1 Corĩtu 9:1-27
9 9:1-2 Niꞌwam norĩ hã ma tô te te ĩꞌãma ꞌre rosaꞌrata zaꞌra, Zezusihi zadawa wasuꞌuꞌwa, sena na dama ꞌre ĩhâimana mono õ na hã. Tane nherẽ, a norĩ waꞌwa hã ma tô ĩꞌãma iwaihuꞌu zaꞌra waꞌwa, sena na isadawa wasuꞌuꞌwa na ꞌre ĩhâimana mono zém na hã.
Wa hã danhimiroti zarina, ꞌre ĩhâimana mono õ di. ꞌRe ihâimana uꞌâsi mono si, ma tô ĩpisutu, Zezusihi zadawa wasuꞌuꞌwa na dama ꞌre ĩhâimana mono zéb da hã, isadawa para. Wanhibꞌapito Zezusi hã wa tô duré ꞌmadâ, ĩtõmo na. A norĩ waꞌwa hã bété. E ꞌwa simiroti zarina, ma tô ꞌre isaze zaꞌra waꞌaba mo. Wanhibꞌapito ma, te aiꞌãma ꞌre iromhuri zaꞌra waꞌaba mono zéb zarina, ma tô ꞌre isaze zaꞌra waꞌaba mo. Tawamhã e marĩ te wasuꞌu, ã hã, Zezusi hã te aima ꞌre iwasuꞌu zaꞌra waꞌaba mono zéb zarina, ꞌre isaze zaꞌra waꞌaba mono zé hã. ꞌRe ihâimana uꞌâsi mono nhimipisutuzéb zarina, wa hã tô sena dama Zezusihi zadawa wasuꞌuꞌwa, te aima ĩwasuꞌu zaꞌra waꞌwa.
2 ꞌMadâꞌâ 9:1
3 Niꞌwam norĩ hã, senai õ na te te dama ꞌre ĩwasuꞌu wasété zaꞌra mono wamhã, wa ãne ĩmreme na ꞌre ĩsimapa:
4 Wa norĩ hã Zezusihi zadawa wasuꞌuꞌwa norĩ hã, e wasai ãna, duré wa te ꞌre hâsi mono ãna, wa za bété wa te ꞌre romhuri. Tô iꞌuwaibaba, wa za waꞌâbâ ãna ãne hã wa te dawi ꞌre awaibu.
5 Zezusihi zadawa wasuꞌuꞌwa norĩ, wasiré norĩ hã Zezusi te te dama ꞌre sadawa wasuꞌu zaꞌra mono da, nimomo ꞌre nomro mono wamhã, timro hã te za siré te te ꞌre simro. Duré Wanhibꞌapito no norĩ zama, te za timro hã siré te te ꞌre simro. Pedruhu zama te za duré timro hã siré te te ꞌre saprõni. Wa hã bété. Ĩmro ré, ꞌre ĩhâimana mono ꞌwaꞌâhã, duré isazeiꞌwa siꞌuiwa ꞌre wahâimana mono wamhã, e iꞌuwaibaba ꞌre ĩhâimana mono õ di aré, dazaꞌrui mono bâ, ĩsiré te ꞌre saprõni mono wamhã. Duré wasazéb da, ĩmro ãma zama, ꞌre ana waꞌaba mono wamhã, e iꞌuwaibaba õ di bété aré. Iꞌuwaibaba tô aré, wahâimanazé hã.
6 Wa hã Paulu, duré ĩsiré romhuriꞌwa Barnabé, Zezusihi zadawa wasuꞌuꞌwa norĩ siré, ꞌre wahâimana mono nherẽ, e wa norĩ si, wa za wanhibꞌrata na wa te wasima ꞌre romhuri pese, wasazéb da hã, ãma ꞌre iwahâimana mono zéb da hã. E ãne hã iꞌuwaibaba bâ bété. Iꞌuwaibaba õ di.
