1 Corĩtu 15:1-58
15 Ĩsisãnawã norĩ, ãne wa za duré ãma aipoꞌre puꞌu zaꞌra waꞌwa. Duréihã Zezusihi wasuꞌuwẽ na, wa tô te aima ꞌre rowasuꞌu zaꞌra waꞌwa. Taha zarina, ma tô oto asima iwẽ zaꞌra waꞌwa, asiptete sina ãma ꞌre anomro uꞌâsi aba mono da hã oto.
2 Ãhã wasuꞌuwẽ hã te aima ãma ꞌre iwasuꞌu zaꞌra waꞌaba mono zé hã, asiptete sina ꞌre sazei utõrĩ zaꞌra waꞌaba mono õ wapsi, te za ꞌRe ihâimana uꞌâsi mono te te ꞌre asõꞌreptu zaꞌra waꞌaba mono zé hã asina ꞌre iꞌuwaimrami zaꞌra waꞌaba mo. Tane nherẽ, ãté ꞌRe ihâimana uꞌâsi mono, asina ꞌre umnhasi uptabi zaꞌra waꞌaba mono õ wamhã, te te ꞌre iꞌasõꞌreptu zaꞌra waꞌaba mono zé hã asina ꞌre uwaimrami zaꞌra waꞌaba mono õ di za.
3 15:3-4 Zezusihi wasuꞌuwẽ hã danhipai u ipire uptabi hã, wa tô te aima ꞌre wasuꞌu zaꞌra waꞌwa, da te ĩma ꞌre irowasuꞌu zaꞌra mono zéb zarina. Ãne, Zezusihi wasuꞌu hã ipire uptabi hã: Cristu hã ma tô, u, wazada dârâ, uburé wawasété na ꞌre iwahâimana zaꞌra mono norĩ zada. Taha pari, ma tô dasiwi sẽrẽ ni, u, abꞌre ꞌre. Tawamhã bâdâ maparane ãma siꞌutõrĩ õ ré, ma tô duré Imama hã, u, hâiwaꞌutu, ꞌRe ihâimana uꞌâsi mono hã. Ãne ma tô tãma tiromhâiba, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré zarina.
4 ꞌMadâꞌâ 15:3
5 Tawamhã Zezusi hã hâiwaꞌutu pari, Pedruhu ma, ma tô sihâiꞌré. Taha pari, ma tô duré tizadawa wasuꞌuꞌwa norĩ ma zama sihâiꞌré zaꞌra, 12 na aré isiré ꞌre inomro mono norĩ ma hã.
6 Taha parimhã, ma duré tizazeiꞌwa norĩ nhoꞌa sihâiꞌré, 500 na ihâiba zaꞌra norĩ nhoꞌa, aihĩni norĩ siré ta norĩ hã siꞌubumroi ré. Ta norĩ hã te zahadu dâꞌâ ãna ꞌre hâimana zaꞌra. Niꞌwam norĩ si, ma tô tidâꞌâ zaꞌra, umro na.
7 Taha pari, ma tô duré Tiaguhu ma sihâiꞌré. Taha zaꞌu si, ma duré dama isadawa wasuꞌuꞌwa da, za daro mono bâ te te isatõrĩ zaꞌra norĩ ma, sihâiꞌré zaꞌra, uburé te te hâiba pibu zaꞌra da.
8 Ĩma zama, ĩma robduma si, ma tô duré sihâiꞌré, Zezusi hã. Niꞌwa hã dazaꞌu si poto wa, marĩ iwẽ uptabi hã dasiré te te sina iꞌuwaimrami õ ne, wa tô wa hã dazaꞌu si Zezusi hã ꞌmadâ, ĩtõmo na, ĩma sihâiꞌré wa.
9 Wa hã uburé ĩsiré Zezusihi zadawa wasuꞌuꞌwa norĩ zapari, wa ꞌre ĩhâimana, tãma ĩwapu zaꞌra na. E marĩ wa. Te sazei õ ré, wa tô ꞌRe ihâimana uꞌâsi mono nhibꞌaꞌuwẽ ma, te tãma ꞌre robꞌmanharĩ wasété uꞌâsi zaꞌra. Tahawa, ibâi õ di aré, isadawa wasuꞌuꞌwa na, da te ꞌre ĩwaptẽrẽ zaꞌra mono zé hã.
