1 Samuéu 19:1-24
19 Tawamhã Sau ma tô tiꞌra Zonataha ma wasuꞌu, uburé tãma romhuriꞌwa norĩ ma zama, Dawi te te wĩrĩ da, te te sima irosaꞌratazém na hã. Tane nherẽ, Dawi hã Zonataha siwaihuꞌu uptabi na te tãma tihâiba.
2 Tahawa, te ãne timama hã tãma wasuꞌu, Dawihi ma:
— Ĩmama te aiꞌãma sima rosaꞌrata, te te aiwĩrĩ da. Tahawa, awẽ mararé hã asipibui pese za. Nima niwĩ piꞌuriwi aimaꞌuri za, tame aꞌâ asãmra da.
3 Tawamhã wa hã wa za ĩmama zô mapa, aꞌubuni wi aimaꞌuri ré nimame, te tãma nharĩ da, aihâiba na hã. Tawamhã marĩ te tiwi upsibi mei wamhã, wa za aipoꞌre puꞌu.
4 Tawamhã Zonata, timama ma, ma tô Dawi hã tãma wasuꞌu wẽ ãne:
— Ĩmama, marĩ iwasédé hã tãma ꞌmanharĩ tõ, aima romhuriꞌwa Dawihi ma hã. E marĩ wa. Niwamhã õ hã marĩ iwasédé hã te te aiwi ꞌmanharĩ õ di. Iwẽ na si uburé ma tô te te ꞌre aipawapto.
5 Õ hã sĩrĩtĩ zawi õ di. Gulia simimnhasi nherẽ, ma tô tiwĩ. Tahawa, Wanhibꞌapito ꞌRe ihâimana uꞌâsi mono nhisi na ma tô ãma aiꞌuté, Izaraéu nhihudu norĩ te te anhoꞌreptu da hã. Duré te te ãma aiꞌuté ré hã a hã ma tô asiꞌuihâ na iꞌmadâ. Tahawa, aima rowẽ di. Ĩmama, e marĩ wa, te za bété ãne nherẽ, iwasédé hã tãma iꞌmanha. E marĩ te te ꞌmanharĩ bâ te za Dawi hã iwĩ.
6 Tawamhã ãne te te tãma waihuꞌu wa, ma tô Sau tiꞌra Zonataha mreme hã saze. Tahawa, ma tô ropisutu, Uburé Danhibꞌapito idâꞌâꞌõ nhisi na, Dawi hã te te wĩrĩ tõ da.
7 Tawamhã Zonata ma tô oto sô hâ, Dawihi zô. Tahawa, ma tô uburé tãma wasuꞌu, imama te te tãma iwaihuꞌuzé hã. Tawamhã te te tãma rowasuꞌu pari, ma tô apâ saprõ Sauhu u hã. Tahawa, ma tô Dawi hã apâ te te tãma ꞌre romhuri apito ma, iwana te te tãma ꞌre iromhuri mono ne.
8 Tawamhã dasiꞌwapé hã ma duré watobro, filisteu norĩ da hã. Tahawa, Dawi hã ma tô sô tiwatobro zaꞌra, te te ꞌwapé zaꞌra da. Tawamhã ma tô ãma aiꞌuté pese zaꞌra. Ma tô tãma sisaꞌre, Dawihi ma hã.
9 Tawamhã nimahã bâtâ na ma tô Uburé Danhibꞌapito waꞌuburé hã itẽme satõ, Sauhu u hã, iwap sébré da. Tahawa, tinhorõwa ãma te nhamra tite isiꞌuwazi ꞌrãꞌwa ré tinhibꞌrata. Dawi hã te tame iꞌrata nhamra, tinhiptaꞌazé hã te te taꞌa sina.
10 Tawamhã Sau Dawihi ãma te te ꞌri naꞌrata nhiptâꞌâ pibu da, ma tô aré ãma simri tite isiꞌuwazi ꞌrãꞌwa na hã. Tane nherẽ, ma tô tiwi tiwaꞌa. Tahawa, ma tô ꞌri naꞌrata si iꞌupana ãma siptâꞌâ. Tahawa, Dawi hã ma tô duré tiwi aimani, sina isõwẽ hawi.
11 Tawamhã tô taha marabâre Dawihi nhorõwa te te nasi siwi sô sabu da hã, ma tô Sau nima norĩ aibâ ma hã tãma robꞌru zaꞌra, awẽm na ãne mararé te te siwi wĩrĩ da oto. Tane nherẽ, Dawihi mro Micau ma tô poꞌrepuꞌu ãne:
— Ã mara na aimani õ wamhã, awẽmhã te za oto atâ.
12 Tawamhã imro ma tô ãma siꞌra Dawihi ãma, zanela ꞌri zadazâri na. Tahawa, ma tô dawi aimani.
13 Tawamhã te te oto ãma siꞌrai pari, ma tô Micau hã tiꞌâ romhâibarĩ isõrõwa ꞌre, ꞌre isa mono hã. Tawamhã ma tô tihi, tizaꞌwari zahuré zéb ãma. Iꞌrã ãma ma duré tihi, poneꞌẽrebâ hâ zéré hã. Taha pari, ma suwa.
