1 Corĩtu 8:1-13
8 Robꞌuiꞌéré na we asiwi ĩzadanharĩ zaꞌra waꞌaba zém na, wa za duré aima ãma roti zaꞌra waꞌwa, waihuꞌu pese newa romhâiba ꞌmanharĩ ãma ꞌre idawata zaꞌra mono zéb da, dasa hã da te tãma ꞌre isõmri zaꞌra mono zém na, romhâiba ꞌmanharĩ ma hã. Ãne ma tô we ĩma asiwasuꞌu zaꞌra waꞌwa, robꞌuiꞌéré na hã: “Wa norĩ hã isazeiꞌwa oto ꞌre wanomro mono wa, wama waihuꞌu pese zaꞌra di, ꞌRe ihâimana uꞌâsi mono nhimiroti hã. Taha zarina, wa za marĩ hã dasiré, wa te ꞌre ꞌmanharĩ zaꞌra, wa te wasima ꞌre iwẽ zaꞌra mono zéb zarina.” Ãne na ma tô we ĩma asiwasuꞌu zaꞌra waꞌwa. Tane tô. Uburé wa norĩ ma hã wama waihuꞌu pese zaꞌra di tô, ꞌRe ihâimana uꞌâsi mono nhimiroti hã. Tane nherẽ, marĩ hã da te ꞌre waihuꞌu pese zaꞌra mono wẽ te, te za ꞌre dasiꞌmadâꞌâ ze zaꞌra, ꞌrâwi. Tane nherẽ, isazeiꞌwa norĩ hã ꞌre isisawi pese zaꞌra mono zéb zarina si, te za ꞌre sipawaptob uꞌâsi zaꞌra, siptete sina siré ãma ꞌre hâimana uꞌâsi zaꞌra mono da.
2 Niꞌwam norĩ hã rowaihuꞌu pese ꞌwa newa, ꞌrâwi ꞌre siꞌmadâꞌâ ze zaꞌra mono wamhã, sena na ta norĩ hã, marĩ te te ꞌre waihuꞌu zaꞌra mono õ di za. Mare di.
3 Niꞌwam norĩ ma, ꞌRe ihâimana uꞌâsi mono, tãma isawi zaꞌra si, te za ꞌRe ihâimana uꞌâsi mono hã tinhibꞌaꞌuwẽ na te te sina ꞌre awaihuꞌu.
4 Duré, waihuꞌu pese newa, romhâiba ꞌmanharĩ ãma ꞌre idawata zaꞌra mono zéb da, dasa, da te tãma ꞌre isõmri zaꞌra mono na, wa za oto aima roti zaꞌra waꞌwa. E romhâiba ꞌmanharĩ ma, dasa, da te tãma ꞌre isõmri zaꞌra mono na, te za a norĩ waꞌwa hã dame ãma ꞌre asaihuri aba mo, isazeiꞌwa ꞌre anomro aba mono nherẽ. E dame ãma ꞌre asaihuri aba mono õ di za. Ãne, wa za aima ãma waihuꞌu zaꞌra waꞌwa. Romhâiba ꞌmanharĩ ãma ꞌre idawata zaꞌra mono hã, ꞌRe ihâimana uꞌâsi mono nei õ di. Iwaihuꞌu pese zéb da hã, marĩ hã tãma hâimana õ di. Robaba uptabi di. Tarére ta hã robꞌmanharĩ. Ãne hã wama waihuꞌu pese zaꞌra di. Siwaprosi, te ꞌRe ihâimana uꞌâsi mono si ꞌre hâimana, waihuꞌu pese uptabi na. Isine hã marĩ hã isipai u iwaihuꞌupe hã ꞌre ꞌmaihâimana mono õ di, aimawi hã. Robaba uptabi di. Ãne hã wama waihuꞌu pese zaꞌra di duré.
