroti te te aima hiri zaꞌra waꞌaba wamhã.
9 Tawamhã Mozési, Arã norĩ me, Nadabe, Abiu, duré 70 na Izaraéu nhihudu nhibꞌihâꞌa norĩ me ma tô ẽtẽ na saiꞌuri zaꞌra.
10 Tawamhã ma tô Izaraéu nhihudu norĩ te, ꞌRe ihâimana uꞌâsi mono hã ꞌmadâꞌâ zaꞌra. Ipara zahâpâmhã ẽtẽ waipo iꞌuzé safira na iwamri ꞌmanharĩ na waptâzé hã, hâiwa uzé ne hã.
11 Tawamhã ꞌRe ihâimana uꞌâsi mono hã, Izaraéu nhihudu nhibꞌihâꞌa norĩ hã te te uprosi õ di. Ta norĩ hã ma tô ꞌRe ihâimana uꞌâsi mono hã ꞌmadâꞌâ zaꞌra. Taha pari simisutu ma tô duré siré tisa hã tihu. Ma tô duré siré tisa hã simihâri zaꞌra.
Mozési ẽtẽ nhisi ãma ihâimanazé wasuꞌu
12 Tawamhã Uburé Danhibꞌapito Mozésihi ma, te tãma tinha ãne:
— Ĩhâimanazéb u, maꞌãpé ẽtẽ na we ĩtẽme saiꞌuri, ãme aihâimana da. Wa hã ĩnhimirotizém na te irobꞌuiꞌérézéb ré ẽtẽ baihâ po hã wa za aima tisõ, ãma dama ꞌre iroti mono zéb da hã.
13 Tawamhã Mozési, Zozué tipawaptoꞌwai me ma tô oto sima robꞌupsãtã pese zahuré. Tawamhã Mozési hâiba si ma tô ẽtẽ ꞌrãihâ iwazéb zahi na hã saiꞌu.
14 Mozési ma tô aré dama iꞌrãnhoꞌõmo norĩ ma hã tãma nharĩ zaꞌra ãne:
— Ãme asimipari sina aihâimana zaꞌra waꞌaba, we apâ iwanebzéb u, wa norĩ hã. Arã norĩ, Hur me hã te za asiré waꞌaba tihâimana zahuré. Tahawa niꞌwa marĩ na romreme na da te tãma rowairébé da wamhã, te za õ norĩ ma hã ãwisi ni.
15 Tawamhã Mozési, Sinaꞌi na ẽtẽ nhisi na ma tô oto saiꞌu. Te te saiꞌuri wamhã, ma tô hâiwaꞌa ẽne hã suwa.
16 Tawamhã Uburé Danhibꞌapito hâiba na rowaꞌa iwẽ uptabi hã ma tô ẽtẽ u hã siꞌra. Tahawa, 6 bâtâ ꞌre, ma tô hâiwaꞌa ẽne hã upsi. Duré 7 bâtâ ãma ma tô Uburé Danhibꞌapito hâiwaꞌa hawi Mozési hã ꞌmahâ.
17 Izaraéu nhihudu norĩ ma hã, Uburé Danhibꞌapito hâiba na rowaꞌa hã uzâ iroꞌo pese ne, ma te tãma ãma sihâiꞌré zaꞌra, ẽtẽ nhisiwimhã.
18 Tawamhã Mozési ẽtẽ na te te saiꞌuri ré, ma tô oto hâiwaꞌa waꞌwa u hã ãzé. Tahawa, ẽtẽ ãma 40 bâtâ na, duré 40 mara na ma tô tihâiba.