1 Samuéu 13:1-23
13 Tawamhã Sau, 30 na ãma iwahubzéb ãma ma tô siꞌapito. Tahawa, Izaraéu nhihudu norĩ ma apito na ꞌre hâimana mono ré hã, ma tô 42 na ãma tiwahu.
2 Tawamhã ma tô pisutu zaꞌra 3 miu na aibâ hã Izaraéu nhihudu norĩ hã. 2 miu na ime ihâimana zaꞌra hã ꞌrinhoꞌu Mitima ãma, duré Bétéu tiꞌa niwĩ ẽtẽ ãma hã. Duré miu na Zonataha me ihâimana zaꞌra hã, Zibea ꞌri nhoꞌõmo ãma Bẽzamihĩ nhihudu norĩ nhiptiꞌai waꞌõtõ ãma hã. Tawamhã tinhorõwa u aibâ isiꞌmairẽme norĩ hã, ma tô satõrĩ zaꞌra apâ siꞌabaꞌré da.
3 Tawamhã Zonata hã, ma tô tiwĩ filisteu daꞌwapéiꞌwa norĩ wadaꞌuriꞌwa hã, ꞌrinhoꞌu Zeba na isisi ãma. Ãne hã ma tô filisteu norĩ waihuꞌu zaꞌra. Tawamhã Sau, ma tô aibâ norĩ hã satõrĩ zaꞌra, te te dapoꞌre puꞌu zaꞌra mono da, uburé tiꞌai waꞌõtõ nhoꞌõmo mono bâ da te ihãsi mono da hã ihârâre hã, ãma sô simnhihãsi zaꞌra da hebreu norĩ zô isiꞌwapé zaꞌra da hã.
4 Tawamhã ã hã uburé Izaraéu nhihudu norĩ hã ma tô wapari zaꞌra, rowasuꞌu hã: “Sau hã, filisteu norĩ te dasiꞌwapéiꞌwa norĩ ꞌmadâꞌâꞌwa hã ma tô tiwĩ. Tahawa, ma tô Izaraéu nhihudu norĩ hã oto ꞌru ꞌmanharĩ zaꞌra.” Tawamhã sô idahãsizé te te wapari zaꞌra wa, ma tô Gilga ãma Sauhu tẽme siꞌrãꞌõtõ da hã aiꞌabaꞌré.
5 Tawamhã filisteu norĩ hã ma tô duré siꞌrãꞌõtõ, Izaraéu nhihudu norĩ te te isahu da hã. Tahawa, ite zaꞌra 30 miu na wedewara zapore na dasiꞌwapézé hã duré 6 miu na awaru na daꞌwapéiꞌwa norĩ hã. Duré ahâ uptabi di dasiꞌwapéi ꞌmanharĩꞌwa norĩ hã â zaihâ na supara ꞌré ꞌre ihâimana zaꞌra mono ne. Tawamhã ma tô oto aiꞌabaꞌré Mitima u, Bete-Awé na ꞌri nhoꞌõmo nhisi bâtâ pusizém niwĩ. Tame ma tô sima ꞌri nhoré zaꞌra.
6 Tawamhã Izaraéu nhihudu norĩ ma tô sina waihuꞌu zaꞌra, dapusizéb da iwaihuꞌuꞌõ na hã, duré tãma iromnhimimnhasi zaꞌra zé hã. Tahawa, ma tô niꞌwam norĩ hã aimaꞌuri zaꞌra ẽtẽ ꞌrãihâ zahâpâ ẽtẽꞌre ꞌre, duré abꞌre ꞌre. Duré niꞌwam norĩ hã, ma tô aimaꞌuri zaꞌra ẽtẽ nhiꞌriti ꞌre abꞌre wa, duré ẽtẽ na abꞌre ꞌre, duré â zô abꞌre ꞌre.
