Ezodu 9:1-35
9 Tawamhã Uburé Danhibꞌapito te Mozésihi ma tinha ãne:
— Apito Faraꞌoho u aimorĩ, Uburé Danhibꞌapito, hebreu norĩ te ꞌRe ihâimana uꞌâsi mono, ãne na te inharĩzém na tãma ĩzadawa wasuꞌu da: “Ĩnhibꞌaꞌuwẽ norĩ ma, maꞌãpé tãma waprosi zaꞌra na, ã hã tiꞌai waꞌõtõ nhoꞌõmo hawimhã wairébé da, ĩꞌãma ꞌre wata zaꞌra mono da.
2 A hã duré tãma waprosi zaꞌra õ wamhã, duré siꞌabaꞌré tõ da tiwi rosawi zahu zaꞌra wamhã,
3 wa hã wa za dahâzé ipire na hã, uburé danhimizama awaru norĩ hã, awaru poꞌre pore norĩ hã, awaru baꞌõmo norĩ hã, duré powawẽ norĩ hã, poneꞌẽrebâ zéré mapure norĩ hã, duré poneꞌẽrebâ zéré uzé norĩ hã, dawi hâ zaꞌra.
4 Tawamhã wa za duré Izaraéu nhihudu nhimizama ꞌrem norĩ, ezipsiu norĩ nhimizama norĩ ꞌre me, aiwab õ na romhâimanazé hã tãma ꞌmanharĩ zahuré za. Tahawa Izaraéu nhihudu norĩ nhimizama iꞌmatâꞌâ da hã mare di za.
5 Wa hã Uburé Danhibꞌapito, wa bâdâ hã ĩsima pisutu: awẽ wa za ãne hã ꞌmanha.”
6 Tawamhã awẽ bâtâ na ma tô Uburé Danhibꞌapito hã oto tô ꞌmanha. Te te inharĩzéb zarina ma tô uburé ezipsiu norĩ nhimizama hã nemo tiwi siꞌutõrĩ. Tane nherẽ, tawamhã Izaraéu nhihudu norĩ nhimizama si, siꞌutõrĩ õ di.
7 Tawamhã apito Faraꞌo, ma tô Izaraéu nhihudu norĩ ꞌre ihâimana zaꞌra mono zéb u hã daꞌmazatõ, niha hã romhâimanazé te te waihuꞌu da. Ãhã wa, ma tô Izaraéu nhihudu norĩ nhimizama siꞌutõrĩꞌõ na wẽ na isimasam na tãma ꞌmairowasuꞌu ni. Tane nherẽ, te tawamhã zahadu simirosaꞌrata wasété nhiptete uꞌâsi, tihâimana na hã te te ãma uzusi.
Imropâ ãma dama robꞌmanharĩzé wasuꞌu, daꞌwaꞌre tobꞌmaiꞌãsi na
8 Tawamhã Uburé Danhibꞌapito te Mozési norĩ ma, Arãhã me, tãma nharĩ zahuré ãne:
— ꞌRuꞌa te za asibꞌrata na iꞌazaꞌãi waꞌwa, tiꞌa uꞌẽne, da te ꞌre isebre zaꞌra mono zéb ꞌre, ꞌre isimiꞌwara mono hã. Tawamhã a hã, Mozési te za ꞌruꞌa hã nasi hâimo iꞌanha za, rowaꞌuꞌu nhoꞌrãmi Ezitu te apito nhoꞌa.
9 Tawamhã ta hã isum hâi pesere te za Ezitu tiꞌai ꞌre daro mono bâ hã te te ropé. Ta hã te za duré aꞌuwẽ ꞌre ihâimana zaꞌra mono norĩ hã, duré danhimizama ꞌre isimasa mono norĩ zama hã nemo iꞌwaꞌre toꞌmaiꞌã hã te te duri.
10 Ãne Mozési norĩ, Arãhã me, ꞌruꞌa tinhibꞌrata na te te amrami zahuré wamhã, ma tô apito nhoꞌre para na hâiwi iré aimaꞌwa. Tawamhã Mozési hâimo te te sãmra wamhã, ma tô aꞌuwẽ ꞌre ihâimana mono waꞌre toꞌmaiꞌãsi na hã duré danhimizama ꞌre isimasa mono waꞌre toꞌmaiꞌãsi na hã siꞌmanharĩ zaꞌra.
11 Tawamhã marĩ ꞌmanharĩ waihuꞌu nhipeseꞌwa norĩ hã, Mozési u hã sihâiꞌré zaꞌra õ di. E marĩ wa. Tisiré ezipsiu norĩ ne, iwaꞌre toꞌmaiꞌã hã te te hâibaꞌutõrĩ zaꞌra wa.
