Ezodu 4:1-31
4 Tawamhã Mozési, ꞌRe ihâimana uꞌâsi mono ma, ma te ãne ãma sadaꞌâ:
— Izaraéu nhihudu norĩ te te aiꞌãma siwi ĩzaze da hã mare di. Duré ĩma iꞌasihâiꞌrézém na te tãma aiwasuꞌu zaꞌra wamhã, te te siwi ĩwapari õ di za.
2 Tawamhã ꞌRe ihâimana uꞌâsi mono te ãma sadanha ãne:
— E marĩ te asibꞌratamhã ꞌre iꞌâ.
Tawamhã ma sadaꞌâ, ãne Mozési hã:
— Wedehu wa ꞌre tiꞌâ.
3 Tawamhã ꞌRe ihâimana uꞌâsi mono te tãma tinha ãne:
— Tiꞌai u maꞌãpé me na, ta wedehu hã.
Tawamhã tiꞌai u te te ime hã ma tô siwahi. Taha ma, te Mozési tawamhã wara, tãma pahi wa.
4 Tawamhã Uburé Danhibꞌapito, te Mozésihi ma waihuꞌu ãne:
— Maꞌãpé asibꞌrada sô wẽ na, isarébé na âri da apâ!
Tawamhã isarébé na ma tô tiꞌâ. Te te âri wi, ma tô apâ siwedehu isibꞌrata.
5 Tahawa te Uburé Danhibꞌapito tãma tinha ãne:
— Ãne te za Izaraéu nhihudu norĩ nhoꞌa hã iꞌmanha, Uburé Danhibꞌapito, aihiꞌrata norĩ te, Abraꞌãhã te, Izaquihi te, Zacoho te, ꞌRe ihâimana uꞌâsi mono, aima ĩsihâiꞌrézém na te te ãma asaze zaꞌra da hã.
6 Tawamhã te duré tãma tinha ãne:
— Maꞌãpé asibꞌrada hã sẽrẽ, asõꞌutu ꞌre.
Tawamhã te te tãma inharĩzéb zarina ma tô tinhibꞌrada hã tisẽ, tinhoꞌutu ꞌre. Tawamhã tinhoꞌutu hawi oto te te wazere wamhã, ma tô iꞌwaꞌre hâꞌa ahâ hã ãma wairébé, rowahâzé pĩni uꞌẽne iꞌa pese ne hã.
7 Tawamhã Uburé Danhibꞌapito, ꞌRe ihâimana uꞌâsi mono te duré tãma tinha ãne:
— Asibꞌrada hã maꞌãpé apâ sẽrẽ, asõꞌutu ꞌremhã.
Tawamhã Mozési ma tô apâ tinhoꞌutu ꞌre tinhibꞌrada hã tisẽ. Tawamhã tinhibꞌrada tinhoꞌutu hawi apâ te te wazere wamhã, ma tô iꞌwaꞌre aré ãma iwairébé mono hã tãma aimani zaꞌra õne haré. Tahawa apâ hã oto sibꞌrata wẽ di, uburé ihâiba hã wẽ na tãma ihâimana ne.
8 Tawamhã Uburé Danhibꞌapito, te ãne Mozésihi ma waihuꞌu:
— Imorĩꞌrata na marĩ dama iꞌmanharĩ waihuꞌuꞌõ na Izaraéu nhihudu norĩ te te ãma asaze zaꞌra dai õ wamhã, ãté te za isãnaꞌre marĩ dama iꞌmanharĩ waihuꞌuꞌõ na si ãma asaze zaꞌra.
9 Te ꞌre iromhõsi mono zarina, maparane marĩ, dama iꞌmanharĩ waihuꞌuꞌõ na dama ꞌmanharĩ nherẽ, ãté duré da te dasiwi hã aiwapari õ di za. Ãne wamhã, te za Nilu na pa nhoꞌõmo nhisi hawimhã â hã iꞌaꞌâ, tiꞌai u saꞌwari da. Tahawa, te za dawapru na siꞌmanha.
10 Tawamhã Mozési, ma te ꞌRe ihâimana uꞌâsi mono ãma sadaꞌâ ãne:
— Ĩnhibꞌapito, tane ĩma iwaihuꞌu wana ré, niwamhã ĩmreme waihuꞌu pese na hã ãma ĩhâimana õ di. Wa hã ĩmreme tobre di, duré ĩmreme zani suꞌu õ di. Duré ĩmreme hã te ꞌre sani mono wamhã, ĩmreme tété hâre di.
