1 Samuéu 14:1-52
14 Tawamhã nimahã bâtâ na te Zonata hã tãma tinha, tisiꞌwapézé âriꞌwai ma ãne:
— Oto wane na ẽtẽ nhiꞌriti na bâdâdi uiwada niwĩ, filisteu norĩ te te sima iꞌri nhoré zaꞌra zéb u.
Tane nherẽ, Zonata, timama ma, te te wasuꞌu õ di, za marĩ te te iꞌmanharĩzé hã.
2 Tahawa, Sau hã te tihâiba, Midrõ na romnhisi ãma, Zibea na ꞌri nhoꞌõmo nhisi ꞌrata, roma na rowede nhisi zahâpâ te te sima iꞌri nhoré wa. Tawamhã isiré hã 600 na dasiꞌwapéi ꞌmanharĩꞌwa norĩ hã, te tihâimana zaꞌra.
3 Tawamhã sasedoti siꞌuzazém na ãma ꞌre isiꞌuza mono hã, Aiꞌasi na isisi, Aitubihi ꞌra, Icabôhô ꞌra wapté hã. (Icabô hã Finéaha ꞌra, Erihi nhihudu. Eri hã, aré Silo ãma Wanhibꞌapito ꞌRe ihâimana uꞌâsi mono ma ꞌre ihâimana mono sasedoti na hã.) Tawamhã aibâ norĩ te te siwi waihuꞌu õ di, ꞌri nhorézém hawi Zonata iwatobrozé hã.
4 Tawamhã Zonata, filisteu norĩ te te sima iꞌri nhoré zaꞌra zéb u morĩ da wamhã, ẽtẽ nhiꞌriti bâdâdi na isaprĩzé hã. Tame te ẽtẽ tõmo wawẽ Bosesi na isisi hã, ihâiba amo Sene na isisi me hã, siꞌuiwada pese na tizaꞌwari zahuré.
5 Ẽtẽ tõmo wawẽ imorĩꞌrada Bosesi na isisi hã te hâiwa nhimiꞌe niwĩ, Mitima nhoꞌre niwĩ nomro. Duré ihâiba amo Sene na isisi hã, te Zeba na ꞌri nhoꞌõmo nhisi niwĩmhã isõꞌre nomro.
6 Tawamhã Zonata te aibâ iprédupté isiꞌwapézé âriꞌwai ma tinha ãne:
— Oto wane na, filisteu norĩ, ihâibaꞌõ ꞌRe ihâimana uꞌâsi mono upa na ãma ꞌre iwata zaꞌra mono norĩ ꞌre ihâimana wasété zaꞌra mono te te sima iꞌri nhoré zaꞌra zéb u. Ãté te za Wanhibꞌapito wapawapto. Te te wapawaptob da hã wamhã, wa te ãma iꞌaiꞌuté zaꞌra zéb da hã waꞌumro nherẽ marĩ hã te te wawi sawi waihuꞌu zaꞌra õ di za.
7 Tawamhã aibâ iprédupté ime imorĩ hã ma ãma sadaꞌâ ãne:
— Niha hã iwẽ isãmrizéb zarina ꞌmanharĩ tô. Wa ãma aiꞌuze tô, aime ĩhâimana zarina.
8 Tawamhã ma tô duré ãma sadaꞌâ ãne, Zonata hã:
— Wẽ di tô. Iꞌuiwada u wa te saprĩ na pé oto, ihâimana zaꞌra zéb u, te te tô waꞌmadâꞌâ zaꞌra da, dasiꞌwapéi ꞌmanharĩꞌwa norĩ hã.
9 Tawamhã ꞌrâwi watẽme sihutu da, aꞌâ sô wanhimizahâri zaꞌra da, te te wama nharĩ zaꞌra wamhã, wa za aꞌâ tô ꞌmazahâri zaꞌra ni za.
10 Tane nherẽ, ihâimana zaꞌra zéb u waneb da, te te wama nharĩ zaꞌra wamhã, wa za tô duré aꞌâ wanem ni. E marĩ wa. Ãne wamhã, Wanhibꞌapito ꞌRe ihâimana uꞌâsi mono, wanhibꞌrata za te te wama ihâiba nhomri zaꞌra zé hã te wasuꞌu, za wa te duré ãma iꞌaiꞌuté zaꞌra zéb da hã.
