1 Corĩtu 7:1-40
7 Robꞌuiꞌéré na we asiwi ĩzadanharĩ zaꞌra waꞌaba zém na, wa za oto aima roti zaꞌra waꞌwa. E aibâ norĩ hã ꞌre mro zaꞌra mono õ nherẽ, tãma ꞌre rowẽ zaꞌra mono di za. Ãté mro õ nherẽ, tãma ꞌre rowẽ zaꞌra mono di za tô.
2 Tane nherẽ, aibâ norĩ hã mro ãna ꞌre hâimana zaꞌra mono nherẽ, piꞌõ na tiwasédé te te ꞌre iꞌmanharĩ zaꞌra mono zé hã, ahâ uptabi di. Duré piꞌõ norĩ hã mro ãna ꞌre hâimana zaꞌra mono nherẽ, aibâ na tiwasédé te te duré ꞌre iꞌmanharĩ zaꞌra mono zé hã, ahâ uptabi di. Tahawa, aibâ norĩ hã te za tô ꞌre mro zaꞌra, timro me si ꞌre hâimana zaꞌra mono da. Ãne hã wẽ uptabi di, piꞌõ aimawi na tiwasédé te te ꞌre ꞌmanharĩ zaꞌra mono tõ da. Duré piꞌõ norĩ hã te za tô ꞌre mro zaꞌra aibâ na, timro me si ꞌre hâimana zaꞌra mono da, ta norĩ zama, aibâ aimawi na tiwasédé te te ꞌre ꞌmanharĩ zaꞌra mono tõ da.
3 Aibâ norĩ hã piꞌõ na oto ꞌre mro zaꞌra mono wamhã, timro wi, tihâiba hã te te ꞌre sawi zaꞌra mono õ di za oto. Duré piꞌõ norĩ hã aibâ na oto ꞌre mro zaꞌra mono wamhã, duré timro wi tihâiba hã te te ꞌre sawi zaꞌra mono õ di za oto.
4 Piꞌõ norĩ hã ꞌre mro zaꞌra mono wamhã, ihâiba hã itei õ di oto. Imro te hã za oto, ihâiba hã. Tane duré aibâ norĩ hã ꞌre mro zaꞌra mono wamhã, itei õ di oto, ihâiba hã. Imro te hã oto, ãne hã aiwa.
5 Tahawa, aimro ré ꞌre iꞌaihâimana zaꞌra waꞌaba mono norĩ, aimro wi aihâiba hã ꞌre sawi zaꞌra waꞌaba mono õ di za oto. Ãté nimahã bâtâ na si te za ãma ꞌre asisaze zaꞌra waꞌaba mo, aimro ma, aihâiba hã aꞌâ ꞌre sõmri zaꞌra waꞌaba mono tõ da, ꞌRe ihâimana uꞌâsi mono ma si, aꞌâ ꞌre asisõmri zaꞌra waꞌaba mono da, tãma ꞌre aimreme zusi aba mono da. Ãne wamhã, ꞌRe ihâimana uꞌâsi mono ma, ꞌre aimreme zusi aba mono pari, aihâiba hã aimro wi ꞌre sawi zaꞌra waꞌaba mono ãna, te za tô aihâiba na apâ asima ãma ꞌre atob zaꞌra waꞌaba mo, aiwasédé hã aihâiba na ꞌrâwi nherẽ, aimro õ ne, asiwi ꞌre ꞌmanharĩ zaꞌra waꞌaba mono tõ da, asina ꞌre asiptete zaꞌra waꞌaba mono õ wa, Satanasi hã te te ꞌre aipibu zaꞌra waꞌaba mono tõ da.
6 A norĩ waꞌwa hã uburé asina ꞌre aimro zaꞌra waꞌaba mono da hã, te aima ꞌru zaꞌra waꞌaba õ di. Asiꞌuihâ na asima ꞌre iwẽ zaꞌra waꞌaba mono zarina, ꞌre aimro zaꞌra waꞌaba mono da hã, te duré aiwi wẽꞌõ zaꞌra waꞌaba õ di.
