1 Samuéu 15:1-35
15 Tawamhã Samuéu te Sauhu ma tinha ãne:
— Wanhibꞌapito ꞌRe ihâimana uꞌâsi mono ma tô ĩma aiꞌru, te aiꞌrãtiꞌi da hã, isibꞌaꞌuwẽ Izaraéu nhihudu norĩ ma asiꞌapito da. Tahawa, te za iwapa ãhã na hã, Wanhibꞌapito Iwaihuꞌu pe te te inharĩzé hã.
2 Amalequita norĩ ma, te za robꞌmanharĩ wasété zaꞌra. E marĩ wa. Izaraéu nhihudu norĩ hã, Ezitu hawi we siꞌabaꞌréi ré te te ꞌwapé zaꞌra wa.
3 Tahawa, te za aimo ãhã na hã, amalequita norĩ aꞌwapé da. Te za uburé pese isimarĩ zaꞌra marĩ hã tiwi iꞌaꞌupro za, ãma aipẽꞌẽzé zaꞌra ãna, duré ãma aiwamri zaꞌra ãna. Uburé pese te za iꞌupro za aibâ norĩ hã, piꞌõ norĩ, aiꞌuté norĩ, aiꞌutépré norĩ, powawẽ norĩ, poneꞌẽrebâ norĩ, awaru baꞌõmore norĩ hã, duré awaru poꞌrepore norĩ zama.
4 Tawamhã Teraꞌĩ na ꞌri nhoꞌõmo nhisi ãma ma tô Sau hã, tite dasiꞌwapéi ꞌmanharĩꞌwa norĩ hã oto awaibu, te te azaꞌrata da. Tawamhã Izaraéu nhihudu norĩ dasiꞌwapéi ꞌmanharĩꞌwa hã para na isiꞌabaꞌré norĩ hã, 200 miu na ihâiba zaꞌra hã. Duré Zuda hawimhã 10 miu na dasiꞌwapéi ꞌmanharĩꞌwa norĩ hã.
5 Tawamhã Sau norĩ hã ma tô aiꞌabaꞌré, tite dasiꞌwapéi ꞌmanharĩꞌwa norĩ me, ꞌriꞌahâ Amalequi na isisi u. Tame te dazô simaꞌuri sina paꞌre ꞌré wa mapari zaꞌra.
6 Tahawa, Sau ma tô poꞌre puꞌu siromo zaꞌra queneu norĩ hã ãne:
— Maꞌãpé aiwairébé aba, amalequita norĩ hawimhã, isu wa hã te aiꞌuprosi aba tõ da. E marĩ wa. A norĩ waꞌwa hã Izaraéu nhihudu norĩ Ezitu hawi we wairébé wamhã, ma tô tãma iꞌmanharĩ wẽ zaꞌra waꞌwa iwẽ hã.
Tawamhã ãne te te poꞌre puꞌu zaꞌra wa, ma tô wairé, queneu norĩ hã.
7 Tawamhã Sau te te ꞌwapé zaꞌra wamhã, ma tô ãma aiꞌuté zaꞌra amalequita norĩ ãma hã Havira na romnhisi hawi Su na romnhisi u hã, Ezitu niwĩ bâtâ pusizém niwĩb u hã.
8 Tahawa, amalequita norĩ te apito Adadi na isisi hã ma tô tiꞌâ te te wĩrĩ ãna. Tane nherẽ, ma tô uburé isibꞌaꞌuwẽ norĩ hã uprosi.
9 Sau tite dasiꞌwapéi ꞌmanharĩꞌwa norĩ me hã te te siwi wĩrĩ õ di, apito Adadi hã. Duré poneꞌẽrebâ iwẽ norĩ zama te te siwi simroi õ di, duré powawẽ ibaꞌu iwẽ norĩ hã, powawẽ zapu iwẽ norĩ hã, poneꞌẽrebâ zéré mapure siꞌaibâ iwẽ norĩ hã, duré uburé marĩ iwẽ norĩ hã. Marĩ iwasété norĩ si ma tô siwi uprosi pese, marĩ dai õ wa, ta hã oto.
ꞌRe ihâimana uꞌâsi mono, Sau te te iwẽꞌõzé wasuꞌu
10 Tawamhã Uburé Danhibꞌapito te Samuéu ma tinha:
11 — Sau hã, ma tô ĩrẽ. Duré te tãma iwaihuꞌuzé hã ma tô ĩmreme rẽ. Tahawa, ma tô ĩwi tirobzeiꞌõ wa hã apito te te iꞌmanharĩzé zabâdâmhã.
Tawamhã ãne te te tãma waihuꞌu wa, ma tô Samuéu wi hã tirobzeiꞌõ duré. Tahawa, mara bâre ma tô mreme ꞌrãihâ na Sauhu ãma hã mre, Uburé Danhibꞌapito ma.
12 Tawamhã ma tô awẽm na Samuéu mararé uptabi watobro, sô rĩtĩ mono da, Sauhu zô. ꞌRiꞌahâ Carmeru na isisi u imorĩ na hã ma tô waihuꞌu, isiptete na ãma ꞌre dawata zaꞌra mono da ẽne hâiwi te te sima isãrĩzéb u, duré taha pari, Gilga u imorĩ na hã ma tô waihuꞌu.