5 Tane nherẽ, niꞌwam norĩ hã ma tô te te ꞌre saze zaꞌra, ꞌRe ihâimana uꞌâsi mono nei õ nherẽ, waihuꞌu pese uptabi na ꞌre hâimana zaꞌra mono newa, hâiwa nhirõtõ na, duré tiꞌai ãma zama, ihâibaꞌõ norĩ hã. Isibꞌapito zaꞌra hã ahâ uptabi na tãma ꞌre hâimana zaꞌra mono õ nherẽ, ma tô te te ãma ꞌre saze zaꞌra.
6 Tane nherẽ, te siwaprosi wama ꞌre hâimana, ꞌRe ihâimana uꞌâsi mono si, wasiré wa te ꞌre isaze zaꞌra mono norĩ ma hã. Ta hã uburé Wamama, ꞌRe ihâimana uꞌâsi mono hã. Taha ma si, wa oto ꞌre wahâimana zaꞌra. Wanhibꞌapito si te duré siwaprosi ꞌre hâimana, Zezu Cristuhu si. Taha si, ma tô Timama zadawa para te te roꞌapoto. Taha nhimipawaptobzéb zarina si, ma tô ꞌRe ihâimana uꞌâsi mono hã te te ꞌre waꞌanhoꞌreptu, õhõ ãma si ꞌre wahâimana uꞌâsi zaꞌra mono da oto.
7 Tane nherẽ, niꞌwam norĩ hã isazeiꞌwa na oto ꞌre hâimana zaꞌra mono nherẽ, ãne na te te waihuꞌu zaꞌra õ di ta norĩ hã, rosaꞌrata nhibꞌuware na si ꞌre hâimana zaꞌra mono wa. Te te ꞌre saze zaꞌra mono õ ré, romhâiba ꞌmanharĩ ãma, aré dame ãma ꞌre wata uꞌâsi zaꞌra mono wa, te zahadu ta hawim haré te te ãma ꞌre rosaꞌrata uꞌâsi zaꞌra, romhâiba ꞌmanharĩ ãma hã, ꞌRe ihâimana uꞌâsi mono ne, waihuꞌu pese newa. Tahawa, dasa hã romhâiba ꞌmanharĩ ma, da te ꞌre isõmri zaꞌra mono hã te te duré dame ꞌre huri mono wa, te ta norĩ hã rosaꞌrata na te te ãma ꞌre upai uꞌâsi zaꞌra, ãne: “Ã hã dasa hã romhâiba ꞌmanharĩ ma, da te ꞌre isõmri zaꞌra mono na, ꞌre wasaihuri mono wamhã, wa za wawasédé hã wa te ãma ꞌre ꞌmanharĩ zaꞌra.” Ãne te za ta norĩ hã ꞌre siwẽꞌõ zaꞌra, tinhimirosaꞌrata nhibꞌuware na ꞌre hâimana zaꞌra mono wa. Romhâiba ꞌmanharĩ hã ꞌRe ihâimana uꞌâsi mono ne, waihuꞌu pese newa, dasa hã da te tãma ꞌre isõmri zaꞌra mono hã te te dasiré ꞌre huri mono wamhã, te za ãne na hã ꞌre siwẽꞌõ zaꞌra, ta norĩ hã.
8 Tazahã, dasa hã wa te ꞌre ihuri mono zéb zarina, duré wa te ꞌre ihuri mono õ zéb zarina, te te ꞌre waꞌawẽsãmri mono õ di za, ꞌRe ihâimana uꞌâsi mono hã. Marĩ hã wa te ꞌre huri tõ mono da, wa te wasima ꞌre ipisutu zaꞌra mono zéb zarina, te te siwi ꞌre waꞌawẽꞌõ mono õ di za. Duré marĩ hã wa te ꞌre huri mono da, wa te wasima ꞌre ipisutu zaꞌra mono zéb zarina, te te ꞌre waꞌawẽsãmri mono õ di za.