7 Tane nherẽ, wa hã ĩmro õ na ꞌre ĩhâimana mono zéb zarina, aimro ãna ꞌre aihâimana zaꞌra waꞌaba mono zéb da hã, ĩma wẽ di aré. Tane nherẽ, ꞌRe ihâimana uꞌâsi mono hã aiwa te te dama ꞌre apisutu mono õ di, dahâiba mono bâ, niha ꞌre idahâimana zaꞌra mono zéb da hã. Dasisarina si ꞌre idahâimana zaꞌra mono õ na hã, taha si te za te te dama ꞌre apisutu, damro ré ꞌre dahâimana zaꞌra mono da, duré damro ãna ꞌre idahâimana zaꞌra mono da hã.
8 Aimro ãna ꞌre aihâimana zaꞌra waꞌaba mono norĩ ma, wa za oto aima roti zaꞌra waꞌwa, duré piꞌõi mrotõ norĩ ma zama. Õne haré, ꞌre aihâimana zaꞌra waꞌaba mono da hã, wẽ di, wa hã ĩmro õ na ꞌre ĩhâimana mono ne. Ãne hã ĩma wẽ di.
9 Tane nherẽ, dahâiba na dawasété wi ꞌre idanhiptete zaꞌra mono õ si, wẽ õ di. Tahawa, aihâiba na aiwasété wi, asina ꞌre asiptete waihuꞌu zaꞌra waꞌaba mono õ wamhã, te za tô asina ꞌre aimro zaꞌra waꞌaba mo, asisô ꞌre rowasutu zahu zaꞌra waꞌaba mono tõ da.
10 Aimro ré, ꞌre aihâimana zaꞌra waꞌaba mono norĩ ma, wa za oto aima roti pese zaꞌra waꞌwa duré. Tane nherẽ, ĩsiꞌuihâ na ĩnhimirosaꞌrata na te aima roti zaꞌra waꞌaba õ di za. Wanhibꞌapito nhimiroti na si, wa za aima roti zaꞌra waꞌwa, ãne na hã: Piꞌõ norĩ hã timro te te ꞌre rẽme zaꞌra mono õ di za.
11 Tane nherẽ, ãté piꞌõ norĩ hã te za timro hã te te ꞌre rẽme zaꞌra. Ãne hã te te ꞌre ꞌmanharĩ zaꞌra mono wamhã, aibâ aimawi na ꞌre mro zahu zaꞌra mono õ di za. Timro ꞌrata u si, te za apâ ꞌre sipizari zaꞌra. Ãne na te te ãma ꞌre sahu ze zaꞌra mono õ wamhã, mro ãna te za tô ꞌre hâimana uꞌâsi zaꞌra. Duré aibâ norĩ hã timro te te ꞌre rẽme zaꞌra mono õ di za, ãne na hã tô aiwa.
12 A norĩ waꞌwa hã ꞌre saze zaꞌra waꞌaba mono õ ré, asina ꞌre aimro zaꞌra waꞌaba mono norĩ ma, wa za oto aima roti zaꞌra waꞌwa. Wanhibꞌapito hã tiꞌab ré, ãne na te te dama ꞌre roti mono õ nherẽ, tane nherẽ, wa za aima ãma roti zaꞌra waꞌwa, ãne na: Aibâ norĩ hã isazeiꞌwa na ꞌre hâimana zaꞌra mono nherẽ, imro hã isazeiꞌõꞌwa na tãma ꞌre hâimana zaꞌra mono wamhã, duré piꞌõ hã timro siré ꞌre hâimana uꞌâsi zaꞌra mono da, te te sima ꞌre sawi pese zaꞌra mono wamhã, ãne wamhã, aibâ norĩ hã timro hã te te ꞌre rẽme zaꞌra mono õ di za.
