1 Samuéu 1:1-28
1 Tawamhã aibâ te ꞌre ꞌmaihâimana, Efraĩhĩ nhihudu, Eucana na isisi ꞌri nhoꞌu Rama na isisi ãma ꞌre ihâimana mono, Efraĩhĩ nhihudu norĩ nhiptiꞌai ꞌrã nhoꞌõmo ãma hã, ẽtẽ ꞌrãihâ si ꞌre iromhâimana mono ãma. Ta hã Zeroꞌãhã ꞌra, Eriꞌuhu nhihudu, Toꞌuhu ꞌra nhihudu, duré Zupihi ꞌra nhihudu ꞌra.
2 Tawamhã Eucanahã mro maparane. Isisi zahuré hã ãne: Ãna, duré Penina. Tawamhã Penina ma tô aiwabzu. Ãnahã si siwabzuri õ di.
3 Wahup sidâpâsi te Eucana tite ꞌri nhoꞌõmo hawimhã ꞌre ne, Silo na ꞌri nhoꞌõmo nhisi u hã, Uburé Danhibꞌapito iwaihuꞌu pese ãma ꞌre wata mono da, duré danhimizama zata na tãma ꞌre sõpru mono da. Duré tamemhã ma tô ꞌre hâimana zahuré, Erihi ꞌra norĩ hã, Uburé Danhibꞌapito ma, daꞌãma romhuriꞌwa norĩ hã. Isisi zahuré hã: Hopini na, duré Finéa na.
4 Tawamhã Eucana ꞌRe ihâimana uꞌâsi mono ma, danhimizama zata na tãma ꞌre sõpru mono sidâpâsi ma tô timro ma te te ꞌre poꞌo, Peninahã ma. Duré uburé tiꞌra norĩ ma zama ma tô te te ꞌre poꞌo.
5 Tane nherẽ, Ãnahã ma si, maparane inhi waꞌõno hã ma tô te te tãma ꞌre sõmri. E marĩ wa. Tãma sawi uptabi wa, Eucanahã ma hã, zahadu Uburé Danhibꞌapito te te tãma pisutu õ nherẽ, ꞌra da hã.
6 Tawamhã Penina ma tô nasi ãma tinhitobꞌru. Duré ma tô nasi ãma tito, Ãnahã ãma. Tahawa, ma tô nasi ãma sisém no, nasi ãma itozém na hã. E marĩ wa. Zahadu Uburé Danhibꞌapito hã te te tãma pisutu õ wa, iꞌra da hã. Tane nherẽ te nasi tô ãma tito.
7 Ãne ma tô nasi tãma robꞌmanha Penina hã, wahup sidâpâsi. Uburé Danhibꞌapito nhorõwa u, ꞌre nomro mono sidâpâsi te Penina hã wi te te ꞌre roꞌwaꞌré, Ãna hã. Tane nherẽ, te te ãma tãma ꞌre waꞌrãmi mono õ di, Ãna hã. Tiwawa si te te ꞌre ꞌmanharĩ. Tahawa duré, ꞌre sai mono õ di, mram na hã.
8 Tawamhã nimahã bâtâ na te Eucana imro hã sadanha, ãne:
— Ãna. E marĩ wa, te aiwawa. E marĩ wa, asai õ di. E marĩ wa, te duré õne uꞌâ robzei ãna aihâimana mo. E niha. E 10 na aiꞌra aima ipoto zaꞌra nhipai u hã, wa hã bété aima hã ĩwẽ õ di.
Ãna tiꞌra te te iwaptẽrẽzé wasuꞌu, ꞌRe ihâimana uꞌâsi mono wi
9 Tawamhã nimahã bâtâ na saihuri pari, te Silo ãma asimro. Tawamhã Eri sasedoti ꞌRe ihâimana uꞌâsi mono ma daꞌãma romhuriꞌwa hã te romhâ ꞌmanharĩ na ꞌri iwazéb zahi, ꞌridawa ãma ꞌre idanhisisi mono zéb ãma nhamra, romhâ ꞌmanharĩ na ꞌri iwazéb zahi ꞌridawa ãma, tisimasisizém na.
10 Tawamhã Ãna hã tãma robzeiꞌõ pese na ma tô wahudu hâiwi, duré wawa sina. Tawamhã ma tô mre, Uburé Danhibꞌapito ma hã.
11 Tawamhã te ropisudu sena na tãma ꞌmanha ãne:
— Wanhibꞌapito ꞌRe ihâimana uꞌâsi mono Iꞌaiwaihuꞌupe, maꞌãpé asibꞌaꞌuwẽ hã, ĩꞌmadâꞌâ! Duré saꞌẽtẽ na, robzeiꞌõ te te ĩꞌazârizé hã ꞌmadâꞌâ! Tahawa, asibꞌaꞌuwẽ ãma, ĩꞌãma aipoꞌre siꞌâri õ di za! Duré a hã ĩꞌra ĩma sõmri wamhã, wa za aima ropisutu, apâ te aima sõmri da za. Duré niwamhã ta hã tizéré hã te te sihâri õ di za*.
12 Tawamhã Ãna, ꞌRe ihâimana uꞌâsi mono ma, mreme ré ma tô ãma ronomro pe. Tawamhã Eri hã te ꞌmadâꞌâ pese isaihâ popo u.
13 Ãna mreme wamhã, imreme hã watobro õ di. Ariꞌiwi ma tô taré saihâ popo, mreme na hã. Tahawa, ma tô Eri hã ãma rosaꞌrata upa, ꞌrã siwamnarĩ newa.
14 Tahawa, te ãne tãma tinha:
— E momo te za asiꞌrãiwamnarĩzé hã tiꞌrãsutu. Tahawa, maꞌãpé sazâri, uwa ꞌrãi waꞌu isé hâsi hã!