10 Tane nherẽ, ꞌRe ihâimana uꞌâsi mono hã tinhimizawi pese zéb zarina si, ma tô ĩma tinhopru, tô õhõ na si dama ꞌre ĩhâimana mono da oto, Cristuhu zadawa wasuꞌuꞌwa na. E tawamhã, taré ma tô ĩma tinhopru, ꞌRe ihâimana uꞌâsi mono hã. Mare di. Wa tô te ĩsina tãma ꞌre uwaimrami uꞌâsi. Uburé ĩsiré Cristuhu zadawa wasuꞌuꞌwa norĩ hã, wa tô romhuri na te ꞌre ꞌrãnhipai uꞌâsi zaꞌra. Tane nherẽ, ĩsiꞌuihâ na te dama ꞌre romhuri mono õ di. ꞌRe ihâimana uꞌâsi mono si, ma tô te te ꞌre ĩpawapto, ãne na te dama ꞌre romhuri mono da, ĩma isõprubzéb zarina si.
11 Ãté, wa hã wa tô aima wasuꞌu naꞌrata zaꞌra waꞌwa, Zezusihi wasuꞌuwẽ hã. Ãté ĩsiré norĩ si ma tô aima wasuꞌu naꞌrata zaꞌra waꞌwa. Ãne hã wẽ di, ĩma hã. E marĩ wa. Wa norĩ hã Cristuhu zadawa wasuꞌuꞌwa norĩ hã, misire Zezusihi wasuꞌuwẽ hã wa tô wa te dama ꞌre wasuꞌu zaꞌra, tô õhõ si wa. Tô taha wasuꞌuwẽ si, ma tô oto ꞌre isaze zaꞌra waꞌaba mo, a norĩ waꞌwa hã.
ꞌRe dadâꞌâ zaꞌra mono nherẽ, apâ ꞌre idahâiwaꞌutu zaꞌra mono zé wasuꞌu
12 Ãne, wa za duré ãma aima rowasuꞌu zaꞌra waꞌwa. Niꞌwam norĩ hã asiré ꞌre hâimana zaꞌra waꞌaba mono nherẽ, te ãne ta norĩ hã te te sima ꞌre nharĩ zaꞌra: “ꞌRe dadâꞌâ zaꞌra mono wamhã, apâ ꞌre dahâiwaꞌutu zaꞌra mono õ di za, niwamhã. Mare uptabi di za.” Ãne te niꞌwam norĩ hã te te sima ꞌre nharĩ zaꞌra. E ãne hã tô sena. Mare di. Cristu hã dâꞌâ nherẽ, ꞌRe ihâimana uꞌâsi mono apâ te te ihâiwaꞌutu na, sena na, wa te dama ꞌre wasuꞌu zaꞌra mono nherẽ, e niha te bété ãne na te te ãma ꞌre rosaꞌrata upa siroptub zaꞌra, asiré ꞌre ihâimana zaꞌra waꞌaba mono norĩ hã.
13 ꞌRe dadâꞌâ zaꞌra mono nherẽ, apâ idahâiwaꞌutu zaꞌra zé hã tô senai õ ꞌwaꞌâhã, e marĩ te aré wama wasuꞌu zaꞌra. Cristu, apâ ihâiwaꞌutuzé wasuꞌu hã, tô senai õ na, te aré tô wama wasuꞌu zaꞌra. Ãne hã aré tô, wama zaꞌra hã aiwa.
14 Duré, Cristu hã ꞌRe ihâimana uꞌâsi mono, sena na te te apâ hâiwaꞌutu õ ꞌwaꞌâhã, aré marĩ dai õ di, Zezusihi wasuꞌuwẽ, wa te dama ꞌre iwasuꞌu zaꞌra mono zé hã. Taré ꞌwaꞌâhã, aré marĩ dai õ di duré, Cristuhu ãma ꞌre isasõmri zaꞌra waꞌaba mono zé hã. Taré te aré ꞌre isaze zaꞌra waꞌaba mo, marĩ dai õ nherẽ.