13 Duré piꞌõ norĩ hã isazeiꞌwa na ꞌre hâimana zaꞌra mono nherẽ, imro hã isazeiꞌõꞌwa na tãma ꞌre hâimana zaꞌra mono wamhã, duré aibâ hã timro siré ꞌre hâimana uꞌâsi zaꞌra mono da, te te sima ꞌre sawi pese zaꞌra mono wamhã, ãne wamhã, piꞌõ norĩ hã timro te te ꞌre rẽme zaꞌra mono õ di za duré.
14 Duré aibâ norĩ hã isazeiꞌõꞌwa na ꞌre hâimana zaꞌra mono nherẽ, imro hã isazeiꞌwa na tãma ꞌre hâimana zaꞌra mono wamhã, ꞌRe ihâimana uꞌâsi mono hã piꞌõ norĩ ma, rowẽ te te tãma ꞌre ipisutu zaꞌra mono zéb uꞌâbâ, te za tô duré aibâ norĩ ma, te te tãma ꞌre pisutu zaꞌra rowẽ hã, imro hâiba uꞌâbâ, isazeiꞌõꞌwa na ꞌre hâimana zaꞌra mono nherẽ, aibâ norĩ hã. Duré piꞌõ norĩ hã isazeiꞌõꞌwa na ꞌre hâimana zaꞌra mono nherẽ, imro hã isazeiꞌwa na tãma ꞌre hâimana zaꞌra mono wamhã, ꞌRe ihâimana uꞌâsi mono hã aibâ norĩ ma, rowẽ te te tãma ꞌre ipisutu zaꞌra mono zéb uꞌâbâ, te za tô duré piꞌõ norĩ ma, te te tãma ꞌre pisutu zaꞌra rowẽ hã, imro hâiba uꞌâbâ, isazeiꞌõꞌwa na ꞌre hâimana zaꞌra mono nherẽ, piꞌõ norĩ hã. Ãnei õ ꞌwaꞌâhã, iꞌra norĩ isazeiꞌõꞌwa norĩ ꞌra ne, te aré tô ꞌre hâimana zaꞌra, ꞌRe ihâimana uꞌâsi mono ma hã. Tazahã imama norĩ hâiba uꞌâbâ, te za tô rowẽ si te te tãma ꞌre apisutu, ꞌRe ihâimana uꞌâsi mono hã.
15 7:15-16 Duré, niꞌwam norĩ hã isazeiꞌõꞌwa ꞌre hâimana zaꞌra mono wamhã, timro hã isazeiꞌwa te te ꞌre rẽme zaꞌra mono da, te te sima ꞌre wẽ zaꞌra mono wamhã, imro hã te te tiwi ꞌre rosawi zaꞌra mono õ di za, isazeiꞌwa siꞌuiwa sima ꞌre hâimana zaꞌra mono õ wa. Siꞌuihâ na te za tô ꞌre wairébé, isazeiꞌõꞌwa hã. ꞌRe ihâimana uꞌâsi mono hã ma tô te te sima ꞌre aiwẽ zaꞌra waꞌwa, robze sina ãma ꞌre aihâimana zaꞌra waꞌaba mono da. Tahawa, aimro hã isazeiꞌõꞌwa aima ꞌre hâimana zaꞌra waꞌaba mono wa, te te oto ꞌre aiwẽꞌõ zaꞌra waꞌaba mono wamhã, te za tô tãma ꞌre iwaprosi waré zaꞌra waꞌaba mo, te te tô ꞌre airẽme zaꞌra waꞌaba mono da.