7 Niꞌwam norĩ hã ma tô saprĩ zaꞌra panhoꞌu Zodã pa na siꞌabaꞌré da, Gadihi nhiptiꞌai u, duré Ziliadi na romnhisi u.
Sauhu si ma tô Gilga ãma hã nhamra. Tame ꞌre idahâimana zaꞌra mono norĩ hã, ma tô tapahi pese zaꞌra ni.
8 Tahawa, Sau hã ma tô aꞌâ mapa, 7 bâtâ ꞌremhã, Samuéu te te tãma ipisutuzéb zarina. Tane nherẽ, Samuéu hã morĩ õ di itẽme. Tahawa, aꞌuwẽ norĩ, Sau te te siwi rẽme da hã, re na ihawi siꞌabaꞌré da, te oto tiwi asama.
9 Tawamhã Sau te tãma nharĩ zaꞌra ãne:
— We ĩma ꞌmaiꞌâri aba abaze hã ãwa, ꞌRe ihâimana uꞌâsi mono ma, te zata da, duré tãma danhoprubzé ãma irowẽ zaꞌẽtẽ zama.
Tawamhã ma tô oto ãma tinhopru.
10 Tawamhã te te zata pari, ma tô Samuéu hã oto wi itẽmemhã. Tahawa, Sau hã ma tô sina uzusi te te sawi da hã.
11 Tane nherẽ, Samuéu hã te sadanha ãne:
— E marĩ ma tô iꞌmanha.
Tawamhã Sau ma ãma sadaꞌâ ãne:
— Ĩnhibꞌaꞌuwẽ norĩ te te siwi ĩrẽme da, nasi apâ isiꞌabaꞌré na hã, wa tô waihuꞌu zaꞌra. A zama ãwamhã bété duré we aimorĩ õ di, ĩma ropisutu nherẽ. Filisteu norĩ hã ma tô siꞌrãꞌõtõ duré, Mitima ãma hã.
12 Tahawa wa tô rosaꞌrata ãne: “Filisteu norĩ hã te za we aiꞌabaꞌré ãwa, Gilga u, te te siwi ĩꞌwapé da. Tane nherẽ, zahadu te pibui õ di, Wanhibꞌapito ꞌRe ihâimana uꞌâsi mono nhimipawaptobzéb hã.” Tawamhã wa tô oto tisã, ãma tãma ĩnhoprubzéb da hã.
13 Tawamhã Samuéu ma ãma sadaꞌâ ãne:
— A hã asimizaꞌrese õ ne ma tô marĩ hã iꞌmanha. Wapari õ di, Wanhibꞌapito ꞌRe ihâimana uꞌâsi mono te te aima iꞌruzé hã. Wapari ꞌwaꞌâhã, te aré Izaraéu nhihudu norĩ ma iꞌrãnhoꞌõmo na tãma ꞌre aihâimana uꞌâsi zaꞌra mo. Asihudu norĩ zama te aré dama iꞌrãnhoꞌõmo na dama ꞌre hâimana uꞌâsi zaꞌra.
14 Tazahã, ãhã na a hã dama iꞌrãnhoꞌõmo na ꞌre aihâimana mono na ãma uzusi õ di za. E marĩ wa. A hã wapari õ wa, Wanhibꞌapito te te aima iꞌruzé hã. Tahawa, te za aibâ zô, rĩtĩ te te ꞌmazabu da, te te sima iwẽzéb zarina te te pisutu da Izaraéu nhihudu norĩ ma isiꞌapito da hã.
15 Tawamhã Samuéu ma tô oto watobro Gilga hawi, morĩ da oto. Tahawa, Sau aꞌuwẽ norĩ siré Gilga hawimhã ma tô mo, Bẽzamihĩ nhihudu norĩ nhiptiꞌai ꞌre tite dasiꞌwapéi ꞌmanharĩꞌwa norĩ tẽme Zibea u morĩ da. Tawamhã tame ma tô tite dasiꞌwapéi ꞌmanharĩꞌwa norĩ hã azaꞌrata. Tawamhã ma tô aibâ norĩ uburé hã watobro 600 na.