7 Dasiꞌwapéi ꞌmanharĩꞌwa norĩ hã bété. E tinhibꞌapito ma, te te ꞌre romhuri zaꞌra mono ré, te za siꞌuihâ na ꞌre siwaꞌâbâ zaꞌra, tihâimanazéb da hã. Mare di. Siꞌuihâ na ꞌre siwaꞌâbâ zaꞌra mono õ di za. Duré uvaꞌru na romhuriꞌwa norĩ hã te te ꞌre ꞌre zaꞌra mono pari, uvaꞌru ꞌrã hã oto ꞌre ꞌrãi prédub zaꞌra mono wamhã, e misi si te te sima ꞌre suhâri zaꞌra mono õ di za bété, te te ꞌre huri mono da hã. Te za tô misi si te te sima ꞌre suhâri zaꞌra, romhuriꞌwa norĩ hã. Duré dama poneꞌẽrebâ ꞌmadâꞌâꞌwa norĩ hã, e aꞌubuni wi te te ꞌre ꞌmadâꞌâ zaꞌra mono ré, ihâiwaꞌu hã te te ꞌre âhuri mono õ di za bété. Te za tô te te sima ꞌre hâiwaꞌu zaꞌra, te te ꞌre âhuri mono da hã.
8 Ãne na danhimirosaꞌrata zarina, te ãma aima rowasuꞌu zaꞌra waꞌaba õ di. Duréihã ꞌRe ihâimana uꞌâsi mono nhimiroti na Mozési te te ãma irobꞌuiꞌérézéb zarina si, wa aima ãma rowasuꞌu zaꞌra waꞌwa. Ĩsiꞌuihâ na hã, mare di.
9 9:9-10 Ãne duréihã Mozési te te ãma irobꞌuiꞌérézé hã:
“Amnho trigu hã, powawẽ tipara na te te aima ꞌre sub zaꞌra waꞌaba mono ré, ꞌre wata wasisi zaꞌra waꞌaba mono õ di za, ꞌre saihuri tõ mono da.”
E tawamhã, powawẽ si te ꞌRe ihâimana uꞌâsi mono hã te te ꞌre azawi. Mare di. Taha zawi nhipai u, te duré wa norĩ hã te te ꞌre waꞌazawi pese. Tahawa, duréihã ãne na te te rowasuꞌu wamhã, taha wasuꞌu nhipai u, ma tô duré waꞌãma zama romnhimiréꞌé. Buru da, tiꞌa te te ꞌre ihâibâdâ zaꞌra mono norĩ hã duré oto ꞌre ꞌrãiꞌré zaꞌra mono wa, te te ꞌre iꞌrãihâri zaꞌra mono norĩ hã, e buru tedeꞌwa te te tãma ꞌre ipoꞌo zaꞌra mono zéb zô, ꞌre simnhasi zaꞌra mono õ di za bété. Te za tô sô ꞌre simnhasi zaꞌra. Ãne hã aiwa, te wasuꞌu.
10 ꞌMadâꞌâ 9:9
11 Tane duré, robzuriꞌwa norĩ hã ro ubuni ré te te ꞌre irobzuri zaꞌra mono ne, wa tô Cristuhu wasuꞌuwẽ na wa te ꞌre aipawaptom naꞌrata zaꞌra waꞌwa. E tawamhã ãne hã ibâi õ di, aima zaꞌra waꞌaba hã, wanhimipawaptobzé waꞌrãmi, marĩ zô aiwi ꞌre iwanhimnhasi zaꞌra waꞌaba mono hã, wasazéb zô, ãma ꞌre iwahâimana zaꞌra mono zéb da hã. Wa za tô ꞌre wanhimnhasi zaꞌra, iꞌuwaibaba wa.
12 Niꞌwam norĩ hã Cristuhu wasuꞌuwẽ na te te ꞌre idapawaptob zaꞌra mono norĩ hã, tô ibâre te marĩ na ꞌre ipawaptob uꞌâsi zaꞌra waꞌaba mo, ãma ꞌre ihâimana zaꞌra mono zéb da hã. Tawamhã wa norĩ hã Zezusi, wa te aima ꞌre wasuꞌu ꞌrata zaꞌra waꞌaba mono nherẽ, e ta norĩ nhipai u, marĩ zô aiwi ꞌre wanhimnhasi zaꞌra waꞌaba mono õ di za bété. E ãne hã isarinai õ di, aima zaꞌra waꞌaba hã. Tô ãne hã, isarina.
Iꞌuwaibaba nherẽ, niwamhã marĩ zô, aiwi ꞌre wanhimnhasi zaꞌra waꞌaba mono õ di. Mare di. Duré, wa te aiwi ꞌre rowaptẽrẽ zaꞌra waꞌaba mono ãna, wa tô wa te ꞌre robzépata zaꞌra, iwasuꞌuwẽ ré daro mono bâ, wa te ꞌre iropéi mono zé hã, wa te dawi ãma ꞌre ꞌwaꞌrutu tõ zaꞌra mono da.
