1 Samuéu 16:1-23
16 Tawamhã Uburé Danhibꞌapito te Samuéu ma tinha ãne:
— E momo te za Sauhu ãma aipẽꞌẽzézé hã iꞌrãsu. Wa hã te ĩsima wẽ zahu õ di, Izaraéu nhihudu norĩ nhibꞌapito na ꞌre ihâimana mono da hã. Tahawa, maꞌãpé azeitona ꞌrãi waꞌu hã ꞌmasisi abazei õmo ꞌre, asiré âri da. Taha parimhã te za aimo, Belẽ na ꞌriꞌahâ nhisi u aibâ Zésé na isisi nhorõwa u. E marĩ wa. Wa hã iꞌra norĩ wa tô ꞌmaipisutu, iꞌmasiꞌapito da hã.
2 Tawamhã Samuéu ma tô ãma sadaꞌâ ãne:
— E niha wa za ꞌmanha. Sau hã bété za ãne hã te te waihuꞌu wamhã, te za ĩwĩ!
Tawamhã Uburé Danhibꞌapito ma ãma tãma waꞌrã ãne:
— Te za powawẽ zapu hã ãma iꞌmazaprõ. Tawamhã te za tãma asiwasuꞌu, ꞌRe ihâimana uꞌâsi mono ma abaze zata na tãma asõprub da, õwa iꞌaimorĩ na hã.
3 Tahawa, Zésé hã te za iwaptẽ, ĩma danhoprubzéb ãma aime hâimana da hã. Tawamhã wa za wa hã aima hâiꞌré, marĩ iꞌmanharĩzéb da hã. Ãhã wamhã, te za a hã iꞌrãti, apito da, wa hã te ipisudu hã.
4 Tawamhã Samuéu hã ma tô ꞌmanha, Uburé Danhibꞌapito te te tãma iꞌruzéb uwaibaba. Taha pari, ma tô Belẽ u hã mo. Tawamhã oto wisi wamhã, ꞌriꞌahâ ãma dama iꞌrãnhoꞌõmo norĩ hã ma tô pahi te rẽrẽꞌẽ sina, sina uzusi zaꞌra. Tawamhã te ãne siwi sadanha:
— E aiwaimri na te we aimo, ã wamhã.
5 Tawamhã Samuéu ma ãma tãma waꞌrãmi zaꞌra ãne:
— Ĩhe. ꞌRe ihâimana uꞌâsi mono ma ĩnhoprub da si wa we robꞌupa ã wamhã. Tahawa, we ĩme aiꞌabaꞌréi waꞌaba da hã, maꞌãpé ꞌRe ihâimana uꞌâsi mono ma asimirosaꞌrata na asisõmri zaꞌra waꞌaba.
Tawamhã Zéséhé ma, ma tô duré tãma tiꞌru iꞌra norĩ zama aꞌâ tinhimirosaꞌrata na sisõmri zaꞌra da. Taha pari, ma tô oto sô hâ ime siꞌabaꞌré da, ꞌRe ihâimana uꞌâsi mono ma danhoprubzéb u hã.
6 Tawamhã oto itẽme sihutu wamhã, ma tô Samuéu hã ꞌmadâ Eliabe na isisi Zéséhé ꞌra hã. Tahawa, ma tô rosaꞌrata ãne: “Ã hã aibâ Wanhibꞌapito ꞌRe ihâimana uꞌâsi mono nhoꞌre isa hã tô sena, Wanhibꞌapito te te ipisudu.”
7 Tane nherẽ, te Uburé Danhibꞌapito tãma tinha ãne:
— Ihâiba mana wawi iwẽ na hã duré iꞌrãihâ na hã, ꞌmadâꞌâ ze tõ, ã hã aibâ hã. Wa tô wẽꞌõ wa hã. E marĩ wa. Dahâiba wẽ zéb zarina da te ꞌre idapisutu zaꞌra mono ne hãi õ wa, ĩnhimipisutuzé hã. Dapẽꞌẽ ꞌre dahâimana wẽ zéb zarina si ĩnhimiꞌmadâꞌâzé hã, wa hã.
8 Tawamhã Zésé ma tô sô hâ, tiꞌra Abinadabi na isisi zô. Tawamhã ma tô duré saprõ Samuéu u hã. Tahawa, Samuéu te duré ãma tãma tinha ãne:
— Ãhã zama Wanhibꞌapito ꞌRe ihâimana uꞌâsi mono hã te te pisutu õ di.
9 Tawamhã Zésé te duré itẽme saprõ, tiꞌra Simeza na isisi hã. Taha na te duré tãma tinha ãne:
— Taha zama te te duré pisutu õ di, Wanhibꞌapito ꞌRe ihâimana uꞌâsi mono hã.
10 Ãne ma tô Zésé hã tiꞌra 7 na ihâiba zaꞌra norĩ hã te te nasi anhimro, Samuéu u hã. Tahawa, te Zéséhé ma tinha ãne:
— Ã norĩ hã te te ꞌmaipisutu õ di, Wanhibꞌapito ꞌRe ihâimana uꞌâsi mono hã.
11 Tahawa, te Zésé sadanha ãne:
— E aimawi hã aiꞌra ꞌmaihâimana õ di duré.
Tawamhã Zésé ma ãma sadaꞌâ ãne:
— Iré hã danhobabati hã. Tane nherẽ, aꞌubuni wi te ta hã poneꞌẽrebâ hã te te ꞌre abꞌmadâꞌâ.