15 ꞌRe dadâꞌâ zaꞌra mono nherẽ, apâ ꞌre idahâiwaꞌutu zaꞌra mono zé hã tô senai õ ꞌwaꞌâhã, Cristu hã ꞌRe ihâimana uꞌâsi mono, apâ te te ihâiwaꞌutuzé hã, aré tô senai õ di duré, ãne hã. Senai õ ꞌwaꞌâhã, wa norĩ hã wazadawa nhipese na, wa aré taré wa te dama ꞌre wasuꞌu zaꞌra ꞌRe ihâimana uꞌâsi mono hã, Cristu apâ te te ihâiwaꞌutuzém na, wa te dama ꞌre rowasuꞌu uꞌâsi zaꞌra mono wa. Tarére aré tô, dama wanhimirowasuꞌu zaꞌra hã.
16 ꞌRe dadâꞌâ zaꞌra mono nherẽ, apâ idahâiwaꞌutu zaꞌra zéb da hã tô senai õ ꞌwaꞌâhã, Cristu, apâ ihâiwaꞌutuzé wasuꞌu hã, tô senai õ na te aré wama wasuꞌu zaꞌra tô.
17 Duré, ꞌRe ihâimana uꞌâsi mono hã Cristu apâ te te ihâiwaꞌutuzé hã tô senai õ ꞌwaꞌâhã, aré tarére, Cristuhu ãma ꞌre isasõmri zaꞌra waꞌaba mono zé hã, aiwasété wa, asada idâꞌâ aba zém na, ꞌre isaze zaꞌra waꞌaba mono zé hã. Ihâiwaꞌutuzé hã senai õ ꞌwaꞌâhã, ꞌRe ihâimana uꞌâsi mono te te siwi ꞌre aiwẽꞌõ pese zaꞌra waꞌaba mono haré, te aré tô zahadu aiwasété ré, ꞌre anomro uꞌâsi aba mo, õne haré, aiwasédé hã te te aima ꞌre pari zaꞌra waꞌaba mono ãna.
18 Duré, Cristuhu hâiwaꞌutuzé hã senai õ ꞌwaꞌâhã, uburé isazeiꞌwa, ꞌre idâꞌâ zaꞌra mono norĩ hã te aré ipẽꞌẽ ꞌre, dâꞌâ uꞌâsi ꞌre hâimana zaꞌra, ꞌRe ihâimana uꞌâsi mono nhiti.
19 Cristu hã apâ hâiwaꞌutu õ ꞌwaꞌâhã, tô ibâre te aré waꞌãma ꞌre dapẽꞌẽzé uptabi zaꞌra, wasiré isazeiꞌwa ꞌre iwahâimana zaꞌra mono norĩ ãma hã. E marĩ wa. Marĩ dai õ wa aré, wa te ãma ꞌre isasõmri zaꞌra mono zé hã, marĩ da ne, wa te ꞌre saze zaꞌra mono wa, tiꞌab ré.
20 Tazahã, ꞌRe ihâimana uꞌâsi mono hã ma tô apâ hâiwaꞌutu tô sena, Cristu hã. E marĩ te tawamhã, wama wasuꞌu zaꞌra, Cristu apâ ihâiwaꞌutuzé hã. Niwapsi uburé isazeiꞌwa ꞌre idâꞌâ zaꞌra mono norĩ hã, tô sena za apâ ꞌRe ihâimana uꞌâsi mono te te ihâiwaꞌutu zaꞌra zé, te wama wasuꞌu zaꞌra. Taréi õ di, ã hã.
21 15:21-22 Duréihã aibâ hã ma tô tiwasété ꞌrata, Adã na isisi hã. Taha nhirã na, te oto dadâꞌâzé hã uburé dama ꞌre hâimana zaꞌra. E marĩ wa. Taha nhihudu si, ꞌre dahâimana zaꞌra mono wa. Tane duré, aibâ marĩ iwẽ hã te te iꞌmanharĩzéb zarina, te oto dahâiwaꞌutuzé hã dama ꞌre hâimana zaꞌra, aiwab zahuré, ãne na hã. Cristu na isisi hã. Taha ãma si ꞌre inomro mono ma, te za dahâiwaꞌutuzé hã tãma ꞌre hâimana zaꞌra, õne uꞌâsi.
22 ꞌMadâꞌâ 15:21
23 Cristu hã ma tô tihâiwaꞌutu naꞌrata. Niwa tiꞌai u, za we apâ dazô morĩ wapsi, te za isibꞌaꞌuwẽ norĩ hã tihâiwaꞌutu zaꞌra.
