Ezodu 33:1-23
33 Tawamhã Uburé Danhibꞌapito te Mozésihi ma tinha ãne:
— Ã hawimhã aiwairébé aba, aꞌuwẽ Ezitu hawi we isani zaꞌra norĩ me. Abraꞌãhã norĩ ma, Izaqui, Zaco, duré isihudu norĩ ma, tiꞌa hã za te tãma sõmri zaꞌra da, te tãma ãma iropisutu zaꞌra zéb u hã aiꞌabaꞌréi waꞌaba da.
2 Hâiwa ãma ĩma romhuriꞌwa hã wa za asõwab zaꞌra waꞌaba hã satõ, te te aima sani zaꞌra waꞌaba da, cananeu norĩ hã, amoreu norĩ hã, hitita norĩ hã, perizeu norĩ hã, heveu norĩ hã, duré zebuzeu norĩ hã.
3 Tiꞌa iwẽ uptabi u te za aiꞌabaꞌréi waꞌwa, powawẽ hâiwaꞌu norĩ ꞌre ipraba zahuré mono zéb u, ropĩni me. Tane nherẽ, wa hã asiré waꞌaba ĩmorĩ õ di za. E marĩ wa. A norĩ waꞌwa aꞌuwẽ aipẽꞌẽ tete zaꞌra waꞌaba wa, za te aiꞌuprosi zaꞌra waꞌaba õꞌumnhasite.
4 Tawamhã ã hã romreme Izaraéu nhihudu norĩ ma, Mozési te te tãma wasuꞌu zaꞌra wamhã, ma tô tisiwaꞌõ na sãnaꞌrata zaꞌra. Tahawa, duré tihâiba na marĩ iwaꞌâbâ zaꞌẽtẽ na siꞌmaꞌwamarĩ zaꞌra õ di.
5 Tawamhã Uburé Danhibꞌapito, Mozésihi ma te tãma tiꞌru, ãne te te dama nharĩ da:
— A norĩ waꞌwa aꞌuwẽ iꞌaipẽꞌẽ tete zaꞌra waꞌwa. Za asiré ĩmorĩ zaꞌra waꞌaba nherẽ, duré asiré waꞌaba ĩhâimana hâ õ nherẽ, wa hã wa aré tô uburé pese aiꞌuprosi ꞌwa. Tahawa, asipesezé marĩ iwaꞌâbâ zaꞌẽtẽ mono hã te za isani zaꞌra waꞌwa ãhã na awaꞌawi. Tawamhã wa hã wa za ꞌrâwi ĩsima wairébé, za marĩ te aima iꞌmanharĩ zaꞌra waꞌaba zéb da hã.
6 Tawamhã ãne Izaraéu nhihudu norĩ, ẽne Sinaꞌi hawi iwairébé hawim haré, tisipesezém na ãma ꞌre siꞌmaꞌwamarĩ zaꞌra mono õ di.
ꞌRe ihâimana uꞌâsi mono, romhâ ꞌmanharĩ na ꞌri wa, ꞌre ihâimana mono zé wasuꞌu
7 Izaraéu nhihudu norĩ te te sima ꞌre ꞌri nhoré zaꞌra mono sidâpâsi, ma tô Mozési hã ꞌri iwazéb zahi hã te te simizusi, danhiti prã na. Taha nhisi hã “Romhâ ꞌmanharĩ ꞌri iwazéb zahi wa, ꞌRe ihâimana uꞌâsi mono, iwa ꞌre isãmra mono na”. Niꞌwa Uburé Danhibꞌapito te te sadawa pibu da, te te sima wẽ wamhã, te za tô õ wamhã itẽme ꞌre ne.
8 Tawamhã Mozési, ꞌRe ihâimana uꞌâsi mono, ꞌri ꞌre, ꞌre ihâimana mono zéb u ꞌre ne mono da, ꞌre pusi mono sidâpâsi, ma tô uburé danhorõwa ꞌridawa ãma hâiwimhã ꞌre dasimasa, da te dasiwi ꞌre ꞌmadâꞌâ mono da hã, ꞌre izasi mono zéb u.
9 ꞌRe zasi mono wi, ma tô hâiwaꞌa zarobꞌa pisutu pe hã te te ꞌre siꞌra. Tawamhã te romhâ ꞌmanharĩ na ꞌridawa ãma ꞌre simizahâri. Duré ta hawi te Uburé Danhibꞌapito, Mozésihi ma, te te ꞌre robzanhamri.
10 Tawamhã ꞌridawa ãma hâiwaꞌa pisutu pe, da te ꞌre ꞌmadâꞌâ zaꞌra mono wi, ma tô duré dahiꞌrãtitõ hã tãma ꞌre dasiꞌubumro.
