1 Timotiu 6:1-21
6 Dama romhuriꞌwa da, date hã dama ꞌre ihâimana zaꞌra mono norĩ ma hã, isibꞌihâꞌa norĩ wazép sina tô tãma ꞌre hâimana zaꞌra mono, niꞌwa hã ꞌRe ihâimana uꞌâsi mono nhisi na te te wasété tõ da, duré wanhimirowahutu zaꞌra na zama.
2 Duré dama romhuriꞌwa da, date hã dama ꞌre ihâimana zaꞌra mono isibꞌihâꞌa isazeiꞌwa tãma ꞌre ꞌmaihâimana mono wamhã, te te tô simini tõ, te te ꞌre iwazé mono zé hã, isisãnawãi wẽ te. Iwaꞌrãmi, te te tô tãma ꞌre romhuri pese mono. E marĩ wa. Isibꞌihâꞌa norĩ te te tãma ꞌre iromhuri zaꞌra mono hã, isazeiꞌwai wa duré isisãnawã tãma isawi wa.
à norĩ na ãma dama ꞌre rowahutu mono. Duré dama ꞌre aꞌrui mono, ãma ꞌre dahâimana zaꞌra mono da.
3 Niꞌwa hã, nimahã marĩ aimawi na te te ꞌre rowahutu mono wamhã, duré Wanhibꞌapito Zezu Cristuhu nhimiroti tô sena uptabi ꞌre ihâimana mono zarina, te te ꞌre irowahutu mono hã te te azâri õ wamhã, duré ꞌRe ihâimana uꞌâsi mono te te sima ꞌre iwẽ mono zéb zarina ꞌre dahâimana zaꞌra mono da, wa te ꞌre irowahutu zaꞌra mono zé hã te te azâri õ wamhã,
4 ta hã te ꞌrâwi ꞌre siꞌmadâꞌâ ze. Duré marĩ tãma waihuꞌu õ uptabi di. ꞌRe ihâimana uꞌâsi mono nhimiroti zahi na robꞌuiꞌéré uꞌâbâ dasiwasu hã duré damreme na dasiꞌahâri hã, ta hã aiwa dahâzé daꞌãma ꞌre ihâimana zaꞌra mono ne. Ta hawi te ꞌre wairébé, marĩ na danhoꞌru hã duré dasiꞌahâri hã duré daꞌãma iwasédé hã duré dasiꞌumnhasi õ iwasété uptabi hã
5 duré dasiwasu iꞌrãsutu waihuꞌu õ zama, niꞌwam norĩ hã simirosaꞌrata siwamnarĩ na oto ꞌre ihâimana zaꞌra mono, te te ꞌre iꞌmanharĩ zaꞌra mono norĩ ne, duré ta norĩ ãma tô sena ꞌRe ihâimana uꞌâsi mono nhimiroti oto ãma ꞌre ihâimana zaꞌra mono õ norĩ ne. Ta norĩ hã te te ꞌre rosaꞌrata zaꞌra, ꞌRe ihâimana uꞌâsi mono ma romhuri hã ꞌre isisibro pese zaꞌra mono zéb da si ꞌre hâimana mono newa.
6 Tô sena tô, niꞌwa hã ꞌRe ihâimana uꞌâsi mono ma, te te ꞌre romhuri mono wamhã, ta hã te za tô tipẽꞌẽ na tinhibro pese, toi uptabi na ꞌre hâimana mono wamhã, marĩ tãma ꞌre ihâimana zaꞌra mono na, taha nhipai u marĩ zô te te sima ꞌre robꞌruiwapari mono õ wamhã.
7 E marĩ wa. ꞌRe wapoto zaꞌra mono wamhã, marĩ, wa te wasiré ꞌre ãwisi zaꞌra mono õ di, ãwa tiꞌai u hã. Tane duré tiꞌai hawimhã, marĩ, wa te wasiré ꞌwasari waihuꞌu õ di za.
