Ezodu 6:1-30
6 Tawamhã Uburé Danhibꞌapito, te asa tãma tinha ãne, Mozésihi ma:
— A hã te za oto iꞌmadâ Ezitu te apito ma, za te iꞌmanharĩzé hã. Ĩwaihuꞌu pese zarina te tãma iwaihuꞌu zéb zarina te za ĩnhibꞌaꞌuwẽ norĩ siꞌabaꞌré da hã oto tãma rowairébé zaꞌra. Ĩhe, ĩnhiptete zarina te za Izaraéu nhihudu norĩ ma hã robꞌru zaꞌra, ite tiꞌai waꞌõtõ nhoꞌõmo hawi wairébé da hã oto.
ꞌRe ihâimana uꞌâsi mono, Mozésihi zô ihârâzé wasuꞌu
2 Tawamhã ꞌRe ihâimana uꞌâsi mono, te Mozésihi ma tinha ãne:
— Wa hã, Uburé Danhibꞌapito uptabi.
3 Wa tô Abraꞌãhã ma, ꞌRe ĩhâimana uꞌâsi mono ĩwaihuꞌu pese na tãma ĩsihâiꞌré, Izaquihi ma, duré Zacoho ma hã. Tane nherẽ, Uburé Danhibꞌapito uptabi na ĩnhisi na tãma ĩsiwaihuꞌu zaꞌra õ di.
4 Wa tô iwẽ na tãma ropisutu zaꞌra, Canaꞌã na romnhisi ãma tiꞌa te tãma sõmri zaꞌra da, isiré aꞌuwẽꞌõ norĩ iwa ꞌre ihâimana zaꞌra mono zé hã.
5 Ta hã wa hã, ãhã na awaꞌawi na wa tô Izaraéu nhihudu norĩ ꞌre iwazidi zaꞌra mono zé hã wapa. Ta hã ezipsiu norĩ te te ꞌre wadaꞌuri pese zaꞌra mono wa, wa tô oto poꞌre puru, tãma ĩnhimiropisutu zaꞌra zém na iwẽ na hã.
6 Tahawa ãne Izaraéu nhihudu norĩ ma, ĩzadawa wasuꞌu zaꞌra na: “Wa hã Uburé Danhibꞌapito uptabi. Wa za ĩnhibꞌaꞌuwẽ norĩ hã sõꞌreptu zaꞌra Ezitu hawi, ezipsiu norĩ pawaꞌâbâ ãna te te ꞌre romhuri zaꞌra mono da, te te ꞌre iwadaꞌuri pese zaꞌra mono zém hawimhã. Tahawa wa za ĩwaihuꞌu pese ré ĩpaihi hã sarõtõ, ezipsiu norĩ nhisiwimhã ĩnhimihâzém na saꞌẽtẽ te hâ zaꞌra da hã. Tawamhã Izaraéu nhihudu norĩ si wa za asõꞌreptu zaꞌra waꞌwa za.
7 Ĩnhibꞌaꞌuwẽ na ꞌre anomro aba mono da, wa za ãne hã aima ꞌmanharĩ zaꞌra waꞌwa. Tawamhã wa hã ate zaꞌra waꞌwa ꞌRe ihâimana uꞌâsi mono na wa za oto ꞌre ĩhâimana. Duré tawamhã wa hã Uburé Danhibꞌapito, ate waꞌwa ꞌRe ihâimana uꞌâsi mono, ezipsiu norĩ ma ꞌre iromhuri zaꞌra waꞌaba mono zém hawi te iꞌasõꞌreptu zaꞌra waꞌaba na hã te za oto tô a norĩ waꞌwa asiwi ĩwaihuꞌu ꞌwa.
8 Tawamhã wa hã wa za Abraꞌãhã ma, Izaquihi ma, duré Zacoho ma, tiꞌa za te tãma isõmri zaꞌra zém na te iropisutu u hã te asimroi waꞌwa. Tawamhã õ hã tiꞌa hã wa za aima sõmri zaꞌra waꞌwa, ate na oto aima ꞌre hâimana zaꞌra waꞌaba mono da. Wa hã Uburé Danhibꞌapito.”
9 Tawamhã te te tãma iwaihuꞌuzéb zarina, ma tô Mozési Izaraéu nhihudu norĩ ma sadawa wasuꞌu zaꞌra, ꞌRe ihâimana uꞌâsi mono hã. Tane nherẽ, te te sima wẽ zaꞌra õ di, te te siwi iwapari da hã. E marĩ wa. Tãma robzei ãna hâimana zaꞌra wa, pawaꞌâbâ ãna te te ꞌre romhuri zaꞌẽtẽ zaꞌra mono wa.
10 Tawamhã Uburé Danhibꞌapito te Mozésihi ma tinha ãne:
11 — Mo oto Ezitu te apito ma nharĩ da aimorĩ, Izaraéu nhihudu norĩ ma, ite tiꞌai waꞌõtõ nhoꞌõmo hawi wairébé da, te te tãma rowairébé zaꞌra da hã.
12 Tane nherẽ, ma te Mozési, Uburé Danhibꞌapito hã ãne sadaꞌâ:
— Bété, Izaraéu nhihudu norĩ te te siwi ĩwapari da, te te sima wẽ zaꞌra õ wamhã, ãne wamhã, duré apito zama te te sima wẽ õ di za, taha zama te te ĩwapari da hã. Wa hã duré ĩmreme zani suꞌu õ di, duré ĩmreme zani tob di.