11 Tawamhã Uburé Danhibꞌapito ma tô Mozésihi ma ꞌrâwi pesere te te tãma ꞌre robzanhamri, niꞌwa hã tisiwaihuꞌu ma, te te ꞌre irobzanhamri mono ne. Taha pari ma tô apâ ꞌri nhoré u hã ꞌre ne. Tane nherẽ, Zozué, Nuhu ꞌra, ipawaptoꞌwa aiꞌrepudu hã ma tô isaꞌu ꞌRe ihâimana uꞌâsi mono te, ꞌri ãma hã ꞌre hâimana.
ꞌRe ihâimana uꞌâsi mono, tinhibꞌaꞌuwẽ norĩ siré ꞌre imorĩ na te te sina tãma iropisutu zaꞌra zé wasuꞌu
12 Tawamhã Mozési, te Uburé Danhibꞌapito ma tinha ãne:
— Tô sena õ hã tiꞌai u ã norĩ aꞌuwẽ te simroi mono da hã, ma tô ĩma iꞌru. Tane nherẽ, za niꞌwa ĩsiré imorĩ da hã ĩma wasuꞌu õ di. Ãne si ma tô ĩma inha: “Ĩma hã aiwaihuꞌu pese di. Wa duré aiwẽsãmri pese.”
13 Ãne hã tô sena ĩwẽsãmri wamhã, ꞌre irowaꞌõtõ mono zé hã ĩma wasuꞌu na, te aiwaihuꞌu pese da, duré ꞌre ĩwẽsãmri mono zém na hã te ĩsina ꞌre uwaimrami uꞌâsi mono da. Maꞌãpé ã aꞌuwẽ norĩ asibꞌaꞌuwẽ ꞌre ihâimana zaꞌra mono na hã ãma aipoꞌre puꞌu.
14 Tawamhã ꞌRe ihâimana uꞌâsi mono, ma te ãma sadaꞌâ ãne:
— Asiré wa za mo tô. Aiwaꞌutuzé hã wa za te aima ꞌre sõmri.
15 Tawamhã Mozési hã ma te ãma tãma waꞌrã ãne:
— Wasiré aimorĩ dai õ wamhã, ã hawi wawairébé da hã wama robꞌru zaꞌra tõ, tôꞌã!
16 E niha te za duré wasiré aimorĩ zaꞌra õ nherẽ, aimawi aꞌuwẽ norĩ hã waihuꞌu zaꞌra, asibꞌaꞌuwẽ norĩ ãma, duré ĩꞌãma iꞌaipẽꞌẽtozém na hã. Wasiré ꞌre iꞌaihâimana uꞌâsi zaꞌra mono zé, te za aimawi na ꞌre iwahâimana zaꞌra mono zé hã te te dama ꞌre ahâiꞌré.
17 Uburé Danhibꞌapito Mozésihi ma, te duré ãne tãma tinha:
— Ĩwi iwaptẽrẽzém na hã wa za tô aiwapa. E marĩ wa. Ĩma iꞌaiwaihuꞌu wẽ zarina, duré asina ĩma irowẽ wazere zarina.
18 Mozési hã te duré ãne tãma tinha:
— Ĩzawi na hã, maꞌãpé aihâiba na rowaꞌa hã ĩma saꞌré na te ꞌmadâꞌâ da.
19 Tawamhã ꞌRe ihâimana uꞌâsi mono, ma te ãma sadaꞌâ ãne:
— Uburé ĩhâiba na rowaꞌa, ĩma ꞌre ihâimana mono hã asõꞌre te te roꞌrazâri da hã wa za tô aima ꞌmanha. Duré ĩnhisi iwazéb zahi na wa za aima wasuꞌu. Wa hã, Uburé Danhibꞌapito, te ĩsima ꞌre iꞌawẽ mono hã wa za te ꞌre azawi pese. Duré te ĩsima ꞌre iꞌawẽ mono ãma hã, wa za ꞌre ĩsiwãrĩ wẽ zaꞌra.
20 Te duré zahadu ãne tãma tinha:
— Taré oto tô ĩꞌubu ꞌmadâꞌâ da hã te aima saꞌréi õ di za. E marĩ wa. Niꞌwa hã ĩꞌubu te te ꞌmadâꞌâ wa, za tihâimanazém na hã te te uzusi dai õ wa.
21 Ãhãta te ẽtẽ tõmo wawẽ ĩꞌratamhã nomro, a hã isisiwi hâiwi aipara na ãma iꞌasab da hã.
22 Tawamhã ĩhâiba na rowaꞌa asõꞌre te te roꞌrazâri wamhã, wa za ẽtẽ sipoꞌo ꞌremhã asẽ za. Tahawa, ĩnhibꞌrata na wa za asuwa, wa hã te aꞌâ roꞌrazâri da hã.
23 Oto ĩnhibꞌrada te aima saꞌréi wamhã, te za ĩbabarãi hawip si ĩba hã iꞌmadâ za. Taré oto tô tane nherẽ, ĩꞌubu hã ꞌmadâꞌâ õ di za.
