1 Samuéu 11:1-15
11 Tawamhã misi aꞌamo siꞌutõrĩ pari, amonita norĩ nhibꞌapito Naꞌasi na isisi hã ma tô tite dasiꞌwapéi ꞌmanharĩꞌwa norĩ hã te te simro, ꞌrinhoꞌu Zabesi na isisi ãma ꞌre idahâimana zaꞌra mono norĩ zô, te te ꞌwapé zaꞌra da, Ziliadi na romnhisi tiꞌai ꞌremhã. Tawamhã apito Naꞌasihi te dasiꞌwapéi ꞌmanharĩꞌwa norĩ hã ma tô siwi uirĩ, ꞌrinhoꞌu hã. Tahawa, te Zabesi ꞌre aibâ norĩ ꞌre ihâimana zaꞌra mono norĩ hã tãma nharĩ zaꞌra ãne, Naꞌasihi ma hã:
— Maꞌãpé asimiropisudu hã wama ꞌmanharĩ zaꞌra na. Tawamhã wa norĩ hã wa za ãma asaze zaꞌra ni, wanhibꞌihâꞌa na wama ꞌre iꞌaihâimana zaꞌra mono zém na hã za.
2 Tawamhã apito Naꞌasi ma tô ãma sadaꞌâbâ zaꞌra ãne:
— Wa za tô aima ꞌmanharĩ zaꞌra waꞌwa ĩnhimiropisudu hã ãne: Aihâiba mono bâ waꞌaba wa za atõmo nhimire niwĩp si atopuꞌu zaꞌra waꞌwa. Tawamhã ãne wamhã, wa hã wa za uburé Izaraéu nhihudu norĩ hã ãma sisém nomri zaꞌra za, ĩnhimiꞌmanharĩzém na hã.
3 Tawamhã ꞌrinhoꞌu Zabesi ãma dama iꞌrãnhoꞌõmo norĩ hã te asa tãma nharĩ zaꞌra ãne:
— Aꞌâ wama sõmri zaꞌra na, 7 na bâdâ hã uburé Izaraéu nhihudu norĩ nhiptiꞌai mono bâ, wa te aꞌâ ãma ropéi mono da, romreme na hã. Duré tane nherẽ, niꞌwa hã wei morĩ õ wamhã, te te wapawaptob zaꞌra da hã, ãhã wapsi, wa za tô aima wasisõmri zaꞌra ni.
4 Tawamhã dama romreme ꞌwapéiꞌwa norĩ te te isatõrĩ zaꞌra hã ma tô oto aihutu Zibea ãma, Sau ꞌre ihâimana mono zéb u hã. Tame te te dama rowasuꞌu zaꞌra wamhã oto, ma tô aiwaꞌõ zaꞌra ni, dawawa ꞌrãihâ na hã.
5 Tawamhã taha bâtâ ꞌre, ma tô Sau hã we te te ubumro powawẽ hã aꞌubuni hawi. Tahawa, te awaꞌawi anha ãne:
— E marĩ ma tô watobro. E marĩ wa, te duré uburé taꞌruꞌru ni.
Tawamhã ma tô tãma rowasuꞌu zaꞌra, Zabesi ꞌri nhoꞌõmo nhisi hawi aibâ norĩ isiꞌabaꞌré te te tãma irowasuꞌu zaꞌra zém na hã.
6 Tawamhã Sau ãne hã te te wapari wamhã, ma tô ꞌRe ihâimana uꞌâsi mono pẽꞌẽzani hã iwab ãzé. Tahawa, ma tô oto abꞌrui pese.
7 Tahawa, ma tô maparane powawẽ ibaꞌu hã timra, te te pãrĩ da. Te te pãrĩ wamhã, ma tô te te waꞌõtõ. Tawamhã iwaꞌõno hã ma tô tãma sõmri zaꞌra, romreme ꞌwapéiꞌwa norĩ ma hã ta norĩ hã te te ꞌwasari da, uburé Izaraéu nhihudu norĩ nhiptiꞌai mono bâ ma da. Tahawa, te ãne dama sadawa wasuꞌu zaꞌra:
— Niꞌwa hã Sauhu siré duré Samuéu siré dasiꞌwapéi u morĩ õ wamhã, te za tãma robꞌmanharĩ zaꞌra, ã hã powawẽ ibaꞌõmo norĩ ma, te te irobꞌmanharĩ zahuré ne.