Piꞌõ norĩ, isazeiꞌwa ꞌre anomro aba mono wamhã, duré aimro hã Wanhibꞌapito te te ꞌre saze zaꞌra mono õ nherẽ, e te za te te ꞌre saze zaꞌra, nimahã bâtâ na hã, Cristu hã. Ãté te za tô te te ꞌre saze zaꞌra. Ãté te te ꞌre saze zaꞌra mono õ di za. Ãne hã aima waihuꞌu zaꞌra waꞌaba õ di. Duré aibâ norĩ, isazeiꞌwa ꞌre anomro aba mono wamhã, aimro hã te te ꞌre saze zaꞌra mono õ nherẽ, e te za te te ꞌre saze zaꞌra, nimahã bâtâ na hã. Ãne hã aima waihuꞌu zaꞌra waꞌaba õ di duré. Tahawa, aimro hã isazeiꞌõꞌwa na aima ꞌre hâimana zaꞌra waꞌaba mono wa, te te oto ꞌre aiwẽꞌõ zaꞌra waꞌaba mono wamhã, ihâimanazéb zarina, te za tô tãma ꞌre iwaprosi waré zaꞌra waꞌaba mo, te te tô ꞌre airẽme zaꞌra waꞌaba mono da.
16 ꞌMadâꞌâ 7:15
17 Wanhibꞌapito hã te te aima ꞌre ipisutu zaꞌra waꞌaba mono zéb zarina si, te za oto ꞌre aihâimana uꞌâsi zaꞌra waꞌaba mo. ꞌRe ihâimana uꞌâsi mono hã tinhibꞌaꞌuwẽ da, te te sima ꞌre aipisutu zaꞌra waꞌaba mono õ ré, niha ꞌre iꞌaihâimana zaꞌra waꞌaba mono zém hawi, ꞌre aiwairébé aba mono zém na, ꞌre asiꞌmadâꞌâ zaꞌra waꞌaba mono õ di za, Zudeu na, duré zudeuꞌõ na. Õne haré te za oto ꞌre aihâimana uꞌâsi zaꞌra waꞌaba mo. Ãne na si, wa tô wa hã te dama ꞌre aroti uꞌâsi, daro mono bâ isazeiꞌwa norĩ hã siré ꞌre isiꞌrãꞌõtõ uꞌâsi mono norĩ ma hã.
18 Niꞌwam norĩ hã sihâiwata nhihâri ré, ꞌre hâimana zaꞌra mono wamhã, ꞌRe ihâimana uꞌâsi mono hã tinhibꞌaꞌuwẽ da, te te oto sima ꞌre pisutu zaꞌra mono wamhã, e taha zarina te za ta norĩ hã ꞌre siꞌmadâꞌâ ze zaꞌra, tinhihâiwata nhihârizé hã te te sima ꞌre pari zaꞌra mono da, apâ sihâiwata nhihâri õ ré, ꞌre inomro mono ne, ꞌre hâimana zaꞌra mono da. Mare di. Ãne na hã ꞌre siꞌmadâꞌâ zaꞌra mono õ di za. Õhõ haré te za tô ꞌre nomro. Duré niꞌwam norĩ hã sihâiwata nhihâri õ nherẽ, ꞌRe ihâimana uꞌâsi mono hã tinhibꞌaꞌuwẽ da, te te oto sima ꞌre pisutu zaꞌra mono wamhã, e taha zarina, te za ta norĩ hã ꞌre sisihâiwata nhihâri zaꞌra. Mare di. ꞌRe sisihâiwata nhihâri zaꞌra mono õ di za. Õhõ haré te za tô oto ꞌre nomro, ta norĩ hã.
19 Danhihâiwata nhihâri ré si ꞌre idahâimana zaꞌra mono zé hã marĩ dai õ di, ꞌRe ihâimana uꞌâsi mono ma hã. Duré danhihâiwata nhihâri õ nherẽ, ꞌre idahâimana zaꞌra mono zé hã marĩ dai õ di, ꞌRe ihâimana uꞌâsi mono ma hã, ãne hã tô aiwa. Ãne si tãma ipire hã, ꞌre idahâimana zaꞌra mono zéb da hã. ꞌRe ihâimana uꞌâsi mono nhimiroti, da te ꞌre ꞌmadâꞌâ pese zaꞌra mono sina ꞌre idanomro wẽ mono zép si, tãma ipire hã.
