1 Samuéu 12:1-25
12 Tawamhã Samuéu te Izaraéu nhihudu norĩ ma nharĩ zaꞌra ãne:
— Wa hã wa tô uburé ãma aima uwaimrami zaꞌra waꞌwa, ĩwi iwaptẽrẽ zaꞌra waꞌaba zéb uwaibaba. Tahawa, wa tô aima sõmri zaꞌra waꞌwa apito hã, te te ꞌre iꞌaiꞌmadâꞌâ zaꞌra waꞌaba mono da hã.
2 Tahawa, te oto asibꞌapito zaꞌra waꞌaba na ꞌre hâimana, te te ꞌre iꞌaiꞌmadâꞌâ zaꞌra waꞌaba mono da hã. Tazahã, wa hã wa tô oto ĩhâiba prédu. Wa tô ĩnhiꞌa. Duré ĩꞌra norĩ hã te aime ꞌre hâimana zaꞌra waꞌwa, ãmemhã. Duré wa hã ĩhâiba té hawim haré wa tô aima zaꞌra waꞌaba iꞌrãnhoꞌõmo na ꞌre ĩhâimana, zahadu ãhã bâtâ u hã.
3 Ãhãta wa hã wa ĩhâiba. Marĩ na te upai wamhã, maꞌãpé ĩwasédé hã asiwi ĩꞌãma hiri aba ãhã na awaꞌawi na Uburé Danhibꞌapito nhoꞌa, duré apito da, te te ipisutu nhoꞌa. E niwamhã wa tô powawẽ hã dawi ꞌmaiꞌâ, niha wamhã, awaru poꞌrepore hã. E niwamhã wa tô duré dama sadawa hapese. E niwamhã wa tô dazada ꞌre ĩhâimana. E niwamhã wa tô duré robꞌuiprazé hã te ꞌre awaibu piꞌuriwi, iwaꞌrãmi te dama ꞌre iꞌarowairébé mono wẽ da hã. Ãne hã pé wa hã te ꞌmanharĩ wamhã, wa za apâ sõmri zaꞌra, itedeꞌwa norĩ ma hã.
4 Tawamhã Izaraéu nhihudu norĩ hã ma tô ãma sadaꞌâbâ zaꞌra ãne:
— A hã wama ꞌre aihâimana zaꞌra mono õ di, aihâimana nhipese na hã. Duré wazada ꞌre aihâimana zaꞌra mono õ di. Duré niꞌwai wi asimisaihuri sina marĩ hã âri õ di.
5 Tawamhã Samuéu te duré tãma nharĩ zaꞌra ãne:
— Uburé Danhibꞌapito hã duré apito da, te te ipisudu ma tô ãne hã ĩwasuꞌu wẽ hã wapari zahuré asõꞌa zaꞌra waꞌaba, marĩ na ĩwasédé hã asiwi ĩꞌãma ihiri aba õ na hã. Taha na ma tô ĩwaihuꞌu zahuré.
Tahawa, ma te ãma sadaꞌâbâ zaꞌra ãne:
— Tahata tô. Uburé Danhibꞌapito hã ma tô aiwasuꞌu wẽ hã wapa ãhã na hã.
6 Tawamhã Samuéu te zahadu tãma nharĩ zaꞌra ãne:
— Wanhibꞌapito ꞌRe ihâimana uꞌâsi mono, ma tô pisutu zahuré Mozési norĩ hã, Arãhã me, aihiꞌrata norĩ Ezitu hawi te te daꞌawazere zahuré wa, te te idanhimro zahuré mono da hã.
7 Aihâimana zaꞌra waꞌaba aꞌâ ãme. Wanhibꞌapito ꞌRe ihâimana uꞌâsi mono nhoꞌre, wa za ãma aipoꞌre puꞌu zaꞌra waꞌwa, uburé marĩ te te aima ꞌre iꞌabꞌmanharĩ zaꞌra waꞌaba mono zém na te te iꞌasõꞌreptu zaꞌra waꞌaba na hã, duré aihiꞌrata norĩ te te isõꞌreptu zaꞌra zém na zama.
8 Zaco nimahãna tiꞌra norĩ ré Ezitu u morĩ wamhã, ma tô ezipsiu norĩ hã siwi sé pawaꞌâbâ ãna te te tãma ꞌre romhuri zaꞌra mono da. Tawamhã ã norĩ aihiꞌrata zaꞌra waꞌwa hã ma tô Wanhibꞌapito ꞌRe ihâimana uꞌâsi mono wi te te ꞌre rowaptẽrẽ zaꞌra, te te ꞌre pawaptob zaꞌra mono da. Tahawa, ma tô Mozési norĩ hã satõrĩ zahuré, Arãhã me, ta norĩ hã te te sani zaꞌra da Ezitu hawi, ã hã tiꞌai ꞌre oto ꞌre hâimana zaꞌra mono da.
