1 Corĩtu 4:1-21
4 Wa hã Paulu, Apoluhu me, duré niꞌwam norĩ me, wa Cristuhu ma si, wa te ꞌre romhuri zaꞌra. Iwasuꞌuwẽ hã dama iwaihuꞌuꞌõ hã, iꞌuwaibaba si, wa te dama ꞌre wasuꞌu zaꞌra mono da, ma tô wapisutu zaꞌra, ꞌRe ihâimana uꞌâsi mono hã. Taha na si, wanhimiromhurizéb zaꞌra hã. Tahawa, te za ãne na si waꞌãma ꞌre irosaꞌrata zaꞌra waꞌaba mo.
2 Niꞌwa hã isibro, da te tãma ꞌre ꞌmadâꞌâ mono da, te te sima daꞌmaipisutu wamhã, e niha ihâimanazé hã za, tãma irobꞌmadâꞌâꞌwa da hã. Isibꞌapito ma, tãma umnhasi na, te za te te tãma ꞌre robꞌmadâꞌâ wẽ, te te wẽsãmri da hã.
3 Wa hã bété. ꞌRe ihâimana uꞌâsi mono ma, ĩꞌumnhasi na, wa tô te dama ꞌre rowasuꞌu, Cristuhu wasuꞌuwẽ na hã. Tane nherẽ, a norĩ waꞌwa hã ĩꞌumnhasi na iwasuꞌuwẽ na te dama ꞌre irowasuꞌu mono na asiwi ĩwaihuꞌu aba zéb zarina, asiwi ĩwẽsãmri aba zô, ĩsina ꞌre ĩnhimnhasi mono õ di. Mare di. Duré niꞌwam norĩ hã te te siwi ãma ĩwaihuꞌu zaꞌra zô, ĩsina ꞌre ĩnhimnhasi mono õ di. Ĩzama, ꞌre ĩsiꞌumnhasi mono na, iwasuꞌuwẽ hã te dama ꞌre iwasuꞌu mono na hã ꞌrâwi ĩsiꞌuihâ na ĩsiwaihuꞌu da hã, mare di.
4 Ãhã na hã, ꞌRe ihâimana uꞌâsi mono wi, te ãma iꞌupazém na hã marĩ õ di, ĩnhimirosaꞌrata ꞌremhã oto. E taha zarina, tãma ĩꞌumnhasi sina, iwasuꞌuwẽ te dama ꞌre iwasuꞌu mono zé, te wasuꞌu. Mare di. Wanhibꞌapito si te za ĩwaihuꞌu, tãma ĩꞌumnhasi na hã, duré tãma ĩꞌumnhasi õ na hã.
5 Tahawa, asiwi ꞌre dawẽꞌõ zaꞌra waꞌaba mono õ di za, zahadu bâdâ hã wisi õ nherẽ. Wanhibꞌapito uburé za te te idaꞌawaihuꞌuzé wana, asiwi ĩwaihuꞌu aba zarina, asiwi ĩwẽꞌõ zaꞌra waꞌaba da, asima ĩꞌãma ꞌre rosaꞌrata zaꞌra waꞌaba mono õ di za, Wanhibꞌapito apâ wei morĩ õ ré hã. Niꞌwam norĩ zama asiwi iwaihuꞌu aba zéb zarina, asiwi wẽꞌõ zaꞌra waꞌaba da, asima ãma ꞌre rosaꞌrata zaꞌra waꞌaba mono õ di za, bâtâ na Wanhibꞌapito za daꞌãma isipoꞌozé wana. Taha si te za dawi aꞌupsibi nhamra oto sõꞌawi, uburé dapẽꞌẽ ꞌre, ꞌrâwi da te dasima ꞌre irosaꞌrata zaꞌra mono zé hã. Marĩ hã barana, da te ꞌre ꞌmadâꞌâ zaꞌra mono da, da te ꞌre iꞌuiwẽ zaꞌra mono ne, te za Wanhibꞌapito hã sõꞌawi oto dawi aꞌupsibi nhamra, uburé marĩ hã da te ꞌre ꞌmanharĩ zaꞌra mono da, da te dasima ꞌre iwẽ zaꞌra mono zém na, danhimirosaꞌrada hã. Tawapsi te za ꞌRe ihâimana uꞌâsi mono hã wasuꞌu wẽ zaꞌra niꞌwam norĩ hã, tiꞌab ré tihâimana wẽ zém na te te tãma ãma ꞌre uwaimrami zaꞌra mono wa, te te ꞌre iꞌawaihuꞌu mono zéb zarina.