20 ꞌRe ihâimana uꞌâsi mono hã tinhibꞌaꞌuwẽ da, te te sima ꞌre aipisutu zaꞌra waꞌaba mono wamhã, e niha za tawamhã ꞌre iꞌaihâimana zaꞌra waꞌaba mono zé hã. Õne haré te za tô aihâimanazém na ꞌre aihâimana zaꞌra waꞌaba mo, dapoto mono bâ da te ꞌre aiwamri zaꞌra waꞌaba mono zéb zarina, duré aipire na dama ꞌre iꞌaihâimana zaꞌra waꞌaba mono zéb zarina, duré aiwapu na dama ꞌre iꞌaihâimana zaꞌra waꞌaba mono zéb zarina.
21 7:21-22 Aiꞌuipraꞌwa norĩ ma, aipawaꞌâbâ ãna tãma ꞌre romhuri zaꞌra waꞌaba mono ré, ꞌRe ihâimana uꞌâsi mono hã tinhibꞌaꞌuwẽ da, te te oto sima ꞌre aipisutu zaꞌra waꞌaba mono wamhã, aipawaꞌâbâ ãna ꞌre iromhuri zaꞌra waꞌaba mono zém na, asina ꞌre aihâtâꞌâ zaꞌra waꞌaba mono õ di za. Tane nherẽ, ãté nimahã bâtâ na si te za tô oto te te aima ꞌre pisutu zaꞌra waꞌwa, aipawaꞌâbâ ãna tãma ꞌre romhuri zaꞌra waꞌaba mono tõ da hã oto. Ãne zarina si, te za oto ꞌrâwi ꞌre asiꞌmadâꞌâ zaꞌra waꞌaba mo, tiwi ꞌre aiwairébé aba mono da, romhuri hawi, asiꞌuihâ na oto asima ꞌre romhuri zaꞌra waꞌaba mono da. Aiꞌuipraꞌwa norĩ ma, aipawaꞌâbâ ãna tãma ꞌre romhuri zaꞌra waꞌaba mono ré, Cristuhu ãma oto ꞌre anomro aba mono da, Uburé Danhibꞌapito te te ꞌre iꞌaipisutu zaꞌra waꞌaba mono norĩ hã, te oto robzei uꞌâsi na ꞌre aihâimana zaꞌra waꞌaba mo. Da te ꞌre iꞌuipra zaꞌra mono norĩ, waꞌâbâ ãna te te oto dama ꞌre romhuri zaꞌra mono tõ da, da te tãma ꞌre ipisutu zaꞌra mono ne, ma tô Cristu hã te te ꞌre aipisutu zaꞌra waꞌwa, aiwasété uꞌâsi ꞌre anomro aba mono tõ da, aiwasédé hã oto ꞌre rẽme pese zaꞌra waꞌaba mono da. Tane duré asiꞌuihâ na asima ꞌre romhuri zaꞌra waꞌaba mono ré, Cristuhu ãma ꞌre anomro aba mono da, Uburé Danhibꞌapito te te ꞌre aipisutu zaꞌra waꞌaba mono norĩ hã, te oto Cristuhu nhibꞌaꞌuwẽ si ꞌre anomro aba mo. Taha zarina si, te oto isimiroti hã ꞌre iꞌmadâꞌâ pese zaꞌra waꞌaba mo, da te ꞌre iꞌuipra zaꞌra mono norĩ hã tinhibꞌapito nhimiroti si te te ꞌre iꞌmadâꞌâ pese zaꞌra mono ne.
