Ezodu 8:1-32
8 Tawamhã Uburé Danhibꞌapito, te duré taha parimhã Mozésihi ma tinha ãne:
— Apito Faraꞌoho u duré aimorĩ, ãne na tãma ĩzadawa wasuꞌu da. “Ĩnhibꞌaꞌuwẽ norĩ ma, te za irowairé, ã hã tiꞌai waꞌõtõ nhoꞌõmo hawi wairébé da, ĩꞌãma ꞌre wata zaꞌra mono da.
2 Tãma waprosi waré zaꞌra õ wamhã, wa za wa hã ã hã tiꞌai waꞌõtõ nhoꞌõmo ma robꞌmanha. Uti zarãpré hã te za nemo te te robꞌrãiꞌré za.
3 Tawamhã Nilu na panhoꞌõmo nhisi ꞌremhã uti zarãpré hã ahâ uptabi di za. Ta norĩ hã â hawi rob u iwairébé hã te za asimiwaptâ u, aima romhuriꞌwa norĩ nhorõwa u hã, asibꞌaꞌuwẽ norĩ nhorõwa u hã, marĩ zebrezéb u hã, duré iꞌuꞌẽtẽ waiꞌozéb u hã uburé sisisi.
4 Tawamhã duré uti te za asisiwimhã ꞌre sarõtõ zaꞌra, asibꞌaꞌuwẽ norĩ nhisiwimhã, duré aima romhuriꞌwa norĩ nhisiwimhã.”
5 Tawamhã te duré zahadu Mozésihi ma tinha ãne:
— Maꞌãpé Arãhã ma nharĩ, pa nhoꞌõmo mono nhisiwi, isipti mono nhisiwi, duré puꞌu mono nhisiwi, tinhiwã hã te te wẽ mono da, uti hã ta norĩ hawi wairébé mono da rob u, Ezitu tiꞌa hã te te siwi iꞌubu da hã.
6 Tawamhã Arã, Ezitu ãma â nhisiwi tinhiwã te te wẽ wamhã, ma tô uti zarãpré rob u wairébé. Tahawa, ma tô uburé tiꞌai waꞌõtõ nhoꞌõmo ꞌremhã nemo te te suwa.
7 Tane nherẽ, marĩ ꞌmanharĩ waihuꞌu nhipeseꞌwa norĩ, tô õne tinhimiromhõ hã ma tô siwi ꞌmanha, Ezitu tiꞌai u uti zarãpré iwairébé da hã.
8 Tawamhã apito Faraꞌo, Mozési norĩ zô Arãhã me hã ma tô sô tihârâ zahuré, te te ãne tãma nharĩ zahuré da:
— Maꞌãpé, asibꞌapito ꞌRe ihâimana uꞌâsi mono ma tãma aimreme aba, uti zarãpré hã ĩnhiti, duré ĩnhibꞌaꞌuwẽ norĩ nhiti te te satõrĩ zaꞌra da. Tawamhã wa hã wa za asibꞌaꞌuwẽ norĩ ma hã waprosi zaꞌra, za siꞌabaꞌré da, Uburé Danhibꞌapito uptabi ma, abaze da te ꞌre izata zaꞌra mono na tãma ꞌre sõprub zaꞌra mono da hã.
9 Tawamhã Mozési ma te ãma tãma waꞌrã ãne:
— Wẽ di tô. Maꞌãpé bâdâ hã aiꞌãma tãma ĩmremezéb da hã, aima dama rotiꞌwa norĩ ãma tãma ĩmremezéb da hã, asibꞌaꞌuwẽ norĩ ãma tãma ĩmremezéb da hã, aꞌâ ĩma pisutu, asimiromhurizé ꞌri ꞌremhã, duré danhorõwa ꞌri ꞌremhã te te uprosi da, apâ â wapsi ꞌre hâimana zaꞌra mono da.
10 Tawamhã apito Faraꞌo ma te ãma tãma waꞌrã ãne:
— Awẽpsi te za ĩꞌãma aimre, asibꞌapito ma.
Tawamhã Mozési te tãma tinha ãne:
— Apito, asima iwẽzé iwaptẽrẽzé hã wa za ꞌmanha. Ãhã wamhã, a hã te za iwaihu, Uburé Danhibꞌapito ne, aimawi iꞌmaihâimana õ na hã.
11 A hã, aima romhuriꞌwa norĩ me, duré asibꞌaꞌuwẽ norĩ me te za oto uti zarãpré ãna hã asima iwẽ na aihâimana zaꞌra waꞌwa. Nilu â na si te za oto uti zarãpré hã tihâimana zaꞌra.