6 Ĩsisãnawã norĩ, te ꞌre aipawaptob zaꞌra waꞌaba mono da, wa tô ãne na aima ĩsiwasuꞌu zaꞌra waꞌwa ĩhâimanazém na hã, Apoluhu hâimanazém na zama. ꞌRe ihâimana uꞌâsi mono nhimiroti ꞌrata na robꞌuiꞌéré zarina si, ꞌre aihâimana zaꞌra waꞌaba mono da, wa tô ãne na aima roti zaꞌra waꞌwa, wasiré rowahutuꞌwa norĩ hã tisiré norĩ nhimiroti nhipai u, wẽ uptabi newa, ta norĩ niwĩ ꞌre aihâimana zaꞌra waꞌaba mono wẽ te, asina ꞌre aiwata zaꞌra waꞌaba mono tõ da duré.
7 E asiré norĩ nhipai u ꞌre aihâimana pire zaꞌra waꞌaba mono bâ, te bété ãne na ꞌre asiꞌmadâꞌâ ze zaꞌra waꞌaba mo. E marĩ te aré aima ꞌre hâimana zaꞌra waꞌwa, ꞌRe ihâimana uꞌâsi mono te te aima ꞌre sõmri zaꞌra waꞌaba mono õ ꞌwaꞌâhã. Marĩ iwẽ hã aima ꞌre hâimana zaꞌra waꞌaba mono õ di aré. Uburé iwẽ hã ꞌRe ihâimana uꞌâsi mono nhoprubzéb si, te oto aima ꞌre hâimana zaꞌra waꞌwa. E marĩ wa, te bété asina ꞌre aiwata zaꞌra waꞌaba mo, uburé marĩ iwẽ hã aima ꞌre ihâimana zaꞌra waꞌaba mono hã, ꞌRe ihâimana uꞌâsi mono nhoprubzéb õ newa, aihawim na aima ꞌre wairébé aba mono newa.
8 A norĩ waꞌwa hã, ꞌRe ihâimana uꞌâsi mono, Tipẽꞌẽzani na rowẽ te te aima ꞌre ipisutu zaꞌra waꞌaba mono zô, aiwi sô ꞌre irowaptâꞌâ zaꞌra waꞌaba mono õ na, te ꞌrâwi ꞌre asiꞌmadâꞌâ ze zaꞌra waꞌaba mo, dasa hã da te ꞌre huri mono wa, da te ꞌre iꞌmahâpãrĩ pese zaꞌra mono ne. E ãne bâ, te ꞌrâwi asiꞌãma ꞌre irosaꞌrata ze zaꞌra waꞌaba mo. Danhibro pese wa, marĩ zô dawi ꞌre irowaptâꞌâ zaꞌra mono õ ne, te asina ꞌre aiwata zaꞌra waꞌaba mo, ꞌRe ihâimana uꞌâsi mono, Tipẽꞌẽzani na rowẽ te te aima ꞌre ipisutu zaꞌra waꞌaba mono zô, aiwi ꞌre rowaptâꞌâ zaꞌra waꞌaba mono õ newa. Tiꞌai ãma danhibꞌapito norĩ hã tinhibꞌaꞌuwẽ norĩ ma, pire na ꞌre ihâimana zaꞌra mono ne, te asiré isazeiꞌwa norĩ ma aipire na ꞌre aihâimana zaꞌra waꞌaba mono na ꞌre asiꞌmadâꞌâ ze zaꞌra waꞌaba mo, wa norĩ hã ꞌRe ihâimana uꞌâsi mono zadawa ꞌmahârâꞌwa norĩ hã danhibꞌapito norĩ ne wapire na ꞌre wahâimana zaꞌra mono õ nherẽ. E ãne hã iꞌuwaibaba bâ. Wẽ di tô. Tane hã aima wẽ zaꞌra waꞌaba ze te bâ, taha na si ꞌre aihâimana zaꞌra waꞌaba mono, aipire na isazeiꞌwa norĩ ma ãma ꞌre aihâimana zaꞌra waꞌaba mono da. Niha hã ꞌwaꞌâhã, wa aré tô wa norĩ zama wapire na asiré ꞌre wahâimana zaꞌra waꞌwa, uburé isazeiꞌwa norĩ ma hã.