12 Tane nherẽ, te duré apito simirosaꞌrata wasété nhiptete na zahadu tihâimana na hã te te uzusi, Uburé Danhibꞌapito niha na aꞌâ hâimana da, te te tãma iꞌmanharĩzéb zarina. Duré Uburé Danhibꞌapito, Mozésihi ma, te te inharĩzéb zarina, Arãhã me, te te tiwi irowaptẽrẽ zahuré zém na hã te te wapari zahuré õ di ãma, apito Faraꞌo hã.
7 ãma dama robꞌmanharĩzé wasuꞌu, tãnhama na
13 Tawamhã Uburé Danhibꞌapito te Mozésihi ma tinha ãne:
— Mararé uptabi te za apito u aimo, Uburé Danhibꞌapito, hebreu norĩ te ꞌRe ihâimana uꞌâsi mono, ãne na te inharĩzém na hã tãma ĩzadawa wasuꞌu da: “Ã hã tiꞌai waꞌõtõ nhoꞌõmo hawi wairébé da, te za oto ĩnhibꞌaꞌuwẽ norĩ ma waprosi zaꞌra, ĩꞌãma ꞌre wata zaꞌra mono da.
14 E marĩ wa. Ãhã na tãma waprosi zaꞌra õ wamhã, wa hã wa za ĩnhimirobꞌmanharĩ pipa na hã aiꞌazâ. Aima romhuriꞌwa norĩ zama hã, duré ate aꞌuwẽ norĩ zama hã wa za hâ zaꞌra, a hã waihuꞌu da, tiꞌai ãma niꞌwa ĩsine ihâimana õ na hã.
15 Tawamhã duré a hã aihâzé ipire na te aiꞌazâri ꞌwaꞌâhã, duré ate aꞌuwẽ norĩ ihâzé ipire na te hâ zaꞌra ꞌwaꞌâhã, te aré õne haré uburé pese misi haré aiꞌutõrĩ ꞌwa.
16 Tane nherẽ, aꞌâ ꞌre aihâimana mono da hã wa tô bâdâ hã aima apraba, ĩwaihuꞌu pese na ꞌre ĩhâimana mono zé hã te aꞌâ aima hâiꞌré da, duré uburé daro mono bâ ĩnhisi, da te waihuꞌu zaꞌra da hã.
17 Tane nherẽ, te zahadu a hã ꞌre iꞌasiꞌmadâꞌâ zei mono na aihâimanazém na hã ãma iꞌuzusi mo. Tahawa duré ĩnhibꞌaꞌuwẽ siꞌabaꞌré da, tãma irowairébé zaꞌra da hã asima wẽ õ di.
18 Tahawa, awẽmhã mararé ãne bâtâ na wa za tãzâ isiptede taꞌa da hã ꞌmanha, niwa Ezitu ꞌre iwatobro na iwasuꞌu hã ihâimana õ na.
19 Tahawa maꞌãpé rom na ate powawẽ ihâimana zaꞌra hã dama ꞌru na we da te ubumroi mono da ꞌri u. Duré niꞌwam norĩ rom na ihâimana zaꞌra, danhimizama powawẽ norĩ me, ta norĩ ꞌri u isiꞌabaꞌréi õ norĩ, oto tãzâ taꞌa wamhã, te za uburé pese aiꞌutõ.”
20 Tawamhã apito ma romhuriꞌwa norĩ, ãne na Uburé Danhibꞌapito te te dama iropipa wasuꞌu te te iwapari zaꞌra zé ma hã, ma tô tipahi pese zaꞌra. Tahawa tite pawaꞌâbâ ãna buru na te te tãma ꞌre iromhuri zaꞌra mono norĩ hã ma tô tinhimizama siré hã ꞌripara u te te ꞌmazasi zaꞌra.
21 Tane nherẽ niꞌwam norĩ, Uburé Danhibꞌapito te te iwaihuꞌuzé te te iwapari zaꞌra õ norĩ, ma tô tite pawaꞌâbâ na te te tãma ꞌre iromhuri zaꞌra mono hã, duré tinhimizama norĩ rom na sõꞌawi hâimana zaꞌra da hã rẽme zaꞌra.
22 Tawamhã Uburé Danhibꞌapito te Mozésihi ma tinha ãne:
— Hâiwaꞌu te za oto asibꞌrada hâimo iwẽ. Asibꞌrada wẽ wamhã, te za uburé Ezitu tiꞌai ꞌremhã tãzâ hã titaꞌa. Duré te za aꞌuwẽ ꞌre ihâimana zaꞌra mono nhisiwimhã, danhimizama ꞌre isimasa mono nhisiwib zama hã, duré robꞌre nhisiwib zama hã titaꞌa.