24 15:24-25 Tawapsi, te za oto robꞌrãsutuzé hã iwa waptãrã. Tawapsi te za uburé dama ipire norĩ nhiptetezé hã tiwi aꞌuprosi Cristu hã, tiꞌai ãma uburé dama rotiꞌwa norĩ wi hã, hâiwa nhirõtõ na uburé ihâibaꞌõ norĩ wib zama. ꞌRe ihâimana uꞌâsi mono hã uburé tinhitobꞌru norĩ ãma te te iꞌaiꞌutézéb u si, te za Cristu hã te te ꞌre daꞌaꞌmadâꞌâ, pire na. Taha parip si, te za oto Timama ma isibꞌaꞌuwẽ hã sõmri zaꞌra, õhõ si te te ꞌre aꞌmadâꞌâ uꞌâsi mono da oto, pire uptabi na.
25 ꞌMadâꞌâ 15:24
26 Dadâꞌâzé hã te dazada ꞌre hâimana. Ta hã te za oto Cristu hã uprosi pese, daꞌrãsutu ãma hã.
27 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Ta hã ma tô ꞌRe ihâimana uꞌâsi mono hã pisutu, uburé marĩ hã pire na te te ꞌre aꞌmadâꞌâ mono da, siwaprosi.”
E tawamhã, pire na dama ꞌre ihâimana mono zéb da, Cristuhu pisutuꞌwai ma zama, te za pire na tãma ꞌre hâimana, ꞌRe ihâimana uꞌâsi mono ma. Mare di. Taha ma zama, te te wasuꞌu õ di, ãne hã. Tizapariꞌwai ma si, ma tô pisutu, ꞌRe ihâimana uꞌâsi mono hã. Ãhã wasuꞌu hã wama pibui pese zaꞌra di oto.
28 ꞌRe ihâimana uꞌâsi mono hã te za te te ꞌre daꞌapisutu, Cristuhu nhimiꞌmadâꞌâ si oto ꞌre dahâimana zaꞌra mono da. Tawapsi, te za oto tiꞌra hã pisutu ꞌRe ihâimana uꞌâsi mono hã, isapari ꞌre hâimana mono da oto, Imama si te te oto ꞌre daꞌaꞌmadâꞌâ uꞌâsi mono da, danhipai u dama pire uptabi na.
29 Ãne, wa za duré aima ãma rowasuꞌu zaꞌra waꞌwa, za idahâiwaꞌutu zaꞌra zé wasuꞌu na hã. Niꞌwam norĩ hã asiré ꞌre ihâimana zaꞌra waꞌaba mono norĩ hã ma tô â dawabzuri hã da te tãma ꞌre ꞌmanharĩ zaꞌra, isazeiꞌwa norĩ, â dawabzuri da te tãma ꞌre ꞌmanharĩ zaꞌra mono õ ré, ꞌre idâꞌâ zaꞌra mono norĩ upana, isazeiꞌwa norĩ zu hâiwaꞌutu zaꞌra da. E marĩ da, ma tô bété ta norĩ hã ãne hã te te ꞌre ꞌmanharĩ zaꞌra, dahâiwaꞌutuzé wasuꞌu hã te te ꞌre sazei uptabi zaꞌra mono õ nherẽ. Ãne wamhã, e tô iꞌuwaibaba, aima zaꞌra waꞌaba hã.
30 Wa norĩ hã bété, Cristuhu ma, wa te ꞌre iromhuri pese zaꞌra mono norĩ hã. Wama romnhimimnhasi na, wa ꞌre wahâimana uꞌâsi zaꞌra bâtâ sidâpâsi, iwasuꞌuwẽ hã wa te dama ꞌre wasuꞌu zaꞌra mono ꞌru te, niha da te wama ꞌre robꞌmanharĩ zaꞌra mono õꞌumnhasite, da te ꞌre iwaꞌruiwapari zaꞌra mono zéb zarina. Tawamhã dahâiwaꞌutuzé wasuꞌu hã senai õ ꞌwaꞌâhã, e marĩ da, wa aré bété wa te tãma ꞌre romhuri zaꞌra Cristuhu ma hã, wama romnhimimnhasi uptabi zaꞌra nherẽ. Marĩ dai õ di tô aré, tãma wanhimiromhuri zaꞌra zé hã.
