1 Samuéu 2:1-36
2 Tawamhã Ãna te ãne mre:
Uburé Danhibꞌapito hã rowẽ zaꞌẽne hã ĩpẽꞌẽ ꞌremhã ma tô ĩma tisõ, saꞌẽtẽ na. Te te ĩma iꞌmanharĩzéb uꞌâbâ, wa nasi ĩꞌrãiwahutu haré ne.Wa nasi ĩnhitobꞌru norĩ na hã aihâ zaꞌra.Duré ĩpẽꞌẽ ꞌremhã ĩma rowẽ uptabi di, ꞌRe ihâimana uꞌâsi mono te te ĩpawaptobzém na hã.
2 Niꞌwa Uburé Danhibꞌapito sine iwẽ uptabi iwasétéꞌõ hã hâimana õ di. Tawamhã duré aimawi ihâibaꞌõ hã hâimana õ di, tô õhõ si wa. Duré niꞌwa hã hâimana õ di isine, daꞌwawi rowasété wa ꞌre isimapa mono hã, ꞌRe ihâimana uꞌâsi mono ne hã.
3 Aimreme na asina ꞌre aiwata zaꞌra waꞌaba mono tõ, duré ꞌre asiꞌmadâꞌâ ze zaꞌra waꞌaba mono zarina, asima ꞌre rowasuꞌu zaꞌra waꞌaba mono tõ.E tihai wa. Uburé Danhibꞌapito ꞌRe ihâimana uꞌâsi mono ma, tiha hã tãma waihuꞌu pese di. Ta hã te uburé te te daꞌãma ꞌre arowairébé, da te ꞌre iꞌmanharĩ zaꞌra mono zém na te te ꞌre idaꞌawaihuꞌu mono zéb zarina.
4 Dasiꞌwapéi ꞌmanharĩꞌwa norĩ te umnhiꞌã iwã tede hã sihâri zaꞌra di. Tane nherẽ, dasiꞌwapéi ꞌmanharĩꞌwa norĩ isibꞌuware norĩ hã te iwaꞌrãmi ꞌre siptete zaꞌra.
5 Aré isai ahâ norĩ hã te oto te te ꞌre romhuri zaꞌra, tisazéb da hã. Tane nherẽ, mram na te te ꞌre irobzépata zaꞌra mono norĩ hã ãhã na hã tãma zaꞌra hã mrab õ di oto, iwaꞌrãmib zaꞌra.Piꞌõ iꞌra waihuꞌuꞌõ norĩ ma hã ma tô 7 na iꞌra hã tãma tipoto zaꞌra. Tane nherẽ, iꞌra ahâ norĩ ma hã, iꞌra hã tãma ꞌre hâimana zaꞌra mono õ di oto, iwaꞌrãmib zaꞌra.
6 Uburé Danhibꞌapito si dahâimanazé ꞌrãsutu pisutuꞌwa hã, duré dahâimana naꞌrata zé pisutuꞌwa hã.Ta hã te te ꞌre daꞌazatõrĩ, adâ ꞌre ihâimana zaꞌra mono zéb u hã. Ta hã te duré te te ꞌre daꞌazani, ta hawimhã.
7 Wanhibꞌapito hã te duré te te dama ꞌre apisutu, danhiptihai ãna ꞌre dahâimana zaꞌra mono da hã, duré danhibro pese na ꞌre idahâimana zaꞌra mono zéb da hã. Õhõ si te te dama ꞌre apisutu, dawapu na ꞌre idahâimana zaꞌra mono zéb da hã, duré dapire na ꞌre idahâimana zaꞌra mono zéb da hã.
8 ꞌRe ihâimana uꞌâsi mono hã te robzaprum hawi te te ꞌre awahutu, isiptihai õ norĩ hã. Te duré tihai õ zarina robzépata hawi, te te ꞌre azani, tiha zô tiwi ꞌre iroꞌwanhiꞌriti uꞌâsi zaꞌra mono norĩ hã. Ta hã te duré isiptihai õ norĩ ma hã te te ꞌre apisutu, dama ipire norĩ siré ꞌre idahâimana zaꞌra mono zéb da hã. Te duré te te ꞌre daꞌaꞌmaza, dawazém na ꞌre idahâimana zaꞌra mono zéb u hã. Tiꞌa naꞌrada hã Uburé Danhibꞌapito te hã. Ta hã ma tô tiꞌa hã isisiwimhã ꞌmanha.
9 Õ hã te iꞌwawi ꞌre simapa uꞌâsi zaꞌra, sena na ãma ꞌre inomro mono norĩ ꞌwawimhã. Tane nherẽ, wasété na ꞌre inomro mono norĩ wi si te tiwi ꞌre sipizari zaꞌra, ꞌre simani zaꞌra mono da siꞌuihâ na, robra u hã. E tihai wa. Niꞌwa hã tinhiptete hawim na ꞌrâwi te te daꞌãma aiꞌuté õ wa.
