Ezodu 32:1-35
32 Tawamhã Mozési ẽtẽ hawi te te isiꞌra suꞌu õ na da te dasiwi waihuꞌu wamhã, ma tô Arã hã dasiwi uirĩ ni. Ãne ma tô tãma nharĩ zaꞌra ni:
— Aibâ hã Mozési, Ezitu hawi we te te iwaꞌawazere ma, niha na tãma iromhâimanazé hã, wa te waihuꞌu zaꞌra õ di. Tahawa, maꞌãpé ihâibaꞌõ norĩ poto awã na niha hã marĩ wama ꞌmanharĩ zaꞌra na, te te iwanhimroi mono da hã isipaiꞌu.
2 Tawamhã Arã, ma te ãma sadaꞌâbâ zaꞌra ãne:
— Maꞌãpé aimro norĩ hã, ẽtẽ waipo pré oru ꞌmanharĩ na ãma ꞌre isipoꞌre zaꞌru zaꞌra mono zé hã tiwi sani zaꞌra waꞌaba, aiꞌra siꞌaibâ norĩ te zama, duré aiꞌra sipiꞌõ norĩ te zama, we ĩma ꞌwasari aba da.
3 Tahawa, Izaraéu nhihudu norĩ, ẽtẽ waipo pré oru ꞌmanharĩ na tipoꞌre zaꞌruzé mono bâ te te sani zaꞌra wamhã, ma tô Arãhã ma ãma tãma sito.
4 Tawamhã dapoꞌre zaꞌruzé te te nasi dawi iꞌawaibu hã ma tô uwa zaꞌra, powawẽ zapu hâiba na te te ꞌmanharĩ da, ãma ꞌre idawata zaꞌra mono zéb da hã. Tahawa, te ãne nharĩ zaꞌra ni:
— Izaraéu nhihudu norĩ, ã hã wate zaꞌra ihâibaꞌõ ꞌre ihâimana zaꞌra mono, Ezitu hawi we te te iwazani zaꞌra!
5 Tawamhã Arã, ãne hã te te ꞌmadâꞌâ wamhã, ma tô danhimizama zatazéb da, sisiwipsi ẽtẽ zaꞌra hã ꞌmanha, oru na powawẽ zapu hâiba na ropoto ꞌmanharĩ nhoꞌremhã. Tawamhã ma tô timreme na ãma dama rowasuꞌu ãne:
— Awẽmhã Uburé Danhibꞌapito ma, dasima rowẽzé dato isaꞌẽne te za tihâiba.
6 Tawamhã awẽm na mararé ma tô danhimizama zata na tãma ãma tanhoprub zaꞌra ni, duré danhoprubzé ãma idato zaꞌẽtẽ na zama. Taha pari dasaihuri da, duré da te simihâri zaꞌra da, ma tô asimro ni. Ma tô duré taha pari tawahutu zaꞌra ni, da te dasima romhuꞌu zaꞌra da hã, duré apâ.
7 Tahawa, Uburé Danhibꞌapito te Mozésihi ma tinha ãne:
— Maꞌãpé waptu na ẽtẽ hawimhã saꞌẽtẽ siꞌra na, asibꞌaꞌuwẽ norĩ Ezitu hawi we isani zaꞌra hã, ma tô aiwamnarĩ zaꞌra, duré ma tô siwi iwẽꞌõ zaꞌra.
8 Bâdâdi te tãma ipisutu zaꞌra zé hã ma tô waptu na siwi tirẽ. Duré powawẽ zapu ẽtẽ waipo pré oru na te te siwi iꞌmanharĩ ma, ma tô isõꞌre nasi tãma aiwẽꞌẽ zaꞌra. Te duré nasi tãma tinhoprub zaꞌra, danhimizama zata na. Tahawa, te nasi ãne nharĩ zaꞌra: “Izaraéu nhihudu norĩ, ãhãta ate zaꞌra waꞌwa ihâibaꞌõ, Ezitu hawi we te te iꞌasani zaꞌra waꞌwa hã”.
9 Ĩma waihuꞌu pese di ã hã aꞌuwẽ norĩ, pẽꞌẽ tete na ꞌre ihâimana zaꞌra mono na hã.
10 Tahawa, ĩwi hã robzâri tõ. Sada ĩnhitiꞌru zaꞌra zéb zarina wa za uprosi. Tawamhã romhutuꞌõmhã aihawimhã wa za daꞌahâ na apâ dasiré ꞌre idahâimana zaꞌra mono da hã ꞌmanha.
11 Tane nherẽ, Mozési, te Uburé Danhibꞌapito, tite ꞌRe ihâimana uꞌâsi mono wi hã ãne rowaptẽ, tinhimirosaꞌrata na te te ãma saprĩ da:
— Ĩnhibꞌapito, e marĩ da, ma asibꞌaꞌuwẽ asiptete na Ezitu hawi we isani zaꞌra norĩ da hã asitiꞌrui pe.