9 Wa norĩ hã Zezusihi zadawa wasuꞌuꞌwa na dama ꞌre iwahâimana zaꞌra mono hã, isazeiꞌwa norĩ ma, wawapure na damana wawi taré ꞌre iwahâimana zaꞌra mono da si, ma tô te te ꞌre waꞌapisutu. Wa hã ãne na wa tô rosaꞌrata na hã ĩsina waihuꞌu. Niꞌwam norĩ hã marĩ te te ꞌre iꞌmanharĩ wasété zaꞌra mono zéb zarina, te za da te dasima ãma ꞌre roti zaꞌra, dasisõꞌa da te ꞌre simroi mono wa, ãma ꞌre dawaꞌẽ zaꞌra mono da. Tane duré, wa norĩ hã sõꞌawi wa te dama ꞌre sadawa wasuꞌu zaꞌra mono da, ma tô ꞌRe ihâimana uꞌâsi mono hã te te ꞌre waꞌapisutu, da te dasiwi ꞌre wawẽꞌõ zaꞌra mono wa, uburé dasisõꞌa waꞌãma ꞌre dawaꞌẽ zaꞌra mono da nherẽ, duré hâiwa ãma ꞌRe ihâimana uꞌâsi mono ma, romhuriꞌwa norĩ nhoꞌa zama.
10 Cristuhu wasuꞌuwẽ na si, wa te dama ꞌre rowasuꞌu zaꞌra mono wa, te isazeiꞌõꞌwa norĩ hã wanhimizaꞌreseꞌõ na ꞌre iwahâimana zaꞌra mono na te te waꞌãma ꞌre rosaꞌrata upa zaꞌra. E a norĩ waꞌwa hã, ꞌRe ihâimana uꞌâsi mono nhimiroti, wanhipai u aima waihuꞌu pese zaꞌra waꞌaba bâ, te ãne hã ꞌrâwi asimirosaꞌrada hã asiꞌãma ꞌre iꞌmanharĩ zaꞌra waꞌaba mo, Cristuhu ãma ꞌre aihâimana zaꞌra waꞌaba mono na. Duré wa norĩ hã isazeiꞌõꞌwa norĩ ma, wawapure na ꞌre iwahâimana zaꞌra mono na, te ta norĩ hã te te waꞌãma ꞌre rosaꞌrata zaꞌra. E a norĩ waꞌaba si, tãma aipire zaꞌra waꞌaba bâ, te bété ꞌrâwi ãne na asiꞌãma ꞌre irosaꞌrata zaꞌra waꞌaba mo. Duré wa norĩ hã dama wawapure na ꞌre iwahâimana zaꞌra mono na, da te waꞌãma ꞌre rosaꞌrata zaꞌra mono wa, da te dasiwi ꞌre wawazéb zaꞌra mono õ di. Ãté a norĩ waꞌaba si, da te ꞌre aiwazé pese zaꞌra waꞌaba mono na, te ꞌrâwi asiꞌãma ꞌre irosaꞌrata ze zaꞌra waꞌaba mo. E ãne hã iꞌuwaibaba. Mare di.
11 Wa norĩ hã bété, iwasuꞌuwẽ na si, wa te dama ꞌre irowasuꞌu zaꞌra mono norĩ hã. E niha ꞌre iwahâimana zaꞌra mono zé hã. Ãhã na zama wa mra hã wa te ꞌre sépata zaꞌẽtẽ zaꞌra, ꞌrubu zama. Waꞌuza hâꞌratare ré si, wa duré ꞌre wanomro. Te duré da te ꞌre wahâ zaꞌra danhibꞌrata na, da te ꞌre iwaꞌruiwapari zaꞌra mono zéb zarina. Daro mono bâ ꞌre wanomro mono ré, ꞌre iwanhimiꞌwara mono zéb da, duré da te wama ꞌre pisutu zaꞌra mono õ di. Hâiwi si, wa ꞌre wanomro uꞌâsi.
