1 Samuéu 18:1-30
18 Tawamhã Sau norĩ hã Dawihi me ma tô oto sima robzanhamri pari zahuré. Tahawa, Zonata, Sauhu ꞌra pẽꞌẽ ꞌremhã, ma tô Dawihi zawi hã iwab ãzé. Tahawa, ipẽꞌẽ ꞌremhã tãma sawi uptabi di oto, ꞌrâwi tihâiba te te ꞌre isisawi pese mono ne.
2 Tawamhã taha hawim haré ma tô Sau hã te te ꞌre ꞌmadâꞌâ Dawi hã, isiré ꞌre hâimana mono da oto, isõrõwa ãma. Timama nhorõwa u, apâ morĩ da hã, te te tãma waprosi õ di.
3 Tawamhã Zonata norĩ hã Dawihi me, ma tô sena na ropisutu zahi hã sima ꞌmanharĩ zahuré, tinhimizawi zahuré zém na hã. E marĩ wa. Zonata Dawihi ãma ipẽꞌẽzézé hã saꞌẽtẽ uptabi wa.
4 Tahawa, ma tô tisiꞌuzazé ihâpa hã waze, te te tãma sõmri da, Dawihi ma. Tite dasiꞌwapéi ꞌmanharĩꞌwai uza zama ma tãma tisõ, sibꞌézé ꞌwapa hã, umnhiꞌã hã duré tiꞌusisizé hã.
5 Tawamhã Dawi uburé dazaꞌrui mono bâ Sau te te ꞌre isatõrĩzé mono sidâpâsi, ma tô wẽ na hã ꞌre pusi. Tahawa, Sau hã ma tô oto pisutu, ite dasiꞌwapéi ꞌmanharĩꞌwa norĩ nhibꞌihâꞌa da hã. Ãne wa, ma tô uburé dasiꞌwapéi ꞌmanharĩꞌwa norĩ ma tirowẽ zaꞌra, duré ta norĩ ꞌmadâꞌâꞌwa norĩ ma zama.
Sau, Dawi te te iꞌruiwaparizé wasuꞌu
6 Dawi, Gulia te te wĩrĩ pari, dasiꞌwapéi ꞌmanharĩꞌwa norĩ apâ siꞌabaꞌréi wamhã, ma tô uburé ꞌriꞌahâ mono bâ Izaraéu nhihudu norĩ nhiptiꞌai ãma piꞌõ norĩ hã wairé, apito Sau te te siwi sõpẽtẽ da, sõꞌre zaꞌra sina rowẽ te, siꞌrẽne zaꞌra mono sina, piza baihâ ꞌmanharĩ na te te roptaꞌa zaꞌra mono sina, duré rowamremezé te te siwi sõrõtaꞌa mono sina.
7 Tahawa, te piꞌõ norĩ hã ãne tinhoꞌre zaꞌra, rowẽ te:
“Sau ma tô miu na hã dapã. Duré Dawi ma tô 10 miu na hã dapã!”
8 Tawamhã ãne hã te te wapari wamhã, Sauhu ma te te rowẽ õ di. Tahawa, ma tô iwa aimei pese. Iwa simei pese wa, te tawamhã tinha ãne:
— Piꞌõ norĩ ma tô ĩꞌãma tinhoꞌre zaꞌra miu na te idaꞌuprosi na hã. Tane nherẽ, Dawihi ãma ma tô ĩnhipai u ãma tinhoꞌre zaꞌra 10 miu na te te idaꞌuprosi na hã. Pra! Isiꞌapito da si te oto tawamhã tiwi sô rowaptâ, ãhã na hã.
9 Tawamhã taha bâtâ hawim haré ma tô Sau hã Dawi te te ꞌre ꞌruiwapari uꞌâsi.
10 Tawamhã ãma awẽ wamhã, ma tô waꞌuburé itẽme satõ, ꞌRe ihâimana uꞌâsi mono hã Sauhu wa, iwap sébré da. Tahawa, ma tô ꞌrãihaiwamna, ꞌri paramhã. Dawi hã te roptaꞌa tinhiptaꞌazém na hã, awẽ sidâpâsi te te nasi iroptaꞌazém ne. Taha ré te Sau hã tinhibꞌrata na tété, isiꞌuwazi ꞌrãꞌwa hã.