11 Tawamhã sõꞌawi ma tô oto tineb zahuré, filisteu norĩ te te siwi ꞌmadâꞌâ zaꞌra da hã. Tawamhã ãne te sima ꞌmahârâ zaꞌra, te te siwi ꞌmadâꞌâ zaꞌra wamhã:
— Maꞌãpé asiwi ꞌmadâꞌâ aba! Niꞌwam norĩ hebreu norĩ hã ma tô tipusi zahuré, abꞌre wa isimaꞌuri zaꞌra zém hawi.
12 Tahawa, filisteu dasiꞌwapéi ꞌmanharĩꞌwa norĩ hã ma tô siwi ꞌmahârâ zahuré, Zonata norĩ hã ãne:
— We ãwa saiꞌuri waré aba! Marĩ hã wa te aima hâiꞌré aba da hã, wa wasima wẽ zaꞌra ni.
Tawamhã Zonata te tisiré aibâ iprédupté ma hã tinha ãne:
— We ĩzarina aimorĩ. E marĩ wa. Wanhibꞌapito ꞌRe ihâimana uꞌâsi mono hã, filisteu norĩ, ma tô Izaraéu nhihudu norĩ ma hâiba nhomri zaꞌra te te ãma iꞌaiꞌuté zaꞌra da hã.
13 Tawamhã Zonata, ma tô tinhibꞌrata na te te romrami mono sina oto saiꞌu. Aibâ iprédupté hã te duré saiꞌu isarina. Tahawa, Zonata te te aꞌwapéi mono wamhã, duré te te aꞌmarõpãrĩ mono wamhã, isiꞌwapézé âri ꞌwa hã ma tô õne haré isarina te te ꞌmapãrĩ.
14 Tawamhã imorĩꞌrata na te te aꞌwapéi wamhã, ma tô uprosi 20 na aibâ norĩ hã, duré 1.200 metru na tiꞌai pibuzé zapoto ꞌremhã.
15 Tahawa, ma tô filisteu norĩ uburé te te sima iꞌri nhoré zaꞌra zéb ãma ihâimana zaꞌra hã tipẽꞌẽwara pese zaꞌra. Dasiꞌwapéi ꞌmanharĩꞌwa norĩ, pahi wa te duré tirẽrẽꞌẽ zaꞌra. Tawamhã tiꞌa zama te duré saꞌẽtẽ popo. Tahawa, rowaihuꞌuꞌõ na hã, ma tô tiromhâiba.
Filisteu norĩ ãma da te iꞌaiꞌuté zaꞌra zé wasuꞌu
16 Tawamhã Sauhu te wapsãiꞌaꞌwa norĩ, Bẽzamihĩ nhihudu norĩ te tiꞌai ãma, Zibea na ꞌri waꞌõtõ nhisi wa ihâimana zaꞌra norĩ hã, ma tô filisteu norĩ, uihâ idiꞌiti zaꞌra wa siwaꞌrãmi ꞌre isisaꞌrei mono hã ꞌmadâꞌâ zaꞌra.
17 Tawamhã te Sau tite dasiꞌwapéi ꞌmanharĩꞌwa ꞌmadâꞌâꞌwa norĩ ma nharĩ zaꞌra ãne:
— Maꞌãpé wa te dasiꞌwapéi ꞌmanharĩꞌwa norĩ hã, saꞌrata zaꞌra waꞌaba, sô ꞌmairoꞌwanhiꞌriti zô.
Tawamhã te te saꞌrata zaꞌra wamhã, ma tô siwi upsibi me, Zonata norĩ zô irobaba zahuré zé hã, ite isiꞌwapézé mramiꞌwai me.
18 Tawamhã Sau te sasedoti Aiꞌasihi ma tinha ãne:
— We âri ãwa, ꞌRe ihâimana uꞌâsi mono te, wedehâꞌre hã.
Ãne ma tô tãma tinha. E marĩ wa. Aꞌuwẽ Izaraéu nhihudu norĩ, ꞌre nomro mono sidâpâsi ma tô wedehâꞌre ne hã da te dasiwi ꞌre mrami isõwab zaꞌra hã.
