1 Samuéu 10:1-27
10 Tawamhã Samuéu ma tô siré tiꞌâ, simhi azeitona waꞌu tob ré hã. Tawamhã iwaꞌu to hã ma tô saꞌwa, Sauhu ꞌrã nhisiwi. Taha pari, ma tô tobꞌrata hârâ na sawi. Tawamhã te ãne tãma tinha:
— Uburé Danhibꞌapito ma tô aiꞌrãtiꞌi, asiꞌiꞌrãnhoꞌõmo da, isibꞌaꞌuwẽ Izaraéu nhihudu norĩ ma. Duré taha wa, a hã te za ꞌre iꞌaꞌmadâꞌâ mo, Izaraéu nhihudu norĩ hã. Te za duré ꞌre iꞌanhoꞌreptui mo, asitobꞌru norĩ wi hã. Ãne te za ꞌRe ihâimana uꞌâsi mono te te iꞌaipisutu na hã da te ꞌre waihuꞌu zaꞌra, asiꞌiꞌrãnhoꞌõmozém na hã isibꞌaꞌuwẽ norĩ ma.
2 Ã bâtâ na ã hawi aimorĩ wamhã, te za maparane aibâ norĩ hã isõpẽtẽ zahuré, Raqueu ꞌru ꞌrata, Bẽzamihĩ nhihudu norĩ nhiptiꞌa zadaꞌré, Zeꞌuza na romnhisi ãma. Tawamhã ta norĩ si te za aima wasuꞌu zahuré, awaru poꞌrepore sipiꞌõ norĩ isimani zaꞌra, da te isõpẽtẽ zaꞌra zém na hã. Tawamhã te za duré aima wasuꞌu zahuré, aimama hã awaru poꞌrepore ãma oto ihâtâꞌâꞌõzém na hã duré aiꞌãma si oto ihâtâꞌâzém na hã. Tahawa, te za duré aima wasuꞌu zahuré, aimama te te ãne inharĩ na hã: “E marĩ wa za ꞌmanha, ĩꞌra te isõpẽtẽzéb da hã.”
3 — Tawamhã te za aimo, aiwisi da, wede iwazéb zahi, ꞌre isa mono u Tabo na romnhisi ãma. Tawamhã tame te za siꞌubdatõ aibâ norĩ hã isõpẽtẽ zaꞌra, Bétéu na ꞌri nhoꞌõmo nhisi u isiꞌabaꞌré hã, tame danhimizama zata na sõprub zaꞌra da, ꞌRe ihâimana uꞌâsi mono ma. Tawamhã aibâ imorĩꞌrada hã te za tidu siꞌubdatõ poneꞌẽrebâ zéré uzé hã. Duré aibâ isãnaꞌremhã te za tidu iꞌuꞌẽtẽ wapu hã. Duré aibâ siꞌubdatõ ãma hã abazei hâ ꞌmanharĩ na ubꞌrẽ hã te za tiꞌâ, uva ꞌrãi waꞌu isé ré iꞌmasi hã.
4 Tawamhã ta norĩ hã te za siwi asawi. Te za duré iꞌuꞌẽtẽ wapu hã maparane aima wẽ zaꞌra. Tawamhã a hã wẽꞌõ õ di za, isibzari zaꞌra hã.
5 Tawamhã taha parimhã te za aimo, ꞌrinhoꞌu Gibea na isisi ãma, ꞌRe ihâimana uꞌâsi mono te, ẽtẽꞌrãihâ u, filisteu norĩ te te sima iꞌri nhoré zaꞌra zéb u. Tawamhã ꞌri nhoꞌõmo u ꞌre idanhisisi mono zéb ãma te za ꞌRe ihâimana uꞌâsi mono zadawa ꞌmahârâꞌwa norĩ hã isõpẽtẽ zaꞌra, ẽtẽ nhisi wedezane ꞌmanharĩ danhoprubzém hawi isiꞌabaꞌré hã. Ta norĩ hã rowamremezé harpa na isisi hã te te taꞌa zaꞌra mono sina te za isõpẽtẽ zaꞌra, roptaꞌazé hã, ubꞌrãtã hi ne na danhimnhihârâzé hã, duré isõrõtaꞌare hã. Tawamhã ã norĩ hã ꞌRe ihâimana uꞌâsi mono mreme na te te dama rowasuꞌu zaꞌra ré te za isõpẽtẽ zaꞌra.
6 Tawamhã Uburé Danhibꞌapito pẽꞌẽzani hã te za aiwa ãzé. Tawamhã a zama te za oto isiré aihâimana zaꞌra, ꞌRe ihâimana uꞌâsi mono zadawa ꞌmahârâꞌwa ne. Taré oto a hã aimawi uptabi za.