9 Tane nherẽ, ma tô aihiꞌrata norĩ waꞌwa hã poꞌre haꞌâri zaꞌra Wanhibꞌapito ꞌRe ihâimana uꞌâsi mono ãma hã. Tahawa, ma tô Sisera ꞌrinhoꞌu Hazo na isisi ãma dasiꞌwapéi ꞌmanharĩ ꞌmadâꞌâꞌwai ma hâiba nhomri zaꞌra, filisteu norĩ ma hã, duré Moabi ãma apito ma hã, te te ꞌwapé zaꞌra wa, te te duré ãma aiꞌuté zaꞌra da.
10 Tahawa, ma tô nasi tiwi rowaptẽrẽ zaꞌra ãne te te pawaptob zaꞌra da, Wanhibꞌapito ꞌRe ihâimana uꞌâsi mono hã: “ꞌRe ihâimana uꞌâsi mono, wa norĩ hã wa tô wawasété zaꞌra ni. Duré wa tô rẽme zaꞌra ni, aiꞌãma ꞌre iwawata zaꞌra mono zé hã, romhâibarĩ Baau na si ãma ꞌre wawata zaꞌra mono da oto, ꞌri nhoꞌõmo mono bâ. Duré Asitaroti na romhâibarĩ nhisi na zama ꞌre wawata zaꞌra mono da, wa tô aiꞌãma ꞌre iwawata zaꞌra mono zé hã wasiwi rẽme ni. Tane nherẽ, ãhã na wanhoꞌreptu zaꞌra na wanhitobꞌru zaꞌra wi, aiꞌãma si ꞌre wawata zaꞌra mono da oto apâ.”
11 Tahawa, ma tô Wanhibꞌapito ꞌRe ihâimana uꞌâsi mono hã satõrĩ zaꞌra Gidiã norĩ hã, Baraque hã, Zépté hã, duré wa hã Samuéu, wa te iꞌasõꞌreptu zaꞌra waꞌaba da hã, asitobꞌru norĩ wi. Ãne wa, ma tô a norĩ waꞌwa hã oto romnhimimnhasi ãna ꞌre aihâimana zaꞌra waꞌaba mo.
12 Tane nherẽ, amonita norĩ te apito Naꞌasi hã te te aiꞌwapé zaꞌra waꞌaba da, we imorĩ na asiwi ꞌmadâꞌâ aba wamhã, ma tô a norĩ waꞌwa hã asiwi iwẽꞌõ zaꞌra waꞌwa, Wanhibꞌapito ꞌRe ihâimana uꞌâsi mono hã apito na wama ꞌre ihâimana zaꞌra mono hã aré. Tahawa, ma tô ãne duré ĩma inharĩ zaꞌra waꞌwa: “Wa wasima wẽ zaꞌra ni, aimawi wama isiꞌapito zaꞌra da hã.”
13 — Tahawa, ãhãta apito asiwi ipisutu zaꞌra waꞌwa hã. Ma tô asiwi iwaptẽrẽ zaꞌra waꞌwa. Tahawa, Wanhibꞌapito ꞌRe ihâimana uꞌâsi mono ma tô ã hã apito aima sõmri zaꞌra waꞌwa.
14 Tawamhã Wanhibꞌapito ꞌRe ihâimana uꞌâsi mono hã asiwi ꞌre wazéb zaꞌra waꞌaba mono wamhã, te za rowẽ na si ꞌre aihâimana zaꞌra waꞌaba mo, ãma ꞌre aiwata zaꞌra waꞌaba mono wamhã, ꞌre wapari pese zaꞌra waꞌaba mono wamhã, imreme na si ꞌre anomro aba mono wamhã, duré asibꞌapito siré a norĩ waꞌwa ãma ꞌre anomro aba mono wamhã.
15 Tane nherẽ, Wanhibꞌapito mreme ꞌre wapari zaꞌra waꞌaba mono õ wamhã, duré isimiroti hã asiwi ꞌre wẽꞌõ zaꞌra waꞌaba mono wamhã, õ hã te za asada ꞌre hâimana zaꞌra waꞌwa, asibꞌapito zaꞌra waꞌaba da zama.