13 ꞌRe ihâimana uꞌâsi mono nhorõwa ꞌre, ꞌri ꞌremhã sasedoti norĩ hã, ta norĩ hã ꞌRe ihâimana uꞌâsi mono ma, danhoprubzéb da, dasa hã da te tãma ꞌre isõmri zaꞌra mono hã, te za te te sima ꞌre poꞌo zaꞌra suru na, ãma ꞌre saihuri mono da. Danhimizama hã, ꞌRe ihâimana uꞌâsi mono ma, danhoprubzéb da, da te tãma ꞌre isõmri zaꞌra mono nhi zama, te za duré te te sima ꞌre poꞌo zaꞌra suru na, daꞌãma romhuriꞌwa norĩ hã, wedeza ne na ꞌRe ihâimana uꞌâsi mono ma, te te ꞌre izata zaꞌra mono hã. E ãne hã aima waihuꞌu zaꞌra waꞌaba õ di bété.
14 Tane duré, Wanhibꞌapito hã ma tô te te wama ꞌre pisutu zaꞌra, iwasuꞌuwẽ hã wa te dama ꞌre iwasuꞌu zaꞌra mono norĩ ma hã, danhibzari na da te ꞌre iwapawaptob zaꞌra mono na, ãma ꞌre iwahâimana zaꞌra mono zéb da hã, wanhimirowasuꞌu wẽ waꞌrãmimhã, dama.
15 Tane nherẽ, nimahã na hã marĩ zô aima ĩnhimnhasi zaꞌra waꞌaba õ di, asibzari na asiwi ꞌre ĩpawaptob zaꞌra waꞌaba mono da hã, Cristuhu wasuꞌuwẽ na te ꞌre aipawaptob zaꞌra waꞌaba mono waꞌrãmimhã. Mare di. Taha wasuꞌu na si, wa ãma ꞌre ĩtoi uptabi, ĩpẽꞌẽ ꞌremhã, ĩnhimiromhuri waꞌrãmi, marĩ zô aima ꞌre ĩnhimnhasi zaꞌra waꞌaba mono õ wa. Duré marĩ zô aima ĩnhimnhasi zaꞌra waꞌaba zém na, te sãnaꞌrata da, te ĩsina aima ãma robꞌuiꞌéré zaꞌra waꞌaba õ di, ãhã na hã. Ãne ꞌwaꞌâhã, aré ĩma ꞌre robzei mono õ di. Ĩdâꞌâ da si, aré ĩnhimirosaꞌrada hã.
16 ꞌRe ĩsiꞌmadâꞌâ zei waihuꞌu mono õ di, te dama ꞌre iwasuꞌu mono zém na iwasuꞌuwẽ hã. Tô ĩnhimiromhuri wa, wa te te dama ꞌre wasuꞌu, ꞌRe ihâimana uꞌâsi mono nhimipisutuzéb zarina. Iwasuꞌuwẽ hã te dama ꞌre wasuꞌu mono õ ꞌwaꞌâhã, aré ĩma ꞌre ropipa uptabi mono di.
17 Ãne na te tãma ꞌre iromhuri mono zéb da hã, wa hã ĩsiꞌuihâ na ĩsipisutu ꞌwaꞌâhã, aré ibâre ĩpawaꞌâbâ ré, iwasuꞌuwẽ na te tãma ꞌre iromhuri mono da hã. Tane nherẽ, ĩsiꞌuihâ na ĩsipisutu õ di. ꞌRe ihâimana uꞌâsi mono si, ma tô ĩpisutu, taha ma ĩꞌumnhasi zarina, te tãma ꞌre romhuri wẽ uꞌâsi mono da.
18 E marĩ na tawamhã, ĩpawaꞌâbâzé hã. ꞌRe ihâimana uꞌâsi mono zadawa ꞌmahârâꞌwa norĩ siré ꞌre ĩhâimana mono nherẽ, marĩ zô dama ꞌre ĩnhimnhasi mono õ zarina, da te ꞌre ĩpawaꞌâbâ mono ãna, wa iwasuꞌuwẽ si te dama ꞌre wasuꞌu. Taha na si, wa ꞌre ĩtoi uꞌâsi. Taha na si ĩpawaꞌâ hã, ãma ꞌre ĩtoi uꞌâsi mono zém na si.