11 Tahawa, te Sau hã ãne sima rosaꞌrata:
— Wa za Dawihi ãma ꞌri naꞌrata nhiptâꞌâre, te ãma tétére da.
Tawamhã isiꞌuwazi ꞌrãꞌwa na ma tô maparane ãma simri, te te ãma waꞌré da aré. Tane nherẽ, ma tô Dawi hã duré maparane tiwi tiwaꞌa.
12 Wanhibꞌapito te Dawihi siré ꞌre hâimana oto. Sauhu si ma tô tirẽ. Tahawa, Sau hã Dawihi ma pahi uptabi di oto.
13 Tahawa, ma tô Sau hã oto sihawi aiꞌré, Dawi hã, miu na dasiꞌwapéi ꞌmanharĩꞌwa norĩ ꞌmadâꞌâꞌwa na si ꞌre hâimana mono da oto. Tahawa, Dawi ma tô ite dasiꞌwapéi ꞌmanharĩꞌwa norĩ hã te te ꞌre abꞌmadâꞌâ, dasiꞌwapéi wamhã.
14 Tawamhã uburé marĩ hã te te ꞌre abꞌmanharĩ mono wamhã, ma tô iwẽ na si ꞌre pusi, te te ꞌre iꞌabꞌmanharĩ mono da hã. E marĩ wa. Wanhibꞌapito ime ꞌre hâimana mono wa.
15 Tawamhã Sau hã ma tô te ꞌre ꞌmadâꞌâ, Dawi hã tinhimiꞌmanharĩzém na te te ãma ꞌre iꞌaꞌuwaimrami wẽ mono zé hã. Tahawa, ma tô tãma tipahi pese oto.
16 Tane nherẽ, Izaraéu nhihudu norĩ nhiptiꞌai ãma hã, duré uburé Zudaha nhihudu norĩ nhiptiꞌai ãma aꞌuwẽ hã, ma tô Dawi te te siwi ꞌre sawi pese. E marĩ wa. Õ hã dama iꞌrãnhoꞌu isiptete uptabi ꞌre hâimana mono wa.
Dawi hã Sauhu ꞌra na imrozé wasuꞌu
17 Tawamhã Sau te Dawihi ma tinha ãne:
— Ãhãta ĩꞌra ipotoꞌrada, Merabe na isisi hã. Ã hã wa za aima tisõ, ãma aimro da hã. Tawamhã a hã dasiꞌwapéi ꞌmanharĩꞌwa asiptete na te za ĩma ꞌre aihâimana mo za ĩma aiꞌumnhasi na, duré Uburé Danhibꞌapito te dasiꞌwapé na ãma ꞌre aiꞌwapéi mono da.
Sau te rosaꞌrata ãne: “Te iwĩrĩ da hã mare di wa hã. Ĩma wẽ di filisteu norĩ si ĩꞌupana te te siwi iwĩrĩ da hã.”
18 Tawamhã Dawi ma tô ãma tãma waꞌrã ãne:
— Pra! E ꞌwa hã wa hã, apito saꞌõmo na ꞌre ĩhâimana mono da hã. Duré e ꞌwam norĩ ĩmama norĩ Izaraéu nhihudu norĩ nhiptiꞌai ꞌremhã, wa hã apito saꞌõmo na ꞌre ĩhâimana mono da hã. Tarére hã wa hã.
19 Tawamhã Sauhu ꞌra Merabe hã Dawihi ãma imrozéb da hã, oto iwa waptãꞌã wamhã, ma tô Sau hã Dawihi upana Adriꞌéhé ma hã tisõ, ꞌriꞌahâ Meꞌora na isisi na ꞌre ihâimana mono ãmap si mro da.
20 Tane nherẽ, Sauhu ꞌra hâiba amo Micau na isisi hã ma tô sima wẽ pese, Dawi hã. Tahawa, ãne na hã Sau te te waihuꞌu wamhã, ma tô apâ pẽꞌẽ nomro tahawa apâ tãma rowẽ di.
21 Tahawa, te ãne rosaꞌrata: “Micau si wa za tãma tisõ, Dawihi ma hã, taha na si mro da. Tawamhã ta hã te za isimizaꞌrepese norĩ nhimirobꞌmanharĩzém na ãma sô tihâiba za, filisteu norĩ te te siwi iwĩrĩ da hã.”
