1 Corĩtu 11:1-34
11 Wa hã ꞌre ĩmorĩzém na aima ãma ꞌre ĩsisanho zaꞌra waꞌaba mono zéb zarina, te za ꞌre anomro wẽ waꞌaba mo. Cristu hã tiꞌai ãma ꞌre morĩ ré, wama ãma ꞌre isisanho zaꞌra mono zéb zarina, wa hã ꞌre ĩhâimana mono ne, te za duré ꞌre anomro wẽ waꞌaba mo.
2 A norĩ waꞌwa hã te oto ĩꞌãma ꞌre aipoꞌre puꞌu uꞌâsi zaꞌra waꞌaba mo, ꞌre ĩhâimana mono zém na hã, duré uburé te aima ãma ꞌre irowasuꞌu zaꞌra waꞌaba mono zém na zama. Isazeiꞌwa norĩ ꞌre ihâimana zaꞌra mono zém na roti hã da te ĩma ꞌre iwaihuꞌu zaꞌra mono zéb zarina, te oto ꞌre anomro uꞌâsi aba mo, te aima ãma ꞌre iroti zaꞌra waꞌaba mono zéb zarina si. Tahawa, wa aiꞌãma ꞌre ĩwata uꞌâsi zaꞌra waꞌwa.
3 Tane nherẽ, wa ĩsima wẽ, waihuꞌu zaꞌra waꞌaba da, ãne: Cristu hã uburé aibâ norĩ nhibꞌapito, te ꞌre hâimana. Duré aibâ norĩ hã uburé timro norĩ nhibꞌapito, te ꞌre hâimana zaꞌra. Duré ꞌRe ihâimana uꞌâsi mono hã, te Cristuhu nhibꞌapito na hã ꞌre hâimana.
4 A norĩ waꞌwa hã, zudeuꞌõ na te ꞌre aihâimana zaꞌra waꞌaba mo. Tahawa, zudeuꞌõ na ꞌre aihâimana zaꞌra waꞌaba mono zéb zarina, te za tô uburé marĩ hã ꞌre iꞌmanharĩ zaꞌra waꞌaba mo. Isazeiꞌwa norĩ hã asiré ꞌre aiꞌrãꞌõtõ aba mono ré, aibâ norĩ hã ꞌrã ubu ré, ꞌRe ihâimana uꞌâsi mono ma, ꞌre mreme zusi mono wamhã, duré ꞌrã ubu ré, ꞌRe ihâimana uꞌâsi mono zadawa wasuꞌu na te te dama ꞌre rowasuꞌu zaꞌra mono wamhã, e marĩ te ta norĩ hâimanazé hã wama wasuꞌu zaꞌra. Ta norĩ hã Cristu te te siwi ꞌre iwazéb zaꞌra mono õ zé, te wama wasuꞌu zaꞌra, zudeuꞌõ norĩ hâimanazéb uwaibaba õ wa, ãne hã.
5 Duré piꞌõ norĩ hã ꞌrãi ubu ãna, ꞌRe ihâimana uꞌâsi mono ma, ꞌre mreme zusi mono wamhã, duré ꞌrãi ubu ãna, ꞌRe ihâimana uꞌâsi mono zadawa wasuꞌu na te te dama ꞌre romhuri zaꞌra mono wamhã, ta norĩ ma, imro hã tãma wazéb zaꞌra õ di. E marĩ wa. Piꞌõ ꞌrãi ubuzé hã timro zapari ꞌre ihâimana zaꞌra mono zé, te te dama wasuꞌu wa, zudeuꞌõ norĩ hâimanazéb zarina. Piꞌõ norĩ hã marĩ iwasédé hã te te ꞌre ꞌmanharĩ zaꞌra mono wa, te za da te ꞌre ꞌrãpari zaꞌra, sisém na ꞌre hâimana zaꞌra mono da aꞌâ. Tane duré, piꞌõ norĩ hã ꞌrãi ubu ãna, ꞌRe ihâimana uꞌâsi mono ma, ꞌre mreme zusi mono wamhã, piꞌõ, da te ꞌre iꞌrãpari zaꞌra mono ne, te za aꞌâ ꞌre hâimana zaꞌra ta norĩ hã, sisém na.