12 Wahâimanazéb da hã, wawasutu nherẽ, wa wanhibꞌrata na wa te ꞌre romhuri pese zaꞌra. Duré da te waꞌãma ꞌre wasété zaꞌra mono nherẽ, wa daꞌãma ꞌre wamreme zusi uꞌâsi, ꞌRe ihâimana uꞌâsi mono ma, iwẽ hã te te dama ꞌre anhomri mono da. Duré da te wama ꞌre robꞌmanharĩ wasété zaꞌra mono nherẽ, wa wanhiptete na õhõ ãma si ꞌre wahâimana zaꞌra, asa wa te dama ãma ꞌre waꞌrãmi zaꞌra mono ãna.
13 Duré da te dasima ꞌre wawasuꞌu wasété zaꞌra mono nherẽ, wa wamreme wẽ na si, wa te dama ãma ꞌre waꞌrãmi zaꞌra, wawaimri na. Duré, ropru hã da te dasiwi ꞌre isaꞌwari zaꞌra mono ne, te da te dasiwi ꞌre wawẽꞌõ pese zaꞌra. Ãne ꞌre iwahâimana zaꞌra mono zé hã, ãhã na hã.
14 E ãne na te aima iroti zaꞌra waꞌaba zé ma, asiséb zaꞌra waꞌaba da, wa tô ãne na aima ãma robꞌuiꞌéré zaꞌra waꞌwa. Mare di. Taha dai õ di. Taré ĩnhimiroti hã waihuꞌu pese zaꞌra waꞌaba da, wa ãne na aima ãma robꞌuiꞌéré zaꞌra waꞌwa, ĩꞌra ne oto ĩma ꞌre aihâimana zaꞌra waꞌaba mono wa, ĩma asawi uptabi zaꞌra waꞌaba wa.
15 Ãté daꞌahâ na te oto da te aima ꞌre roti uꞌâsi zaꞌra waꞌwa, Zezusihi nhimiroti wẽ na hã, taha na si ãma ꞌre anomro wẽ waꞌaba mono da. Daꞌra hã da te dasisô ꞌre iꞌmadâꞌâ pese zaꞌra mono ne, te ta norĩ hã te te ꞌre aiꞌmadâꞌâ pese zaꞌra waꞌwa, Zezusi hã ꞌre rẽme zaꞌra waꞌaba mono tõ da. Tane nherẽ, ĩsiwaprosi wa aimama uptabi aba ne, aima ꞌre ĩhâimana zaꞌra waꞌwa. Iwasuꞌuwẽ na te aima ꞌre irowasuꞌu zaꞌra waꞌaba mono zéb zarina, Cristu Zezusi hã ꞌre saze zaꞌra waꞌaba mono wa, wa oto aimama uptabi aba ne, ꞌre ĩhâimana, daꞌra hã damama siwasutu hawi, dama ꞌre ipoto zaꞌra mono ne.
16 Taha zarina, wa za oto aima roti zaꞌra waꞌwa, Cristuhu nhirã zarina ꞌre ĩmorĩ wẽ ne, oto ꞌre anomro wẽ waꞌaba mono da, aima ãma ꞌre ĩsisanho zaꞌra waꞌaba mono zéb zarina.
17 Taha da, wa tô Timotiu hã atẽme satõrĩ zaꞌra waꞌwa, te te ãma ꞌre aipawaptob zaꞌra waꞌaba mono da. Ta hã ĩꞌra ne, oto ĩma ꞌre hâimana mono wa, ĩma sawi uptabi di duré. Ta hã te Wanhibꞌapito si te te ꞌre ꞌmadâꞌâ pese, tiwi sipiꞌrai ãna. Ta hã atẽme wisi aba wapsi, te za Cristu Zezusihi ãma si ꞌre ĩhâimana mono zém na ãma aipoꞌre puꞌu zaꞌra waꞌwa, daro mono bâ isazeiꞌwa norĩ hã ꞌre isiꞌrãꞌõtõ mono norĩ ma, te ꞌre irowahutu mono zém na zama.