13 Tawamhã Uburé Danhibꞌapito, ma tô Mozési norĩ ma tãma waihuꞌu zahuré Arãhã me, Izaraéu nhihudu norĩ ma, te te tãma rowasuꞌu zaꞌra da hã, duré Ezitu te apito Faraꞌoho ma te te tãma nharĩ zahuré da hã, Izaraéu nhihudu norĩ, tiꞌai waꞌõtõ nhoꞌu Ezitu hawi te te isani zaꞌra zém na hã.
Mozésihi norĩ hiꞌrata wasuꞌu, Arãhã hiꞌrata me
14 Ã hã robꞌuiꞌéré hã Mozési norĩ hiꞌrata zaꞌratazé, Arãhã hiꞌrata me ãne: Rubẽ, Zacoho ꞌra poto ꞌrada, maparane siꞌuiwa na iꞌra nhisi norĩ hã ãne: Enoqui, Palu, Hezirõ, Carmi. Ã norĩ hã Rubẽhẽ hawi aꞌuwẽ poto upsãtã na ma tô tihâimana zaꞌra.
15 Ãne Simiãhã ꞌra norĩ nhisi hã: Zemuꞌé, Zami, Oade, Zaquĩ, Zoa, duré Sau hã, cananeu norĩ sipiꞌõi zéꞌre hawi aiꞌuté. Ã norĩ hã Simiãhã hawi aꞌuwẽ poto upsãtã na ma tô tihâimana zaꞌra.
16 Ã hã Levihi ꞌra norĩ nhisi ipoto mono bâ hã ãne: Gésõ, Coate duré Merari. Tawamhã Levihi ãma ꞌre hâimana mono ré ma tô ãma tiwahu, 137 na.
17 Gésõ hã maparane iꞌra norĩ, ãne isisi norĩ mama na ma tô tihâiba: Libni duré Simei. Ta norĩ hã sihudu ahâ uptabi zahuré di.
18 Ã hã duré Coatehe ꞌra norĩ, ãne isisi zaꞌra hã: Anrã, Isa, Hebrõ duré Uziꞌé. Coatehe ãma ma tô 133 na ãma tiwahu.
19 Merari maparane iꞌra norĩ, ãne isisi norĩ mama na ma tô tihâiba: Mali duré Musi. Ã hã Levihi hawi aꞌuwẽ, isihudu norĩ.
20 Tawamhã Anrã, ma tô tina wapté Zoquebede na ĩsisi na timro. Ta hawimhã ma tô duré Arã norĩ hã, Mozésihi me tipoto zahuré. Tawamhã Anrã ãma hã, ma tô tiwahu, 137 na.
21 Isa siꞌubdatõ iꞌra norĩ, ãne isisi norĩ mama na ma tô tihâiba: Cora, Nefegue duré Zicri.
22 Tawamhã Uziꞌé zama hã, ma tô siꞌubdatõ iꞌra norĩ, ãne isisi norĩ mama na tihâiba: Mizaéu, Elzafã duré Sitri.
23 Tawamhã Arã, ma tô Eliseba, Aminadabehe ꞌra, Nasõhõ hidiba na timro. Ta hã maparane siꞌuiwa na iꞌra hã. Nadabe, Abiu, Eriaza duré Itama.
24 Cora ma tô siꞌubdatõ iꞌra norĩ, ãne isisi norĩ mama na tihâiba: Assir, Eucana, Abiꞌasape. Ã norĩ hã Cora hawi aꞌuwẽ poto upsãtã na ma tô tihâimana zaꞌra.
25 Tawamhã Eriaza, Arãhã ꞌra hã ma tô Putiꞌéhé ꞌra sipiꞌõ na timro. Ta hã ma tô tiꞌra hã sisi, Finéa na. Duré ã norĩ hã ma tô levita norĩ waꞌõtõ nhibꞌihâꞌa na tãma ꞌre hâimana zaꞌra.
26 Ã norĩ hã Arã norĩ, Mozésihi me ma tô Uburé Danhibꞌapito, ãne na tãma waihuꞌu zahuré: “Izaraéu nhihudu norĩ, Ezitu hawimhã te za iꞌawazere ꞌwa.”
27 Ta norĩ hã ma tô Ezitu te apito Faraꞌoho u tineb zahuré, ta hawi Izaraéu nhihudu norĩ te te awazere zahuré da hã.
ꞌRe ihâimana uꞌâsi mono, Mozésihi ma, te te inharĩzé wasuꞌu
28 Uburé Danhibꞌapito, Mozésihi ma, Ezitu ãma te te tãma nharĩ wamhã,
29 ma tô ãne tãma tinha:
— Wa hã Uburé Danhibꞌapito. Maꞌãpé Ezitu te apito Faraꞌoho ma tãma ĩzadawa wasuꞌu na, uburé te aima iwaihuꞌuzém na hã.
30 Tane nherẽ tawamhã Mozési, ma tô ãma tãma waꞌrã ãne:
— Ĩnhibꞌapito, wa hã ĩmreme tété hâ di, duré ĩmreme zani suꞌu õ di. E niha te za tawamhã apito ĩwapari waihuꞌu, ãne nherẽ.