11 Tawamhã Uburé Danhibꞌapito, te ãne tãma tinha:
— E ꞌwa hã ma tô dazadawa ãma ꞌre idamreme zusi mono zéb da hã te te dama ꞌre abꞌmanharĩ. E ꞌwa hã dapoꞌreptõ ꞌmanharĩꞌwa, dapoꞌre ꞌre puꞌu ãna iré ꞌre idahâimana zaꞌra mono da hã. E ꞌwa hã duré damremeꞌõ ꞌmanhariꞌwa, damreme õ na ꞌre danomro mono da hã. E ꞌwa hã datõmo ꞌmanharĩꞌwa, da te ãma ꞌre irobꞌmadâꞌâ zaꞌra mono zéb da hã. Duré e ꞌwa hã datõmo wamnarĩꞌwa, datobꞌa na ꞌre danomro mono da hã iré. Wa hã, Uburé Danhibꞌapito.
12 Tahawa te za ãhã na awaꞌawi na datẽme aimo. Wa hã datẽme aimorĩ wamhã, wa za aipawapto, aimreme zani wẽ da, te aima iwaihuꞌuzéb zarina, ãma dama rowasuꞌu da hã.
13 Tawamhã Mozési, za imorĩꞌõzé te tiwi waptẽ ãne:
— Ĩnhibꞌapito mare di. Ãté ĩmorĩ õ di za. Tahawa maꞌãpé ĩnhipai u aimawi hã daꞌmazatõrĩ, ĩꞌupana daꞌmaimorĩ da.
14 Tawamhã ꞌRe ihâimana uꞌâsi mono ma tô sada tinhitiꞌru. Tahawa te Mozésihi ma tinha, ãne:
— Arã levita hã e adubꞌrata õ di bété. Ta hã ĩma hã waihuꞌu pese di, imreme zani wẽ na hã. Ta hã te oto we atẽme mo, te te asõpẽtẽ da. Te te asõpẽtẽ wamhã, tãma rowẽ di za, te te oto aiꞌmadâꞌâ wa za.
15 Tawamhã Arãhã ma, a hã rowasuꞌu wamhã, te za aimreme nhipai u dama tinha. Tawamhã duré wa hã wa za aipawapto waꞌwa, niha na dama inharĩ aba zéb da hã. Duré wa za iꞌabꞌmanharĩ aba zéb da hã aima waihuꞌu ꞌwa.
16 Tawamhã Arã te za aiꞌupa na dama rowasuꞌu. Tawamhã a hã ĩsine ꞌRe ihâimana uꞌâsi mono na tãma aihâimana wa, te za marĩ te te iꞌmanharĩzéb da hã ãma tãma iꞌarowasuꞌu mo.
17 Ta wedehu hã ãma âri. E marĩ wa. Taha na te za marĩ dama iꞌmanharĩ waihuꞌuꞌõ hã ãma iꞌabꞌmanharĩ mo.
Mozési apâ Ezitu u imorĩzé wasuꞌu
18 Tawamhã Mozési, timaprewa Zetruhu nhorõwa u ma tô mo. Tahawa, te ãne tãma tinha:
— Ĩma rowairébé, aꞌâ Ezitu u apâ ĩmorĩ da wasisabu zaꞌra da. Wa tô ĩsima wẽ, te sabu zaꞌra da zahadu rowẽ na ꞌre hâimana zaꞌra mono zô.
Tawamhã Zetru ma te ãma sadaꞌâ ãne:
— Rowẽ na aimorĩ za!
19 Tawamhã Midiã na romnhisi ãma zahadu sãmra ré, ma tô Uburé Danhibꞌapito hã duré tãma tinha ãne, Mozésihi ma:
— Te za oto apâ aimo, Ezitu u! E marĩ wa. Te te siwi aiwĩrĩ da, te te sima iwẽ zaꞌra hã ma tô uburé sô tirobaba zaꞌra.
20 Tawamhã Mozési, timro, tiꞌra norĩ me ma tô awaru poꞌre pore ba nhisiwimhã sõré. Tahawa ma tô Midiã na romnhisi hawimhã oto apâ Ezitu u hã sina siri. Tawamhã ꞌRe ihâimana uꞌâsi mono te na tisiwazusizé te tinhibꞌratamhã siré tiꞌâ.