31 Ĩsisãnawã norĩ, awẽ sidâpâsi aré ꞌre ĩdâꞌâ uꞌâsi mono nherẽ, wa tô te dama ꞌre rowasuꞌu uꞌâsi, iwasuꞌuwẽ na. Wa norĩ hã Wanhibꞌapito Cristu Zezusihi ãma simisutu oto ꞌre wanomro mono wa, tô sena aima ꞌre ĩtoi uptabi zaꞌra waꞌaba mono zéb zarina, wa tô sena na aima ĩsiwasuꞌu zaꞌra waꞌwa, ãne na hã.
32 Éfézu ãma, niꞌwam norĩ hã ma tô ĩzada tihâimana wasété zaꞌra, robzahi hã dazô ꞌre iwairébé mono ne. Ta norĩ ꞌrata, ĩhâimana ré hã, ĩma romnhimimnhasi uptabi di, te te siwi ĩwĩrĩ da newa. Tawamhã dahâiwaꞌutuzé wasuꞌu hã taré wamhã, e sena aré ĩnhimiromhuri hã, Cristuhu ma hã, ĩma romnhimimnhasi nherẽ, te tãma romhuri wamhã aré. Ãne hã iꞌuwaibaba õ di tô aré, ĩma hã. Tarére aré, te ꞌre iromhuri mono zé hã. Dahâiwaꞌutuzé wasuꞌu hã tô senai õ ꞌwaꞌâhã, tiꞌai ãma ꞌre wahâiba siꞌutõrĩ pese zaꞌra mono ꞌwaꞌâhã, iꞌuwaibaba wa aré danhimiroti wasété na, wa te daꞌãma ꞌre sasõmri zaꞌra. Ãne danhimiroti wasédé hã: “Ãté romhutu na, wa za wasiꞌutõrĩ. Ãté awẽm na niha wamhã. Tahawa, ãhã na hã watozém na si siwaꞌru wato zaꞌra waꞌaba, wanhirõiwi da, wasazém na, duré âzé na.” Ãne wamhã, wa aré tô ibâre, wa te daꞌãma ꞌre sasõmri zaꞌra, dahâiwaꞌutuzé wasuꞌu hã tô senai õ ꞌwaꞌâhã.
33 Ãne wa, te za dawi ꞌre asiꞌmadâꞌâ pese zaꞌra waꞌaba mo, danhimiroti wasédé hã tô sena newa, daꞌãma ꞌre sasõmri zaꞌra waꞌaba mono tõ da. Taha na daꞌãma ꞌre sasõmri zaꞌra waꞌaba mono wamhã, ta norĩ ne te za oto ꞌre aihâimana wasété zaꞌra waꞌaba mo.
34 Niꞌwam norĩ hã asiré ꞌre ihâimana zaꞌra waꞌaba mono norĩ hã ꞌRe ihâimana uꞌâsi mono hã ꞌrâwi te te ꞌre waihuꞌu zaꞌra mono õ di. E ãne na ꞌre siséb zaꞌra mono ãna. Asimizaꞌrese ãna ꞌre aihâimana zaꞌra waꞌaba mono zém hawi, te za oto aipizari zaꞌra waꞌwa, aiwasédé hã rẽme pese zaꞌra waꞌaba da, aiwẽ uptabi na si ꞌre anomro aba mono da oto.
ꞌRe ihâimana uꞌâsi mono hã za te te daꞌahâiwaꞌutu wa, dahâiba té wasuꞌu
35 Ãté niꞌwam norĩ hã asiré ꞌre aihâimana zaꞌra waꞌaba mono norĩ hã te za ãne ꞌre sisadanharĩ zaꞌra: “E niha te za merẽ ꞌRe ihâimana uꞌâsi mono hã daꞌahâiwaꞌutu. ꞌRe dadâꞌâ zaꞌra mono wa, ꞌre dahâiba siꞌutõrĩ pese zaꞌra mono nherẽ, e niha te za merẽ ãne nherẽ, apâ daꞌahâiwaꞌutu.”
36 E niha te asimirosaꞌrata waihuꞌu ãna, ãne na ꞌre iꞌupa zaꞌra waꞌaba mo. Amnho potozém na, wa za pé aima ãma simiréꞌé zaꞌra waꞌwa, waihuꞌu zaꞌra waꞌaba da. Amnho hã da te ꞌre zuri mono wamhã, itomhâ ꞌre siꞌutõrĩ mono õ nherẽ, ꞌre ꞌwanhipré zaꞌra mono õ di.