14 Tawamhã Sauhu nhibꞌaꞌuwẽ norĩ, tô Dawi te te siwi âri da siꞌabaꞌréi wamhã, ma tô Micau hã tãma wasuꞌu zaꞌra ihâzé na hã.
15 Tawamhã Sau te duré apâ satõrĩ zaꞌra isibꞌaꞌuwẽ norĩ hã, Dawi te te siwi ꞌmadâꞌâ da titõmo na. Te duré ãne tãma nharĩ zaꞌra:
— Dawi hã waptâ wa nomro ré, te za we asiwi isaprõni ꞌwa, te wĩrĩ da za, wa hã.
16 Tawamhã ma tô oto asisi ꞌri para u. Tane nherẽ, ma tô romhâiba si siwi tisã waptâ wamhã, poneꞌẽrebâ hâ zéré na ꞌrãꞌubu ré inomro hã.
17 Tahawa, te Sau hã tiꞌra Micau hã sadanha ãne:
— E marĩ da, ma tô ãne na ĩma asadawa nhipese sina hã irobꞌmanha tô simani da ĩnhitobꞌru hã.
Tawamhã ma tô ãma tãma waꞌrã ãne, timama ma hã:
— Simani da, te pawaptob õ wamhã, te aré u ĩwĩ. Ãne ma tô ĩma tinha.
18 Tawamhã Dawi hã ma tô oto aimani. Tahawa, ma tô mo Rama u. Tamomo wisi wamhã, ma tô uburé Samuéu ma hã wasuꞌu, Sau sada hâimana mono wa, te te tãma irobꞌmanharĩ mono zé hã. Taha pari, ma tô oto tineb zahuré, ꞌRe ihâimana uꞌâsi mono zadawa ꞌmahârâꞌwa norĩ nhorõwa u, tame simasisi da.
19 Tawamhã Sau ma tô waihuꞌu, Dawi Rama ãma ihâimana na hã.
20 Tahawa, ma tô aibâ norĩ hã sô satõrĩ zaꞌra, te te siwi âri da hã. Tawamhã oto sihutu wamhã, ma tô ꞌRe ihâimana uꞌâsi mono zadawa ꞌmahârâꞌwa norĩ imreme na te te dama rowasuꞌu zaꞌra mono ré hã ꞌmadâꞌâ zaꞌra. Tahawa, te Samuéu hã romhuriꞌwa nhibꞌihâꞌa na hã tihâiba. Tahawa, ma tô duré ꞌRe ihâimana uꞌâsi mono pẽꞌẽzani hã iwab asisi Sau aibâ norĩ te te isatõrĩ zaꞌra ꞌremhã. Tahawa, ta norĩ zama ma tô ꞌRe ihâimana uꞌâsi mono mreme na duré dapawaptom na hã daꞌãma sasõmri zaꞌra.
21 Tawamhã Sau ãne hã te te waihuꞌu wamhã, ma tô duré aimawi rowasuꞌuꞌwa norĩ hã satõrĩ zaꞌra. Tane nherẽ, ta norĩ zama ma tô duré ꞌRe ihâimana uꞌâsi mono mreme na dapawaptom na hã daꞌãma sasõmri zaꞌra. Tahawa, ma tô duré siꞌubdatõ ãmamhã satõrĩ zaꞌra, aibâ norĩ hã. Tane nherẽ, tô õne si ma tô tãma tiromhâimana zaꞌra.
22 Tawamhã Sau siꞌuihâ na te oto mo, Rama u. Tawamhã Seco na ꞌriꞌahâ isaꞌẽtẽ nhisi ãma â zô abꞌre u oto wisi wamhã, ma tô daꞌmazadanha ãne:
— E mame te Samuéu norĩ, Dawihi me hã tihâimana zahuré.
Tawamhã ãma sinharĩ zahuré wa, te ãne tãma wasuꞌu zahuré ni:
— ꞌRe ihâimana uꞌâsi mono zadawa ꞌmahârâꞌwa norĩ nhorõwa ãma te tihâimana zahuré.
23 Tawamhã Sau tamomo morĩ ré, ma tô ꞌRe ihâimana uꞌâsi mono pẽꞌẽzani hã iwamhã ãzé. Tahawa, te õhõ zama ꞌRe ihâimana uꞌâsi mono mreme na hã bâdâdi na te te dama rowasuꞌu, isadawa wasuꞌuꞌwa norĩ nhorõwa u iwisizéb u.
24 Tahawa, oto wisi wamhã, ma tô tiꞌuzazé hã waze. Tawamhã Samuéu nhoꞌa ꞌRe ihâimana uꞌâsi mono mreme na te duré dama rowasuꞌu. Tawamhã ma tô aiꞌuréiwi tiꞌai wamhã nomro, bâtâ wahuré na, duré mara wahuré na. Tahawa ãne, da te dasima inharĩ zaꞌra zé hã, ma tô tihâiba: “Pra! E Sauhu zama ma tô ꞌRe ihâimana uꞌâsi mono mreme na rowasuꞌu ꞌwai u hã aipiꞌra.”