16 Tawamhã Sau, tiꞌra Zonataha me ma tô tite dasiꞌwapéi ꞌmanharĩꞌwa norĩ ré hã tihâimana zahuré, Bẽzamihĩ nhihudu norĩ te tiꞌai ꞌre Zeba na ꞌri nhoꞌõmo nhisi ãma. Tahawa, Mitima ãma filisteu norĩ te te sima iꞌri mono ꞌremhã te tihâimana zaꞌra.
17 Tawamhã dasiꞌwapéi ꞌmanharĩꞌwa filisteu norĩ hã ma tô oto dazô wairé siꞌubdatõ iwaꞌõtõ na, isiꞌwapé zaꞌra da hã. Tahawa, misi iwaꞌõno hã ma tô aiꞌabaꞌré, Opra na ꞌri nhoꞌõmo nhisi Suꞌaha nhiptiꞌa niwĩ.
18 Iwaꞌõtõ hâiba amo hã, Bete-Horõ na ꞌri waꞌõtõ nhisi niwĩ, ma tô aiꞌabaꞌré. Siꞌubdatõ ãma iwaꞌõno hã saꞌa nhoꞌõmo u ma tô aiꞌabaꞌré, Zeboꞌĩ na ẽtẽ siwaꞌaba nhisi iꞌmadâꞌâ pese niwĩ, duré aꞌubuni wi rop si ꞌre isaꞌwari mono iꞌmadâꞌâ pese niwĩb zama.
19 Filisteu norĩ hã ma tô aré te te tiwi ꞌre sawi zaꞌra hebreu norĩ wi, te te ꞌre ꞌmanharĩ zaꞌra mono tõ da, sibꞌézé ꞌwapa hã, duré isiꞌuwazi ꞌrãꞌwa hã. Tahawa, tame Izaraéu nhihudu norĩ nhiptiꞌai ãma dama ꞌre hâimana zaꞌra mono õ di, isiꞌuwazi na robꞌmanharĩꞌwa hã.
20 Tahawa, tiꞌai hâipoꞌoꞌwa norĩ hã, hâtâra ꞌrãpo hã, hâtâra hã, popanone hã, Izaraéu nhihudu norĩ wi ꞌre ꞌwaꞌõ zaꞌra mono wamhã, ma tô filisteu norĩ tẽmemhã te te ꞌre ꞌwasari te te ꞌre ꞌwa zaꞌra mono da.
21 Tawamhã ã hã Izaraéu nhihudu norĩ te te sima ꞌre ꞌwa zaꞌra mono da wamhã, ma tô te te tãma ꞌre waꞌâbâ zaꞌẽtẽ zaꞌra filisteu norĩ ma, hâtâra hã duré powawẽ zusizéb da hã. Tane nherẽ, tiꞌai hâipoꞌozém norĩ hã hâtâra ꞌrãpo me hã, danhipai u iꞌwa da hã iwaꞌâbâ zaꞌẽtẽ zahuré.
22 Tahawa, bâtâ na oto dasiꞌwapé da wamhã, dasiꞌwapéi ꞌmanharĩꞌwa Izaraéu nhihudu norĩ te hã hâimana õ di, sibꞌézé ꞌwapa hã, duré isiꞌuwazi ꞌrãꞌwa hã. Tahawa, Sauhu norĩ te si iꞌra Zonataha me hã te tãma tihâimana zahuré.
23 Tawamhã filisteu norĩ ma tô dasiꞌwapéi ꞌmanharĩꞌwa misi iwaꞌõtõ norĩ hã satõrĩ zaꞌra, Mitima ꞌrata ẽtẽ nhiꞌriti na bâdâdi inomro hã te te siwi bâdâdi simri da.