22 ꞌMadâꞌâ 7:21
23 Tidâꞌâzém na ma tô Cristu hã aiwaꞌâbâ zaꞌra waꞌwa, aiwasété uꞌâsi ꞌre anomro aba mono tõ da oto. Tahawa, isazeiꞌõꞌwa norĩ ma, ꞌre aihâimana zaꞌra waꞌaba mono õ di za oto.
24 Ĩsisãnawã norĩ, ꞌRe ihâimana uꞌâsi mono hã tinhibꞌaꞌuwẽ da, te te sima ꞌre aipisutu zaꞌra waꞌaba mono wamhã, õne haré te za aihâimanazéb uꞌâsi zaꞌra waꞌaba na si, ꞌre aihâimana zaꞌra waꞌaba mo, ꞌRe ihâimana uꞌâsi mono ãma si.
Mro ãna ꞌre ihâimana zaꞌra mono zé wasuꞌu
25 Robꞌuiꞌéré na we asiwi ĩzadanharĩ zaꞌra waꞌaba zém na, wa za duré ãma aima roti zaꞌra waꞌwa, mro ãna zahadu ꞌre ihâimana zaꞌra mono norĩ na hã. Wanhibꞌapito hã tiꞌai ãma ꞌre morĩ ré, ãne na te te dama ãma ꞌre roti mono õ nherẽ, wa za aima ãma roti zaꞌra waꞌwa. Wanhibꞌapito hã tinhoprubzéb zarina, ma tô te te ꞌre ĩpawapto, dama ĩꞌumnhasizéb zarina, isimiroti zarina si, te dama ãma ꞌre roti mono da. Taha zarina, wa za tô oto aima ãma roti zaꞌra waꞌwa.
26 Ãhã na Zezusihi zazeiꞌwa oto ꞌre wanomro mono wa, te da te wama ꞌre robꞌmanharĩ wasété zaꞌra, wa te ꞌre robzépata zaꞌra mono da. Tahawa, wa za oto aima roti zaꞌra waꞌwa, aimro ré ꞌre aihâimana zaꞌra waꞌaba mono wamhã, taha haré asima ꞌre aihâimana uꞌâsi zaꞌra waꞌaba mono da, duré aimro õ nherẽ, ꞌre aihâimana zaꞌra waꞌaba mono wamhã, õne haré ꞌre aihâimana zaꞌra waꞌaba mono da.
27 Aibâ norĩ, aimro ré ꞌre aihâimana zaꞌra waꞌaba mono norĩ hã, asima ꞌre rosaꞌrata wasété zaꞌra waꞌaba mono õ di za, ꞌre irẽme zaꞌra waꞌaba mono zéb da na hã. Duré zahadu aimro ãna ꞌre aihâimana zaꞌra waꞌaba mono norĩ hã, asima ꞌre rosaꞌrata zaꞌra waꞌaba mono õ di za, ꞌre iꞌaimro zaꞌra waꞌaba mono zéb da na hã.
28 Tane nherẽ, ãté te za tô asima ꞌre iwẽ zaꞌra waꞌaba mo, ꞌre aimro zaꞌra waꞌaba mono da. E tawamhã aiwasédé te za ꞌre iꞌmanharĩ zaꞌra waꞌaba mo. Mare di. Iwẽ si te za tô ꞌre iꞌmanharĩ zaꞌra waꞌaba mo. Duré piꞌõi hâiba préduptém norĩ hã ꞌre mro zaꞌra mono wamhã, e te za tiwasédé hã te te ꞌre ꞌmanharĩ zaꞌra. Mare di. Tiwasédé hã te te ꞌre ꞌmanharĩ zaꞌra mono õ di za. Ãne, wa hã wa tô aré te ĩsima ꞌre aiwẽ zaꞌra waꞌwa, asina ꞌre aimro zaꞌra waꞌaba mono wa, ꞌre robzépata zaꞌra waꞌaba mono tõ da. Ãne tõ da, wa tô aima roti zaꞌra waꞌwa, asina ꞌre aimro zaꞌra waꞌaba mono tõ da hã.