6 Ãne hã piꞌõ norĩ, ꞌrã ubu ãna ꞌre hâimana zaꞌra mono wamhã, ãne hã wẽ te bâ, te za tô ꞌre siꞌrãpari zaꞌra, sisém na dama ꞌre ihâimana zaꞌra mono zéb da hã oto. Tawamhã ꞌre siꞌrãpari zaꞌra mono wa, duré taré ꞌre siséré nhihâri zaꞌra mono wa, dama sisém na ꞌre hâimana zaꞌra mono tõ da, te za ꞌrã ubu ré, dame ꞌre hâimana zaꞌra, isazeiꞌwa norĩ hã ꞌre siꞌrãꞌõtõ mono ré.
7 Tane nherẽ, isazeiꞌwa norĩ, siré ꞌre siꞌrãꞌõtõ mono ré, aibâ norĩ hã ꞌrã ubu ré, dasiré ꞌre hâimana zaꞌra mono õ di za. E marĩ wa. ꞌRe ihâimana uꞌâsi mono ne, ꞌre hâimana zaꞌra mono wa, ta norĩ hã. Tane nherẽ, piꞌõ norĩ hã aibâ norĩ zapari ꞌre ihâimana zaꞌra mono zé hã, piꞌõi ma, aibâ ipirezé, te wasuꞌu.
8 Duréihã ꞌRe ihâimana uꞌâsi mono hã, piꞌõi hâiba na aibâ hã te te poto õ di. Aibâ hâiba na si, ma tô piꞌõ hã poto.
9 Duré aibâ hã piꞌõi ma, ꞌre hâimana mono da, te te poto õ di, ꞌRe ihâimana uꞌâsi mono hã. Piꞌõ si, ma tô tãma poto, aibâ ma, ꞌre ihâimana mono da hã.
10 Tahawa, isazeiꞌwa norĩ hã rowahutu u ꞌre siꞌrãꞌõtõ mono wamhã, piꞌõ norĩ hã te za tô ꞌrã ubu ré dasiré ꞌre hâimana zaꞌra. E marĩ wa. Timro norĩ zapari ꞌre ihâimana zaꞌra mono zém na, da te ãma ꞌre waihuꞌu zaꞌra mono da, duré hâiwa ãma ꞌRe ihâimana uꞌâsi mono ma romhuriꞌwa norĩ hã te te iré ꞌre ꞌmadâꞌâ zaꞌra mono wa, te te siwi ꞌre wẽꞌõ zaꞌra mono tõ da, zudeuꞌõ norĩ hâimanazé hã te te sina ꞌre uwaimrami zaꞌra mono da.
11 Tane nherẽ, wa norĩ hã Wanhibꞌapito ãma oto ꞌre wanomro mono wa, aibâ norĩ hã piꞌõi ãna ꞌre hâimana waihuꞌu zaꞌra mono õ di za oto. Duré piꞌõ norĩ zama hã, aibâ ãna ꞌre hâimana waihuꞌu zaꞌra mono õ di za. Ãne hã aiwa te wama wasuꞌu zaꞌra.
12 Duréihã ꞌRe ihâimana uꞌâsi mono hã aibâ hâiba na ma tô piꞌõ hã poto ꞌrata tô. Tane nherẽ, te oto ta hawim haré aibâ norĩ hã piꞌõi hâiba hawi dama ꞌre poto uꞌâsi zaꞌra. ꞌRe ihâimana uꞌâsi mono si, ma tô uburé marĩ hã te te apoto, aibâ na, duré piꞌõ na.
13 E tawamhã iꞌuwaibaba, te za piꞌõ norĩ hã ꞌrãi ubu ãna, ꞌRe ihâimana uꞌâsi mono ma, ꞌre mreme zusi, isazeiꞌwa norĩ hã siré ꞌre siꞌrãꞌõtõ mono wamhã. Maꞌãpé, a norĩ waꞌwa hã asiꞌuihâ na ãma waihuꞌu zaꞌra waꞌaba, ãne na hã.
14 Aibâ norĩ hã séré pa ré, ꞌre nomro mono wamhã, wẽꞌõ nherẽ, te siséb ãna iré ꞌre hâimana zaꞌra, tihâimanazéb zarinai õ nherẽ. Ãne hã ꞌrâwi wapẽꞌẽ na dahâimanazém na, wa te wasina ꞌre iwaihuꞌu zaꞌra mono zéb zarina, wa ãne na aima ãma roti zaꞌra waꞌwa.
15 Tane nherẽ, piꞌõ norĩ hã séré pa ré, ꞌre hâimana zaꞌra mono wamhã, dama ꞌmadâꞌâ ze ti. E marĩ wa. ꞌRe ihâimana uꞌâsi mono si, ma tô iséré pa hã te te tãma ꞌre pisutu zaꞌra, piꞌõ norĩ ma hã, iꞌrãzuwazéb da hã.
