1 Pedru 1:1-25
1 Wa hã Pedru, Zezu Cristuhu zadawa wasuꞌuꞌwa, ã hã, wa robꞌuiꞌéré ꞌRe ihâimana uꞌâsi mono nhibꞌaꞌuwẽ, ropâ ꞌre isiꞌubumroi mono norĩ ma, danhiptiꞌai waꞌõtõ nhoꞌõmo mono bâ, Põtu ãma hã duré Galasia ãma duré Capadosia ãma duré Azia ãma duré Bitinia ãmab zama.
2 ꞌRe ihâimana uꞌâsi mono Wamama hã ma tô sima aipisutu zaꞌra waꞌwa, aimawi tãma ꞌre aihâimana zaꞌra waꞌaba mono da, Ipẽꞌẽzani nhimipawaptobzém na. Ã hã ite rowaꞌõno isiꞌutõrĩ õ. Ma tô sima aipisutu zaꞌra waꞌwa, ꞌre wapari pese zaꞌra waꞌaba mono da, duré Zezu Cristu hã tiwapru na te te aiꞌupsõ zaꞌra waꞌaba da.
ꞌRe ihâimana uꞌâsi mono nhimipawaptobzé waꞌâbâ ãna duré ite rowẽ hã, isaꞌẽtẽ uꞌâsi mono da si iwẽ hã, aima zaꞌra waꞌaba.
Robꞌumnhasi sina ꞌre iwahâimana zaꞌra mono zé, rowẽ u za wasihutu wa
3 ꞌRe ihâimana uꞌâsi mono ãma si wa za wawata zaꞌra ni, Wanhibꞌapito Zezu Cristuhu mama ãma! Daꞌãma ꞌre isiba mono zé hã saꞌẽtẽ uptabi wa, ma tô wahâimanazé ité hã wama sõmri zaꞌra, Zezu Cristu ihâiwaꞌutuzém na. Tahawa, wapẽꞌẽ ꞌremhã, rowẽ hã ꞌmasisi uptabi zaꞌra di, robꞌumnhasi na ꞌre wahâimana zaꞌra mono wa, niwa rowẽ u za wasihutu wa.
4 Ãne wamhã, iwẽ uptabi te te wazô ipisutu zaꞌra hã, wa za waibu ni, isiꞌutõrĩ waihuꞌu õ hã, marĩ aimawi na iwazari õ, duré pire na ꞌre ihâimana mono zé te te isimini waihuꞌu õ hã. Ã hã iwaibui waꞌaba da hã ꞌRe ihâimana uꞌâsi mono ma tô asô saꞌra siromo zaꞌra waꞌwa, hâiwa ãma.
5 Ta hã ate zaꞌra waꞌwa, iꞌumnhasi zaꞌra waꞌaba zarina, ꞌRe ihâimana uꞌâsi mono hã tiwaihuꞌu pese uptabi na te te ꞌre iꞌabꞌmadâꞌâ pese mono hã. Ãne wa, te za danhoꞌreptuzé hã asima iwaibui waꞌwa, za te te ihâiꞌré robꞌrãsutu ãma hã.
6 Tahawa, maꞌãpé asima ãma rowẽ zaꞌra waꞌaba, aꞌâ aiwi robzei õ zaꞌra waꞌaba da nherẽ, aipibuzé hã ahâ na asada ꞌre hâimana zaꞌra waꞌaba mono wa.
7 Aipibuzé hã asada ꞌre ihâimana zaꞌra waꞌaba mono hã, ꞌRe ihâimana uꞌâsi mono ꞌre iꞌumnhasi zaꞌra waꞌaba mono zé hã, tô sena zô. E marĩ wa. Ẽtẽ waipo pré oru zama, siꞌutõrĩ ãna ꞌre ihâimana uꞌâsi waihuꞌu zaꞌra mono õ hã, te unhama na da te ꞌre pibu zaꞌra. Tane duré ꞌRe ihâimana uꞌâsi mono ꞌre iꞌumnhasi zaꞌra waꞌaba mono zé, oru nhipai u iwẽ uptabi hã, iwẽ hã ipibuzé tãma ꞌre ihâimana zaꞌra mono da si, siptete sina aima ꞌre ihâimana uꞌâsi zaꞌra waꞌaba mono da hã. Ãne wapsi te za aipibuzém na ꞌre isaprĩ wẽ zaꞌra waꞌaba mo, asiptete na duré aiwazé pese na, niwa Zezu Cristu apâ we imorĩzéb ãma hã.
