Ezodu 3:1-22
3 Tawamhã Mozési te oto poneꞌẽrebâ te te ꞌre aꞌmadâꞌâ, timaprebaba ma, Zetru sasedoti Midiã na romnhisi ãma ꞌre isãmra mono ma. Tawamhã nimahã bâtâ na ma tô poneꞌẽrebâ te te simro, tiꞌa zadaꞌré amoi u, rop si ꞌre irosaꞌwari mono waꞌwai baba. Taha wamhã, ẽtẽ ꞌrãihâ iwazéb zahi, Sinaꞌi* na isisi na ꞌre ihâimana mono u ma tô oto wi.
2 Tawamhã tame hâimana ré, ma wede zapore hã ãro, Mozésihi ꞌrata. Roꞌo nherẽ, zata õ di. Taré te ãro. Taha waꞌwa te ꞌRe ihâimana uꞌâsi mono hã za. Mozésihi ma, sihâiꞌré da, te iwaꞌwab za.
3 Tawamhã Mozési te sima tinha: “E niha wede roꞌo nherẽ, zata õ di. Wa za pé itẽme ĩsina rotété, te ꞌmadâꞌâ da.”
4 Tawamhã Uburé Danhibꞌapito, Mozési ꞌrâwi itẽme te te sina irotété na te te ꞌmadâꞌâ wamhã, ma tô wede iroꞌo waꞌwa hawi ꞌmahâ ãne:
— Mozési! Mozési!
Tawamhã awaꞌawi ma sadaꞌâ ãne, Mozési hã:
— E marĩ. Ãhãta, ãme wa za.
5 Tawamhã ꞌRe ihâimana uꞌâsi mono hã te tãma tinha ãne:
— Tame asimizazâri. ꞌRâwi we ĩtẽme aimorĩ tõ! Maꞌãpé aiparaꞌuza hã sani na. E marĩ wa. Ta tiꞌa iwa iꞌasa hã iwazéb zahi wa.
Te duré tãma nharĩ na sahu ãne, ꞌRe ihâimana uꞌâsi mono hã:
6 — Wa hã aihiꞌrata norĩ nhibꞌapito ꞌRe ĩhâimana uꞌâsi mono, Abraꞌãhã nhibꞌapito, Izaquihi nhibꞌapito, duré Zacoho nhibꞌapito.
Tawamhã Mozési ma tô siꞌubu zuwa, pahi wa, ꞌRe ihâimana uꞌâsi mono te te iꞌmadâꞌâ da hã.
7 Tawamhã Uburé Danhibꞌapito te ãne duré tãma tinha:
— Ezitu ãma ĩnhibꞌaꞌuwẽ norĩ ma, da te tãma ꞌre irobꞌmanharĩ wasété zaꞌra mono zém na hã wa tô te ꞌre ꞌmadâꞌâ zaꞌra. Duré tiwadaꞌuriꞌwa norĩ wi, da te pawaptob zaꞌra da, te te ꞌre irowaptẽrẽ zaꞌra mono zé hã wa tô te ꞌre wapari. Wa hã ĩma waihuꞌu pese di, te te tô ꞌre irobzépata zaꞌra mono zé hã.
8 Tahawa wa tô we siꞌra, ezipsiu norĩ siptete na ꞌre ihâimana zaꞌra mono hawi te dawazere da, ta hawi duré tiꞌa ĩsaꞌẽne iwẽ u te danhimro mono da, tiꞌa iwẽ ãma cananeu norĩ, hitita norĩ, amoreu norĩ, perizeu norĩ, heveu norĩ, duré zebuzeu norĩ iwa ꞌre ihâimana zaꞌra mono zéb u.
9 Sena na da te pawaptob zaꞌra da, ĩnhibꞌaꞌuwẽ nhimirowaptẽrẽ zahi zaꞌra zé hã wa tô te ꞌre wapari. Ezipsiu norĩ te te tãma ꞌre irobꞌmanharĩ wasété zaꞌra mono zém na hã wa tô duré te ꞌre ꞌmadâꞌâ zaꞌra.
10 Tahawa maꞌãpé aimorĩ. Wa hã wa za Ezitu te apito u hã asatõ, ĩnhibꞌaꞌuwẽ Izaraéu nhihudu norĩ, isiptiꞌai hawi sani zaꞌra da hã.
11 Tane nherẽ, ãne te Mozési hã tãma tinha:
— E ꞌwa hã wa hã bété, Ezitu te apito u, ĩmorĩ da hã, ta hawi za Izaraéu nhihudu norĩ, te isani zaꞌra da hã.
12 Tawamhã ꞌRe ihâimana uꞌâsi mono, ma duré ãma sadaꞌâ ãne:
— Wa hã wa za asiré ĩhâiba. Niwa nimahã na Ezitu hawi ĩnhibꞌaꞌuwẽ awazere wamhã, a norĩ waꞌwa te za ã hã ẽtẽ ãma hã ĩꞌãma ꞌre aiwata zaꞌra waꞌaba mo. Tawamhã ãne na te iꞌasatõrĩzém na te za a hã tô sena na hã iwaihu.
13 Tane nherẽ Mozési, te ꞌRe ihâimana uꞌâsi mono ma ãne tãma tinha:
— Izaraéu nhihudu norĩ u ĩmorĩ wamhã, duré ãne te tãma rowasuꞌu zaꞌra wamhã: “Aihiꞌrata norĩ te, ꞌRe ihâimana uꞌâsi mono hã ma tô we atẽme ĩzatõrĩ zaꞌra waꞌwa”, te za siwi ĩzadanha, ãne: “E niha tawamhã isisi.” Tawamhã e niha wa za ãma tãma waꞌrãmi zaꞌra za.