16 Ãté niꞌwam norĩ hã asiré ꞌre ihâimana zaꞌra waꞌaba mono norĩ hã te za ãne na sina ĩzadawa ꞌru zaꞌra, piꞌõ norĩ hã ꞌrã ubu ré ꞌre ihâimana zaꞌra mono wasuꞌu na hã, te te ĩzaze zaꞌra õ wa. Ãne wamhã, wa za ãne na si ĩzadawa na tãma ãma waꞌrãmi zaꞌra. Wa norĩ hã aimawi na, wa te dama ꞌre roti zaꞌra mono õ di. Mare di. Duré ꞌRe ihâimana uꞌâsi mono nhibꞌaꞌuwẽ, siré ꞌre isiꞌrãꞌõtõ mono norĩ hã te duré õhõ na si te te ãma ꞌre rosaꞌrata zaꞌra, piꞌõ norĩ hã ꞌrã ubu ré, ꞌre ihâimana zaꞌra mono wasuꞌu na si.
Zezusi hã dazada idâꞌâzém na ãma ꞌre dasipoꞌre puꞌu zaꞌra mono da, dasiré ꞌre idasaihuri mono zé wasuꞌu
17 Aimawi na wa za oto aima ãma roti zaꞌra waꞌwa, aihâimanazém na ꞌre iꞌupa zaꞌra waꞌaba mono zém na hã. Tahawa, aiꞌãma ĩwata zaꞌra waꞌaba õ di za, ãhã na hã. Rowahutu u asiré ꞌre asiꞌrãꞌõtõ aba mono wamhã, asiptete sina Cristuhu ãma ꞌre anomro aba mono zéb da, ꞌre asipawaptob zaꞌra waꞌaba mono õ di. Marĩ na si, ma tô iꞌupana asiwi ꞌre iroꞌwaꞌrutu zaꞌra waꞌaba mo.
18 Ãne uimrehẽne, wa za aꞌâ aiꞌãma zaꞌra waꞌaba robꞌuiꞌéré. Ma tô we ĩma aiwasuꞌu zaꞌra waꞌaba ni, asiré ꞌre asiꞌrãꞌõtõ aba mono nherẽ, asima aipoꞌo aba na hã, ꞌre asisadaꞌâbâ zaꞌra waꞌaba mono ꞌru te. Ãne na suru na wa tô dazaze, da te we ĩma aiwasuꞌu wasété zaꞌra waꞌaba zém na hã. Ãté tô sena, ãne na hã.
19 Ãne hã wẽꞌõ nherẽ, ãté wẽ di tô. E marĩ wa. Asiwi aipoꞌo aba nherẽ, niꞌwam norĩ hã wa za wa te ꞌre waihuꞌu zaꞌra, tô sena, Zezusihi zazei uptabi ꞌwa, ꞌre ihâimana zaꞌra mono na hã.
20 Asiré ꞌre asaihuri aba mono da, ꞌre asiꞌrãꞌõtõ aba mono wamhã, Wanhibꞌapito hã wazada idâꞌâzém na ꞌre asipoꞌre puꞌu zaꞌra waꞌaba mono zéb da, tãma ãma ꞌre uwaimrami zaꞌra waꞌaba mono õ di. Marĩ aimawi hã ꞌre iꞌmanharĩ zaꞌra waꞌaba mono da si, te ꞌre asiꞌrãꞌõtõ aba mo, siwaꞌru.
21 Aihĩni, asitẽme ꞌre aihutu aba mono õ ré, te za niꞌwam norĩ si dawana tisa hã te te ꞌre huri, siꞌabaꞌré na. Tahawa, te za niꞌwam norĩ hã tisa hã te te ꞌre simini zaꞌra, iwana ꞌre dasihutu mono wa. Tahawa, te za tô iwana da te ꞌre uprosi zaꞌra. Niꞌwam norĩ hã te za duré ãma ꞌre siꞌrãiwamnarĩ zaꞌra, uva ꞌrãi waꞌu isé hã saꞌẽtẽ na te te ꞌre âhuri mono wa.