12 Tawamhã Mozési norĩ Arãhã me ma tô apito nhimiromhurizé ꞌri hawimhã oto tipusi zahuré. Tawamhã Mozési ma tô ꞌRe ihâimana uꞌâsi mono ma hã mre, apito ꞌre ihâimana mono zéb ꞌremhã uti zarãpré te te uprosi da, apito nhorõwa u te te aré tãma ĩrobꞌru zaꞌra hã.
13 Tawamhã Uburé Danhibꞌapito, tãma imremezé hã ma tô wapa. Tahawa uti zarãpré ꞌri ꞌre ihâimana zaꞌra hã, duré ꞌri zahâpâ na ihâimana zaꞌra hã ma tô aiꞌutõ.
14 Tawamhã ezipsiu norĩ, ma tô nemo te te saꞌwari uti zarãpré hã, saꞌwari ꞌrãihâ na. Tahawa tiꞌai waꞌõtõ nhoꞌõmo mono bâ ma tô iꞌuzé hã te te ropé.
15 Tawamhã apito, uti zarãpré dâ, te te aꞌmadâꞌâ wamhã, ma tô duré tipẽꞌẽ tete na tihâimana na hã apâ ãma uzusi, Uburé Danhibꞌapito te te iwaihuꞌuzéb zarina. Mozési norĩ Arãhã me, te te tiwi irowaptẽrẽ zahuré hã te te wapari õ di.
Siꞌubdatõ ãma dama robꞌmanharĩzé wasuꞌu, daꞌu na
16 Tawamhã Uburé Danhibꞌapito te Mozésihi ma, duré tãma tinha ãne:
— Maꞌãpé Arãhã ma nharĩ, tinhiwã na tiꞌa te te azâri da, te te iꞌazâri hawi Ezitu tiꞌai ꞌremhã uburé tiꞌa zaprum nherẽ, daꞌu na siꞌmanharĩ zaꞌra da.
17 Tawamhã Arã tinhiwã na tiꞌa te te azâri wamhã, ma tô Ezitu ãma tiꞌa zaprum nherẽ, daꞌu na hã uburé siꞌmanha. Ta hã ma tô nemo te te dazuwa zaꞌra. Duré danhimizama norĩ zama ma tô nemo te te suwa zaꞌra.
18 Tawamhã marĩ ꞌmanharĩ waihuꞌu nhipeseꞌwa norĩ, ma tô aré daꞌu na asa te te robꞌmanharĩ zaꞌra da hã siwi pibu. Tane nherẽ, te te oto tawamhã siwi ãma uwaimrami õ di, tinhimiromhõsi na hã. Tawamhã te zahadu aꞌuwẽ norĩ hã, duré danhimizama norĩ hã, daꞌu te te isuwa zaꞌra na hã tihâimana zaꞌra.
19 Tawamhã marĩ ꞌmanharĩ waihuꞌu nhipeseꞌwa norĩ, te apito ma nharĩ zaꞌra ãne:
— ꞌRe ihâimana uꞌâsi mono nhibꞌrata hawim na ma tô ãne hã tiromhâiba.
Tane nherẽ, apito Faraꞌo tipẽꞌẽ tete na tihâimana na hã ma tô ãma uzusi, ꞌRe ihâimana uꞌâsi mono te te iwaihuꞌu siromo zéb zarina. Tahawa Mozési norĩ Arãhã me te te tiwi irowaptẽrẽ zahuré zém na hã te te wapari zahuré õ di.
Maparane siꞌuiwa na ãma dama robꞌmanharĩzé wasuꞌu, upu na
20 Tawamhã Uburé Danhibꞌapito, Mozésihi ma, te tinha ãne:
— Awẽ mararé, apito padawa u morĩ wamhã isõꞌrãmi aimorĩ, wa hã Uburé Danhibꞌapito ãne na te ĩnharĩzém na tãma ĩzadawa wasuꞌu da: “Ĩnhibꞌaꞌuwẽ norĩ ma, tiꞌai waꞌõtõ nhoꞌõmo hawi wairébé da hã te za tãma iwaprosi suꞌu zaꞌra, ĩꞌãma ꞌre wata zaꞌra mono da.
21 Tãma waprosi suꞌu zaꞌra õ wamhã, wa hã wa za upu na te aima robꞌmanharĩ da hã, aima romhuriꞌwa norĩ ma, te robꞌmanharĩ da hã, duré ate aꞌuwẽ norĩ ma, te robꞌmanharĩ da hã ãma tãma robꞌru za, wairébé da. Tawamhã ezipsiu norĩ nhorõwa ꞌremhã ubu hã ꞌmasisi mono di za. Duré tiꞌa nemo te za te te upsibi.
22 Tane nherẽ, taha bâtâ na, ĩnhibꞌaꞌuwẽ Gosẽ na rowamri ãma ꞌre ihâimana zaꞌra mono zéb ãma wa za tãma baꞌa zaꞌra, taha tiꞌai ꞌremhã ubu hâimana tõ da. Ãne wa, te za a hã ĩwaihu, wa hã Uburé Danhibꞌapito ã hã tiꞌai waꞌõtõ nhoꞌõmo ꞌre ĩhâimana na hã.
