Ezodu 40:1-38
40 Tawamhã Uburé Danhibꞌapito, Mozésihi ma, te tinha ãne:
2 — Aꞌamo isãnaꞌrata te, bâdâ imorĩꞌrata ãma, te za romhâ ꞌmanharĩ na ꞌri ꞌre, ꞌRe ihâimana uꞌâsi mono iwa ꞌre ihâimana mono zé ꞌri hã iwasisi mo.
3 Tawamhã te za duré ĩte wedehâꞌre ĩnhimiroti ré ẽtẽpo iwa isaꞌwari iꞌmazé, ꞌri para u hã. Tahawa te za duré isõꞌre na zazahâ hâi wawẽ waré hã isasõ.
4 Wedeza hã sãrĩ ꞌri paramhã. Sõré na uburé marĩ isisi isimiꞌwara da hã. Robꞌuiwẽzé ꞌri para u te za isã. Te za isimizu mono bâ iroꞌozéb da iꞌrãire mono hã tãma iꞌaꞌmazai mo za.
5 Wedewaꞌu isadaze da te ãma ꞌre isazu zaꞌra mono da, ẽtẽ waipo pré oru na wedezane na ꞌre idanhoprub zaꞌra mono zé hã sãrĩ za, ĩte wedehâꞌre nhoꞌremhã. Tawamhã duré sasõmri za zazahâ hâi wawẽ ꞌri para u za ꞌre idanhisisi mono zéb ãma hã.
6 Ĩma danhimizama zatazé ꞌri nhoꞌre rowimhã sãrĩ za.
7 Tawamhã duré danhimizama zatazém norĩ waꞌwamhã ꞌri me, te za pizaꞌa ꞌre nhoꞌa isã. Tahawa, te za â hã iwa iꞌmasi.
8 Taha parimhã ꞌrimana wi baba te za iwaꞌra. Tawamhã dazasizéb ãma te za duré zazahâ hâi wawẽ waré hã isasõ.
9 — Azeitona waꞌu to robdiꞌizéb da hã âri, ꞌri hã, duré uburé marĩ iwa ihâimana zaꞌra hã ãma saza zaꞌra da. Taha zarina te za aimawi sipoꞌo pese na ĩma isaꞌra, iwazéb zahi na si ĩma ꞌre hâimana zaꞌra mono da.
10 Taha parip si te za duré danhimizama zatazé hã duré uburé marĩ isiré ihâimana zaꞌra hã ãma iꞌazaza. Taha zarina te za tô aimawi ĩma si tihâiba, iwazéb zahi na hã.
11 Tô õne te za duré pizaꞌa ꞌre nhoꞌa hã, duré iꞌuparizé hã ãma isaza zahuré.
12 — Arã, iꞌra norĩ me ꞌri para u ꞌre idanhisisi mono zéb u hã simroi mono. Tawamhã a hã te za duré â na ihâiba upsõ zaꞌra.
13 Taha pari Arã, sasedoti siꞌuzazém na te za iꞌuza. Te za duré ĩma iꞌrãti, aimawi danhiti sasedoti na te te ĩma ꞌre romhuri mono da, daꞌãma.
14 Iꞌra norĩ iꞌuza ihâpa tãma séme da hã te za duré we isimroi mo.
15 Taha pari te za duré a hã, imama zaꞌra iꞌrã tiꞌi ne iꞌrã tiꞌi zaꞌra, sasedoti na te te ĩma ꞌre romhuri zaꞌra mono da, duré ta norĩ hã. Sasedoti na isihudu sidâpâsi õne uꞌâ te te ꞌre romhuri zaꞌra mono da, te za ãne hã tãma iꞌmanharĩ zaꞌra za.
16 Ãne ma tô Mozési, Uburé Danhibꞌapito te te tãma iꞌawaihuꞌu mono zéb zarina uburé hã abꞌmanha.
17 Ãne ma tô aꞌamo imorĩꞌrata te, bâdâ imorĩꞌrata ãma, Izaraéu nhihudu norĩ Ezitu hawi iwairébézém na misi wahu aré tô oto isiꞌutõrĩzéb ãma, ma tô romhâ ꞌmanharĩ na ꞌri ꞌre, ꞌRe ihâimana uꞌâsi mono iwa ꞌre ihâimana mono zé ꞌri na hã te te siwi ãma wasisi.
18 Tawamhã Mozési ma tô isãnaꞌratazé hã azaꞌra, duré iꞌuparizéb da hã ma tô te te anhoré. Isimiꞌrãmi na tãma isimiꞌwara mono da hã ma tô duré te te azaꞌra. Hâiwi tãma isimasa mono da hã, ma tô wede te te duré anhoré.
19 Tawamhã ꞌri upsibizé hã ma tô oto hânhozi isisiwimhã. Ma tô duré aimawi hã isisiwimhã tihi, Uburé Danhibꞌapito te te tãma iwaihuꞌuzéb zarina.
20 Taha pari isimiroti ré ẽtẽpoꞌo norĩ hã ma tô wedehâꞌre ꞌremhã tino. Isiꞌuwazi zapoto ꞌre ma tô duré imramizéb da, wede norĩ hã tãma za zahuré. Duré tawamhã isidâzém na hã ma tô oto sidâ.