29 Ĩsisãnawã norĩ, tô sena, wa za ãne hã aima waihuꞌu zaꞌra waꞌwa. Romhuture di oto, irobꞌrãsutuzéb u hã. Tahawa, taha õ ré, Wanhibꞌapito ma si, wa te ꞌre iromhuri pese zaꞌra mono zéb da si, wa za ꞌrâwi wasina ꞌre wanhopré uꞌâsi. Tahawa, aibâ norĩ, aimro ré ꞌre aihâimana zaꞌra waꞌaba mono norĩ hã, aimro zawi na si ꞌrâwi asima ãma ꞌre rosaꞌrata zaꞌra waꞌaba mono õ di za.
30 Duré asisô ꞌre aiwaꞌõ zaꞌra waꞌaba mono wamhã, taha na si ꞌre rosaꞌrata zaꞌra waꞌaba mono õ di za. Duré aima ꞌre irowẽ zaꞌra waꞌaba mono zéb zarina, ato sina ꞌre anomro aba mono wamhã, taha na si ꞌre rosaꞌrata zaꞌra waꞌaba mono õ di za. Duré marĩ hã asima ꞌre uipra zaꞌra waꞌaba mono wamhã, taha na si ꞌre rosaꞌrata zaꞌra waꞌaba mono õ di za, asima.
31 Tiꞌai ãma uburé marĩ na ꞌre romhuri zaꞌra waꞌaba mono nherẽ, taha si asima ꞌre wẽ uptabi zaꞌra waꞌaba mono õ di za. E marĩ wa. Uburé marĩ hã tiꞌai ãma, da te ꞌre iꞌmadâꞌâ zaꞌra mono hã te za dawi ꞌre siꞌutõrĩ uꞌâsi zaꞌra. Tahawa, hâiwa ãma uburé marĩ iwẽ si ꞌre ihâimana zaꞌra mono zô si, te za sô ꞌre irobꞌruiwapari uꞌâsi zaꞌra waꞌaba mo.
32 Wa hã wa ĩsima te ꞌre aiwẽ zaꞌra waꞌwa, tiꞌai ãma marĩ zô si asima ꞌre asõpré waꞌaba mono zarina, asina ꞌre aihâtâꞌâ tõ zaꞌra waꞌaba mono da. Aibâ norĩ hã mro ãna ꞌre ihâimana zaꞌra mono norĩ hã Wanhibꞌapito ma, te te ꞌre iromhuri zaꞌra mono zém na da si, te za sima ꞌre sõpré uꞌâsi, taha zarina ꞌRe ihâimana uꞌâsi mono hã te te ꞌre ꞌmadâꞌâ ze zaꞌra mono da.
33 Tane nherẽ, aibâ norĩ hã mro ré ꞌre hâimana zaꞌra mono wẽ te, te za tiꞌai ãma marĩ zô zama sima ꞌre sõpré uꞌâsi, timro udâna, rowẽ na tãma ꞌre ihâimana zaꞌra mono zéb da hã.
34 Tahawa, maparane isimiromhuri te tãma ꞌre hâimana zaꞌra, aibâ norĩ ma hã, te te sima sô ꞌre irobꞌruiwapari zaꞌra mono hã, Wanhibꞌapito ma, duré timro ma.
Duré, piꞌõi hâiba prédum norĩ, mro ãna ꞌre ihâimana zaꞌra mono hã, duré piꞌõ préduptém norĩ, mro ãna ꞌre ihâimana zaꞌra mono hã ta norĩ hã te za simiꞌẽ na Wanhibꞌapito ma si, te te tãma ꞌre romhuri zaꞌra, waꞌa ãna. Wanhibꞌapito ma si, tãma ꞌre sihâiba nhomri uꞌâsi zaꞌra mono da, te za tô sena na te te sima ꞌre wẽ zaꞌra, mro ãna ꞌre hâimana zaꞌra mono wa, ta norĩ hã. Tane nherẽ, piꞌõ norĩ, mro ré ꞌre ihâimana zaꞌra mono norĩ hã, te za tiꞌai ãma marĩ zô si sima ꞌre sõpré uꞌâsi, timro udâna, robze na ãma ꞌre hâimana zaꞌra mono da.