10 Uburé Danhibꞌapito nhitobꞌru norĩ hã te za ꞌre siꞌutõrĩ. Tãiwapsaꞌa na ne, te za sada ꞌre hâimana zaꞌra, hâiwa hawimhã.Uburé Danhibꞌapito hã te za dapoto mono bâ te te dama ꞌre arowairébé, dahâimanazém na te te ꞌre idaꞌawaihuꞌu mono zéb zarina. Duré tinhiptetezé hã te za tãma tisõ, Danhibꞌapito da, te te ipisutu ma hã. Te za duré tãma tisõ, te te daꞌãma iꞌaiꞌutézéb da hã, Danhibꞌapito te te ipisutu ma hã.
11 Tawamhã ma tô oto mo Eucana hã apâ, Rama ãma tinhorõwa u hã. Tane nherẽ, te ꞌwatébrémi Samuéu si nhamra isaꞌu, Silo ãma hã, Uburé Danhibꞌapito ma romhuriꞌwa na ꞌre hâimana mono da, sasedoti Erihi pawaptoꞌwa na.
Erihi ꞌra norĩ wasuꞌu
12 Tawamhã sasedoti Erihi ꞌra norĩ hã wasété uptabi zaꞌra di. Tahawa, Uburé Danhibꞌapito ãma te te ãma rosaꞌrata zahuré õ di, te te sima iwẽꞌõ zahuré zarina.
13 Ta norĩ hã te te ꞌre ꞌmadâꞌâ zahuré mono õ di, sasedoti norĩ nhimiromhurizém na roti hã te te duré dawi ꞌre irowaptẽrẽ zaꞌra mono zém na hã. Tawamhã aibâ danhimizama zata na ꞌRe ihâimana uꞌâsi mono ma ꞌre sõpru mono wamhã, ma tô sasedoti pawaptoꞌwa hã ꞌre ne, isihâparahi ꞌwa siꞌubdatõ ré hã. Tawamhã romnhi hã ꞌre sebre zaꞌra mono ré,
14 ma tô pizaꞌa ꞌre zaꞌẽtẽ wa, isihâ para hi zaꞌẽne hã te te sô ꞌre za, romnhi zô. Tawamhã duré te te ãma ꞌre isani zaꞌra mono hã tô sasedoti norĩ ma da hã. Tawamhã ãne ma tô Izaraéu nhihudu norĩ hã te te sima ꞌre ꞌmanharĩ uꞌâsi zaꞌra, Silo u ꞌre nomro mono sidâpâsi hâiba pisutu, danhimizama zata na ꞌRe ihâimana uꞌâsi mono ma, ꞌre sõprub zaꞌra mono da.
15 Tawamhã romnhi wa, te te ꞌre sazari mono wana ré hã, duré te te ꞌre zata zaꞌra mono õ ré hã, ma tô sasedoti Erihi ꞌra norĩ hã te te tãma ꞌre ꞌru zahuré, sasedoti pawaptoꞌwai ma hã, tinhoprubzé te te izata ma, te te tãma ꞌre nharĩ zaꞌra mono da, ãne: “Maꞌãpé we ĩma sõmri, inhi waꞌõno hã sasedoti te te isebre da hã. Ta hã te te sima wẽ õ di za, isebre siro hã. Inhi tép si te za sima wẽ.”
16 Tawamhã duré aibâ hã ãne te te tãma ãma ꞌre waꞌrãmi mono wamhã: “Aꞌâ imorĩꞌrata na te te zata romnhi wa hã. Taha parip si te za asima iwẽ na asima iꞌmaiwaze za”, tawamhã sasedoti pawaptoꞌwa ma tô ãne te te tãma ꞌre anharĩ: “Mare di. Sõmri suꞌu, ta romnhi hã. Duré sõmri suꞌu õ wamhã, wa za tiꞌâ, ĩnhiptete sina.”
17 Tawamhã ãne Erihi ꞌra norĩ hã ma tô siwi te te ꞌre wazébꞌõ zahuré, Uburé Danhibꞌapito ma danhoprubzé da te ꞌre iꞌãwisi zaꞌra mono hã. Tahawa, Uburé Danhibꞌapito ma hã aiꞌreputu norĩ wasété zahuré zé hã pire uptabi di.
Samuéu, Silo ãma ihâimanazé wasuꞌu
18 Tawamhã Samuéu te oto te te ꞌre romhuri, ꞌRe ihâimana uꞌâsi mono Uburé Danhibꞌapito ma hã. Tawamhã zahadu ꞌwatébrémi nherẽ, ma tô ꞌre siꞌuza, sasedoti norĩ siꞌuzazé ipanoiꞌõ abazi ꞌmanharĩ na hã.