21 Tahawa, te duré ꞌRe ihâimana uꞌâsi mono hã tãma tinha ãne, Mozésihi ma:
— Ezitu u apâ aimorĩ wamhã, maꞌãpé ãma pibui pese za, apito Faraꞌoho nhoꞌa ĩwaihuꞌu pese zé te aima isõmri zarina, marĩ dama iꞌmanharĩ waihuꞌuꞌõ hã nasi ꞌmanharĩ da hã. Tane nherẽ, ta hawi Izaraéu nhihudu norĩ ma, te te waprosi tõ da hã wa za aꞌâ nasi ipẽꞌẽ tede hã tãma tisõ.
22 Tawamhã wa hã Uburé Danhibꞌapito te iwaihuꞌuzém na hã te za apito Faraꞌoho ma ĩzadawa wasuꞌu ãne: “Izaraéu nhihudu norĩ hã aibâ na dama ꞌre ipoto ꞌrata zaꞌra mono ne hã te ĩma ꞌre hâimana zaꞌra.
23 Wa tô aima nharĩ pa, ĩꞌra norĩ ma, waprosi da, asaꞌrui hawimhã wairébé da, ĩꞌãma si oto ꞌre wata zaꞌra mono da. Tazahã a hã tãma waprosi zaꞌra õ di, wairébé da hã. Tahawa, wa za aiꞌra aibâ na ãma irosõwada ꞌrada hã aiwi tiwĩ.”
24 Tawamhã Ezitu u siꞌabaꞌréi wa, Mozési tiꞌra norĩ ré rowãi wa sõtõ wamhã, ma tô Uburé Danhibꞌapito hã itẽme wi. Ãhã wa, ma tô duré aré tiwĩ.
25 Tawamhã imro Zipora, ma tô ẽtẽꞌwa hâdâ hã tiꞌâ. Taha na tiꞌra ma tô sihâiwata nhizâ. Duré tiꞌra nhihâiwata na ma tô timro Mozési hã ãma para upi. Tahawa te ãne timro ma tinha:
— A hã te za ĩmro dawaprui ré hã ĩma ꞌre aihâimana mo.
26 Tiꞌra te te isihâiwata nhizârizéb zarina ma tô ãne hã tãma tinha, timro ma hã. Ãne zarina ma tô Uburé Danhibꞌapito hã ãma rosazâ, te te wĩrĩ tõ da.
27 Uburé Danhibꞌapito, iwana ré ma tô Arã hã poꞌre puꞌu siro ãne:
— Mo oto aimorĩ rop si ꞌre irosaꞌwari mono u, Mozési sõpẽtẽ da.
Ãhã wa, Arã morĩ wamhã, ma tô ẽne iwazéb zahi iꞌrãihâ ãma sõpẽtẽ, Mozési hã. Tawamhã ma tô duré tobꞌrata hârâ na sawi.
28 Tawamhã Mozési, ma tô uburé tidubꞌrada Arãhã ma hã tãma wasuꞌu, ꞌRe ihâimana uꞌâsi mono, Ezitu u apâ te te satõrĩ wa, te te tãma iwaihuꞌuzé hã te te tãma wasuꞌu da. Duré ꞌRe ihâimana uꞌâsi mono, marĩ dama iꞌmanharĩ waihuꞌuꞌõ hã za nasi te te iꞌmanharĩzém na, te te ipawaptob na te te tãma iwaihuꞌuzé hã te sina tãma mreme wasuꞌu.
29 Tawamhã Mozési norĩ Arãhã me, ma tô oto siré Ezitu u hã tineb zahuré. Tahawa ma tô uburé Izaraéu nhihudu norĩ ma, iꞌrãnhoꞌu hã ꞌrãꞌõtõ zahuré.
30 Tawamhã Arã, Uburé Danhibꞌapito, Mozésihi ma, te te tãma iwaihuꞌuzé hã ma tô ta norĩ ma wasuꞌu zaꞌra. Taha pari, Mozési ma tô õne haré daꞌahâ norĩ nhoꞌa, marĩ dama iꞌmanharĩ waihuꞌuꞌõ na hã sãnaꞌrata.
31 Tawamhã ma tô uburé ãma saze zaꞌra, isimirowasuꞌu na hã. Uburé Danhibꞌapito itẽme imorĩ zaꞌra zém na te te sina waihuꞌu zaꞌra wa, duré da te tãma ꞌre irobꞌmanharĩ wasété zaꞌra mono zém na te te ꞌre iꞌmadâꞌâ zaꞌra mono na te te sina waihuꞌu zaꞌra wa, hiꞌrãtitõ ma tô asimro, ꞌRe ihâimana uꞌâsi mono ãma wata zaꞌra da hã.