14 Tahawa, ꞌRe ihâimana uꞌâsi mono te ãne sina tãma tinha:
— WA HÃ, tô WA HÃ ꞌRE ĨHÂIMANA UꞌÂSI MONO.
Te duré zahadu tãma tinha ãne:
— Te za duré tãma inharĩ zaꞌra za ãne: “Tô WA HÃ ꞌRE ĨHÂIMANA UꞌÂSI MONO, ma tô we atẽme ĩzatõrĩ zaꞌra waꞌwa.
15 Uburé Danhibꞌapito, ꞌRe ĩhâimana uꞌâsi mono aihiꞌrata norĩ te, Abraꞌãhã te, Izaquihi te, Zacoho te, ma tô we atẽme zaꞌra waꞌaba hã ĩzatõ. Taha nhisi hã te õne uꞌâ ꞌre hâimana. Tahawa, taha nhisi na te za õne uꞌâ a norĩ waꞌwa hã ãma ꞌre asipoꞌre puꞌu zaꞌra waꞌaba mo.”
16 Tawamhã taha pari te ꞌRe ihâimana uꞌâsi mono duré ãne tãma tinha:
— Aimorĩ, Izaraéu norĩ ma, iꞌrãnhoꞌu ꞌrãꞌõtõ da. Tawamhã te za ãne tãma ĩzadawa wasuꞌu zaꞌra. Wa hã Uburé Danhibꞌapito aihiꞌrata norĩ te, ꞌRe ihâimana uꞌâsi mono, Abraꞌãhã nhibꞌapito, Izaquihi nhibꞌapito, duré Zacoho nhibꞌapito. Wa tô aima ĩsihâiꞌré. Duré wa tô aima waihuꞌu, ãne na tãma ĩzadawa wasuꞌu zaꞌra da: “Wa hã ꞌre irobzépata zaꞌra waꞌaba mono zé hã wa tô te ꞌre ꞌmadâꞌâ. Duré ezipsiu norĩ te te aima ꞌre irobꞌmanharĩ wasété zaꞌra waꞌaba mono zé hã ĩma waihuꞌu pese di.
17 Wa hã wa tô rowairébé, Ezitu ãma da te tãma ꞌre irobꞌmanharĩ wasété zaꞌra mono zém hawi te sani zaꞌra da hã. Tahawa wa za te simro tiꞌai wẽ u, duré tiꞌa simarĩ pese na ꞌre isaꞌwari mono u, cananeu norĩ iwa ꞌre ihâimana zaꞌra mono zéb u, hitita, amoreu, perizeu, heveu, duré zebuzeu.”
18 — Tawamhã duré ãne tãma ĩzadaihuꞌu zaꞌra wamhã, te za ĩnhibꞌaꞌuwẽ norĩ aiwapari zaꞌra. Taha pari te za Izaraéu nhihudu norĩ ma iꞌrãnhoꞌõmo norĩ me hã aiꞌabaꞌréi waꞌwa, Ezitu te apito ma, nharĩ zaꞌra waꞌaba da hã. Tahawa, te za ãne tãma inharĩ zaꞌra waꞌwa za: “Uburé Danhibꞌapito, hebreu norĩ te ꞌRe ihâimana uꞌâsi mono, ma tô wama zaꞌra hã sihâiꞌré. Tahawa, wama rowairébé zaꞌra na, aꞌubuni wi rop si ꞌre irosaꞌwari mono u wasiꞌabaꞌré da. Tawamhã wasiꞌabaꞌréi ré te za siꞌubdatõ bâdâ hã waꞌãma tineb zaꞌra, Uburé Danhibꞌapito wate ꞌRe ihâimana uꞌâsi mono ma, wanhimizama zata na tãma ãma wanhoprub zaꞌra da hã.”
19 Wa tô waihuꞌu siro, Ezitu te apito ma, ꞌRe ihâimana uꞌâsi mono te te tãma pẽtẽ õ nherẽ, za te te aima iwaprosi zaꞌra waꞌaba õ na, aiwairébé aba da hã.
20 Tahawa wa za ĩnhiptete na ezipsiu norĩ ma robꞌmanharĩ wasété zaꞌra, te ãma hâ zaꞌra da hã. Taha parip si, te za apito Ezitu hawi aiwairébé aba da hã aima waprosi zaꞌra waꞌwa, azâmorĩ aba da oto.
21 — Tawamhã wa za duré ezipsiu norĩ ma ꞌmanharĩ zaꞌra, za te te aiwazéb zaꞌra waꞌaba da hã. Tahawa nimahã na oto aiwairébé aba da wamhã, asibꞌrata baba na hã aiꞌabaꞌréi waꞌaba õ di za.
22 Tahawa te za hâiba mono bâ Izaraéu nhihudu norĩ nhipiꞌõ, ezipsiu nhipiꞌõ norĩ isõrõwa ꞌre, ꞌre ihâimana zaꞌra mono wi hã, duré iwaptoma ꞌre ihâimana zaꞌra mono wi hã, marĩ hã, ẽtẽ waipo prã prata hã, ẽtẽ waipo pré oru hã, duré iꞌuza ãma ꞌre isiꞌuza zaꞌra mono da hã, iꞌra si aibâ norĩ hã, duré iꞌra sipiꞌõ norĩ hã tiwi tãma waptẽrẽ zaꞌra za. Tawamhã ãne te za ezipsiu norĩ wi isimarĩ hã tiwi iwaibu zaꞌra waꞌwa za.
Ĩwaꞌõtõ piꞌreba watsuꞌu mono
^ 3:1 Sinaꞌi hã Horebe na isisi amo hã.
