Ezodu 5:1-23
5 Tawamhã Mozési norĩ Arãhã me, ma tô Ezitu te apito u tineb zahuré. Tahawa, te ãne tãma rowasuꞌu zahuré:
— Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono hã te tinha ãne: “Ĩnhibꞌaꞌuwẽ norĩ ma, te za irowairé, rop si ꞌre irosaꞌwari mono u siꞌabaꞌré da, tame niha bâtâ na ĩꞌãma ꞌre iwata zaꞌra mono zém na dato isaꞌẽne te te sima ꞌre ꞌmanharĩ zaꞌra mono da.”
2 Tawamhã apito Faraꞌo te ãma sadanharĩ zahuré ãne:
— E ꞌwa hã bété Asibꞌapito waꞌwa, imreme te iwapari da hã, duré Izaraéu nhihudu norĩ ma, te iwaprosi da hã, ã hawi wairébé da. Asibꞌapito waꞌwa hã ĩma waihuꞌu õ di. Tahawa Izaraéu nhihudu norĩ ma, ã hawi wairébé da, te tãma irowairébé zaꞌra da hã mare di za.
3 Tawamhã Mozési norĩ Arãhã me, ma te ãma tãma waꞌrãmi zahuré ãne:
— Hebreu norĩ te, ꞌRe ihâimana uꞌâsi mono, ma tô wei watẽme mo, te te wama nharĩ da. Tahawa, maꞌãpé wama waprosi zaꞌra na, siꞌubdatõ bâtâ ꞌre wazâmorĩ da, rop si ꞌre irosaꞌwari mono u, Uburé Danhibꞌapito, wate ꞌRe ihâimana uꞌâsi mono ma, ãma tãma wanhoprub zaꞌra da, danhimizama zata na hã. Wasiꞌabaꞌréi õ wamhã, wahâzé na, duré dasiꞌwapé na te za wama robꞌmanharĩ zaꞌra, wasiꞌutõrĩ da hã.
4 Tawamhã Ezitu te apito, te Mozési norĩ ma, Arãhã me tãma nharĩ zahuré ãne:
— E marĩ da, ma tô Izaraéu nhihudu norĩ nhimiromhuri hã iꞌwaꞌrutu ꞌwa. Tahawa te za apâ romhuri u dasiꞌabaꞌré da hã dama irowairébé ꞌwa.
5 Tahawa, te duré tãma nharĩ zahuré ãne:
— Ãhã na awaꞌawi na Izaraéu nhihudu norĩ, ã hã tiꞌai waꞌõtõ nhoꞌõmo ꞌre, dazaꞌrui mono bâ ahâ na ꞌre hâimana zaꞌra mono nherẽ, te a norĩ waꞌwa tinhimiromhuri te te wawi rẽme zaꞌra da hã asima iwẽ waꞌwa.
6 Tawamhã tô taha bâtâ na ma tô apito, dapawaꞌâbâ ãna dama robꞌruiꞌwa norĩ ma duré danhibꞌihâꞌa norĩ ma ãne tãma waihuꞌu zaꞌra:
7 — Ã hawimhã aꞌuwẽ norĩ ma, amnho teihi tãma ꞌre sõmri zaꞌra waꞌaba mono õ di za, tiꞌai uꞌẽne te te ãma ꞌre ꞌmanharĩ zaꞌra mono da hã. Õ norĩ hã te za oto siꞌuihâ na te te sima ꞌre ubumro zaꞌra, za te te ãma ꞌre iromhuri zaꞌra mono da hã.
8 Tane nherẽ, te za a norĩ waꞌwa õ norĩ tiꞌai uꞌẽne te te ꞌre iꞌmanharĩ zaꞌra mono hã aiwab zô ꞌre isaꞌrata zaꞌra waꞌaba mo za, sizabaꞌa ãna te te ꞌre iꞌmanharĩ zaꞌra mono zô. E marĩ wa. Waꞌa zaꞌra wa, te nasi hã ãne: “Oto danhimizama zata na wate ꞌRe ihâimana uꞌâsi mono ma hã wanhoprub zaꞌra waꞌaba!”
9 Ã hã aꞌuwẽ norĩ romhuri ipire na te te ꞌre robꞌmaꞌwamarĩ mono da, te za apâ ãma tãma ꞌre ihâimo zaꞌra waꞌaba mo, isimiromhuri zaꞌra zé hã. Ãhã wa, dazadawa nhipese na rowasuꞌu hã te te duré iwapari zaꞌra da hã mare di za.
10 Tawamhã dapawaꞌâbâ ãna dama robꞌruiꞌwa norĩ, danhibꞌihâꞌa norĩ me ma tô oto wairé, apito Faraꞌoho hawimhã. Ãne te tawamhã tãma sadawa wasuꞌu zaꞌra, Izaraéu nhihudu norĩ ma:
— Ãne apito ma tô waihuꞌu, amnho teihi wa te aima ꞌre saꞌwari zaꞌra waꞌaba mono tõ da oto.
11 Õ hã ma tô tiꞌru, asiꞌuihâ na tô asima ꞌre ubumro zaꞌra waꞌaba mono da, nima me amnho teihi ꞌre isõpẽtẽ zaꞌra waꞌaba mono zéb ãma. Tane nherẽ, te za tô tiꞌai uꞌẽtẽ ꞌmanharĩ na aiwapsi ꞌre irobꞌmaꞌwamarĩ aba mo.