13 Tawamhã Samuéu ma tô Sau hã sõpẽtẽ. Tahawa, Sau hã te te sawi sina, te Samuéu ma tãma tinha ãne:
— Samuéu, wa ĩsima wẽ Wanhibꞌapito ꞌRe ihâimana uꞌâsi mono si iwẽ hã te te aima ꞌre sõmri mono da! Wa hã wa tô Wanhibꞌapito nhimiroti hã te ꞌre wapari pese uꞌâsi.
14 Tawamhã te Samuéu sadanha ãne:
— E marĩ wamhã, wa bété wapa, powawẽ norĩ hârâ hã, duré poneꞌẽrebâ norĩ hârâ zama.
15 Sau hã ma tô ãma tãma waꞌrã ãne:
— Ĩte dasiꞌwapéi ꞌmanharĩꞌwa norĩ, ta hã te te siwi iwaibu, amalequita norĩ wi. Ma tô poneꞌẽrebâ iwẽ norĩ hã siwi waibu, duré powawẽ iwẽ norĩ hã, ate ꞌRe ihâimana uꞌâsi mono ma ãma tãma iwanhoprub zaꞌra zéb da hã. Isiꞌatarẽme norĩ hã wa tô uburé pese wasiwi uprosi ni.
16 Tawamhã Samuéu ma tô Sauhu mreme nhizâ ãne:
— Ariꞌiwi asãmra! Wa za aima wasuꞌu, Wanhibꞌapito ꞌRe ihâimana uꞌâsi mono te te ĩma inharĩzé hã ã mara isiꞌutõrĩ na hã.
Tawamhã Sau ma ãma sadaꞌâ ãne:
— Maꞌãpé wasuꞌu na ĩma.
17 Tawamhã Samuéu te tãma tinha ãne:
— Oro a hã Izaraéu nhihudu norĩ nhibꞌihâꞌa na aihâimana za hã te taré ne hã asiꞌãma irosaꞌra. Tane nherẽ, a hã Wanhibꞌapito ꞌRe ihâimana uꞌâsi mono hã ma tô aiꞌrãtiꞌi, Izaraéu nhihudu norĩ nhibꞌapito na ꞌre aihâimana mono da.
18 Ma tô duré aima tiꞌru, amalequita norĩ uprosi da hã, aꞌuwẽ iwasédé hã. Duré ma tô aima hâiba ꞌru zaꞌra ꞌwapé zaꞌra da hã uburé iꞌuprosi pese zéb u.
19 E marĩ wa, bété wapari õ di, te te aima iwaihuꞌuzé hã. E marĩ wa, te duré bété saꞌẽtẽ tãma aihâiba asitobꞌru norĩ nhimarĩ ma hã asima ꞌmairẽme da. Ãne ꞌmanharĩ wa, ꞌRe ihâimana uꞌâsi mono ma hã upa ti.
20 Tawamhã Sau ma tô ãma tãma waꞌrã ãne:
— Tane nherẽ, wa hã wa tô te ꞌre wapari pese, Wanhibꞌapito ꞌRe ihâimana uꞌâsi mono nhimiroti hã. Taha wab zama, wa tô watobro, te te ĩma iwaihuꞌuzéb zarina. Tawamhã wa tô we ãwisi, apito Adadi, amalequita norĩ te hã. Wa tô duré uburé uprosi, amalequita norĩ hã.
21 Tane nherẽ, ĩte dasiꞌwapéi ꞌmanharĩꞌwa norĩ, powawẽ iwẽ norĩ hã te te siwi simroi õ di, duré poneꞌẽrebâ iwẽ norĩ hã, uburé te te siwi uprosi zaꞌra da nherẽ. Ãne da nherẽ, ma tô Gilga u hã ãwamhã, we te te siwi simro, ꞌRe ihâimana uꞌâsi mono ma, ãma tãma iwanhoprub zaꞌra zéb da hã, Asibꞌapito ma.
22 Tawamhã Samuéu ma duré ãma tãma waꞌrã ãne:
— E ma hã tawamhã tãma iwẽ, Wanhibꞌapito ꞌRe ihâimana uꞌâsi mono ma hã. E dapoꞌre pe. E abaze da te tãma ꞌre izata zaꞌra mono na tãma danhoprubzé.ꞌRe ihâimana uꞌâsi mono, da te ꞌre iwapari pese zaꞌra mono zé hã iwẽ uptabi, poneꞌẽrebâ zéré mapure siꞌaibâ iwẽ na tãma ꞌre idanhoprub zaꞌra mono zém nhipai u.
23 Wanhibꞌapito wi tiwi ꞌre idasipizari zaꞌra mono hã pire uptabi di, aiwa simiꞌâ na da te ꞌre iromhuri zaꞌra mono ne. Duré ꞌrâwi ꞌre idasiꞌmadâꞌâ ze zaꞌra mono hã tô dawasédé, romhâibarĩ na ꞌre idawata zaꞌra mono zém ne.Tahawa, ma tô Wanhibꞌapito siwi aiwẽꞌõ. E marĩ wa. Aima isimirotizé hã, asiwi wẽꞌõ wa, a hã.