37 Duré, trigu ꞌrã hã da te ꞌre zuri mono wamhã, duré aimawi amnho hã da te ꞌre zuri mono wamhã, e iteihi zama te za isu da te ꞌre zuri. Mare di. Inhama uptabi si te za da te ꞌre zuri, pibui pese na ꞌre poto zaꞌra mono da, amnho hã.
38 Amnho hã da te ꞌre zuri mono wamhã, ꞌRe ihâimana uꞌâsi mono hã te te iꞌaropoto mono hawim haré, te te sima ꞌre iꞌapisutu mono zéb zarina si, te za dama ꞌre ꞌwanhipré wairébé, sipuꞌu pese na.
39 Duré, tiꞌai ãma uburé hâiba ré ꞌre ihâimana zaꞌra mono hã aiwapsi õ di. Aꞌuwẽ hâiba hã aimawi. Duré abaze norĩ hâiba hã aimawi. Duré peꞌa norĩ hâiba hã, aimawi. Duré si norĩ hâiba hã aimawi.
40 Duré, hâiwa ãma ꞌre ihâimana zaꞌra mono norĩ hâiba hã aiwab õ di, tiꞌai ãma ꞌre idahâimana zaꞌra mono norĩ hâiba ne hã. Hâiwa ãma si, dahâiba hã wẽ uptabi di. Duré ꞌmadâꞌâ zei uptabi di. Tiꞌai ãma dahâiba hã wẽ nherẽ, duré ꞌmadâꞌâ ze nherẽ, aiwab õ di, hâiwa ãma dahâiba ne hã.
41 Bâdâ hã bété. Ta hã ꞌmadâꞌâ ze ti. Wẽ uptabi di. Aꞌamo hã ꞌmadâꞌâ zei uptabi di duré. Uburé wasi hã hâiwa na ꞌre isimasa mono hã, ꞌmadâꞌâ ze ti duré. Tane nherẽ, uburé aiwapsi ꞌre hâimana zaꞌra mono õ di, iꞌmadâꞌâ ze da hã. Duré uburé wasi norĩ hã aiwapsi ꞌre simasa mono õ di, iꞌmadâꞌâ ze da hã.
42 Tane duré, za niwa ꞌRe ihâimana uꞌâsi mono te te idaꞌahâiwaꞌutuzé hã. Amnho hã da te ꞌre zuri mono wamhã, itomhâ ꞌre siꞌutõrĩ mono wapsi, te za ꞌre ꞌwanhipré zaꞌra. Tane duré, tiꞌab ré, ꞌre dadâꞌâ zaꞌra mono pari, abꞌre ꞌre, da te oto ꞌre danheme mono wamhã, te za tô ꞌre dahâiba siꞌutõrĩ zaꞌra. Tane nherẽ, ꞌRe ihâimana uꞌâsi mono te te oto daꞌahâiwaꞌutu wamhã, dahâiba hã aiwa dama ꞌre hâimana zaꞌra mono õ di za oto. ꞌRe dahâiba siꞌutõrĩ zaꞌra mono ãna, te za oto iré ꞌre dahâimana uꞌâsi zaꞌra, õne uꞌâsi.
43 ꞌRe dadâꞌâ zaꞌra mono wa, dahâiba hã abꞌre ꞌre, da te ꞌre séme mono wamhã, wasété uptabi di, dahâiba hã. Duré, marĩ hã te te ꞌmanharĩ waihuꞌu õ di dahâiba hã, marĩ dai õ wa oto. Tane nherẽ, ꞌRe ihâimana uꞌâsi mono hã te te oto daꞌahâiwaꞌutu wamhã, dahâiba hã wẽ uptabi di za oto. ꞌMadâꞌâ zei uptabi di za duré. Tawapsi, danhiptete uptabi na te za iré ꞌre dahâimana uꞌâsi zaꞌra oto.
44 ꞌRe dadâꞌâ zaꞌra mono wa, dahâiba hã abꞌre ꞌre, da te ꞌre iséme mono hã, tiꞌai ãma ré hã, dahâiba si, danhi ré si, duré dahi ré si. Tazahã ꞌRe ihâimana uꞌâsi mono hã za te te daꞌahâiwaꞌutu wamhã, dahâiba aimawi ré, te za oto ꞌre dahâimana zaꞌra, Ipẽꞌẽzani nhimipisutuzéb zarina. Tiꞌab ré, te tô dahâiba na ꞌre dahâimana zaꞌra. Taha zarina, te duré hâiwa ãma dahâiba aimawi ré ꞌre dahâimana zaꞌra, ꞌRe ihâimana uꞌâsi mono Pẽꞌẽzani nhimipisutuzéb zarina.