22 E niha. E asõrõwa hã aima ꞌre hâimana zaꞌra waꞌaba mono ã bâ, asapaꞌabâ asa hã iwa ꞌre ihuri aba mono zéb da hã. Asiré ꞌre asiꞌrãꞌõtõ aba mono ré, ãne hã asiwi ꞌre ꞌmanharĩ wasété zaꞌra waꞌaba mono wamhã, asiré ꞌRe ihâimana uꞌâsi mono nhibꞌaꞌuwẽ, ꞌre iꞌruiwapari zaꞌra waꞌaba mono zé, te aima wasuꞌu zaꞌra waꞌwa. Ãne hã asima ꞌre ꞌmanharĩ wasété zaꞌra waꞌaba mono wa, te duré isimarĩꞌõ norĩ hã ꞌre wazéb zaꞌra waꞌaba mono ãna, ꞌre aihâimana zaꞌra waꞌaba mo. Ãne wamhã, e niha wa za aiꞌãma waihuꞌu zaꞌra waꞌwa. E ãne zarina, wa za duré aiꞌãma ꞌre ĩwata zaꞌra waꞌwa. Mare uptabi di, aiꞌãma ꞌre ĩwata zaꞌra waꞌaba mono da hã.
23 Duréihã Wanhibꞌapito te te ĩma iwaihuꞌuzém na, wa tô ãne na aima waihuꞌu pari zaꞌra waꞌwa: Zudasi hã Zezusi te te dama ihâiba nhomrizém na, tô taha barana ma tô Wanhibꞌapito Zezusi hã iꞌuꞌẽne hã tiꞌâ.
24 Tawamhã ꞌRe ihâimana uꞌâsi mono ãma te tiwata, sõpru wa. Taha pari, ma tô te te wẽꞌẽ, iꞌuꞌẽne hã. Ãne te tãma nharĩ zaꞌra, tisiré ꞌre inomro mono norĩ ma: “Ã hã iꞌuꞌẽne hã ĩhâiba te wasuꞌu, asada ĩsisõmri zaꞌra waꞌaba zé hã. Ã hã te za ꞌre ihuri aba mo, ĩꞌãma ꞌre asipoꞌre puꞌu uꞌâsi zaꞌra waꞌaba mono zéb da hã.” Ãne ma tô sina tãma rowasuꞌu zaꞌra, Zezusi hã.
25 Tawamhã saihuri pari, tô õne ma tô duré hâsizé hã tiꞌâ, uva ꞌrãi waꞌui ré hã. Ãne te duré tãma nharĩ zaꞌra: “Ã hã robꞌrãi waꞌu hã, ĩwapru asada zaꞌra waꞌaba ĩwi puꞌu wa, ꞌRe ihâimana uꞌâsi mono te te dama iropisutuzép té iwẽ, tô sena za te te dama ãma ꞌre iꞌaꞌuwaimrami mono zé, te wasuꞌu. Ã hã ꞌre âhuri aba mono sidâpâsi, te za ĩꞌãma ꞌre asipoꞌre puꞌu uꞌâsi zaꞌra waꞌaba mono zéb da, ꞌre iꞌmanharĩ zaꞌra waꞌaba mo, õne uꞌâsi.” Ãne ma tô duré sina tãma nharĩ zaꞌra, Zezusi hã.
26 Tawamhã iꞌuꞌẽne hã ꞌre huri aba mono wamhã, duré robꞌrãi waꞌu hã ꞌre âhuri aba mono wamhã, ta hã, Wanhibꞌapito dazada idâꞌâzém na ꞌre asipoꞌre puꞌu zaꞌra waꞌaba mono zé, te aima wasuꞌu zaꞌra waꞌwa, za we apâ imorĩzéb u hã.
27 Tahawa, niꞌwam norĩ hã Wanhibꞌapito ãma ꞌre isipoꞌre puꞌu zaꞌra mono zéb da, iꞌuꞌẽne hã te te siré ꞌre huri mono wamhã, duré robꞌrãi waꞌu hã te te siré ꞌre âhuri mono wamhã, siséb ãna siré ꞌre siꞌrãꞌõtõ mono wamhã, ta norĩ hã te za Wanhibꞌapito hâiba na, tiwasédé hã te te ãma ꞌre ꞌmanharĩ zaꞌra, iwapru na zama, dazada idâꞌâzé hã taré newa, siwaꞌru te te ꞌre huri mono wa, iꞌuꞌẽne hã, duré siwaꞌru te te ꞌre âhuri mono wa, robꞌrãi waꞌu hã.