8 Ta hã aima sawi zaꞌra waꞌaba di, niwa ꞌmadâꞌâ zaꞌra waꞌaba õ nherẽ. Ma duré isaze zaꞌra waꞌwa, ãhã na hã ꞌmadâꞌâ zaꞌra waꞌaba õ nherẽ, atõmo na. Ãne wa, te rowẽ hã saꞌẽtẽ uptabi na aima tihâimana zaꞌra waꞌwa. Damreme hã sada ꞌmaihâimana õ di, ãma irobꞌuiꞌérézéb da hã.
9 Ã hã rowẽ hã te aima tihâimana zaꞌra waꞌwa, asõꞌreptuzé hã asina uwaimrami zaꞌra waꞌaba wa, ta hã Wanhibꞌapito asina ꞌre iꞌumnhasi zaꞌra waꞌaba mono zéb zarina.
10 ꞌRe ihâimana uꞌâsi mono zadawa ꞌmahârâꞌwa norĩ hã, ꞌRe ihâimana uꞌâsi mono nhimipawaptobzé iwaꞌâbâ õ na ma tô ãma rowasuꞌu zaꞌra, za te te aima ihâiꞌré zaꞌra waꞌaba na hã. Ta norĩ hã ma tô we sarẽi wẽ zaꞌra, te te ãma pibui pese zaꞌra sina, danhoꞌreptuzém na rowasuꞌu hã.
11 Wanhibꞌapito Cristuhu Pẽꞌẽzani hã ma tô iwa tihâimana zaꞌra, ã norĩ ꞌRe ihâimana uꞌâsi mono zadawa ꞌmahârâꞌwa norĩ wamhã. Ã hã Ipẽꞌẽzani ma tô tãma waihuꞌu siromo zaꞌra, Cristu za te te irobzépata na hã duré te te robzépata pari, waihuꞌu pese uptabi na za ꞌre ihâimana mono zém na hã. Tawamhã ꞌRe ihâimana uꞌâsi mono zadawa ꞌmahârâꞌwa norĩ hã ma tô sima wẽ zaꞌra, te te sadaihuꞌu wẽ zaꞌra da, Ipẽꞌẽzani hã marĩ te te tãma iwaihuꞌu zaꞌra zé hã. Ipẽꞌẽzani ma tô tãma hâiꞌré siromo zaꞌra, za te te irobzépatazé bâdâ hã, duré taha pari, waihuꞌu pese uptabi na za ꞌre ihâimana mono zém na, taha bâtâ mono ꞌremhã.
12 ꞌRe ihâimana uꞌâsi mono zadawa ꞌmahârâꞌwa norĩ hã, tô sena ꞌRe ihâimana uꞌâsi mono nhimiroti na ãhã na iwapari zaꞌra waꞌwa hã te te rowasuꞌu zaꞌra wamhã, ꞌRe ihâimana uꞌâsi mono hã ma tô tãma hâiꞌré zaꞌra, ꞌrâwi te te sima iromhuri zaꞌra õ na hã, aima zaꞌra waꞌaba si te te iromhuri zaꞌra na hã. Rowasuꞌu Itém na rowasuꞌuꞌwa norĩ hã, ꞌRe ihâimana uꞌâsi mono Pẽꞌẽzani zadawa para te te irowasuꞌu zaꞌra norĩ hã, hâiwa hawi ꞌRe ihâimana uꞌâsi mono te te we isatõrĩ zadawa para, ma tô aima ꞌmahârâ zaꞌra waꞌwa, tô sena ꞌRe ihâimana uꞌâsi mono nhimiroti hã. Ã hã rowasuꞌu hã te hâiwa hawi romhuriꞌwa norĩ zama te te sima ꞌre wẽ zaꞌra, te te sadaihuꞌu zaꞌra da hã.
ꞌRe ihâimana uꞌâsi mono hã ma tô te te ꞌre waꞌapisutu, wahâimana wẽ na ꞌre wanomro mono da
13 Tahawa, rosaꞌrata na asimire sina ꞌre aihâimana uꞌâsi zaꞌra waꞌaba mono, marĩ hã za ꞌre iꞌmanharĩ zaꞌra waꞌaba mono zô. Asimizaꞌrese ꞌre anomro aba mono. Duré robꞌumnhasi sina waꞌâbâ ãna ꞌRe ihâimana uꞌâsi mono nhimipawaptobzéb zô, te za ꞌre asimipari zaꞌra waꞌaba mo, za te te aima isõmri zaꞌra waꞌaba zô, Zezu Cristu hã niwa te te aima hâiꞌré zaꞌra waꞌaba wamhã.
14 Ãhã na hã ꞌRe ihâimana uꞌâsi mono nhimiroti ꞌmadâꞌâ peseꞌwa na oto ꞌre anomro aba mono wa, asima iwẽzéb zarina ꞌre aihâimana zaꞌra waꞌaba mono tõ oto, isimiroti aima waihuꞌu zaꞌra waꞌaba õ ré, aré ꞌre iꞌaihâimana zaꞌra waꞌaba mono ne.