23 Tawamhã Mozési tisiwazusizé hâimo hâiwa u te te wẽ wamhã, ma tô Uburé Danhibꞌapito, tãirãrãꞌã ma hã robꞌru. Duré tiꞌai waꞌõtõ nhoꞌu hã, tã nhama na, duré tãi wapsaꞌa na ma tô azâ. Tawamhã tã ipĩni nhama ré pĩni nhiptete na
24 Ezitu tiꞌai ꞌre uburé ꞌri nhoꞌu ꞌre ihâimana zaꞌra mono na taꞌa da hã ma tô ꞌmanha. Tawamhã tã hã wapsaꞌa ré pĩni nhimizazâri ãna ma tô titaꞌa. Ã hã niwa Ezitu ãma ihâimana õ, ma tô waꞌuꞌu nhiptete na hã watobro.
25 Tawamhã Ezitu tiꞌai ꞌre uburé rom na siwazari marĩ ꞌre ihâimana zaꞌra mono hã ma tô te te uprosi, tãzâ ita hã. Duré aꞌuwẽ norĩ zama, duré danhimizama zama, ma tô te te anhoꞌremhâri. Uburé robꞌre norĩ zama, duré wede norĩ zama, ma tô uburé pese te te na.
26 Tawamhã Gosẽ tiꞌai ãma Izaraéu nhihudu norĩ ꞌre ihâimana zaꞌra mono zéb ãma si tãzâ hã taꞌa õ di.
27 Tawamhã apito, Mozési norĩ zô, Arãhã me itẽme neb zahuré da, te te daꞌmazatõrĩ wa, oto itẽme neb zahuré wamhã, te ãne tãma siwasuꞌu zahuré:
— Ãhã na wa hã wa tô ĩwasédé hã ꞌmanha. Uburé Danhibꞌapito si te iꞌuwaibaba na ꞌre hâimana. Tahawa wa norĩ hã ĩnhibꞌaꞌuwẽ norĩ me hã, marĩ na iꞌupaiꞌwa na hã wa tô wahâimana zaꞌra ni.
28 Maꞌãpé, Asibꞌapito waꞌaba ma, aimreme aba. Tãirãrã hã tã ipĩni nhama ré hã sipari zahuré hâ. Pipa uptabi di! Tawamhã aiꞌabaꞌréi waꞌaba da hã wa za oto aima waprosi zaꞌra waꞌwa. Tawamhã duré oto iꞌasimipari zahu aba da hã mare di za.
29 Tawamhã Mozési, ma te ãma tãma waꞌrã ãne:
— Ã hã ꞌri nhoꞌõmo hawi ĩwatobro wamhã, wa za ĩnhibꞌrada hâimo wẽ zahuré, Uburé Danhibꞌapito ma, ĩmreme da. Tawamhã tãma ĩmreme wamhã, tãirãrã hã te za sazâ za. Duré niwamhã oto tã ipini nhama ré itaꞌa zahu da hã mare di za. Apito, ꞌRe ihâimana uꞌâsi mono te tiꞌa ihâimana na, ãne hã duré ãma waihuꞌu da, te za tãzâ hã sazâ.
30 Tane nherẽ, ĩma aiwaihuꞌu pese di, a hã aima romhuriꞌwa norĩ me, Uburé Danhibꞌapito ꞌRe ihâimana uꞌâsi mono ma, zahadu asiwi ꞌre iwazé waꞌaba mono õ na hã.
31 Tawamhã amnho linho norĩ, amnho cewada me hã ma tô tãzâ hã te te pari, cewada ꞌrã siromo hâimana nherẽ, duré linho hã sirãrã siromo hâimana nherẽ.
32 Tane nherẽ, trigu norĩ, amnho imono bâ ihâimana zaꞌra mono me hã te te uprosi mono õ di. E marĩ wa. Zahadu ta norĩ ꞌwanhipré zaꞌra mono õ wa.
33 Tawamhã ãne Mozési, apito hawi oto watobro wa, duré oto ꞌri nhoꞌõmo hawib zama watobro wamhã, ma tô hâimo tinhibꞌrada hã wẽ zahuré, Uburé Danhibꞌapito ma, mreme da. Tawamhã awaꞌawi tãirãrãꞌã norĩ, tã ipini nhama ré me hã ma tô oto sazâri zahuré.
34 9:34-35 Tawamhã apito Faraꞌo, tã isiparizé te te ꞌmadâꞌâ wamhã, tãirãrã isimizazârizé te te waihuꞌu wamhã, duré tãzâ oto itaꞌaꞌõzé te te ꞌmadâꞌâ wamhã, ma tô apâ tinhimirosaꞌrata na hã saprĩ, romharé na apâ tãma romhâimana wẽ te. Tahawa, ma tô duré tite romhuriꞌwa norĩ me hã apâ tipẽꞌẽ tete na hã ãma uzusi zaꞌra. Uburé Danhibꞌapito, Mozésihi ma, te te iwaihuꞌu siromo zéb zarina, tawamhã apito hã, Izaraéu nhihudu norĩ ma, siꞌabaꞌré da hã te te tãma waprosi zaꞌra õ di.
35 ꞌMadâꞌâ 9:34