21 Taha parimhã, wedehâꞌre ꞌmanharĩ hã ma tô oto duré ꞌri para u hã tisẽ. Duré Uburé Danhibꞌapito te te iwaihuꞌuzéb zarina ma tô zazahâ hâi wawẽ waré hã iꞌwawimhã sasõ, ꞌRe ihâimana uꞌâsi mono nhimiroti te, wedehâꞌre, da te ꞌre ꞌmadâꞌâ zahu zaꞌra mono tõ da oto.
22 Tawamhã Mozési, wedeza ꞌri para u ma tô hâiwa nhimire niwĩmhã tisã, zazahâ hâi wawẽ isaꞌo babarã na.
23 Tawamhã Uburé Danhibꞌapito ma, iꞌuꞌẽtẽ wapu na tãma danhoprubzé ma tô isisiwimhã saꞌra, te te tãma iwaihuꞌuzéb zarina.
24 Tawamhã duré ꞌri para u ma tô robꞌuiwẽzé hã tisã, wedeza nhoꞌre hâiwa nhimiꞌe niwĩ.
25 Tawamhã duré Uburé Danhibꞌapito nhoꞌre, ma tô te te tãma iwaihuꞌuzéb zarina te te ãma azazu, roꞌo zaꞌra da.
26 ꞌRi para u, ẽtẽ waipo pré oru na wedezane ꞌmanharĩ, ꞌRe ihâimana uꞌâsi mono ma, danhoprubzéb da, wedewati isadaze, da te tãma ꞌre izata zaꞌra mono, zazahâ hâi wawẽ isaꞌo nhoꞌre, ma tô tisã.
27 Tawamhã ma tô wedewaꞌu isadaze na hã ãma sazu, Uburé Danhibꞌapito te te tãma iwaihuꞌuzéb zarina.
28 Tawamhã duré romhâ ꞌmanharĩ na ꞌri para u ꞌre idanhisisi mono zéb ãma, ma tô zazahâ hâi wawẽ hã sasõ.
29 Tame ma tô duré danhimizama zatazém na danhoprubzé hã tisã, ꞌre idanhisisi mono zém nhoꞌre. Taha nhisiwimhã ma tô danhimizama zata na duré amnho na tãma tinhopru, Uburé Danhibꞌapito te te tãma iwaihuꞌuzéb zarina.
30 Tawamhã pizaꞌa ꞌre nhoꞌa hã ma tô tisã, danhimizama zatazém norĩ waꞌwamhã ꞌri me. Tahawa, ma tô â hã iwa ꞌmasisi.
31 Taha na ma tô Mozési hã Arã, tiꞌra norĩ me ãma sisibꞌrata upsõ zaꞌra. Duré ma tô ãma sipara upsõ zaꞌra.
32 Ãne ma tô ꞌri para u ꞌre sisisi mono sidâpâsi, duré niha wamhã danhimizama zatazéb u ꞌre nomro mono sidâpâsi te te ꞌre ꞌmanharĩ zaꞌra, Uburé Danhibꞌapito Mozésihi ma te te iwaihuꞌuzéb zarina.
33 Tawamhã Mozési, ꞌri norĩ ꞌwawi, danhimizama zatazé ꞌwawi me hã ma tô waꞌra na ãma uirĩ. Ma tô duré dazasizéb ãma zazahâ hâi wawẽ hã sasõ. Ãne ma tô Mozési romhuri hã ꞌrãsutu.
Hâiwaꞌa zarobꞌa, romhâ ꞌmanharĩ na ꞌri te te isuwazé wasuꞌu
34 Tawamhã hâiwaꞌa zarobꞌa ma tô romhâ ꞌmanharĩ na ꞌri hã suwa. Te te suwai wamhã, ma tô Uburé Danhibꞌapito hâiba na rowaꞌa hã saꞌẽtẽ na ꞌri ꞌre waꞌa.
35 Tahawa Mozési hã sébré waihuꞌu õ di, ꞌri para u hã.
36 Tawamhã hâiwaꞌa zarobꞌa, romhâ ꞌmanharĩ na ꞌri nhisi ma ꞌre saꞌo hâ mono sidâpâsi ma tô Izaraéu nhihudu norĩ tizâmorĩ na hã te te ꞌre uzusi zaꞌra mono.
37 Tane nherẽ, hâiwaꞌa zarobꞌa ꞌri ma ꞌre sarõtõ mono õ ré, tô ta hawimhã ꞌre wairébé mono õ di. Nimahã bâtâ na ꞌri ma ꞌre sarõtõ mono wapsi ma tô tizâmorĩ na hã te te ꞌre uzusi zaꞌra.
38 Ãne ma tô bâtâ na Uburé Danhibꞌapito nhimirowaꞌa hâiwaꞌa zarobꞌa ꞌri nhisiwimhã te te ꞌre ꞌmadâꞌâ zaꞌra. Duré barana te unhama ro hâiwaꞌa ꞌre ihâiba hã te te ꞌre ꞌmadâꞌâ zaꞌra, aꞌuwẽ Izaraéu norĩ ꞌre nomro mono ré hã.