Tahawa, Sau maparane ãmam na te duré tãma tinha ãne, Dawihi ma hã:
— A hã za tô ĩsaꞌõmo.
22 Tawamhã Sau tite romhuriꞌwa norĩ ma, ma tô tãma waihuꞌu zaꞌra, Dawihi ma hâiba si te te tãma robzanhamri zaꞌra da. Tahawa, te ãne tãma rowasuꞌu zaꞌra:
— Apito ma hã aiwẽ di. Duré uburé ite romhuriꞌwa norĩ ma zama aiwẽ zaꞌra di. Ãhã wa, iꞌra na aimro da hã wẽ di ãhã na hã.
23 Tawamhã ãne te te tãma rowasuꞌu zaꞌra wa, ma te Dawi hã ãma tãma waꞌrãmi zaꞌra ãne:
— E wapu bâ, apito saꞌõmo na ꞌre ĩhâimana mono da hã pire di. Wa hã tarére hã, aibâ ĩnhimarĩ ãna ꞌre ĩhâimana mono.
24 Tawamhã Sauhu ma, ma tô tãma wasuꞌu zaꞌra, tãma iromhuriꞌwa norĩ hã, Dawi te te tãma inharĩ zaꞌra zé hã.
25 Tahawa, ma duré tãma waihuꞌu zaꞌra, Dawihi ma, te te tãma nharĩ zaꞌra da ãne:
— Ãhã si te apito hã sima wẽ, aimro ãma iwaꞌâbâ da hã, filisteu isiꞌutõrĩ nhihâiwata nhihâri hã 100 na, taha na te te siwi sé nhiꞌra da, isitobꞌru hã. Taha si. Marĩ aimawi hã te te waptẽrẽ õ di aiwi.
Ãne ma tô Sau hã rosaꞌrada hã, Dawihi ãma ꞌmanha filisteu norĩ si te te siwi wĩrĩ da.
26 Tawamhã Dawihi ma, ma tô duré tãma rowasuꞌu zaꞌra, Sauhu ma romhuriꞌwa norĩ hã, Sau te te tãma iwaihuꞌu zaꞌra zém na hã. Tawamhã ma tô oto sina simirosaꞌrata wẽsã, za apito saꞌõmo na ꞌre ihâimana mono zém na hã. Tawamhã iꞌra na za imrozéb da bâdâdi wana ré,
27 ma tô Dawi tite dasiꞌwapéi ꞌmanharĩꞌwa norĩ me hã aiꞌabaꞌré. Tahawa, ma tô filisteu norĩ hã siwi uprosi 200 na. Tawamhã Dawi ma tô tãma tidu, Sauhu ma, filisteu norĩ idâꞌâ zaꞌra nhihâiwada te te isihâri zaꞌra hã. Isõꞌa ma tô duré saꞌrata zaꞌra isihâiwata zaꞌra hã, taha zarina isaꞌõmo na oto ꞌre hâimana mono da. Tahawa, Sau hã ma tô oto tiꞌra Micau hã tãma tisõ, Dawihi ma, ãma mro da.
28 Tawamhã Sau ma tô oto ãma poꞌrepuru, Uburé Danhibꞌapito Dawihi siré ꞌre ihâimana mono zém na hã, duré iꞌra Micau hã Dawi te te ꞌre isawi pese mono na hã.
29 Tahawa, Dawihi ma hã pahi uptabi di oto. Tawamhã idâꞌâzéb u Sau hã, ma tô Dawihi nhitobꞌru na hã ꞌre hâimana uꞌâsi oto.
30 Tawamhã filisteu dasiꞌwapéi ꞌmanharĩꞌwa norĩ hã Izaraéu nhihudu norĩ te te ꞌre ꞌwapé zaꞌra mono da, sô ꞌre pusi mono sidâpâsi ma tô Dawi hã te te ãma ꞌre aiꞌuté zaꞌra, uburé Sauhu ma romhuriꞌwa norĩ nhipai u hã. Tawamhã ãne wa, Dawi hã dama wasuꞌu zaꞌẽtẽ di oto, dazaꞌrui mono bâ hã.