19 Wa hã ĩpawaꞌâbâ ré, ꞌre ĩhâimana mono õ di. Tahawa, ĩwadaꞌuri zarina si, te ꞌre romhuri mono õ di. Tane nherẽ, wa tô ĩsima wẽ, dapawaꞌâbâ ãna dama romhuriꞌwa norĩ ne, te dama ꞌre romhuri uꞌâsi mono da, ĩnhimirowasuꞌu zarina, Cristu hã da te ꞌre isaze zaꞌra mono da si, daꞌahâ na.
20 Zudeu norĩ hã iwasuꞌuwẽ na te ꞌre pawaptob zaꞌra mono da, iꞌrata ꞌre ĩhâimana zaꞌra mono ré, Zudeu hâimanazéb zarina, wa tô ꞌre ĩhâimana, ĩnhimirowasuꞌu zarina, ta norĩ hã ahâ na te te ꞌre saze zaꞌra mono da, Cristu hã. Ta norĩ hã duréihã ꞌRe ihâimana uꞌâsi mono nhimiroti ꞌrata na Mozési te te ãma irobꞌuiꞌérézé hã te zahadu te te ꞌre ꞌmadâꞌâ pese zaꞌra, taha zarina, ꞌRe ihâimana uꞌâsi mono te te ꞌre iwẽsãmri zaꞌra mono da si. Tane hã, wa hã iꞌrata ꞌre ĩhâimana zaꞌra mono ré, ꞌRe ihâimana uꞌâsi mono nhimiroti ꞌrata zarina, wa tô ta norĩ hâimanazéb zarina si ꞌre ĩhâimana, ta hã te ꞌre iꞌmadâꞌâ pese mono zéb zarina, te te ꞌre ĩwẽsãmri mono da newa, isine zaꞌra, ãne na ĩsina ꞌre ĩnhimnhasi mono õ nherẽ. Sõꞌawi te tiwi wẽꞌõ zaꞌra õ di, Zudeu norĩ hâimanazé hã. Daꞌahâ na da te ꞌre saze zaꞌra mono da si, wa tô ãne na si te ꞌre rosaꞌrata.
21 Tane duré, zudeuꞌõ norĩ ꞌrata, ꞌre ĩhâimana mono ré, ta norĩ hâimanazéb zarina, wa tô duré ꞌre ĩhâimana. Zudeu norĩ nhimiroti hã te ꞌre ꞌmadâꞌâ pese mono õ di. E tawamhã ꞌRe ihâimana uꞌâsi mono nhimiroti hã te ꞌre ꞌmadâꞌâ mono õ di, zudeuꞌõ norĩ ꞌrata ꞌre ĩhâimana mono ré hã. Wa tô te ꞌre ꞌmadâꞌâ uꞌâsi tô. Cristuhu nhimiroti si, wa tô te ꞌre ꞌmadâꞌâ uꞌâsi. Ãne si, wa tô te ꞌre ꞌmanharĩ, ta norĩ zama ahâ na Wanhibꞌapito te te ꞌre saze zaꞌra mono da, zudeuꞌõ norĩ hã.
22 Duré niꞌwam norĩ hã wasiré Zezusihi zazeiꞌwa ꞌre hâimana zaꞌra mono nherẽ, sibꞌuware na ãma ꞌre ihâimana zaꞌra mono norĩ hã iwasuꞌuwẽ na te ꞌre apawapto mono wamhã, wa za ta norĩ hâimanazéb zarina si ꞌre ĩhâimana, ĩnhimipawaptobzéb zarina, te te ꞌre sazei pese zaꞌra mono da. Ãne hã dapoto mono bâ ꞌre idahâimana zaꞌra mono zép sidâpâsi, wa za dasine dama ꞌre ĩhâimana, daꞌahâ na Cristu hã da te ꞌre isaze zaꞌra mono zéb da si.