15 ꞌRe ihâimana uꞌâsi mono te te sima iꞌaipisutu zaꞌra waꞌwa hã wẽ uptabi na ꞌre ihâimana mono ne, te za aiwẽ uptabi na si tãma ꞌre aihâimana zaꞌra waꞌaba mo, uburé marĩ ꞌre iꞌmanharĩ zaꞌra waꞌaba mono zém na hã.
16 E marĩ wa. Ãne, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã nomro wa: “Aiwẽ na ꞌre anomro aba mono, Wa hã ĩwẽ uptabi na ꞌre ĩhâimana mono wa.”
17 ꞌRe ihâimana uꞌâsi mono hã te ꞌre isisi zaꞌra waꞌaba mo, Aimama na, simibaꞌa ãna aiwapsi te te daꞌãma ꞌre iꞌarowairébé mono hã danhimiromhuri zarina. Tahawa, maꞌãpé ꞌre wazé pese zaꞌra waꞌaba mono, tiꞌai baba ꞌre anomro aba mono ré.
18 Aima waihuꞌu pese zaꞌra waꞌaba di, te te iꞌaiwaꞌâbâ zaꞌra waꞌaba zé hã, aihâimanazé marĩ dai õ na ꞌre iꞌaihâimana zaꞌra waꞌaba mono zém hawi te te asani zaꞌra waꞌaba da hã, aihiꞌrata hawi ꞌre iꞌaihâimana zaꞌra waꞌaba mono zém hawimhã. Aiwaꞌâbâ zaꞌra waꞌaba zé hã marĩ ꞌre isiꞌutõrĩ pese mono nei õ di. Ẽtẽ waipo pré oru nei õ di. Duré ẽtẽ waipo prã prata nei õ di.
19 Cristuhu wapru iwaꞌâbâ zaꞌẽtẽ na ma tô asani zaꞌra waꞌwa. Ta hã poneꞌẽrebâ iꞌrare iwẽ uptabi ne, duré marĩ iwasédé ãma ihâimana õ ne.
20 Ta hã ma tô ꞌRe ihâimana uꞌâsi mono pisutu, te te aropoto mono wana ré. Tane nherẽ, ã bâtâ mono na ma tô hâiꞌré, aiꞌudâna zaꞌra waꞌaba.
21 Taha uꞌâbâ ma tô ꞌRe ihâimana uꞌâsi mono hã isaze zaꞌra waꞌwa, apâ te te ihâiwaꞌudu hã duré waihuꞌu pese uptabi na ꞌre ihâimana mono zé te te tãma ipisudu hã. Ãne wa, ꞌre iꞌumnhasi zaꞌra waꞌaba mono zé hã duré robꞌumnhasi sina ꞌre iꞌaihâimana zaꞌra waꞌaba mono zé hã, te ꞌRe ihâimana uꞌâsi mono ãma siptete sina aima ꞌre hâimana zaꞌra waꞌwa.
22 Ãhã na, tô sena ꞌRe ihâimana uꞌâsi mono nhimiroti, ꞌre iꞌmadâꞌâ pese zaꞌra waꞌaba mono zém na, ma tô aiwasété wi asiꞌupsõi pese zaꞌra waꞌwa. Taha zarina te oto asiré isazeiꞌwa norĩ hã tô sena ꞌre isawi zaꞌra waꞌaba mono zé hã aima ꞌre hâimana zaꞌra waꞌwa. Tahawa, maꞌãpé tô sena na, aipẽꞌẽ na ꞌre asisawi pese zaꞌra waꞌaba mono.
23 E marĩ wa. Ma tô aipoto téb zaꞌra waꞌwa, romnhamare idâꞌâ pese nei õ di. Tazahã romnhamare idâꞌâ waihuꞌu õ ne. ꞌRe ihâimana uꞌâsi mono nhimiroti, ꞌre ihâimana mono na ma aipoto téb zaꞌra waꞌwa, siꞌutõrĩ waihuꞌu ãna ꞌre ihâimana uꞌâsi mono na.
24 Ãne, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré, te nomro:“Uburé tiꞌai ãma aꞌuwẽ ꞌre ihâimana zaꞌra mono hã, aiwa, du rom na ꞌre ihâimana zaꞌra mono ne. Duré marĩ iwẽ na tãma ꞌre ihâimana zaꞌra mono zé hã, aiwa romnhirãrã ne. Du hã te za timre. Isirãrã zama te za duré rere.
25 Tanei õ di, Uburé Danhibꞌapito nhimiroti hã. Õne uꞌâ te za ꞌre hâimana.”
à hã Rowasuꞌuwẽ na da te aima ãma ꞌre irowahutu zaꞌra waꞌaba mono.