Tawamhã uburé Izaraéu nhihudu norĩ hã ma tô tipahi pese zaꞌra, Uburé Danhibꞌapito hã niha za te te tãma robꞌmanharĩ zaꞌra õꞌumnhasite. Tahawa, uburé ma tô Sauhu tẽmemhã aiꞌabaꞌré, misi tinhimirosaꞌrata ré, isiré si oto ꞌre nomro mono da.
8 Tawamhã uburé ma tô Sau hã te te ꞌrãꞌõtõ, ꞌrinhoꞌu Bezequi ãma hã. 300 miu na aibâ Izaraéu nhihudu norĩ ihâiba zaꞌra na hã, duré 30 miu na Zudaha nhihudu norĩ ihâiba zaꞌra na hã.
9 Tawamhã ta norĩ hã te Zabesi hawi romreme ꞌwapéiꞌwa norĩ ma hã nharĩ zaꞌra ãne:
— Maꞌãpé rowasuꞌu zaꞌra waꞌaba, tame asiré norĩ aba ma, awẽmhã abzuma wana ré, za wa te iꞌasõꞌreptu zaꞌra waꞌaba na hã.
Tawamhã ãne hã romreme Zabesi ãma ꞌre ihâimana zaꞌra mono norĩ te te wapari zaꞌra wamhã, ma tô ꞌre to zaꞌra, rowẽ te.
10 Tawamhã Zabesi ãma aibâ norĩ ꞌre ihâimana zaꞌra mono norĩ hã te duré ãne tãma nharĩ zaꞌra, amonita norĩ ma:
— Awẽmhã wa za tô aima wasisõmri zaꞌra waꞌaba ni, marĩ hã asima iwẽ na waꞌãma ꞌmanharĩ zaꞌra waꞌaba da.
11 Tawamhã awẽ bâtâ na ma tô Sau hã tite dasiꞌwapéi ꞌmanharĩꞌwa norĩ siꞌubdatõ iwaꞌõtõ na hã upsãtã zaꞌra. Tawamhã awẽ wi, ma tô amonita norĩ te te sima iꞌri nhoré zaꞌra zéb u asisi, te te ꞌwapé zaꞌra da hã. Tahawa, ma tô abzuma u hã uprosi, tinhitobꞌru norĩ hã. Duré tiwi isimani zaꞌra norĩ hã ma tô siwi sipé misisi robzawi te.
12 Tawamhã Izaraéu nhihudu norĩ hã te Samuéu ma nharĩ zaꞌra ãne:
— E mahãta aibâ norĩ, Sau wama siꞌapito zaꞌra tõ da, te te inharĩ zaꞌra hã. We simroi aba mono ãwa, wa te wasiwi simro da.
13 Tane nherẽ, Sau hã te tãma nharĩ zaꞌra ãne:
— Niꞌwa hã idâꞌâ da hã mare di, ã bâtâ na hã. E marĩ wa. Uburé Danhibꞌapito hã ma tô wa te daꞌãma iꞌaiꞌutézé hã wama sõmri zaꞌra, Izaraéu nhihudu norĩ ma hã.
14 Tawamhã Samuéu te duré dama tinha ãne:
— Oto uburé wasiꞌabaꞌréi waꞌaba Gilga na romnhisi u. Tawamhã tamep si wa za Sau hã wa te wasiwi ipisutu na ãma sahu zaꞌra ni, wanhibꞌapito zaꞌra da hã.
15 Tahawa, ma tô oto aiꞌabaꞌré uburé Gilga u hã. Tame ma tô ro iwazéb zahi ãmamhã Sau hã siwi pisutu, tinhibꞌapito zaꞌra da hã. Tawamhã ma tô duré tinhoprubzém na hã tinhoprub zaꞌra, ꞌRe ihâimana uꞌâsi mono ma, danhoprubzé ãma irowẽ zaꞌẽtẽ na hã. Tahawa, Sau norĩ hã Izaraéu nhihudu norĩ me ma tô rowẽ te ꞌre to zaꞌra, ãne na iromhâimanazém na hã.