19 Tawamhã Sau ãne na sasedoti ma te te nharĩ mono ré, ma tô filisteu norĩ te te sima iꞌri nhoré zaꞌra zéb ãmamhã rowaihuꞌuꞌõ hã te te sina hâimo mono.
Tawamhã te duré Sau tãma tinha ãne, sacedotihi ma:
— Wanhibꞌapito hã, Sadanharĩ zahu õ di za.
20 Tawamhã Sau tite aibâ norĩ me ma tô õne haré asisi, filisteu norĩ te te ꞌwapé zaꞌra da hã. Tawamhã ta norĩ hã tõmoi huꞌu õ na hâimana zaꞌra wa, ma tô tisiré norĩ me hã ꞌrâwi siꞌwapé zaꞌra.
21 Tawamhã niꞌwam norĩ hebreu norĩ siré hã filisteu niwĩ aré te te isaprĩ zaꞌra hã, duré filisteu norĩ te te sima iꞌri nhoré zaꞌra zéb u isiꞌabaꞌré hã ma tô oto apâ saprĩ zaꞌra, Sauhu niwĩ duré Zonataha niwĩ hâimana zaꞌra da.
22 Tawamhã Izaraéu nhihudu norĩ, Efraĩ na romnhisi ãma ẽne ihâimana ãma isimaꞌuri zaꞌra zama, ma tô filisteu norĩ pahi te siwaꞌru dawi isisaꞌrei mono zé hã waihuꞌu zaꞌra. Tahawa, apâ sada siꞌrãꞌõtõ pari wamhã, ma tô Filisteu hã bâdâdi na te te ꞌwapéi uꞌâsi zaꞌra.
23 Bete-Awé na romnhisi inomro nhipai u bâdâdi na ma tô duré te te ꞌwapéi uꞌâsi zaꞌra. Tawamhã Danhibꞌapito ꞌRe ihâimana uꞌâsi mono hã tô taha bâtâ na ma tô Izaraéu nhihudu norĩ ma sõmri zaꞌra, za te te daꞌãma iꞌaiꞌuté zaꞌra zéb da hã.
Izaraéu nhihudu norĩ siꞌwapé zaꞌra pari, Sau te te iropisutuzé wasuꞌu
24 Tawamhã tô taha bâtâ na ma tô abꞌuwa zaꞌra Izaraéu nhihudu norĩ hã mrap te. E marĩ wa. Sau hã ropisudu te te ꞌmanharĩ wa, ãne: “Niꞌwa hã ĩnhitobꞌru norĩ hâiba na te ꞌruiwaꞌâbâ zaꞌra wana ré, ã bâtâ na marĩ hã te te ꞌrẽne wamhã, ta hã te za dârâ.” Tahawa, niꞌwa hã marĩ hã te te ꞌrẽne õ di, bâtâ wahuré na hã.
25 Tawamhã marãi u, ma tô uburé aihutu. Sihutu wamhã, tame ma tô ropĩ hã uburé wede mono bâ te te sõpẽtẽ zaꞌra.
26 Wede mono na te ropĩni si tihâimana zaꞌra. Tane nherẽ, niꞌwa hã te te ꞌmaiꞌupsõmri õ di. E marĩ wa. Pahi zaꞌra wa, Sau te te iropisutuzé ma hã.
27 Tane nherẽ, Zonata hã te te wapari õ di, imama Izaraéu nhihudu norĩ ma te te iwaihuꞌuzé hã. Tahawa, ma tô tinhibꞌrata wedehu te te ꞌre iꞌâri hã, ropĩni zadawa u hã sô wẽ, te te ãma ꞌrãsutu diꞌi da, ropĩni na hã. Tawamhã ma tô oto upsõ suru na. Te te upsõmri wamhã, ma tô awaꞌawi niha na hã siwaihuꞌu tãma irowẽzém na hã.
28 Tane nherẽ, te aibâ hã tãma tinha ãne:
— Uburé mrap te wa norĩ hã wa tô abꞌuwa zaꞌra ni, aimama hã te te wama amhâzépata zaꞌra wa, ãne: “Niꞌwa hã ã bâtâ na hã marĩ te te ꞌrẽne wamhã, wa za ropipa hã tãma pisutu za!”