19 Tawamhã Ãna ina hã wahup sidâpâsi ma tô iꞌuzazé ihâpa hã te te sada ꞌre abꞌmanharĩ. Tawamhã duré ꞌRe ihâimana uꞌâsi mono ma, tinhimizama zata na ꞌre sõpru mono da, ꞌre ne mono wamhã, ma tô timro siré te te tãma ꞌre ꞌwapé, iꞌuzazé hã.
20 Tawamhã Eri hã, Eucana norĩ ãma imro me ma tô iwẽ na te te ãma ꞌre rowaptẽrẽ zahuré, ꞌRe ihâimana uꞌâsi mono wi. Ãne ma tô te te tãma ꞌre rowasuꞌu zahuré:
— Wa aima wẽ waꞌwa, Uburé Danhibꞌapito hã te te aima sõmri aba da hã, aiꞌra norĩ hâiba amo hã, ꞌRe ihâimana uꞌâsi mono ma isõmri aba nhowaꞌreꞌreb da hã.
Tawamhã taha parip si, ma tô apâ ꞌre neb zahuré, tinhorõwa u hã.
21 Tawamhã Uburé Danhibꞌapito hã ma tô duré pawapto iwẽ na, Ãna hã. Tahawa, ma tô siꞌubdatõ iꞌra siꞌaibâ tãma tipoto zaꞌra, duré maparane piꞌõ hã. Tawamhã taha ré ma tô ꞌwatébrémi Samuéu hã oto tiprédu, Uburé Danhibꞌapito ma, te te ꞌre romhuri mono ré.
Erihi wasuꞌu, duré iꞌra norĩ wasuꞌu me
22 Tawamhã Eri hã ma tô oto tihâiba prédu pese. Tawamhã ma tô te te ꞌre wapari, iꞌra norĩ uburé marĩ te te ꞌre iꞌaꞌmanharĩ zahuré mono zé hã Izaraéu nhihudu norĩ ma. Ma tô duré te te ꞌre wapari, piꞌõ norĩ ãma ꞌre ihâimana wasété zahuré mono zém na hã, romhâ ꞌmanharĩ na ꞌri iwazéb zahi wa, ꞌre idanhisisi mono zéb ãma, te te ꞌre iromhuri zaꞌra mono norĩ ãmamhã.
23 Tahawa, te Eri imama hã tãma nharĩ zahuré ãne:
— E marĩ da, te ãne hã ꞌre iꞌmanharĩ aba mo. Uburé ma tô ĩma da te ꞌre aiwasuꞌu waꞌwa, asimirobꞌmanharĩ wasété aba zém na hã.
24 Tahawa, ãne hã sahâri aba, iꞌra norĩ! Wa hã nasi te iwapari hã wasété uptabi di, Uburé Danhibꞌapito nhibꞌaꞌuwẽ norĩ nhimirowasuꞌu hã, aihâiba na waꞌaba.
25 Niꞌwa hã tisiré hâiba amo da, wasété wamhã, te za Uburé Danhibꞌapito hã mreme wapto. Tane nherẽ, oto niꞌwa hã ꞌRe ihâimana uꞌâsi mono zada hâimana wamhã, niꞌwa te te mreme wapto waihuꞌu õ di.
Tane nherẽ, Erihi ꞌra norĩ hã timama te te wapari zahuré õ di. E marĩ wa. Uburé Danhibꞌapito hã te te ãma sima rowairébé zahuré wa aré, te te ipãrĩ da hã.
26 Tawamhã ꞌwatébrémi Samuéu hã simizaꞌrese siꞌréi mono sidâpâsi ma tô da te dasiwi ꞌre wẽsãmri. Duré Uburé Danhibꞌapito zama ma tô te te ꞌre wẽsãmri.
ꞌRe ihâimana uꞌâsi mono te te ihâiꞌré zé wasuꞌu, Erihi ꞌra norĩ wasété zé hã
27 Tawamhã ꞌRe ihâimana uꞌâsi mono zadawa ꞌmahârâꞌwa hã te Erihi u mo, te te tãma sadawa wasuꞌu da, ꞌRe ihâimana uꞌâsi mono hã ãne:
— Aihiꞌrada Arãhã ma, wa tô wa hã ĩsihâiꞌré, Ezitu na romnhisi ãma pawaꞌâbâ ãna te te dama ꞌre romhuri mono ré hã, timro me duré tiꞌra norĩ me.