9 Ãté te za tô asima ꞌre iwẽ zaꞌra waꞌaba mo, dasa hã romhâiba ꞌmanharĩ ma, da te ꞌre isõmri zaꞌra mono na dame ꞌre asaihuri aba mono da, ꞌRe ihâimana uꞌâsi mono hã za te te siwi ꞌre aiwẽꞌõ zaꞌra waꞌaba mono õ na dâꞌâsina. Tane nherẽ, te za ꞌre asiꞌmadâꞌâ uꞌâsi zaꞌra waꞌaba mo, ta hã dasa hã ꞌre huri aba mono wa, asiré isazeiꞌwa nherẽ, sibꞌuware na ꞌre inomro mono norĩ hã apâ tiwasété u ꞌre rereꞌe mono tõ da.
10 Ãté dasa hã romhâiba ꞌmanharĩ ma, da te tãma ꞌre isõmri zaꞌra mono na, te za ꞌre asaihuri aba mo dasiré, romhâiba ꞌmanharĩ ãma ꞌre idawata zaꞌra mono zéb ãma hã, ꞌri paramhã. Ãté ꞌRe ihâimana uꞌâsi mono hã te te siwi ꞌre aiwẽꞌõ zaꞌra waꞌaba mono õ na dâꞌâsina, te za tô asina ꞌre aihâtâꞌâ zaꞌra waꞌaba mono ãna, dasiré ãma ꞌre asaihuri aba mo. Tawamhã ãté asiré isazeiꞌwa nherẽ, sibꞌuware na ꞌre inomro mono norĩ hã te za te te ꞌre aiꞌmadâꞌâ zaꞌra waꞌwa, dame ãma ꞌre asaihuri aba mono ré hã. Tawamhã dasa hã romhâiba ꞌmanharĩ ma, da te tãma ꞌre isõmri zaꞌra mono hã te te ꞌre huri mono tõ da, te te aré siwi ꞌre wẽꞌõ zaꞌra mono nherẽ, e te za te te sima ꞌre wẽ zaꞌra, dame ãma ꞌre saihuri mono da, asine zaꞌra waꞌaba. Te za tô te te sima ꞌre wẽ zaꞌra. E marĩ wa. Dame ãma ꞌre asaihuri aba mono ré, te te ãma ꞌre aiꞌmadâꞌâ zaꞌra waꞌaba mono wa.
11 Tawamhã taha zarina, oto ãma ꞌre saihuri mono wamhã, te za ꞌrâwi ꞌre siwẽꞌõ zaꞌra, asiré isazeiꞌwa nherẽ, sibꞌuware na ꞌre inomro mono norĩ hã, te te aré siwi ꞌre wẽꞌõ zaꞌra mono nherẽ, te te oto dame ꞌre huri mono wa. Tahawa, te za Cristu te te ꞌre isaze zaꞌra mono zém na siꞌuihâ na ꞌre sisimini zaꞌra, ta hã sada dâꞌâ zaꞌra nherẽ.
12 Ãne hã ꞌre ꞌmanharĩ zaꞌra waꞌaba mono wamhã, asiré isazeiꞌwa norĩ wi, te za aiwasédé hã ꞌre iꞌmanharĩ zaꞌra waꞌaba mo. Taha zarina, ta norĩ hã marĩ hã te te aré siwi ꞌre wẽꞌõ zaꞌra mono nherẽ, te te oto ꞌre ꞌmanharĩ zaꞌra mono wa, te za ꞌre siwẽꞌõ pese zaꞌra. Ãne na aiwasédé hã tiwi ꞌre ꞌmanharĩ zaꞌra waꞌaba mono wamhã, ta norĩ hâiba siré te za Cristuhu wi zama aiwasédé hã ꞌre iꞌmanharĩ zaꞌra waꞌaba mo.
13 Ãté ĩsisãnawã norĩ hã te za te te sima ꞌre rosaꞌrata zaꞌra, dasa hã romhâiba ꞌmanharĩ ma, da te ꞌre isõmri zaꞌra mono na, dasiré ãma ꞌre saihuri mono wa, tiwasédé te te ꞌre iꞌmanharĩ zaꞌra mono na hã. Ãne wamhã, taha na wa hã dame ꞌre ĩsa zahu mono õ di za oto, ĩsisãnawã norĩ hã tiwasété u ꞌre sipizari zahu zaꞌra mono tõ da, apâ.