29 Tawamhã Zonata ma ãma sadaꞌâ ãne:
— Ĩmama hã ma tô robꞌmanharĩ wasété, wanhibꞌaꞌuwẽ norĩ ma hã. Maꞌãpé asiwi ĩꞌmadâꞌâ aba. Ĩma rowẽ di wa hã suru na te ꞌmaiꞌupsõmri parimhã, ã hã ropĩ hã.
30 Tahawa, ã bâtâ na wẽ di aré wanhibꞌaꞌuwẽ norĩ te te huri ꞌwaꞌâhã, wanhitobꞌru norĩ ãma wa te aiꞌuté zaꞌra wa, dasa te te iduri mono hã. Pra! E ãhãre aré sadawa nhiptete zaꞌra wa, filisteu norĩ wa te iꞌuprosizé hã.
31 Tawamhã taha bâtâ na Mitima hawi Aizarõ na ꞌri waꞌõtõ nhisi u filisteu norĩ ãma te te aiꞌuté zaꞌra parimhã, ma tô Izaraéu nhihudu norĩ hã abꞌuwa pese zaꞌra, mrap te.
32 Tahawa, tinhitobꞌru norĩ wi poneꞌẽrebâ, powawẽ, duré powawẽ zapu te te iwaibu zaꞌra zô hã, ma tô oto wairé. Tahawa, iwapru zô te te sima sõnhiꞌre hipãrĩ zaꞌra ãna tame te te sima ꞌmaiwĩrĩ zaꞌra wamhã, ma tô tihu waprui ré.
33 Ãne wa, ma tô Sau u hã ꞌmaimo, te te tãma ꞌmairowasuꞌu da hã ãne:
— Maꞌãpé ꞌmadâꞌâ zaꞌra na! Izaraéu nhihudu norĩ hã ma tô tiwasédé hã ꞌRe ihâimana uꞌâsi mono wi hã ꞌmanharĩ zaꞌra. Imorĩꞌrata na abaze te te sima iwapru puꞌu õ zaꞌra nhi hã ma tô siwi tiꞌrẽ, wapru puꞌu õ nherẽ.
Tahawa Sau, mreme ꞌrãihâ na ma tô tinha ãne:
— E niha ma tô aiwasété zaꞌra waꞌwa. Ẽtẽ tõmo wawẽ, we ĩma asiwi pizari aba mono ãwa.
34 Tahawa, te duré Sau hã tãma robꞌru zaꞌra ãne:
— Maꞌãpé Izaraéu nhihudu norĩ tẽme, aiꞌabaꞌréi waꞌaba, tãma nharĩ zaꞌra waꞌaba da, hâiba mono bâ we te te ĩma simroi mono da powawẽ hã, duré poneꞌẽrebâ hã. Tawamhã ãmep si te za siwi simro za te te ihuri da hã. ꞌRe ihâimana uꞌâsi mono wi, tiwasédé te te ꞌmanharĩ zaꞌra tõ da, romnhi hã waprui ré te te ihuri da hã mare di.
Tahawa, ãne te te tãma waihuꞌu zaꞌra wa, ma tô taha mara na uburé hâiba mono bâ hã te te simro powawẽ hã, duré poneꞌẽrebâ hã tame te te siwi simro da.
35 Tawamhã Sau hã ma tô oto ẽne hã saꞌra sisiwipsi, Uburé Danhibꞌapito ma, ãma tãma ꞌre idanhoprub zaꞌra mono zéb da hã. Ãne hã imorĩꞌrata na ma tô ẽtẽ zaꞌra sisiwipsi hã ꞌmanha.
Izaraéu nhihudu norĩ, Zonata te te siwi isõꞌreptuzé wasuꞌu
36 Tawamhã Sau, te tite dasiꞌwapéi ꞌmanharĩꞌwa norĩ ma nharĩ zaꞌra ãne:
— Filisteu norĩ wa te ꞌwapé zaꞌra da hã, bara na ã hã ẽtẽ hawimhã wa te siꞌra zaꞌra waꞌaba za. Tawamhã wa te ãma awẽ u pré zaꞌra wamhã, wa za uburé marĩ tãma ihâimana zaꞌra hã wa te duri. Tawamhã filisteu norĩ hâiba ré wa te wasiwi iꞌmairẽme zaꞌra da hã mare di za.