7 Tawamhã ãne hã marĩ aima hâimana wamhã, uburé marĩ hã iꞌuwaibaba si ꞌre abꞌmanharĩ mono za. E marĩ wa. ꞌRe ihâimana uꞌâsi mono hã za aime ꞌre hâimana mono wa.
8 Maꞌãpé aimorĩ ĩnhowa Gilgau na romnhisi u. Tawamhã tamep si wa za duré wa hã asõpẽtẽ, ꞌRe ihâimana uꞌâsi mono ma, ĩnhoprubzéb da danhimizama hã te zata pese da, ãma ĩmorĩ wamhã. Wa za duré tãma ãma ĩnhopru, danhoprubzém na ãma idapẽꞌẽ to zaꞌẽtẽ na hã. Tahawa, aꞌâ ĩzô asimipari za, 7 bâtâ ꞌremhã wa hã ãma ĩwisizéb u, duré te aima waihuꞌu da, za marĩ iꞌmanharĩzéb da hã.
9 Tawamhã Samuéu hawi sipiꞌrai wi morĩ da oto, ma tô ꞌRe ihâimana uꞌâsi mono hã ãma tiwi saprĩ, ipẽꞌẽ ꞌrem na hã. Tahawa, taha bâtâ na Samuéu hã te te tãma iwaihuꞌu mono zéb zarina, ma tô marĩ hã ãma tihâiba, Sauhu ãma hã.
10 Tawamhã Sau norĩ hã tite romhuriꞌwai me, Gibea na ꞌri waꞌõtõ nhisi u oto simasisi zahuré wamhã, ma tô sõpẽtẽ zaꞌra, ꞌRe ihâimana uꞌâsi mono zadawa ꞌmahârâꞌwa norĩ hã. Tawamhã ꞌRe ihâimana uꞌâsi mono Pẽꞌẽzani hã ma tô iwab ãzé, Sauhu wamhã. Tahawa, ma tô oto isiré tihâimana zaꞌra.
11 Tawamhã iwaihuꞌuꞌwa norĩ te te siwi ꞌmadâꞌâ wamhã, ꞌRe ihâimana uꞌâsi mono zadawa ꞌmahârâꞌwa norĩ siré te te iromhurizém na hã ma tô ãma sisadanharĩ zaꞌra ãne:
— E marĩ wamhã te dame tihâiba, Quisihi ꞌra hã. E Sau zama ma tô aipiꞌra, ꞌRe ihâimana uꞌâsi mono zadawa ꞌmahârâꞌwa na romhuriꞌwai u hã.
12 Tawamhã aibâ tame ꞌre ihâimana mono hã ma tô ãma dazadanha ãne:
— Isiré norĩ hã bété. E imama norĩ hã ma tô ꞌRe ihâimana uꞌâsi mono zadawa ꞌmahârâꞌwa na hã ꞌre hâimana zaꞌra.
Ãne zarina te oto da te dasima ꞌre nharĩ zaꞌra: “E Sauhu zama ma tô aipiꞌra, ꞌRe ihâimana uꞌâsi mono zadawa ꞌmahârâꞌwa na romhuriꞌwai u hã.”
13 Tawamhã Sau, ꞌRe ihâimana uꞌâsi mono zadawa wasuꞌu na te te romhuri pari, ma tô oto mo ẽtẽꞌrãihâ ãma wedeza ne na ꞌRe ihâimana uꞌâsi mono ma ꞌre idanhoprub zaꞌra mono zéb u.
14 Tawamhã Sau mama amo hã te sadanharĩ zahuré ãne, tãma iromhuriꞌwai me:
— E momo te ane waꞌwa.
Tawamhã Sau te tãma siwasuꞌu ãne, timama amoi ma:
— Awaru poꞌrepore isimani zaꞌra zô wa ꞌre warĩtĩ! Duré taha wa, niha wa te sõpẽtẽ zaꞌra õ wa, wa tô Samuéu u hã wanem ni, wa te sô sadanharĩ da.
15 Tawamhã imama amo te ãma sadanha ãne:
— E niha tawamhã ma aima waihuꞌu ꞌwa, Samuéu hã.
16 — Ma tô wama wasuꞌu ãne: Ma tô u siwi sõpẽtẽ, awaru poꞌrepore norĩ hã. — Ãne Sau te tãma rowasuꞌu, timama amoi ma hã. Tane nherẽ, uburé hã te te tãma rowasuꞌu õ di, Samuéu te te tãma inharĩzém na hã za isiꞌapitozém na Izaraéu nhihudu norĩ ma.
Sau hã isiꞌapitozé wasuꞌu, Izaraéu nhihudu norĩ ma
17 Tawamhã Samuéu ma tô uburé sô tihârâ zaꞌra, Izaraéu nhihudu norĩ zô, Mispa ãma siꞌrãꞌõtõ da.
18 Tahawa, te dama tinha ãne:
— Uburé Danhibꞌapito Izaraéu nhihudu norĩ te ꞌRe ihâimana uꞌâsi mono hã te wama nharĩ zaꞌra ãne: “Wa hã wa tô Ezitu hawimhã asani zaꞌra waꞌwa, te asõꞌreptu zaꞌra waꞌaba da, ezipsiu norĩ wi, duré uburé da te aima ꞌre irobꞌmanharĩ wasété zaꞌra mono wib zama.