45 E marĩ wa. ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“ꞌRe ihâimana uꞌâsi mono hã ma tô aibâ hã poto ꞌrata, Adã na isisi hã. Aꞌuwẽ hâiba na ꞌre morĩ da, ma tô poto ꞌrata tô.”
Tane nherẽ, Adãhã ne te tô ꞌre hâimana, ꞌRe ihâimana uꞌâsi mono ꞌrata, dadâꞌâ ãna ꞌre danomro mono da, te te dama ꞌre iꞌapisutu mono hã, Ipẽꞌẽzani nhimipisutuzéb zarina. Ta hã Zezusi.
46 E tawamhã hâiwa ãma hã dahâiba aimawi ré, ma tô ꞌre dahâimana naꞌrata zaꞌra. Mare di. Tiꞌai ãma dahâibazém na, te tô aꞌâ iré ꞌre dahâimana naꞌrata zaꞌra, tiꞌai ãma ré hã. Niwapsi te za hâiwa ãma dahâiba iwẽ uptabi ré si ꞌre dahâimana zaꞌra.
47 Duréihã te te dama iꞌmanharĩ ꞌrada hã aibâ na ma tô tiꞌa na ꞌmanha, ꞌRe ihâimana uꞌâsi mono hã. Tane nherẽ, taha uirĩ na si, ma tô aibâ aimawi hã wei mo hâiwa hawimhã, tiꞌai u, Adãhã ma ipire uptabi hã, duré iwẽ uptabi hã.
48 Uburé tiꞌai ãma ꞌre idahâimana zaꞌra mono norĩ hã te Adãhã hâiba ne, iré ꞌre dahâimana zaꞌra, tiꞌai ꞌmanharĩ na ihâiba ꞌmanharĩ naꞌrata ne ré. Tane nherẽ, niꞌwam norĩ si hâiwa ãma za ꞌre ihâimana zaꞌra mono norĩ si, te za hâiwa ãma ꞌre imorĩ hâiba ne ré ꞌre hâimana uꞌâsi zaꞌra, tô Cristuhu hâiba ꞌmanharĩ sine ré.
49 Wa norĩ hã, aibâ tiꞌai ꞌmanharĩ na ihâiba naꞌrata ne ré, wa tiꞌab ré iré ꞌre wahâimana zaꞌra. Tane, wa za duré niwapsi hâiwa hawi we imorĩ hâiba ne iré ꞌre wahâimana uꞌâsi zaꞌra. Tahawa, wa za oto isine ꞌre wahâimana uꞌâsi zaꞌra, õne uꞌâsi.
50 Ĩsisãnawã norĩ, ãne wa za aima ãma waihuꞌu zaꞌra waꞌwa, sena na. Tiꞌai ãma ré wahâiba hã wanhi ré hã duré wawaprui ré hã, taha ré, hâiwa u iré ꞌre wanhisisi waihuꞌu mono õ di za, ꞌRe ihâimana uꞌâsi mono hã daꞌãma ꞌre isibꞌaꞌuwẽ mono zéb u hã. E marĩ wa. Tiꞌai ãma ré wahâiba hã za wawi ꞌre isiꞌutõrĩ zaꞌra mono hã, hâiwa ãma iré ꞌre wahâimana waihuꞌu zaꞌra mono õ di za oto, ꞌRe ihâimana uꞌâsi mono ꞌrata iré ꞌre iwahâimana uꞌâsi zaꞌra mono zéb da hã.
