Ezodu 7:1-25
7 Tawamhã Uburé Danhibꞌapito, te Mozésihi ma tinha ãne:
— Wa hã wa za aima ꞌmanha, ĩsine ꞌRe ihâimana uꞌâsi mono na apito Faraꞌoho ma aihâimana da. Tawamhã Arã adubꞌrada hã te za dama ipire zadawa wasuꞌuꞌwa ne, apito ma nasi asadawa wasuꞌu.
2 Tahawa, a hã te za Arãhã ma, uburé te aima iwaihuꞌu mono zém na, tãma ĩzadawa wasuꞌu, aimreme nhipai u apito Faraꞌoho ma, te te rowasuꞌu mono da, duré te te tiwi waptẽrẽ da, Izaraéu nhihudu norĩ ma, te te iwaprosizé hã isiptiꞌai hawi wairébé da.
3 Tane nherẽ, pẽꞌẽ tete na hâimana da hã wa za aꞌâ nasi ꞌrãnhito. Tawamhã ahâ na wa za nasi aꞌâ Ezitu ãma marĩ hã tãma aꞌmanha, ĩnhimiromhõsi pipa na.
4 Taha nherẽ, apito hã te te aꞌâ aiwapari aba õ di za. Tawamhã wa hã wa za ĩnhimihâzém na hã azâ, ĩte Izaraéu nhihudu norĩ, Ezitu hawi te simroi mono da hã.
5 Tawamhã wa hã, ezipsiu norĩ te hâ zaꞌra da, oto ĩnhibꞌrada te sarõtõ wamhã, duré ihawib zaꞌra Izaraéu nhihudu norĩ te sani zaꞌra wamhã, te za ezipsiu norĩ hã siwi ĩwaihuꞌu, wa hã Uburé Danhibꞌapito uptabi na.
6 Tawamhã Mozési norĩ Arãhã me, ma tô Uburé Danhibꞌapito te te tãma iwaihuꞌu zahuré zé hã mreme ꞌmanharĩ zahuré.
7 Mozésihi ãma 80 na ãma iwahub ãma ré, duré Arãhã ãma 83 na ãma iwahub ãma ré, ma tô Ezitu te apito ma, ãne hã tãma nharĩ zahuré.
Arãhã nhiwã isiwahizé wasuꞌu
8 Tawamhã Uburé Danhibꞌapito, te Mozési norĩ ma, Arãhã me hã tãma nharĩ zahuré ãne:
9 — Ezitu ãma apito, niha na marĩ, dama iꞌmanharĩ waihuꞌuꞌõ, ꞌmanharĩ aba da, te te aima ꞌrui waꞌaba wamhã, a hã Mozési te za Arãhã ma tãma iꞌru, tinhiwã te te âri da, duré tiꞌai u te te me da, apito nhoꞌremhã. Tawamhã tinhiwã, tiꞌai u te te mei wamhã, te za wahi na siꞌmanha.
10 Tawamhã apito u, Mozési norĩ Arãhã me oto neb zahuré wamhã, ma tô Uburé Danhibꞌapito te te tãma iwaihuꞌu zahuré zé hã tãma poto hâiꞌré zahuré. Tawamhã Arã, ma tô tinhiwã tiꞌai u hã time apito nhoꞌremhã, duré tãma iromhuriꞌwa norĩ nhoꞌremhã. Ta hã te te mei wamhã, ma tô siwahi isõꞌreb zaꞌra hã.
11 Tawamhã apito, rowaihuꞌu pese ꞌwa norĩ zô duré romhõsiꞌwa norĩ zô zama ma tô sô tihârâ zaꞌra, tô isine marĩ hã te te tãma ꞌmanharĩ zaꞌra da.
12 Tawamhã hâiba bâ romhõsiꞌwa norĩ, tiꞌai u tinhiwã te te isãmra hã ma tô ta norĩ hã siwahi zaꞌra. Tane nherẽ, Arãhã nhiwã ma tô romhõsiꞌwa norĩ nhiwã isiwahi zaꞌra hã tiwi sõmri zaꞌra.
13 Tane nherẽ, Uburé Danhibꞌapito te te inharĩzéb zarina ma tô apito pẽꞌẽ tete na aꞌâ tô tihâiba. Tahawa, Mozési norĩ Arãhã me, te te tiwi irowaptẽrẽ zahuré zém na te te ãma saze zahuré õ di.