8 Tahawa, wasa duré waꞌuza wama ꞌre hâimana zaꞌra mono wamhã, taha na wa te wasima ꞌre rowẽ zaꞌra mono.
9 Tanei õ di, sibro pese da, te te sima ꞌre iwẽ zaꞌra mono norĩ hã. Ta norĩ hã ipibuzé tãma ꞌre hâimana zaꞌra mono wamhã, te tiwasété u ꞌre rereꞌe. Te duré ꞌre hâimana zaꞌra, ꞌrã nhimizaꞌrese ãna duré simimnhasi na marĩ, ꞌrâwi te te sima ꞌre iwẽ zaꞌra mono zé nhimimramizéb ꞌre, ta hã iwasété u te te ꞌre iꞌaꞌãwisi mono, duré ꞌrâwi dahâimanazé, da te dasiwi ꞌre iꞌuprosi zaꞌra mono zéb u zama.
10 E marĩ wa. Robꞌuiprazéb zawi hã, marĩ iwasédé sipuꞌu pese na ꞌre ihâimana zaꞌra mono nhanaꞌrada, te ꞌre hâimana. Niꞌwam norĩ hã, robꞌuiprazé saꞌẽtẽ na tãma ꞌre hâimana zaꞌra mono da, te te sima ꞌre wẽ zaꞌra mono wa, ma tô apa zaꞌra, Wanhibꞌapito te te sina ꞌre iꞌumnhasi zaꞌra mono zém nhiti. Ma tô duré sima poto zaꞌra, ihâimanazéb ꞌre robzépata si oto tãma ꞌre hâimana zaꞌra mono da.
ꞌRe ihâimana uꞌâsi mono ma si ꞌre idahâimana zaꞌra mono zé
11 Tazahã, a hã ꞌRe ihâimana uꞌâsi mono nhibꞌaꞌuwẽ, uburé ã norĩ nhiti ꞌre aiꞌréi mono. Dahâimanazé iꞌuwaibaba na si ꞌre aihâimana mono, ꞌRe ihâimana uꞌâsi mono ma si duré asina ꞌre iꞌumnhasi mono na si duré asimizawi na si duré ꞌRe ihâimana uꞌâsi mono asina ꞌre iꞌumnhasi mono zém na ãma ꞌre iꞌuzusi uꞌâsi mono na si duré ꞌre idaꞌawazé pese mono na si.
12 Danhibꞌrata na dasiꞌwapé ne, dasiꞌwapé iwẽ na ãma ꞌre aiꞌwapéi mono, ꞌRe ihâimana uꞌâsi mono asina ꞌre iꞌumnhasi mono zém na hã. Duré dahâimanazé isiꞌutõrĩꞌõ hã asima tété tete. E marĩ wa. Ã hã dahâimanazém na ꞌre aihâimana mono da, ma tô ꞌRe ihâimana uꞌâsi mono hã aipisutu, Cristu isazezém na asiwasuꞌu iwẽ uptabi hã ꞌmanharĩ wamhã, daꞌahâ na da te dasiwi iꞌaiꞌmadâꞌâ norĩ nhoꞌa.
13 Ãhã na hã ꞌRe ihâimana uꞌâsi mono, uburé marĩ ꞌre ihâimana zaꞌra mono ma, ipẽꞌẽzani te te tãma ꞌre iꞌanhomri mono nhoꞌa, duré Cristu Zezusi, Põsiu Pilatuhu nhoꞌre isiwasuꞌu wẽ uptabi nhoꞌa, wa za aima tiꞌru, ãne:
14 Maꞌãpé ate romhuri ꞌRe ihâimana uꞌâsi mono te te aima ipisutu na ãma ꞌre uwaimrami uꞌâsi mono sena na, niꞌwa hã aiwasédé te te aiꞌãma hiri tõ da. Maꞌãpé ãne na ãma ꞌre uzusi uꞌâsi mono bâdâ iwisizéb u, Wanhibꞌapito Zezu Cristu we isihâiꞌrézéb da hã.