Tawamhã ma ãma sadaꞌâbâ zaꞌra ãne:
— ꞌManharĩ tô nimahã asima iwẽzéb zarina.
Tane nherẽ, te sasedoti tãma nharĩ zaꞌra ãne:
— Imorĩꞌrata na aꞌâ ꞌRe ihâimana uꞌâsi mono hã wa te wasiwi sadawa pibui waꞌaba, marĩ wa te aꞌâ waihuꞌu zaꞌra da.
37 Tawamhã Sau, ꞌRe ihâimana uꞌâsi mono hã ma te aꞌâ sadawa pibu ãne:
— E filisteu norĩ zô wa za wazahutu zaꞌra, wa te susi zaꞌra da hã. E te za duré a hã ihâiba nhomri zaꞌra, Izaraéu nhihudu norĩ te te ãma aiꞌuté zaꞌra da hã.
Tane nherẽ, tô taha bâtâ na te te ãma sadaꞌâbâ õ di, ꞌRe ihâimana uꞌâsi mono hã.
38 Tahawa, te Sau hã danhibꞌihâꞌa norĩ ma nharĩ zaꞌra ãne:
— We aiꞌabaꞌréi waꞌaba ãwa, ã bâtâ na danhimiꞌmanharĩ wasété zé hã wa te wasiwi upsibi me da.
39 Ãhã na wa hã wa ropisutu, Wanhibꞌapito ꞌRe ihâimana uꞌâsi mono ma hã, Izaraéu nhihudu norĩ nhoꞌreptuiꞌwai ma hã marĩ ꞌmanharĩ wasété ꞌwa hã te iwĩrĩ da hã. Tô ĩꞌra Zonata te te upai hã wamhã, wa za tô tiwĩ ta hã.
Tane nherẽ, niꞌwa hã te te ãma sadaꞌâbâ õ di, ãne te te nharĩ wamhã.
40 Tawamhã Sau ma duré tãma waihuꞌu zaꞌra ãne:
— Õ niwĩ uburé te za aimasa waꞌwa. Tawamhã wa norĩ hã wa za ã niwĩ ĩꞌra Zonataha me wasiwaprosi aimaꞌwara ni za.
Tahawa, ma tô ãma sadaꞌâbâ zaꞌra ãne:
— Iwẽzéb uwaibaba, marĩ hã tô ꞌmanharĩ.
41 Tawamhã Sau hã te Uburé Danhibꞌapito Izaraéu nhihudu norĩ te, ꞌRe ihâimana uꞌâsi mono ma tinha ãne:
— ꞌRe ihâimana uꞌâsi mono, e marĩ wa, ã bâtâ na hã ĩzadaꞌâbâ õ di. Wanhibꞌapito, Izaraéu nhihudu norĩ te ꞌRe ihâimana uꞌâsi mono, maꞌãpé ẽne sasedoti te, wa te wasima ime zaꞌra zém na hã ãma ĩzadaꞌâbâ za. Wa hã marĩ na te upai wamhã, niha wamhã duré Zonata marĩ na te te upai wamhã, maꞌãpé ãma ĩzadaꞌâbâ, ẽne Urĩ na isisi hã ipisutuzéb ãma. Duré asibꞌaꞌuwẽ Izaraéu nhihudu norĩ, marĩ na te te upa zaꞌra wamhã, maꞌãpé ãma ĩzadaꞌâbâ, ẽne Tumi na isisi hã ipisutuzéb ãma.
Tahawa, õ norĩ na si ma tô oto ãma sadaꞌâ Zonataha norĩ na si, Sau me hã. Mare di, Izaraéu nhihudu norĩ dasiꞌwapéi ꞌmanharĩꞌwai ãmamhã.
42 Tahawa, te Sau duré tãma nharĩ zaꞌra ãne, Izaraéu nhihudu norĩ ma hã:
— Maꞌãpé ẽtẽ uiꞌéré hã asiwi wabzuri aba, wa hã te upa zô, niha wamhã duré ĩꞌra te te upa zô, wa hã te waihuꞌu da.
Tawamhã ẽtẽ uiꞌéré te te siwi iwabzuri hâiba amo hã ma tô Zonata hã wasuꞌu.
43 Tawamhã te Sau sadanha ãne:
— E marĩ ma tô iꞌmanha.