12 Ãne hã tãma ꞌmanharĩ zaꞌra wamhã, ãté te za ezipsiu norĩ ãne na sima aiwasuꞌu zaꞌra: “E taré ẽtẽ ãma tinhibꞌaꞌuwẽ te te uprosi pese da, ma tô Ezitu hawimhã sani zaꞌra.” Tahawa, ãne tõ da, asitiꞌru na aihâimanazé wi hã aipiꞌra na. Duré asimirosaꞌrata na ãma saprĩ na, asibꞌaꞌuwẽ norĩ nhisiwi robzépatazé ipire hã hâimana tõ da.
13 Maꞌãpé asibꞌaꞌuwẽ Abraꞌã norĩ ãma Izaqui, duré Zaco, ãma aipoꞌre puꞌu zaꞌra na. Duré hâiwa na wasi ahâ uptabi na ꞌre isimasa mono ne, isihudu norĩ ahâ na ꞌre hâimana zaꞌra mono da, tãma iropisutu zaꞌra zém na zama ãma aipoꞌre puꞌu. Duré isihudu norĩ ma, uburé tiꞌa za tãma sõmri zaꞌra wa, itedeꞌwa na õne uꞌâ ꞌre hâimana zaꞌra mono da, tãma iropisutu zaꞌra zém na zama aimreme na hã aipoꞌre puꞌu.
14 Tawamhã Uburé Danhibꞌapito tinhimirosaꞌrata na ma tô ãma saprĩ. Tahawa, isibꞌaꞌuwẽ norĩ zô robzépatazé ipire watobro da, te te aré ãma iropisutuzém na hã ma tô siwi ꞌmaꞌrã, te te ꞌmanharĩ tõ da.
15 Tawamhã Mozési ẽtẽ hawi ma tô siꞌra. Te te siꞌrai wamhã, ma tô ꞌRe ihâimana uꞌâsi mono, maparane ẽtẽpoꞌo hâ suꞌu na isõꞌre niwĩ duré iba niwĩ tinhimiroti te te ãma tãma isihâtâ ré hã timra.
16 Tô ꞌRe ihâimana uꞌâsi mono maparane ẽtẽ po te te iꞌmanharĩ zahuré na, ma tô tinhimiroti na ãma romnhihâtâ.
17 Tawamhã Zozué, dazadari te te wapari wa, ma tô Mozésihi ma tinha ãne:
— Dasiꞌwapéi wa robruru, wa wapa ãhã na, ꞌri nhoré ãma hã.
18 Tawamhã Mozési, ma te ãma tãma waꞌrã ãne:
— Dasiꞌwapé na da te daꞌãma aiꞌuté wa, rowẽ te, ropupuꞌu ne hãi õ di, te iwapari hã. Duré da te daꞌãma aiꞌuté wa, ꞌre idazadari zaꞌra mono ne hãi õ di. Rowẽ te, idazadawaꞌaꞌa si, wa tô wa hã wapa.
19 Tawamhã Mozési, ꞌri nhoré u oto ꞌrâwi wisi wamhã, oru ẽtẽ waipo na powawẽ zapu ꞌmanharĩ hã, duré idasiwapsisizé te te ꞌmadâꞌâ wamhã, ma tô dazada tinhitiꞌru pese. Tahawa, ẽtẽ zahâpâ, maparane ẽtẽpo tinhibꞌrata te te imrami hã ma tô tiꞌai u hã wabzu. Duré ma tô prub zahuré.
20 Tawamhã oru na powawẽ zapu da te dasiwi iꞌmanharĩ hã ma tô unhama roꞌo na uwa pese. Taha pari ma tô isizuri na si uprosi, tiꞌa zaprum na isiꞌmanharĩzéb u. Ma tô duré â na ãma ropé. Tawamhã Izaraéu nhihudu ma, taha â te te âhuri da ma tô tãma ꞌru zaꞌra.
21 Tawamhã Mozési, Arãhã ma, te tãma tinha ãne:
— E marĩ, ma tô ã hã aꞌuwẽ norĩ hã ꞌmanharĩ zaꞌra, ꞌre idasiwasété zaꞌra mono zé ꞌre ihâimana mono u, a hã itẽme ãwisi zaꞌra da hã.
22 Tawamhã Arã ma te ãma sadaꞌâ ãne:
— Ĩzada hã asitiꞌru tõ. Aima hã waihuꞌu pese di, ã hã aꞌuwẽ norĩ õne uꞌâ marĩ iwasédé te te ꞌre iꞌmanharĩ ze zaꞌra mono na hã.
23 Tahawa ta norĩ hã ma tô ãne ĩma nharĩ zaꞌra: “Aibâ hã Mozési, Ezitu hawi we te te iwaꞌawazere ma, niha na tãma iromhâimanazé hã, wa norĩ wa te waihuꞌu zaꞌra õ di. Tahawa, maꞌãpé ihâibaꞌõ norĩ poto awã na niha hã marĩ wama ꞌmanharĩ zaꞌra na, te te iwanhimroi mono da hã isipaiꞌu.”
24 Tahawa, wa hã wa tô tãma ꞌru zaꞌra, niꞌwam norĩ poꞌre zaꞌruzé oru ꞌmanharĩ na tãma ihâimana zaꞌra hã te te ĩma sani zaꞌra da, te te ĩma sõmri zaꞌra da. Tawamhã ta norĩ hã unhama u te sãmra wamhã, ma tô powawẽ zapu hâiba na hã siꞌmanha!