51 15:51-52 Marĩ hã aré dama iwaihuꞌuꞌõ hã wa za oto aima wasuꞌu hâiꞌré zaꞌra waꞌwa, sõꞌawi. Maꞌãpé ĩwapari pese zaꞌra waꞌaba za. Wa norĩ hã Zezusihi zazeiꞌwa norĩ hã, tiꞌab ré uburé wasiꞌutõrĩ siromo õ di za, robꞌrãsutuzé wana hã. Robꞌrãsudu hã oto iwa iwaptãꞌãzé waihuꞌuzéb da, danhimnhihârâzé daꞌrãsutuꞌwa, da te oto wapari zaꞌra wamhã, uburé tiꞌai ãma zahadu wahâiba ré ꞌre iwanomro mono norĩ hã, wa za awaꞌawi wahâiba na saprĩ zaꞌra ni, waptu na ꞌre idatõmo siꞌrãmi zaꞌra mono ne. Danhimnhihârâ hã da te wapari zaꞌra wi, niꞌwam norĩ isazeiꞌwa dawana ꞌre idâꞌâ zaꞌra mono hã te za apâ ahâiwaꞌutu, dâꞌâ ãna oto ꞌre hâimana uꞌâsi zaꞌra mono da, ihâiba tiwi ꞌre siꞌutõrĩ waihuꞌu zaꞌra mono ãna. Tawamhã wa norĩ zama wahâiba ré ꞌre iwanomro mono norĩ hã, wa za duré wahâiba itém na isiꞌutõrĩꞌõ na saprĩ zaꞌra ni.
52 ꞌMadâꞌâ 15:51
53 Tiꞌai ãma ré hã, wahâiba hã siꞌutõrĩ pese di. Tane nherẽ, wa za tô niwapsi wahâiba itém na saprĩ zaꞌra ni, za oto wawi ꞌre isiꞌutõrĩ waihuꞌu zaꞌra mono õ, u hã, iré ꞌre wahâimana uꞌâsi zaꞌra mono da oto, õne uꞌâsi.
54 15:54-55 Ãne hã niwa za wama romhâimana zaꞌra wamhã, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré zarina, te za tô wama ãma uwaimrami zaꞌra, ꞌRe ihâimana uꞌâsi mono hã, za apâ iwahâiwaꞌutu zaꞌra zém na hã. Ãne duréihã ãma irobꞌuiꞌéré siro hã:
“ꞌRe idadâꞌâ zaꞌra mono zém na, te za ꞌRe ihâimana uꞌâsi mono hã ãma aiꞌuté. Te za uprosi pese oto. ꞌRe idadâꞌâ zaꞌra mono zé hã, e mahãta tawamhã te te daꞌãma iꞌaiꞌuté zaꞌra zéb da hã. Mare di oto. Baba uptabi di. Duré, e mahãta te isiptetezé hã tãma ꞌre hâimana oto, te te ãma ꞌre idaꞌaꞌuprosi mono zéb da hã, apaꞌapa ꞌwa nhiꞌoto nhipsari ne hã. Mare uptabi di oto, tãma hã.”
55 ꞌMadâꞌâ 15:54
56 E marĩ wa, ma tô aré ꞌre iwadâꞌâ zaꞌra mono zé hã siptete na wazada ꞌre hâimana zaꞌra. Wawasété na ꞌre iwanomro mono zéb zarina, ma tô aré tô siptete na wazada ꞌre hâimana zaꞌra, te te ꞌre iwaꞌaꞌuprosi mono zéb da hã. Duré ꞌRe ihâimana uꞌâsi mono nhimiroti na Mozési te te ãma irobꞌuiꞌérézéb zarina, ꞌre wanomro wẽ mono õ wa, ma tô aré te te siwi ꞌre waꞌawẽꞌõ pese, ꞌRe ihâimana uꞌâsi mono hã.
57 Tane nherẽ, ꞌRe ihâimana uꞌâsi mono ãma si, ꞌre wawata uꞌâsi zaꞌra waꞌaba mono za. E marĩ wa. Õhõ si, ma tô ꞌre iwadâꞌâ zaꞌra mono zém na hã wama ãma aiꞌuté zaꞌra, Wanhibꞌapito Zezu Cristuhu si, iwẽ uptabi hã te te wazada iꞌmanharĩzém na hã.
58 Ĩsisãnawã norĩ, ĩma asawi pese zaꞌra waꞌaba norĩ hã, tahawa, te za asiptete uꞌâsi Cristuhu ãma si ꞌre anomro aba mo, tiwi ꞌre aipizari zaꞌra waꞌaba mono ãna. Wanhibꞌapito ma, ꞌre iromhuri zaꞌra waꞌaba mono zé hã taréi õ di. Ãne na asina waihuꞌu zaꞌra waꞌaba wa, te za tãma ꞌre iromhuri pese uꞌâsi zaꞌra waꞌaba mo, asimiꞌẽ na.