Tawamhã Zonata ma asa ãma sadaꞌâ ãne:
— Wa tô ropĩ hã suru na upsõ wedehu ĩnhibꞌrata te ꞌre iꞌâri ꞌrãsutu na te ãma ĩsima idi hã. Tahawa, ãhãta wa ĩhâiba, tô ĩdâꞌâ da hã.
44 Tawamhã Sau te tinha ãne:
— Tô a hã da te aiwĩrĩ dai õ wamhã, ꞌRe ihâimana uꞌâsi mono hã te te ĩwĩrĩ tô.
45 Tane nherẽ, dasiꞌwapéi ꞌmanharĩꞌwa norĩ hã ma tô ãma sadaꞌâbâ zaꞌra ãne:
— Tôꞌã. Zonata idâꞌâ da hã mare di za. Taha nhimipawaptobzéb zarina wa tô Izaraéu nhihudu norĩ hã daꞌãma aiꞌuté zaꞌra ni. Wa norĩ hã wa tô, Wanhibꞌapito ꞌRe ihâimana uꞌâsi mono ma hã ropisutu zaꞌra ni iꞌrãi hawimhã iséré hã da te tiwi ꞌmatari tõ da. Ã bâtâ na marĩ hã te te iꞌmanharĩ na hã ꞌRe ihâimana uꞌâsi mono nhimipawaptobzém na si ma tô ꞌmanha.
Ãne ma tô dasiꞌwapéi ꞌmanharĩꞌwa norĩ hã siwi sõꞌreptu Zonata hã, idâꞌâzé wi.
46 Tawamhã Sau, filisteu norĩ te te iꞌwapé zaꞌra zém na hã ma tô õne haré mazazâ. Tahawa, ma tô tinhiptiꞌai u apâ aiꞌabaꞌré.
Sauhu ꞌra norĩ wasuꞌu
47 Tawamhã Sau Izaraéu nhihudu norĩ ma siꞌiꞌrãnhoꞌõmo parimhã, ma tô iwaptoma isitobꞌru norĩ uburé ꞌre isiꞌubumroi mono norĩ hã aꞌwapé, Moabi na romnhisi ãma ꞌre ihâimana zaꞌra mono norĩ hã, Amo na romnhisi ãma ꞌre ihâimana zaꞌra mono norĩ hã, Edõ na romnhisi ãma ꞌre ihâimana zaꞌra mono norĩ hã, Zoba na romnhisi ãma danhibꞌihâꞌa ꞌre ihâimana zaꞌra mono norĩ hã, duré filisteu norĩ hã. Tawamhã ã norĩ hã te te aꞌwapéi mono wamhã, ma tô uburé ãma aiꞌuté zaꞌra.
48 Sau hã pẽꞌẽwara ãna te te aꞌwapéi wa, ma tô duré ãma aiꞌuté zaꞌra amalequita norĩ ãma hã. Tawamhã ꞌre siꞌwapé zaꞌra mono sidâpâsi ma tô õne uꞌâ Izaraéu nhihudu norĩ ꞌwawimhã ꞌre simapa uꞌâsi.
49 Sau hã siꞌubdatõ iꞌra siꞌaibâ hã: Zonata, Isiwi, duré Maꞌuquisua. Duré iꞌra sipiꞌõ dubꞌrata nhisi hã Merabe na, duré ino nhisi hã Micau na.
50 Imro nhisi hã Ainoꞌã na, Aimaꞌasihi ꞌra hã. Duré dasiꞌwapéi ꞌmanharĩꞌwa norĩ nhibꞌihâꞌa hã Sauhu sisãnawã, Abine na isisi hã, imama amo Nehe ꞌra.
51 Quisi hã Sauhu mama, duré Ne hã Abinehe mama, ta norĩ hã Abiꞌéhé ꞌra zahuré.
52 Tawamhã Sau, ꞌre hâimana mono ré tiꞌai ãmab ré hã, ma tô filisteu norĩ hã sahi sina hã te te ꞌre aꞌwapéi uꞌâsi. Duré ma tô õne uꞌâ aibâ isiptete si duré isibꞌru si te te ꞌre awaibu, te te ꞌre anheme mono da hã, dasiꞌwapéi ꞌmanharĩꞌwa norĩ zu, ime ꞌre nomro mono da.