Tawamhã te Samuéu tãma tinha, ãne:
— Maꞌãpé sô daꞌmazatõrĩ, we da te saprõni da. We wisi õ nherẽ, wasaihuri da, aꞌâ wasiꞌubumroi õ di za.
12 Tawamhã Zésé ma tô oto sô daꞌmazatõ. Ta hã aiꞌrepudu iwẽ, ihâiba ꞌmadâꞌâ ze, duré itõmo ꞌmadâꞌâ ze. Tawamhã Uburé Danhibꞌapito te Samuéu ma tinha ãne:
— Ĩhe ta hã. Maꞌãpé ꞌrãtiꞌi.
13 Tawamhã Samuéu ma tô oto tiꞌâ abazei u azeitona ꞌrãi waꞌui ré hã. Taha na ma tô oto ꞌrãtiꞌi Dawi hã, isisãnawã norĩ nhoꞌre. Tahawa, ꞌRe ihâimana uꞌâsi mono pẽꞌẽzani hã ma tô Dawihi wamhã oto iwab ãzé siptete na ãma ꞌre ihâimana mono zéb da hã. Tawamhã ta hawim haré ma tô ipẽꞌẽ ꞌremhã ꞌre hâimana. Tawamhã Samuéu Rama u te oto apâ mo.
Dawi norĩ wasuꞌu, Sauhu me
14 Tawamhã Uburé Danhibꞌapito pẽꞌẽzani hã ma tô oto watobro, Sauhu hâiba hawimhã. Tahawa, ma tô oto iwaꞌrãmi iwab ãzé, waꞌuburé hã, ꞌRe ihâimana uꞌâsi mono te te itẽme tãma irobꞌru hã. Tahawa, te oto waꞌuburé hã wasutu.
15 Tawamhã te Sauhu ma romhuriꞌwa norĩ hã tãma nharĩ zaꞌra ãne:
— Wa norĩ hã wa tô waihuꞌu zaꞌra ni, ꞌRe ihâimana uꞌâsi mono waꞌuburé we te te atẽme isatõrĩ te te iꞌaiwasutu na hã.
16 Maꞌãpé tahawa wasiꞌabaꞌré da hã wazatõrĩ zaꞌra na, aibâ rowamreme waihuꞌu pese ꞌwa zô ꞌre wanhopré mono da. Tawamhã duré waꞌuburé aiwap sébré da, we atẽme morĩ wamhã, aibâ te za rowamremezé hã taꞌa. Ãhã wamhã, apâ aima rowẽ di za.
17 Tawamhã Sau ma tô tãma waihuꞌu zaꞌra ãne:
— Maꞌãpé aibâ rowamreme wẽ ꞌwa zô asõpré waꞌaba mono da aiꞌabaꞌréi waꞌaba. Tawamhã asiwi ꞌmanhopẽtẽ aba wamhã, we ãwa asiwi saprõni aba za.
18 Tawamhã tãma romhuriꞌwa ma tô ãma ꞌmazadaꞌâ ãne:
— Wa hã ĩma waihuꞌu pese di, ꞌriꞌahâ Belẽ na isisi ãma Zésé ꞌre isãmra mono ꞌra hã. Ta hã rowamreme wẽ ꞌwai uptabi. Ta hã duré ipahi waihuꞌu õ, isiptede, duré dasiꞌwapéi ꞌmanharĩꞌwa iwẽ, imreme wẽ, duré ihâiba wẽ. Uburé Danhibꞌapito hã te duré ime ꞌre hâimana.
19 Tahawa, ma tô oto Sau hã aibâ norĩ hã satõrĩ zaꞌra ãne na romreme ré, Zéséhé u hã:
— Aiꞌra Dawi hã we ĩtẽme satõrĩ, poneꞌẽrebâ te te ꞌre iꞌabꞌmadâꞌâ mono hã.
20 Tawamhã Zésé ma tô tiꞌra Dawi hã tãma satõ, Sauhu ma. Tahawa, Dawi hã ma tô tinhibzari te te tãma isõmri da hã tãma tiꞌâ, abazei hâ na ubꞌrẽ ꞌmanharĩ iꞌmasi hã uwa ꞌrãi waꞌu isé na. Ma tô duré tãma saprõ, poneꞌẽrebâ zéré uzé ꞌra hã. Tawamhã iꞌuꞌẽtẽ wapu ré hã ma tô duré tãma iré saprõ, awaru poꞌrepore hã.
21 Tawamhã Dawi hã ma tô oto mo. Morĩ wamhã, ma tô nasi tãma romhu, Sauhu ma hã. Tahawa, Sauhu ma hã wẽ uptabi di Dawi hã. Tawamhã ma tô oto pisutu isiꞌwapézé hã te te tãma ꞌre mrami mono da.
22 Tahawa, ma tô imama Zéséhé ma romreme tãma tisõ ãne:
— Ĩma hã wẽ uptabi di, aiꞌra Dawi hã. Tahawa, e we tãma waprosi õ di za, ãme ꞌre hâimana mono da, ĩnhimiromhurizéb ãma.
23 Tawamhã ꞌRe ihâimana uꞌâsi mono, waꞌuburé te te isatõrĩ, ꞌre zasi mono sidâpâsi, Sauhu wamhã, ma tô Dawi hã tinhiptaꞌazé hã te te ꞌre mrami, te te ꞌre taꞌa mono da hã. Tahawa, Sauhu hawimhã ma tô duré ꞌre pusi, waꞌuburé hã. Tahawa, ma tô duré apâ tãma ꞌre rowẽ, Sauhu ma hã.