35 Aiwi ꞌre robzeiꞌõ zaꞌra waꞌaba mono wa, aihâiba zei õ na ꞌre aihâimana zaꞌra waꞌaba mono da, ãne na te aima roti zaꞌra waꞌaba õ di. Taré iwẽ na si te aipawaptob zaꞌra waꞌaba da, wa ãne na aima roti zaꞌra waꞌwa. Wa duré te ĩsima te ꞌre aiwẽ zaꞌra waꞌwa, iwẽ si ꞌre ꞌmanharĩ zaꞌra waꞌaba mono da, duré asimirosaꞌrata na Wanhibꞌapito ma ꞌre asimiꞌẽ zaꞌra waꞌaba mono da, tãma ꞌre romhuri pese zaꞌra waꞌaba mono da, tiwi ꞌre asihâiba zawi zaꞌra waꞌaba mono ãna.
36 Ãté niꞌwam norĩ hã te za sina aiwẽ zahuré, sina mro zahuré da. Tawamhã sina mro zahuré õ ré, ãté aibâ hã te za piꞌõi hâiba na si te te sima ãma ꞌre rosaꞌrata uꞌâsi, za ãma imro hâiba na si, tiwasété wi siptete waihuꞌu ãna. Ãté te za duré te te sô ꞌre rowasutu uꞌâsi. Ãne na siwaihuꞌu wamhã, te za tô ãma timro suꞌu, te te sima iwẽzéb zarina. Ãma mro suꞌu da hã tô. Tawamhã oto ãma mro wamhã, tiwasédé hã te te ãma ꞌmanharĩ õ di za. Mare di.
37 Duré aibâ hã ãté siꞌuihâ na te za sima pisutu, mro ãna aꞌâ ꞌre hâimana mono da. Ãne wamhã, ãté te za piꞌõi wi, tihâiba na sina ꞌre siptete uꞌâsi. Ãhã wamhã, te te sima iwẽzéb zarina, mro ãna aꞌâ ꞌre hâimana mono wamhã, wẽ di za tô. Ãne hã iwasété õ di.
38 Tahawa, aibâ norĩ hã ꞌre mro zaꞌra mono wamhã, iwẽ si te za tô te te ꞌre ꞌmanharĩ zaꞌra. Duré ꞌre mro zaꞌra mono õ wamhã, iwẽ uptabi si te za tô te te ꞌre ꞌmanharĩ zaꞌra.
39 Piꞌõ norĩ hã imro tiwi ꞌre dâꞌâ zaꞌra mono õ ré, te te ꞌre rẽme waihuꞌu zaꞌra mono õ di za. Tiwi ꞌre dâꞌâ zaꞌra mono wapsi, te za oto pibui pese na timro na te te ꞌre sahu zaꞌra, aibâ aimawi na. Tane nherẽ, aibâ isazeiꞌõꞌwa na ꞌre mro zaꞌra mono õ di za. Aiwa isazeiꞌwa siꞌuiwa na te za tô sina ꞌre mro zaꞌra apâ.
40 Tane nherẽ, piꞌõi mrotõ norĩ hã ꞌre mro zahu zaꞌra mono õ wamhã, tãma ꞌre rowẽ uptabi zaꞌra mono di za, ta norĩ ma hã. Ãne ta norĩ ãma ĩnhimirosaꞌrada hã. ꞌRe ihâimana uꞌâsi mono Pẽꞌẽzani te te ĩma iwaihuꞌuzéb zarina, wa ãne na aima roti zaꞌra waꞌwa, ãne si.
