Ezodu 31:1-18
31 Tawamhã Uburé Danhibꞌapito te Mozésihi ma tinha ãne:
2 — Wa hã, Hur nhihudu hã Urihi ꞌra, Bezareu hã, Zudaha nhihudu hawi aꞌuwẽ hã wa tô pisutu,
3 ĩpẽꞌẽzani saꞌẽtẽ na te tãma sõmri da. Wa tô rowaihu hã, isipe hã, duré uburé marĩ te te ãma ꞌre iꞌabꞌmanharĩ waihuꞌu pese mono zé hã tãma tisõ,
4 ropodo te te ãma ꞌre iꞌabꞌmanharĩ mono zéb da hã, oru na hã, ẽtẽ waipo prã prata na hã, duré isiꞌuwazi waipo na hã.
5 Ẽtẽ nhihârizé, duré marĩ nhiꞌriti wa te te ꞌre iꞌazaꞌra mono da hã iwa, wa tô isimiromhuri nhipe hã tãma tisõ, wede umozéb da hã, duré uburé marĩ imono bâ tinhibꞌrata na te te ãma ꞌre iꞌabꞌmanharĩ mono zéb da hã.
6 Aisamatihi ꞌra, Aoliabe, Dãhã nhihudu hawi aꞌuwẽ hã wa tô duré pisutu, isiré te te ꞌre iromhuri mono da hã. Uburé marĩ tinhibꞌrata na te te ꞌre iꞌmanharĩ zaꞌra mono norĩ ma zama wa tô duré isimiromhuri waihuꞌu pese zaꞌra zé hã tãma sõmri zaꞌra, uburé te aima iꞌru hã te te ꞌmanharĩ zaꞌra da hã ãne:
7 Romhâ ꞌmanharĩ na ꞌri, ꞌre ĩhâimana mono zé hã, ĩnhimiroti ré ĩte wedehâꞌre hã, taha nhidâzé hã, duré uburé ꞌri ꞌre marĩ ꞌre ihâimana zaꞌra mono da hã,
8 wedeza hã, iwa marĩ ꞌre isimiꞌwara mono da hã, oru uptabi na robꞌuiwẽzé simaꞌwarazé, uburé isiré marĩ norĩ hã, duré danhoprubzéb da, wedewaꞌu isadaze na da te ãma ꞌre isazu zaꞌra mono zé hã,
9 danhoprubzéb da, danhimizama zatazé hã, uburé marĩ isiré ihâimana zaꞌra mono da hã, duré pizaꞌa ꞌre nhoꞌa isimaꞌwarazéb ré hã,
10 zazahâ ihâi baihâire hã, duré daꞌuza iwazéb zahi, sasedoti Arã norĩ, tiꞌra norĩ me ãma ꞌre isiꞌuza zaꞌra mono da hã, sasedoti na te te daꞌãma ĩma ꞌre romhuri zaꞌra mono da wamhã,
11 azeitona waꞌu to daꞌrã tiꞌizéb da hã, duré wedewaꞌu isadazei ro, ꞌRe ihâimana uꞌâsi mono te ꞌri ꞌre waꞌwa iwazéb zahi ãmab da hã. Uburé ã norĩ imono bâ, te aima ipisutu pese zéb zarina te za ꞌmanharĩ zaꞌra.
Sabadu romhuri ꞌrãsudu dawaꞌutuzé wasuꞌu
12 Tawamhã Uburé Danhibꞌapito Izaraéu nhihudu norĩ ma, te te tãma nharĩ zaꞌra da hã,
13 ma tô Mozésihi ma waihuꞌu ãne:
— Maꞌãpé sabadu hã ꞌre wazé pese zaꞌra waꞌaba mono, ĩwaꞌutuzé bâtâ wa. Ã hã a norĩ waꞌaba me iwasisaze zaꞌra zé hã te wasuꞌu, duré asihudu aba mono sidâpâsi, wa hã Uburé Danhibꞌapito ĩnhibꞌaꞌuwẽ da, te ĩsima iꞌaipisutu zaꞌra waꞌaba zém na asiwi ãma ꞌre ĩwaihuꞌu zaꞌra waꞌaba mono zéb da hã.
14 Tahawa, dawaꞌutuzé bâdâ hã ꞌre ꞌmadâꞌâ pese zaꞌra waꞌaba mono. E marĩ wa. Aima zaꞌra waꞌaba hã bâdâ iwazéb zahi na ꞌre hâimana mono wa. Duré niꞌwa hã te te ꞌre iwazé pese mono õ zarina, taha bâtâ na nherẽ, te te ꞌre romhuri mono wamhã, te za dasiwi hã wĩrĩ ni.
15 6 si bâtâ ꞌre, ꞌre iromhuri zaꞌra waꞌaba mono da hã te aima ꞌre hâimana zaꞌra waꞌwa. Tane nherẽ, bâdâ ipire te 7 bâtâ ãma dawaꞌutuzé hã ꞌre hâimana, ĩte hã. Tahawa, niꞌwa taha bâtâ na siwaꞌru marĩ na te te ꞌre romhuri mono wamhã, te za dasiwi wĩrĩ ni.
16 Tahawa, te za Izaraéu nhihudu norĩ, ã hã bâdâ hã te te ꞌre wazé pese zaꞌra, iwasisaze zaꞌra zé wasuꞌu ꞌre hâimana uꞌâsi mono wa.
17 Õne uꞌâ Izaraéu nhihudu norĩ me iwasisaze zaꞌra zé hã te tô wasuꞌu. E marĩ wa. Wa hã Uburé Danhibꞌapito, 6 si bâtâ ꞌremhã wa tô hâiwa norĩ tiꞌai me hã ꞌmanharĩ zahuré. Duré 7 bâtâ ãma hã wa tô romhuri hã sazâ. Wa tô oto waꞌudu taha na.
18 Tawamhã ꞌRe ihâimana uꞌâsi mono, Mozésihi ma, Sinaꞌi na ẽtẽ nhisi ãma te te nharĩ mono parimhã, ma tô ẽtẽpo hã tãma sõmri zahuré, tinhiptõmo na tinhimiroti na te te ãma tãma irobꞌuiꞌéré ré hã.