12 Tahawa ma tô Izaraéu nhihudu norĩ, Ezitu tiꞌai ꞌremhã te te sô ropé, amnho teihi da te ꞌre itehâri siꞌatarẽme mono zô siꞌuihâ na te te sima ꞌre ubumro zaꞌra mono da.
13 Tawamhã apito Faraꞌoho zapari dawadaꞌuriꞌwa norĩ hã ma tô nasi awẽ sidâpâsi tiꞌai uꞌẽne aiwapsi te te nasi ꞌmanharĩ zaꞌra da hã nasi ãma wapsé zaꞌra, Izaraéu nhihudu norĩ hã amnho teihi te te nasi sima iꞌubumro zaꞌra na.
14 Apito zapari dawadaꞌuriꞌwa norĩ, Izaraéu nhihudu norĩ nhibꞌihâꞌa romhuri te te sima ꞌre iꞌmadâꞌâ zaꞌra mono norĩ hã te nasi hâ zaꞌra. Tahawa, te duré nasi sadanharĩ zaꞌra ni ãne:
— E marĩ wa, iwana ne aiwapsi tiꞌai uꞌẽne ꞌre iꞌmanharĩ zaꞌra waꞌaba mono ne hã, ahâmhâ hã, duré ãhã na zama asiwi ꞌmanharĩ aba õ di.
15 Tawamhã danhibꞌihâꞌa tisiré Izaraéu nhihudu norĩ te te ꞌre iwadaꞌuri zaꞌra mono norĩ hã ma tô aiꞌabaꞌré, Apito Faraꞌoho u, tãma siwapsari zaꞌra da. Ãne te tawamhã tãma nharĩ zaꞌra:
— E marĩ da, ma tô ãne na hã wama irobꞌmanharĩ zaꞌra. Wa norĩ hã aima romhuriꞌwa zaꞌra ꞌwa.
16 Amnho teihi hã da te oto wama ꞌre ubumro zaꞌra mono õ di. Tane nherẽ, te tô da te ꞌre wawadaꞌuri pese zaꞌra, tiꞌai uꞌẽtẽ ꞌmanharĩ na wa te tô ãma ꞌre uzusi zaꞌra mono da hã. Tane nherẽ, te duré wawadaꞌuriꞌwa norĩ hã nasi wahâ zaꞌra. Tahawa asapari aima dawadaꞌuriꞌwa norĩ hã ãma wama iꞌupaiꞌwa na hã te tihâimana zaꞌra.
17 Tawamhã apito Faraꞌo, ma asa ãma sadaꞌâbâ zaꞌra ãne:
— A norĩ waꞌwa hã aiwaꞌa zaꞌra waꞌaba di. Duré asima wẽ zaꞌra waꞌaba õ di romhuri hã. Tahawa te aima iwaprosi zaꞌra waꞌaba zé hã te nasi ĩwi iwaptẽrẽ zaꞌra waꞌwa, aiꞌabaꞌréi waꞌaba da, ꞌRe ihâimana uꞌâsi mono, Asibꞌapito zaꞌra waꞌaba ma, asimizama zata na tãma ãma ꞌre asõprub zaꞌra waꞌaba mono da.
18 Apâ aiꞌabaꞌréi waꞌaba, romhuri zaꞌra waꞌaba da. Amnho teihi hã tô da te aima iꞌubumro zaꞌra waꞌaba da hã mare di za. Tane nherẽ, te za tô aiwapsi tiꞌai uꞌẽne hã ꞌre iꞌmanharĩ zaꞌra waꞌaba mo.
19 Tawamhã Izaraéu nhihudu nhibꞌihâꞌa norĩ wi hã ma tô tiwi tirowaihuꞌu õ pese zaꞌra, bâtâ bâre iwana ne aiwapsi tiꞌai uꞌẽne za te te ꞌre iꞌuꞌẽtẽ zaꞌra mono da, da te tãma inharĩ zaꞌra zé hã te te sina wapari zaꞌra wa.
20 Tawamhã apito Faraꞌoho hawi oto wairébé wamhã, ma tô Mozési norĩ hã Arãhã me oto siwi sõpẽtẽ, õ norĩ zô isimipari zahuré zéb ãma.
21 Tahawa, ma tô tãma nharĩ zahuré ni duré ãne:
— Uburé Danhibꞌapito, marĩ iꞌmanharĩ aba zé hã ma tô ꞌmadâ. Tahawa te za duré aiꞌahâri ꞌwa. Aiꞌuꞌâbâ waꞌaba ma tô apito hã duré tãma romhuriꞌwa norĩ zama wazada tinhitiꞌru zaꞌra. A norĩ waꞌwa ma tô isimirosaꞌrata wasété zaꞌra hã wazada tãma isõmri ꞌwa, te te waꞌuprosi da.
Mozési, ꞌRe ihâimana uꞌâsi mono ma, te te duré irobzanhamrizé wasuꞌu
22 Tawamhã Mozési, Uburé Danhibꞌapito ma te duré tãma tinha ãne:
— ꞌRe ihâimana uꞌâsi mono, e marĩ da, ma tô ã hã asibꞌaꞌuwẽ norĩ ma hã irobꞌmanharĩ wasé. E marĩ zô, te tawamhã we ĩzatõ ãwamhã.
23 Ezitu te apito ma, asisi na te tãma irobzanhamri hawi ma tô õ hã ã hã aꞌuwẽ norĩ ma hã robꞌmanharĩ wasété zaꞌra. Tane nherẽ, a hã ãma aime zara õ di. Duré sõꞌreptu zaꞌra õ di.