24 Tawamhã Sau ma tô ãma tãma waꞌrã ãne:
— Wa tô ĩwasédé hã ꞌmanha tô. ꞌRe ihâimana uꞌâsi mono Wanhibꞌapito nhimiroti hã te wapari õ di, a hã duré ĩma iwaihuꞌuzéb zama te wapari õ di. Izaraéu nhihudu norĩ ma hã wa tô ĩpahi. Tahawa, wa tô ꞌmanha, te te sima iwẽ zaꞌra zé hã.
25 Tane nherẽ, ãhã na Samuéu, ĩwasédé te iꞌmanharĩzé hã, ĩꞌãma ꞌre ꞌmadâꞌâ uꞌâsi mono tõ da, wa za aiwi waptẽ, duré apâ ãma ĩsiré aimorĩ da, Wanhibꞌapito ãma ĩwata da hã.
26 Tawamhã Samuéu ma ãma tãma waꞌrã ãne:
— Ãma asiré ĩmorĩ õ di za. A hã ma tô iwẽꞌõ Wanhibꞌapito ꞌRe ihâimana uꞌâsi mono te te aima irotizé hã. Taha zarina, ma tô duré aiwẽꞌõ, Izaraéu nhihudu norĩ nhibꞌapito na iꞌaihâimanazém na hã.
27 Tawamhã Samuéu hã ãne te te tãma nharĩ pari, ma tô aipiꞌra, morĩ da oto. Tahawa, Sau tiꞌuza ihâpa zarébé ãma ma tô hâ tété tinhibꞌrata na hã. Tawamhã ma tô õne haré tiꞌuza hã hâiwazu.
28 Tawamhã Samuéu te duré tinha ãne:
— Ã bâtâ na ma tô ꞌRe ihâimana uꞌâsi mono hã aiwi hâiwazu, Izaraéu nhihudu norĩ ꞌmadâꞌâzé hã. Tahawa, ma tô oto tisõ, asipai u iwẽ ma, Izaraéu nhihudu norĩ nhibꞌihâꞌa da ma.
29 Izaraéu nhihudu norĩ nhibꞌapito, ꞌRe ihâimana uꞌâsi mono hã sadawa nhipese waihuꞌu õ di, duré te te ãma saprĩ waihuꞌu õ di, tinhimirosaꞌrata na hã. E marĩ wa. Õ hã tiꞌai ãma aꞌuwẽ ne hãi õ di. Tahawa, tinhimirosaꞌrata na te te saprĩ õ di.
30 Tawamhã Sau timreme na hã ma tô duré ãma sahu ãne:
— Wa hã wa tô ĩwasédé hã ꞌmanha. Tane nherẽ, maꞌãpé ĩwazé na za, uburé danhibꞌihâꞌa norĩ nhoꞌremhã, duré uburé Izaraéu nhihudu norĩ nhoꞌremhã. Apâ ãma ĩsiré aimorĩ, Asibꞌapito ꞌRe ihâimana uꞌâsi mono ãma, ãma ĩwata da.
31 Ãne wa ma tô Samuéu hã isiré hã mo. Tahawa, ma tô oto Sau hã ãma tiwata, Uburé Danhibꞌapito ãmamhã.
32 Tawamhã Samuéu ma tô dasiꞌwapéi ꞌmanharĩꞌwa norĩ ma ꞌru zaꞌra ãne:
— Maꞌãpé we ãwa saprõni aba, apito Adadi hã.
Tawamhã apito Adadi hã ma tô rẽrẽꞌẽ sina itẽme mo, Sauhu tẽme. ꞌRâwi te sima rosaꞌrata ãne: “E pipa ã bâ wa za isé na hã dârâ.”
33 Tawamhã te Samuéu hã tãma tinha ãne:
— Asiꞌwa hã dana norĩ ꞌra ãna ꞌre hâimana zaꞌra mono da, te te tãma ꞌre iꞌmanharĩ zaꞌra mono ne, te za ãhã na hã ana zama oto ꞌra ãna tihâiba.
Taha pari, ma tô oto Samuéu hã ãma aiwã õne haré, Gilga ãma, danhoprubzéb da, ẽtẽ zaꞌra nhoꞌre.
34 Taha pari Samuéu hã, Rama na ꞌri nhoꞌõmo nhisi u ma tô oto mo. Sau hã te duré tinhorõwa u oto mo, ꞌriꞌahâ Zibea u.
35 Tawamhã niwamhã Samuéu te te oto ꞌmadâꞌâ na sitéb õ di Sau hã. Tane nherẽ, ma tô ipẽ hã ãma wĩrĩ pese. Duré Uburé Danhibꞌapito wi hã ma tô tiwi tirobzeiꞌõ, Izaraéu nhihudu norĩ nhibꞌihâꞌa da, marĩ da Sau hã te te sẽrẽ wa.