Imorĩꞌrata na robꞌmanharĩzé wasuꞌu, isiꞌâwapruzém na
14 Tawamhã Uburé Danhibꞌapito, te Mozésihi ma tinha ãne:
— Apito pẽꞌẽ tete na hâimana wa, Ezitu hawi dawairébé da hã te te dama rowairébé õ di.
15 Tahawa asõtõ hâ na za, mararé awẽ wi apito Faraꞌoho tẽme aimorĩ da, Nilu na panhoꞌõmo nhisi u morĩ ré. Tawamhã te za asiwã isiwahi hã asiré iꞌâ, iré sô asimipari da, pazaihâ na hã.
16 Tawamhã te za ãne tãma inha za: “Uburé Danhibꞌapito, hebreu norĩ te ꞌRe ihâimana uꞌâsi mono, te aima sadawa wasuꞌu da te we ĩzatõ, isibꞌaꞌuwẽ norĩ ma waprosi waré wa, oto siꞌabaꞌréi hâ, ropsi ꞌre iropsaꞌwari mono ãma, õhõ ãma si ꞌre wata zaꞌra mono da. Tane nherẽ, zahadu a hã wapari õ di isimirowaihuꞌuzé hã.
17 Tahawa ꞌRe ihâimana uꞌâsi mono te ãhã na aima tinha: Marĩ te te iꞌabꞌmanharĩzé mono na te za Uburé Danhibꞌapito na hã iwaihu. Apito, ã hã ĩnhiwã ĩnhibꞌrata ihâimana na wa za asõꞌa â hã azâ. Tawamhã te za â wapru na siꞌmanha.
18 Tawamhã tebe, Nilu â ꞌre, ꞌre ihâimana zaꞌra mono hã nemo te za dâꞌâ. Duré â hã za âꞌuzé uptabi di. Tahawa ezipsiu norĩ hã te te duré âhuri waihuꞌu õ di za.”
19 Tawamhã Uburé Danhibꞌapito, Mozésihi ma, te duré tãma tinha ãne:
— Maꞌãpé Arãhã ma nharĩ, tinhiwã â nhisiwi te te wẽ da. Tawamhã daro mono bâ te za â hã siꞌâwapru, pa nhoꞌõmo mono na hã, isipti mono na hã, duré puꞌu mono na â waꞌõno ꞌre ihâimana zaꞌra mono hã. Ãne te za duré wede ꞌmanharĩ na piza ꞌre marĩ nhemezéb ꞌremhã, duré ẽtẽ na ubꞌrẽ ꞌrem ne ꞌremhã siꞌâwapru zaꞌra.
20 Tawamhã Mozési norĩ Arãhã me, ꞌRe ihâimana uꞌâsi mono te te tãma iꞌru zahuré zéb uwaibaba, ma tô apito nhoꞌremhã duré tãma romhuriꞌwa norĩ nhoꞌremhã ꞌmanharĩ zahuré. Tawamhã Arã isõꞌa zaꞌra tinhiwã te te isarõtõ na te te ãma â préꞌé wamhã, ma tô â hã siꞌâwapru.
21 Tawamhã tebe hã nemo ma dâꞌâ. Duré â uzé uptabi di. Tahawa ezipsiu norĩ tinhibꞌâ zaꞌra hã te te âhuri waihuꞌu õ di. Duré Ezitu ꞌremhã daro mono bâ te â wapru hã nomro.
22 Tawamhã Ezitu ãma marĩ ꞌmanharĩ waihuꞌu nhipeseꞌwa norĩ hã ma tô õne hã duré siwi ꞌmanha. Tahawa apito Faraꞌo pẽꞌẽ tete na hã ma tô duré aꞌâ tihâiba. Uburé Danhibꞌapito te te inharĩzéb zarina, Mozési norĩ Arãhã me, te te tiwi irowaptẽrẽ zahuré zé hã te te wapari õ di.
23 Tahawa za marĩ tãma ihâimanazém na sina hâtâꞌâ ãna hã ma tô apâ mo, tinhimiromhurizé ꞌri u.
24 Tawamhã pazaihâ na ezipsiu norĩ, ma tô â wẽ zô hã te te sima abꞌre, te te âhuri da. E marĩ wa. Panhoꞌõmo na â hã te te âhuri waihuꞌu õ wa.
25 Tawamhã Uburé Danhibꞌapito, panhoꞌu te te â préꞌé parimhã, ma tô â waprui ré hã 7 na bâdâ hã ãma mo.