23 Ĩnhibꞌaꞌuwẽ norĩ, asibꞌaꞌuwẽ me, aiwa tãma iromhâimana zahuré õ zém na wa za ĩsima ãma rowairébé. Tawamhã ã hã romhõsi pipa na robꞌmanharĩzé hã te za awẽ mararé si tihâiba.”
24 Tawamhã ãne Uburé Danhibꞌapito, ꞌRe ihâimana uꞌâsi mono te te robꞌmanharĩ wamhã, ma tô apito nhimiromhurizé ꞌri ꞌrãihâ u ubu hã asisi. Duré tãma romhuriꞌwa norĩ nhorõwa u zama ma tô sisisi. Ahâ uptabi wa, te duré nemo ꞌre siꞌré. Tahawa uburé Ezitu ãma hã ma duré te te siwi rowamnarĩ.
25 Tawamhã apito, Mozési norĩ zô, Arãhã me sô hârâ zahuré wamhã, te ãne tãma nharĩ zahuré:
— Te za oto aiꞌabaꞌréi waꞌwa, danhimizama zata na ate ꞌRe ihâimana uꞌâsi mono ma, ãma tãma asõprub zaꞌra waꞌaba da. Tane nherẽ, danhimizama zata na Ezitu ꞌre te za asõprubzé hã asiwi iꞌmanharĩ ꞌwa.
26 Tawamhã Mozési ma te ãma tãma waꞌrã ãne:
— Mare di, iꞌuwaibaba õ di tane hã. E marĩ wa. Uburé Danhibꞌapito, wate ꞌRe ihâimana uꞌâsi mono ma, wanhimizama zata na za tãma ꞌre iwanhoprub zaꞌra mono zé hã, ezipsiu norĩ ma iwazéb zahi, tãma hâimana zaꞌra wa. Tawamhã wanhimizama wa te ꞌre simroi mono ré, te te duré ꞌre waꞌmadâꞌâ zaꞌra mono wamhã, te za ẽtẽ na te te siwi ꞌre wanhimro.
27 Wa za tô rop si ꞌre irosaꞌwari mono u siꞌubdatõ bâtâ ꞌremhã wazâmorĩ ni, tô Uburé Danhibꞌapito te te wama iwaihuꞌuzéb zarina danhimizama zata na ãma tãma ꞌre wanhoprub zaꞌra mono da, ro te te ipisutu tẽme iwasihutuzéb u.
28 Tawamhã apito te duré tãma nharĩ zahuré ãne:
— Romhâ na aiꞌabaꞌréi waꞌaba dai õ wamhã, wa za rop si ꞌre irosaꞌwari mono u danhimroi waꞌaba mono da hã aima waprosi waꞌwa, Uburé Danhibꞌapito, ate zaꞌra waꞌwa ꞌRe ihâimana uꞌâsi mono ma asimizama zata na ãma tãma asõprub zaꞌra waꞌaba da hã. Tawamhã te za duré ĩꞌãma zama ꞌre aimreme aba mo.
29 Tawamhã Mozési, ma duré ãma tãma waꞌrã ãne:
— Wẽ di. Ã hawi ĩwatobro wi, wa za tô ꞌRe ihâimana uꞌâsi mono ma hã aiꞌãma mre, ubu hã te te aima sate mono da, aima romhuriꞌwa norĩ ma hã, duré ate aꞌuwẽ norĩ ma hã. Tane nherẽ, oto wama asadawa nhipese na sahu õ di za. Amanawi taré wama ropisutu tõ. Te za tô oto aꞌuwẽ norĩ hã aiꞌabaꞌré, rop si ꞌre irosaꞌwari mono ãma, Uburé Danhibꞌapito ma, danhimizama zata na tãma ꞌre sõprub zaꞌra mono hâ.
30 Tawamhã Mozési, apito nhimiromhurizé ꞌri hawi watobro wamhã, ma tô Uburé Danhibꞌapito ma hã mre.
31 Tawamhã Uburé Danhibꞌapito, Mozési te te tiwi iwaptẽrẽzé hã ma tô ꞌmanha. Tahawa apito hawimhã ubu hã ma tô te te sate, duré tãma iromhuriꞌwa norĩ hawimhã, duré ite aꞌuwẽ norĩ hawimhã. Tahawa, ꞌmaihâimana õ pese na te tiromhâiba oto.
32 Tane nherẽ, apito pẽꞌẽ tete na tihâimana na hã ma tô duré apâ ãma uzusi. Tahawa dasiꞌabaꞌré da hã te te duré dama waprosi zaꞌra õ di.