18 Niꞌwam norĩ hã ꞌRe ihâimana uꞌâsi mono nhimiroti na, ĩnhipai u te te ꞌre iwaihuꞌu pese zaꞌra mono na, ma tô ꞌrâwi ꞌre siꞌmadâꞌâ pire zaꞌra, asiré ꞌre aihâimana zaꞌra waꞌaba mono norĩ hã. Tahawa, ta norĩ ma ĩpahi zaꞌra newa, ma tô ĩꞌãma rosaꞌrata zaꞌra, atẽme waꞌaba, za ãma ĩmorĩ suꞌu õ na hã. Taha zarina, ma tô duré ꞌrâwi sina ꞌre wata zaꞌra.
19 4:19-20 Tane nherẽ, Uburé Danhibꞌapito te te ĩma pisutu wamhã, wa za tô ãma atẽme ĩmorĩ suꞌu zaꞌra waꞌwa, romhutu na. Niꞌwam norĩ hã ꞌRe ihâimana uꞌâsi mono nhibꞌaꞌuwẽ ꞌre nomro mono wamhã, timreme nhipese na Cristuhu wasuꞌuwẽ na te te dama ꞌre rowasuꞌu zaꞌra mono õ di za, da te ꞌre wapari ze zaꞌra mono da. ꞌRe ihâimana uꞌâsi mono Pẽꞌẽzani, tiwaihuꞌu pese na te te ꞌre ipawaptob zaꞌra mono zém na si, te za te te ꞌre dapawaptob zaꞌra, da te ãma ꞌre saze zaꞌra mono da. Taha zarina si, te za ãma ꞌre hâimana wẽ uꞌâsi zaꞌra, ta norĩ hã.
Tahawa, ãma atẽme ĩmorĩ zaꞌra waꞌaba wamhã, wa za ĩsina aiwaihuꞌu zaꞌra waꞌwa, aiwaihuꞌu pese na ꞌrâwi ꞌre iꞌasiꞌmadâꞌâ ze zaꞌra waꞌaba mono norĩ hã. ꞌRe ihâimana uꞌâsi mono Pẽꞌẽzani, tiwaihuꞌu pese na te te ꞌre aipawaptob zaꞌra waꞌaba mono zéb zarina, sena na ꞌre idapawaptob zaꞌra waꞌaba mono na, wa za duré ĩsina aiwaihuꞌu zaꞌra waꞌwa, sena na ãma ꞌre idapawaptob zaꞌra waꞌaba mono õ na zama. Asina ꞌre aiwata zaꞌra waꞌaba mono sina, aiwaihuꞌu pese na dama ꞌre asiwasuꞌu zaꞌra waꞌaba mono zép si, te waihuꞌu tõ da, wa za ãma atẽme ĩmorĩ zaꞌra waꞌwa, sena na ꞌRe ihâimana uꞌâsi mono Pẽꞌẽzani nhimipawaptobzéb zarina, ꞌre aihâimana zaꞌra waꞌaba mono na si, ꞌrâwi te aiwaihuꞌu zaꞌra waꞌaba da, ĩsiꞌuihâ na.
20 ꞌMadâꞌâ 4:19
21 Ãne, wa tô aima ãma roti zaꞌra waꞌwa. Tawamhã e ma hã te za asima iwẽ zaꞌra waꞌwa. Atẽme ãma ĩmorĩ aba wamhã, e daꞌra, da te ꞌre ihâ zaꞌra mono ne, wa za ĩmreme na aihâ zaꞌra waꞌwa, ĩnhimiroti hã ꞌre wapari zaꞌra waꞌaba mono õ ꞌru te. Ãté wa za tô aihâ zaꞌra waꞌwa, aihâimanazém na ꞌre uwaimrami zaꞌra waꞌaba mono õ wa. E ĩhâimanazém na atãma na wa za aima ĩhâimana zaꞌra waꞌwa, ĩnhimizawi pese zéb zarina, ĩnhimiroti hã ꞌre wapari pese zaꞌra waꞌaba mono wẽ te. Maꞌãpé, ꞌrâwi oto asiꞌuihâ na asima pisutu zaꞌra waꞌaba, niha ꞌre anomro aba mono zéb da hã.