28 Ãne na hã aima waihuꞌu pese di, wa hã te ipisutu zaꞌra na hã uburé Izaraéu nhihudu norĩ ꞌremhã, ĩte sasedoti da hã, duré wedeza ne ꞌmanharĩ ãma danhoprubzé te te ĩma ꞌre zata zaꞌra mono da, duré wedewaꞌu zadaze te te ĩma ꞌre iroꞌo zaꞌra mono da hã, sasedoti siꞌuzazé ipanoiꞌõ na ꞌre siꞌuza zaꞌra mono da, ĩnhoꞌremhã. Tawamhã duré wa hã wa tô tãma pisutu zaꞌra, ĩma danhoprubzé hã wedeza ne ꞌmanharĩ ãma te te ĩma ꞌre izata zaꞌra mono hã te te sima ꞌre poꞌo zaꞌra mono da.
29 E marĩ da, ma tô ãne nherẽ, danhoprubzéb zô ꞌre irobꞌruiwapari zaꞌra waꞌaba mo, wa hã te dama iwaihuꞌuzéb zarina danhoprubzé da te ĩma ꞌre iꞌmanharĩ zaꞌra mono zô. Eri, e marĩ da, te aiꞌra norĩ hã iwazéb zaꞌra ĩnhipai u, taré hâipese zaꞌra da si. Ta norĩ hã ĩma danhoprubzé romnhi waꞌõno danhipai u iwẽ uptabi si te te dawi ꞌre huri mono nherẽ, a hã tiwi sawi zaꞌra õ di.
30 Wa hã Izaraéu nhihudu norĩ te, ꞌRe ihâimana uꞌâsi mono Uburé Danhibꞌapito hã wa tô ropisutu duréihã aihiꞌrata norĩ ma hã za isihudu norĩ hã õne uꞌâ te te ĩma ꞌre iromhuri zaꞌra mono na hã sasedoti na. Tane nherẽ, ãhã na hã wa za tinha, õne uꞌâ ꞌre ihâimana mono õ na hã za oto. E marĩ wa. Wa hã za oto te ꞌre daꞌawazé mono dâꞌâsina, da te ꞌre ĩwazéb zaꞌra mono norĩ hã, duré za oto te ꞌre daꞌawazé mono õ dâꞌâsina, da te ꞌre ĩwazéb zaꞌra mono õ norĩ hã.
31 Maꞌãpé robꞌmadâꞌâ mono! Bâdâ iwa iwaptãꞌãzé hã romhuture di oto wa hã za uburé aiꞌra norĩ te isimrozéb da hã, duré aimama ꞌra norĩ siꞌaibâ hã te isimrozéb da hã ꞌmasiꞌĩhi tõ da.
32 Ãne wa, te za aiwi tirowaihuꞌuꞌõ za nimahã na hã. Tawamhã te za taré duré ãma iꞌruiwapari zaꞌra, Izaraéu nhihudu norĩ ma, za marĩ iwẽ te isõmri zaꞌra zém na hã. E marĩ wa. Aiꞌra norĩ hã duré asihudu norĩ hã za ꞌmasiꞌĩhi õ wa.
33 Tawamhã wa hã asihudu norĩ hã uburé te uprosi õ di za. Misi te za ꞌre ꞌmaihâimana, ĩte sasedoti na ꞌre ihâimana mono da hã. Tane nherẽ, te za siꞌrã na te te robꞌmadâꞌâ waihuꞌu ãna ꞌre hâimana. Duré asihudu hâiba amo norĩ si te za siptete ré uburé pese aiꞌutõ.
34 Hopini norĩ hã Finéaha me maparane aiꞌra norĩ hã te za siré tidâꞌâ zahuré, tô taha bâtâ na aipibuzém na sena na wa hã te nharĩ dâꞌâsina.
35 Tawamhã wa hã wa za duré ꞌmaipisutu ĩte sasedoti ĩma romhuriꞌwa da hã, duré uburé marĩ za te te ꞌre iꞌmanharĩ mono da hã te ĩsima ꞌre iꞌawẽ mono zéb zarina. Duré wa za wa hã õhõ ma te tãma ꞌre sõmri zaꞌra isihudu hã. Ta norĩ hã te za õne uꞌâsi apito ma te te ꞌre romhuri zaꞌra za, apito te ipisutu ma hã.
36 Tawamhã uburé asihudu hâiba amo norĩ hã ꞌre ihâimana zaꞌra mono hã te za tãma ꞌre siwẽꞌẽ zaꞌra apito ma, robꞌuiprazé te te tiwi ꞌre waptẽrẽ zaꞌra mono da hã, duré mra hã. Te za duré sasedoti norĩ pawaptoꞌwa na te te ꞌre romhuri zaꞌra mono da, saꞌẽtẽ te te ꞌre rowaptẽrẽ zaꞌra, tisazéb da.