23 Cristuhu wasuꞌuwẽ hã daro mono bâ da te ꞌre iwaihuꞌu zaꞌra mono zéb da si, wa ãne dama ꞌre ĩhâimana. Duré iwasuꞌuwẽ zarina, ꞌRe ihâimana uꞌâsi mono, isazeiꞌwa norĩ ma, uburé marĩ iwẽ hã te te tãma ꞌre iꞌanhomri mono zém na, dame ꞌre ĩhâimana mono da, wa tô ãne dama ꞌre ĩhâimana.
24 Ãne, wa za oto aima ãma romnhimiréꞌé zaꞌra waꞌwa. Dawara na daꞌahâ na ꞌre dasipibu zaꞌra mono nherẽ, ãté misi te za niꞌwa hã dawi watobro. Tawamhã dawi iwatobro si, te za marĩ iwẽ hã dawi sima tiꞌâ. Ãne hã aima waihuꞌu pese zaꞌra waꞌaba di. Tane duré, a norĩ waꞌwa hã te za asiptete sina Cristuhu ãma si ꞌre anomro wẽ waꞌaba mo, marĩ iwẽ uptabi hã ꞌRe ihâimana uꞌâsi mono te te aima ꞌre ipisutu zaꞌra waꞌaba mono zép si, asina ꞌre uwaimrami zaꞌra waꞌaba mono da, niꞌwa hã dawara na wara tete wa, dawi watobro wẽ te, marĩ iwẽ hã te te sima iꞌâri ne.
25 Niꞌwa hã dawara na dame hâimana da, te te sima wẽ wamhã, te za nasi sihâiba wairo, dazada sihâiba wapu da. Tawamhã dawi watobro wamhã, ropsu ꞌmanharĩ na te za ãma sõpre ni, te te daꞌmairẽme wẽ te. Tane nherẽ, te za tiwi tiwasété suꞌu, ropsu ꞌmanharĩ hã. Tanei õ di, wa norĩ hã. Isiꞌutõrĩꞌõ zô si, wa za Cristuhu ãma si wasina ꞌre wanhiptete uꞌâsi zaꞌra, ꞌRe ihâimana uꞌâsi mono, marĩ iwẽ uptabi hã te te wama ꞌre iꞌapisutu mono zô si.
26 Dawara na ꞌre dasipibu zaꞌra mono wamhã, siwaꞌru dasiwi ꞌre dasisaꞌrei mono õ di. Awaꞌawi uꞌâsi te za ꞌre dasisaꞌre, ꞌre dasirẽme zaꞌra mono da. Tane duré, wa hã siwaꞌru ꞌre ĩhâimana mono õ di, Cristuhu ãma hã. Taha ãma si, wa za õhõ haré ꞌre ĩhâimana uꞌâsi, ꞌRe ihâimana uꞌâsi mono, iwẽ uptabi hã te te ĩma ipisutuzéb zô si, iꞌupana marĩ zô tiwi ꞌre ĩsipai mono ãna. Ãne duré, sibꞌrata ubu ré, dasiꞌwapéi ꞌmanharĩꞌwa norĩ hã daꞌubu wi simiꞌahâri waihuꞌu õ wamhã, taré te za nasi daꞌãma pahairĩ siwaꞌru, te te daꞌãma simirei ãna. Tanei õ di, wa hã. Siwaꞌru ꞌre ĩhâimana mono õ di. Cristuhu ãma ꞌre ĩhâimana wẽ mono zém na si, wa ĩsina te tãma ãma ꞌre uwaimrami uꞌâsi, Cristuhu ma hã.
27 Niꞌwa hã dame wara da, te te sima wẽ wamhã, te za ꞌre siwasutu uꞌâsi, dazada siptete da. Tane, wa duré wa hã ꞌrâwi ꞌre ĩsiꞌwapéi uꞌâsi, ĩwasété na ꞌre ĩhâimana ꞌrata mono zéb zarina, ꞌre ĩhâimana tõ mono da oto. Ĩpẽꞌẽ ꞌre, te ĩsima ꞌre irosaꞌrata wasété mono zé hã wa tô oto ꞌrâwi te ĩsima ꞌre aꞌuprosi. Tahawa, wa tô ãne si te ĩsima ꞌre abꞌmanharĩ, ĩnhimirowasuꞌu zarina, daꞌahâ na da te ꞌre saze zaꞌra mono nherẽ, ꞌRe ihâimana uꞌâsi mono, iwẽ uptabi hã te te ĩma pisutu nherẽ, ꞌrâwi te ĩsiwi simini tõ da.