25 Tawamhã Mozési, dasima iwẽ na siwaꞌru dahâimana zaꞌra da, Arã te te dawi isawi õ zém na ma tô waihuꞌu. Taha zarina te za isitobꞌru norĩ hã ãma tiwaꞌẽ zaꞌra.
26 Tawamhã ꞌri nhoré u ꞌre idanhisisi mono zéb ãma hâiwi sa wamhã, ma tô ãne dama tinha:
— Niꞌwa hã, Uburé Danhibꞌapito niwĩ hâimana wamhã, we ãwa ĩtẽmemhã wisi!
Tawamhã levita norĩ, ma tô uburé Mozési hã siwi uirĩ.
27 Tahawa te Mozési hã tãma nharĩ zaꞌra ãne:
— Uburé Danhibꞌapito, Izaraéu nhihudu norĩ te, ꞌRe ihâimana uꞌâsi mono, ma tô tiꞌru, aihâiba mono bâ aba ate sibꞌézé ꞌwa pa hã waibui waꞌaba mono da, duré ꞌri uwa ꞌrãsutu mono bâ iré aiꞌabaꞌré waꞌaba da, taha na asisãnawã norĩ, asiwaihuꞌu norĩ, duré aiwaptoma ꞌre ihâimana zaꞌra mono norĩ hã ãma simroi waꞌaba mono da.
28 Tawamhã levita norĩ, Mozési te te iwaihuꞌuzé hã ma tô siwi ꞌmanha. Tahawa taha bâtâ na ma tô aibâ norĩ 3 miu na hã siwi uprosi.
29 Tahawa, Mozési, te levita norĩ ma nharĩ zaꞌra ãne:
— Ã bâtâ na a norĩ waꞌwa, aiꞌra norĩ hã, duré asisãnawã norĩ waꞌwa hã ma tô asiwi iꞌuprosi ꞌwa. Ãne wa, Uburé Danhibꞌapito ma, sasedoti na daꞌãma romhuriꞌwa da hã ma tô asina tãma irowairébé zaꞌra waꞌwa. Duré ãne hã ꞌmanharĩ zaꞌra waꞌaba wa, ma tô ꞌRe ihâimana uꞌâsi mono hã iwẽ na aima ꞌmanharĩ zaꞌra waꞌwa, ã bâtâ na hã.
30 Tawamhã Mozési, awẽ bâtâ na te dama tinha ãne:
— A norĩ waꞌwa hã ma tô aiwasété pese zaꞌra waꞌwa. Tane nherẽ, wa za duré ẽtẽ u saiꞌuri na sahu, Uburé Danhibꞌapito ma, te robzanhamri da. Ãté aiwasété zaꞌra waꞌaba waꞌâbâzéb da, wa za tãma ĩnhopru, te te aima pari zaꞌra waꞌaba da, iꞌmanharĩ wasété zaꞌra waꞌaba zé hã.
31 Tawamhã Mozési, Uburé Danhibꞌapito ihâimanazéb u apâ morĩ wamhã, te ãne tãma tinha:
— Ã norĩ aꞌuwẽ hã ma tô tiwasété pese zaꞌra. Ma tô ẽtẽ waipo pré oru na ihâibaꞌõ norĩ poto awã te te siwi iꞌmanharĩ ãma hã tiwata zaꞌra.
32 Ĩzawi na hã, maꞌãpé iwasété zaꞌra zé hã ãma ꞌmadâꞌâ zaꞌra tõ! Duré iwasété zaꞌra zé ãma ꞌmadâꞌâ zaꞌra tõ da, asima wẽꞌõ wamhã, maꞌãpé ĩnhisi hã ꞌwaꞌrutu, ate ibaihâ na asibꞌaꞌuwẽ norĩ nhisi na ãma ꞌre iromnhihâtâ zaꞌra mono zéb ꞌre ihâiba hã.
33 Tawamhã Uburé Danhibꞌapito, te Mozésihi ma tinha ãne:
— Tiwasédé te te ĩwi ꞌre iꞌmanharĩ zaꞌra mono norĩ nhisi si hã wa za tô uburé ĩte ibaihâ ꞌremhã te ꞌre aꞌwaꞌrutu.
34 Aimorĩ oto, danhimroi mono da, ro hã te aima ipisutuzéb u. Duré ãma aipoꞌre puꞌu za, ĩte hâiwa ãma romhuriꞌwa za te te iꞌasaprõnizém na hã. Tane nherẽ, bâdâ hã te za oto wi, ã hã aꞌuwẽ norĩ iwasété zaꞌra uꞌâbâ te ihâ zaꞌra zéb da hã.
35 Tahawa, Uburé Danhibꞌapito dahâzé na ma tô Izaraéu nhihudu norĩ hã hâ zaꞌra. E marĩ wa. Ta norĩ hã Arãhã ma, te te ꞌru zaꞌra wa, oru na powawẽ zapu te te ꞌmanharĩ da hã.