15 Tawamhã ma te ãma tãma waꞌrã ãne:
— Ma. Ĩsiꞌrãiwamnarĩ õ di, ĩnhibꞌapito. Duré te hâꞌrẽne õ di, uwa ꞌrãi waꞌu isé hã, duré âzaipro hã. Wa hã wa tô tãma mre, Uburé Danhibꞌapito nhoꞌremhã, ĩma robzei õ uptabi wa. Duré wa tô tãma wasuꞌu, te irobzépatazé hã.
16 Tahawa, ĩꞌãma rosaꞌrata tõ, wa hã piꞌõ siwaꞌru ꞌre ĩhâimana mono na hã. Wa hã wa tô mre, Wanhibꞌapito ma. E tihai wa. Ĩma robzei mono õ wa, duré te robzépata mono wab zama.
17 Tawamhã Eri te tãma tinha ãne:
— Rowẽ na si aimorĩ. Wa aima wẽ tô, Izaraéu nhihudu norĩ te, ꞌRe ihâimana uꞌâsi mono si marĩ tiwi iwaptẽrẽzé hã te te aima sõmri da.
18 Tawamhã te asa tãma tinha ãne, Erihi ma:
— Ĩnhibꞌapito, ĩꞌãma ꞌre rosaꞌrata wẽ uꞌâsi mono da hã ĩma wẽ di. — Ãne te te tãma nharĩ pari, ma te oto watobro. Tawamhã te oto tisa. Duré tawamhã tiwi robzeiꞌõ õ di oto.
Samuéu ipotozé wasuꞌu
19 Tawamhã awẽ bâtâ na ma tô Eucana norĩ hã tiꞌutu zaꞌra awẽ wi, duré ãma wata zaꞌra da, Uburé Danhibꞌapito ãma hã. Tawamhã ma tô apâ aihutu tinhorõwa Rama u hã. Eucana tame timro Ãnahã ãma ma tô oto ãma hâimana. Tahawa, Uburé Danhibꞌapito hã ma tô oto wapa, te te tiwi irowaptẽrẽzém na hã.
20 Tahawa, ma tô oto tiwasã Ãna hã. Duré za tãma ipotozé bâtâ uwaibaba ma te tãma podo. Tawamhã ma tô sisi ina hã, Samuéu* na. Tahawa, te ãne ãma rowasuꞌu:
— Wa hã ã hã ĩꞌra, te tiwi iwaptẽrẽ, Uburé Danhibꞌapito wi.
21 Tahawa, Eucana norĩ hã ma tô aiꞌabaꞌré, timro tiꞌra norĩ me hã Silo u, wahup sidâpâsi tinhimizama zata na Uburé Danhibꞌapito ma ꞌre isõpru mono zé hã te te tãma ꞌmanharĩ da, te te tãma iropisutuzéb zarina.
22 Tane nherẽ, Ãna hã ime morĩ zaꞌra õ di. Tahawa, te ãne tãma tinha, timro Eucanahã ma:
— Ĩhâ te te rẽme wapsi, wa za subza, Uburé Danhibꞌapito nhorõwa u hã, õmem haré oto ꞌre hâimana uꞌâsi mono da.
23 Tawamhã Eucana ma ãma sadaꞌâ, ãne:
— Maꞌãpé ꞌmanharĩ tô, asima iwẽzéb zarina. Tahawa, ꞌri ꞌre aꞌâ tô iré aihâimana, aihâ te te irẽmezéb u. Duré ĩma wẽ di, Uburé Danhibꞌapito hã te te aipawaptob da hã, tãma ãma uwaimrami da, asimiropisudu iꞌmanharĩzé hã.
Tahawa, ma tô Ãna hã ꞌri ꞌrep si iré hâimana, iꞌra ihâ te te irẽmezéb u.
24 Tawamhã tina hâ te te rẽme parip si, te oto Ãna hã subza tiꞌra hã, Silo u hã. Duré powawẽ ibaꞌõmo zapu siꞌubdatõ na ãma iwahub zama ma tô siré saprõ. Duré trigu zubꞌa ré zama ma tô siré tiꞌâ, 10 na ipire pibuzém na. Tawamhã ubꞌrẽ romhâ ꞌmanharĩ na uwa ꞌrãi waꞌu isé ré iꞌmasi hã ma tô duré siré tiꞌâ. Tawamhã Samuéu ina te te saprõni wamhã, Uburé Danhibꞌapito nhorõwa u hã zahadu re di.
25 Tawamhã Samuéu mama norĩ ma tô ãma tinhoprub zahuré, powawẽ ibaꞌõmore zata na hã. Tahawa, ꞌwatébrémi hã ma tô saprõni zahuré, Erihi ma, te te sãrĩ zahuré da hã.
26 Tawamhã Ãna te ãne tãma tinha:
— Ĩnhibꞌapito! Tô sena wa aima ĩsiwasuꞌu. Wa hã piꞌõ hâiwi ĩzab ré ĩꞌmadâ, ꞌRe ihâimana uꞌâsi mono ma ĩmreme ré hã.
27 Wa hã ã hã aiꞌuté hã wa tô tiwi waptẽ, Uburé Danhibꞌapito wi. Ta hã ma tô ĩma tisõ, te tiwi iwaptẽrẽzé hã.
28 Tahawa, ãhã na awaꞌawi na hã wa hã wa za apâ tãma tisõ, Uburé Danhibꞌapito ma, ite da, ã hã ꞌwatébrémi hã. Duré tiꞌai ãma ꞌre hâimana mono ré hã, ite hã za tô.
Tawamhã tame ma tô oto ãma tiwata zaꞌra, ꞌRe ihâimana uꞌâsi mono ãma hã, imama norĩ hã.