16 Maꞌãpé aꞌâ ãme aihâimana zaꞌra waꞌaba iꞌaihâimana zaꞌra waꞌaba zéb ãma, za marĩ Wanhibꞌapito iwẽ te te iꞌmanharĩzé hã ꞌmadâꞌâ zaꞌra waꞌaba da.
17 Ãhã na hã wahum na wa wahâimana zaꞌra ni. E amnho trigu hã da te tehâri mono õ di za bété, ãhã na hã. Tahawa, wa za mre, Wanhibꞌapito ma tãirãrãꞌã ma, we te te robꞌru da, duré tãi ma. Tawamhã ãne hã a norĩ waꞌwa hã ꞌmadâꞌâ zaꞌra waꞌaba wamhã, te za iwaihuꞌu zaꞌra waꞌwa, aiwasédé saꞌẽtẽ na ꞌRe ihâimana uꞌâsi mono wi iꞌmanharĩ zaꞌra waꞌaba zém na hã, asima iwẽ zaꞌra waꞌaba zarina, aimawi apito hã waptẽrẽ zaꞌra waꞌaba wa.
18 Tawamhã Samuéu hã ma tô mre, ꞌRe ihâimana uꞌâsi mono ma. Tãma mreme wamhã, tô taha bâtâ na ma tô Wanhibꞌapito hã tãma robꞌru tãirãrãꞌã ma, duré tãi ma hã. Tahawa, ma tô uburé Izaraéu nhihudu norĩ hã tipahi pese zaꞌra Wanhibꞌapito ma hã, duré Samuéu ma zama.
19 Tahawa, te Samuéu ma nharĩ zaꞌra ãne:
— Maꞌãpé waꞌãma aimreme zaꞌra na asibꞌapito ꞌRe ihâimana uꞌâsi mono ma. Tawamhã wa norĩ hã wasiꞌutõrĩ õ di za. Uburé wawasédé hã wa te ꞌre iꞌmanharĩ zaꞌra mono zém nhisiwimhã wa tô duré ãhã na hã wawasété zaꞌra ni, apito aimawi wa te wasiwi iwaptẽrẽzém na hã.
20 Tawamhã Samuéu ma ãma tãma waꞌrãmi zaꞌra ãne:
— Aipahi zaꞌra waꞌaba tõ. Tô sena ma tô aiwasédé hã iꞌmanharĩ zaꞌra waꞌwa. Tane nherẽ, oto rẽme zaꞌra waꞌaba õ di za, Wanhibꞌapito ãma ꞌre iꞌaiwata zaꞌra waꞌaba mono zé hã. Te za oto uburé aipẽꞌẽ na ãma ꞌre anomro aba mo.
21 Ihâibaꞌõ norĩ ãma ꞌre anomro aba mono õ di za, ꞌRe ihâimana uꞌâsi mono upana ãma ꞌre idawata zaꞌra mono norĩ ãma hã. Ta norĩ hã simipawapto waihuꞌu õ di, duré te te asõꞌreptu zaꞌra waꞌaba dai õ di. E marĩ wa. Ta norĩ hã sena na hã ꞌre hâimana zaꞌra mono õ wa.
22 Tawamhã Wanhibꞌapito ꞌRe ihâimana uꞌâsi mono nhisi zaꞌẽtẽ zarina ma tô ropisutu, te te airẽme zaꞌra waꞌaba tõ da hã. E marĩ wa. Tãma wẽ uptabi wa, aiꞌãma isibꞌaꞌuwẽ zaꞌra waꞌaba da hã.
23 Wa hã te aiꞌãma ꞌre irowaptẽrẽ zaꞌra waꞌaba mono zé hã te irẽme da hã mare di. Ãnei õ wamhã, wa aré ĩwasédé hã ꞌmanha, ꞌRe ihâimana uꞌâsi mono wi. Wa hã wa za ãma aima te ꞌre rowasuꞌu zaꞌra waꞌwa bâdâdi iwẽ na ãma ꞌre iꞌanomro aba mono da hã.
24 Wanhibꞌapito si te za asiwi ꞌre iwazé pese aba mo. Te za õhõ ãma si ꞌre anomro aba mo, aipẽꞌẽ ꞌremhã. Tawamhã te za ãma ꞌre aipoꞌre puꞌu uꞌâsi zaꞌra waꞌaba mo, marĩ ipire te te aima ꞌre iꞌmanharĩ zaꞌra waꞌaba mono zém na hã.
25 Tane nherẽ, marĩ ꞌmanharĩ wasété na ãma ꞌre uzusi zaꞌra waꞌaba mono wamhã, te za tô aiꞌutõrĩ ꞌwa, asibꞌapito siré.