19 Wa hã asibꞌapito zaꞌra waꞌwa. Ĩwétési wa marĩ wi hã te ꞌre asõꞌreptu zaꞌra waꞌwa, duré ropire hawimhã. Tane nherẽ, ãhã na hã ma tô asiwi ĩwẽꞌõ waꞌwa. Duré ma tô asiwi iwaptẽrẽ ꞌwa, apito hã te aima ꞌmaipisutu zaꞌra waꞌaba da hã. Wẽ di tô. Tahawa, maꞌãpé asiꞌrãꞌõtõ aba ĩnhoꞌre, aihiꞌrata norĩ nhihudu mono bâ duré aimama norĩ zarina aiꞌupsãtã aba mono bâ.”
20 Tawamhã Samuéu hã ma tô uburé Izaraéu nhihudu norĩ zô hã hâ, ꞌrâwi itẽme sihutu da, isihudu mono bâ. Tawamhã datozé dawaihuꞌuzéb da, te te siwi mei wamhã, ma tô watobro Bẽzamihĩ nhihudu norĩ wamri hã.
21 Tahawa, ma tô Samuéu hã tãma ꞌru zaꞌra Bẽzamihĩ nhihudu norĩ ꞌremhã damama norĩ ꞌra mono bâ, danhowa te te sina rotété zaꞌra da, itẽmemhã. Tawamhã Matrihi ꞌra norĩ wamri hã ma tô duré watobro. Tawamhã Matrihi ꞌra norĩ siꞌaibâ norĩ hã ma tô duré sina rotété zaꞌra, isãnaꞌremhã. Tawamhã Sauhu nhisi hã ma tô watobro, Quisihi ꞌra hã. Tawamhã ma tô oto sô ꞌre rĩtĩ zaꞌra, Sauhu zô. Tane nherẽ, te te siwi sõpẽtẽ õ di.
22 Tahawa, te Samuéu Uburé Danhibꞌapito hã duré sadanha ãne:
— E zahadu duré daré hã.
Tawamhã ꞌRe ihâimana uꞌâsi mono ma ãma sadaꞌâ ãne:
— Ĩhe, zahadu daré hã. Ma aimaꞌu dawi, danhimarĩ wazari.
23 Tawamhã te oto sô sisaꞌre. Tahawa, te oto siwi saprõ apâ, Sau hã. Ta hã aibâ uburé danhipai u te te sina irowabzu. Tahawa, ma tô isisé hã watobro, Izaraéu nhihudu norĩ waꞌwa sa wamhã.
24 Tawamhã te Samuéu dama tinha ãne:
— Ãhãta te za aibâ hã, Uburé Danhibꞌapito te te ipisudu hã! Niꞌwa hã isine ihâimana õ, waꞌreb zaꞌra hã.
Ãne wa, te uburé Izaraéu nhihudu norĩ hã nharĩ zaꞌra:
— Wanhibꞌapito aꞌâ wama ꞌre hâimana uꞌâsi zaꞌra mono!
25 Tawamhã Samuéu hã ma tô oto ãma tãma rowasuꞌu zaꞌra, uburé Izaraéu nhihudu norĩ ma hã, apito nhimiꞌmadâꞌâzém na hã. Tawamhã ma tô duré ãma robꞌuiꞌéré ibaihâ na, Uburé Danhibꞌapito nhoꞌa ꞌri ꞌre te te siwi ihiri da hã. Taha pari, Samuéu hã ma tô oto apâ dazatõrĩ zaꞌra, ꞌri tẽmemhã.
26 Tahawa, Sauhu zama ma tô tinhorõwa u apâ mo, Gibea u. Tawamhã ma tô ime aiꞌabaꞌré niꞌwam norĩ aibâ ipẽꞌẽ nhiptete norĩ hã, ipẽꞌẽ ꞌre, ꞌRe ihâimana uꞌâsi mono nhimipawaptobzé te te sina iwaihuꞌu zaꞌra norĩ hã.
27 Tane nherẽ, te niꞌwam norĩ hã ꞌre ihâimana wasété zaꞌra mono hã nharĩ zaꞌra ãne:
— E niha te za õ hã aibâ hã merẽ waꞌanhoꞌreptu.
Tawamhã ta norĩ hã ma tô siwi wẽꞌõ pese, Sau hã. Tahawa, tinhoprub zaꞌra zé hã te te tãma sõmri zaꞌra õ di. Tane nherẽ, Sau hã te ariꞌiwi tihâiba, te te nharĩ õ pese na.