28 11:28-29 Niꞌwam norĩ hã Wanhibꞌapito dazada dâꞌâ da, isihâiba nhomrizém na, te te ꞌre rosaꞌrata zaꞌra mono ãna, iꞌuꞌẽne hã te te ꞌre huri mono wamhã, duré robꞌrãi waꞌu hã te te ꞌre âhuri mono wamhã, taha zarina, te za ꞌRe ihâimana uꞌâsi mono hã ta norĩ te te ꞌre hâ zaꞌra. Taha õꞌumnhasite, te za aꞌâ aipẽꞌẽ na ꞌrâwi ꞌre asiꞌmadâꞌâ zaꞌra waꞌaba mo, asimirosaꞌrata wasédé hã aima ꞌre hâimana zaꞌra waꞌaba mono zô, taha uimrehẽne, aꞌâ asima ꞌre pari zaꞌra waꞌaba mono da. Taha parip si, te za oto iꞌuꞌẽne hã asiré ꞌre ihuri aba mo. Duré taha parip si, te za oto robꞌrãi waꞌu hã asiré ꞌre iꞌâhuri aba mo.
29 ꞌMadâꞌâ 11:28
30 Tahawa, niꞌwam norĩ hã ãne hã te te aꞌâ ꞌre ꞌmanharĩ zaꞌra mono õ wa, te ta norĩ hã hâzé uꞌâsi ꞌre hâimana zaꞌra ahâ na, asiré ꞌre ihâimana zaꞌra waꞌaba mono norĩ hã. Niꞌwam norĩ hã te duré sibꞌuwa uꞌâsi ꞌre hâimana zaꞌra. Niꞌwam norĩ hã ma tô duré ꞌre dâꞌâ zaꞌra, ãne wa.
31 Wasiré ꞌre wasaihuri mono õ ré, wanhimirosaꞌrata wasédé hã wama ꞌre hâimana zaꞌra mono zô, aꞌâ wapẽꞌẽ na ꞌrâwi ꞌre wasiꞌmadâꞌâ zaꞌra mono wamhã, ꞌRe ihâimana uꞌâsi mono hã te te ꞌre waꞌahâ zaꞌra mono õ di za. E marĩ wa. ꞌRe wasiwẽꞌõ zaꞌra mono wa, ꞌre iwahâimana zaꞌra mono na, marĩ na, wa te ꞌre iꞌupa zaꞌra mono na hã.
32 Tane nherẽ, tiꞌab ré te za tô wawasédé hã te te waꞌãma ꞌre iꞌawaihuꞌu mono zéb zarina, te te ꞌre waꞌahâ zaꞌra, Uburé Danhibꞌapito hã. E marĩ wa. Te te ꞌre waꞌazawi pese mono wa, taha zarina, apâ wa te ãma ꞌre sasõmri pese zaꞌra mono da. Nimahã na, uburé isazeiꞌõꞌwa norĩ zu, za te te siwi waꞌawẽꞌõ tõ da, te za tô ãne wa, te te ꞌre waꞌahâ zaꞌra, tiꞌai ãma ꞌre wanomro mono ré.
33 Ĩsisãnawã norĩ, ãne na wa za oto aima ãma ꞌrãsutu zaꞌra waꞌwa, Wanhibꞌapito dâꞌâzém na ꞌre asipoꞌre puꞌu zaꞌra waꞌaba mono zéb da, asiré ꞌre asaihuri aba mono zém na hã. Tahawa, te za aꞌâ asisô ꞌre asimipari zaꞌra waꞌaba mo, aihĩni asitẽme ꞌre aihutu aba mono wapsi, asiré ãma ꞌre asaihuri aba mono da. Ãne hã wẽ di.
34 Niꞌwam norĩ hã asiré ꞌre ihâimana zaꞌra waꞌaba mono norĩ hã, mra te te ꞌre simroi mono wamhã, tinhorõwa ãma si te za aꞌâ tisa hã te te ꞌre huri. Taha parip si, te za oto asitẽme ꞌre aihutu aba mo, asiré ꞌre asiꞌrãꞌõtõ aba mono da. ꞌRe ihâimana uꞌâsi mono hã te te siwi ꞌre aiwẽꞌõ zaꞌra waꞌaba mono tõ da, te za ãne si iꞌuwaibaba ꞌre iꞌmanharĩ zaꞌra waꞌaba mo.
Nimahã na, ãma atẽme ĩmorĩ aba wapsi, wa za aimawi na aima ãma roti zaꞌra waꞌwa, robꞌuiꞌéré na we asiwi ĩzadanharĩ zaꞌra waꞌaba zém na hã.