15 Taha da, ꞌRe ihâimana uꞌâsi mono te te sima ipisutuzéb zarina, bâdâ iwa waptãꞌã wamhã, te za tô dama hâiꞌré. Ta hã wẽ uptabi di. Duré Õhõ si misire Apito hã, tiꞌai ãma uburé apito norĩ nhipai u. Duré Uburé Danhibꞌapito, tiꞌai ãma danhibꞌapito norĩ nhipai u.
16 Õhõ si misire Idâꞌâ õ hã. Õ hã te rowaꞌa uꞌâsi ãma ꞌre sãmra, rowaꞌa niꞌwa ꞌrâwi itẽme iwisi waihuꞌu õ ãma. Ta hã niwa niꞌwa hã te te ꞌmadâꞌâ õ di. Duré da te tô ꞌmadâꞌâ waihuꞌu õ di. Õhõ ãma si wa za ãma ꞌre wawata uꞌâsi zaꞌra, wazé pese wa, duré waihuꞌu pese uptabi na ꞌre hâimana mono wa. Tane tô.
17 Tiꞌai ãma sibrob ahâ na ꞌre ihâimana zaꞌra mono norĩ ma, roti zahi zaꞌra na, ꞌre siꞌmadâꞌâ ze zaꞌra mono tõ da, duré tinhimarĩ hã te te ꞌre umnhasi zaꞌra mono tõ da, ta hã dama ꞌre hâimana uꞌâsi zaꞌra mono õ wa. Iwẽ hã, ꞌRe ihâimana uꞌâsi mono si te te ꞌre iꞌumnhasi zaꞌra mono da hã, uburé marĩ saꞌẽtẽ na te te wama ꞌre anhomri mono wa, wa te ãma wasima ꞌre irowẽ zaꞌra mono zéb da hã.
18 Duré tãma ꞌru zahi zaꞌra na, iwẽ si te te ꞌre ꞌmanharĩ uꞌâsi zaꞌra mono da, duré marĩ iwẽ te te ꞌre iꞌmanharĩ zaꞌra mono na si ꞌre sisibrob pese zaꞌra mono da, duré sõprum na dama ꞌre hâimana zaꞌra mono da, duré simizaꞌrese sina ꞌre hâimana uꞌâsi zaꞌra mono da, tinhibro te te dama ꞌre ipoꞌo zaꞌra mono da hã.
19 Ãne wamhã, marĩ iwaꞌâbâ zaꞌẽtẽ uptabi hã te za te te sima ꞌre ubumro zaꞌra, romhutuꞌõ ꞌri naꞌrata nhanaꞌrata ne tãma ꞌre ihâimana zaꞌra mono zéb da hã. Ãne wapsi, te za te te ꞌre waibu, dahâimanazé tô sena hã.
20 Timotiu, maꞌãpé ꞌre ꞌmadâꞌâ pese mono, ꞌRe ihâimana uꞌâsi mono te te aima ipisudu hã. Robzanhamri iwasété wi ꞌre asiꞌmadâꞌâ pese mono duré damreme iwasété wi duré rosaꞌrada iꞌuptabiꞌõ upa nherẽ, rowaihu iwẽ na da te ꞌre isisi zaꞌra mono wi.
21 Niꞌwam norĩ ma, te ã hã rowaihu iwẽ newa tãma ꞌre hâimana zaꞌra. Tahawa te ꞌre sipa zaꞌra, Cristu te te sina ꞌre iꞌumnhasi zaꞌra mono zém nhiti.
ꞌRe ihâimana uꞌâsi mono nhimizawizé, aiꞌãma ꞌre ihâimana uꞌâsi zaꞌra waꞌaba mono da si, iwẽ hã!
