1 Samuéu 20:1-42
20 Tawamhã Davi ma tô aimani Rama ãma ꞌRe ihâimana uꞌâsi mono zadawa ꞌmahârâꞌwa norĩ nhorõwa hawimhã. Tahawa, ma tô Zonata ꞌre ihâimana mono zéb u hã mo. Itẽme wisi wamhã, te ãne tãma tinha:
— E marĩ te ꞌmanharĩ bâ. E marĩ na wa tô ĩwasédé hã ꞌmanha aimama wi hã, te te ĩwĩrĩ da, te te sima iwẽ hã.
2 Tawamhã Zonata ma te ãma sadaꞌâ ãne:
— Wa ĩsima wẽ wa hã, atâꞌâ tõ da ꞌRe ihâimana uꞌâsi mono te te aiꞌmadâꞌâ pese da. Ĩmama hã te uburé marĩ hã te te ĩma ꞌre awasuꞌu, te te ꞌre iꞌabꞌmanharĩ mono zé hã ipire hã duré ipireꞌõ hã. Marĩ hã te te ĩwi simiꞌuri õ di aré. Ãhã wa, tô marĩ hã hâimana õ di.
3 Tawamhã Davi ma ãma tãma waꞌrã ãne:
— Aimama ma hã waihuꞌu pese di, aima ĩwẽ zaꞌẽtẽ na hã. Tahawa, te te ĩꞌãma sima irosaꞌratazé hã te te aima wasuꞌu õ di, waihuꞌu da hã, robzépata tõ da, aiwi irobzeiꞌõzém na. Ãhã na wa za Wanhibꞌapito ꞌRe ihâimana uꞌâsi mono sena na ꞌre ihâimana mono ne, a hã duré sena na ꞌre aihâimana mono ne ropisudu hã aima ꞌmanha. Tô sena ĩdâꞌâ da hã romnhimimnhasi wa oto.
4 Tahawa, te Zonata sadanha ãne, Davi hã:
— E marĩ te asima iwẽ, wa hã te iꞌmanharĩ da hã.
5 Tawamhã Davi ma ãma sadaꞌâ ãne:
— Awẽmhã aꞌamo itém na dato ihâiba, aré te simini ãna apito me ĩsa da hã ĩmorĩ da si. Tane nherẽ, aima wẽ wamhã, wa za aimaꞌu tô, aꞌubuni wimhã, awẽ amoi u, hâiwahâ tẽme.
6 Tawamhã aimama hã ĩzô robaba wa, ĩzô simrami wamhã, tãma ĩwasuꞌu na za ãne: Wa hã te aiwi irowaptẽrẽ zarina ĩzatõrĩ na hã ĩmorĩ da, marĩ zarina waptu na Belẽ u hã. E marĩ wa. Ãhã na hã te za uburé ĩsiré norĩ hã tame tinhoprubzém na tinhoprub zaꞌra za, ꞌRe ihâimana uꞌâsi mono ma, bâdâ iwa waptãꞌã wa tãma ꞌre isõprub zaꞌra mono zé hã.
7 Tahawa, ãne te te nharĩ wamhã: “Wẽ di, marĩ õ di”, ĩma simimnhasi õ di. Tane nherẽ, sahi na hâimana wamhã, te za iwaihu, za marĩ te te ĩꞌãma iꞌmanharĩ wasété zém na hã.
8 Ãne wa aiwi waptẽ, ꞌRe ihâimana uꞌâsi mono nhisi na ropisudu iwazéb zahi, te te ĩma iꞌmanharĩzéb zarina, ĩma ãma uwaimrami da. Tane nherẽ, tô wa hã marĩ na te upai wamhã, a hã te za pé tô ĩwĩ, aimama hã te te ĩma robꞌmanharĩ tõ da pé.
9 Tawamhã Zonata ma te ãma tãma waꞌrã ãne:
— Tane na hã asina rosaꞌrata tõ! Ĩmama te te aiwĩrĩ da, te te sima irowairébézé wa hã te waihuꞌu ꞌwaꞌâhã, e aré te aipoꞌre puꞌu õ di. Wa aré tô aipoꞌre puꞌu.
10 Tawamhã Davi te duré sadanha ãne:
— Bété aimama hã sahi na te te aima ãma waꞌrãmi wamhã, e ꞌwa te za ĩpoꞌre puꞌu za taha na.
11 Tahawa, Zonata ma te ãma tãma waꞌrã ãne:
— Oto we ĩsiré aimorĩ, waneb da aꞌubuni u.
Tawamhã te oto siré tineb zahuré.
12 Tawamhã Zonata te duré tãma tinha, Davihi ma:
— Wanhibꞌapito Izaraéu nhihudu norĩ te ꞌRe ihâimana uꞌâsi mono nhoꞌa si wa za ropisutu ni ãhã na hã. Awẽmhã duré niha wamhã, awẽ amo na ãne bâtâ na wa za ĩmama hã sadanha. Tawamhã iwẽ na te te aihâiba na ĩzadaꞌâbâ wamhã, wa za duré romreme hã ãma aima tisõ, waihuꞌu da.
13 Ĩmama, marĩ aihâiba na te te ꞌmanharĩ wasété da wamhã, taha zarina apâ rowasuꞌu na te ãma aima siri õ wamhã, duré wẽ na aiwatobro da, te dawi aiꞌmadâꞌâ wẽ õ wamhã, wa za ĩsiꞌru ꞌRe ihâimana uꞌâsi mono te te ĩwĩrĩ da hã. Ĩmama siré ꞌre ihâimana mono ne, asiré ꞌre hâimana mono neza ꞌRe ihâimana uꞌâsi mono hã.
14 Ãhã na awaꞌawi na ĩdâꞌâ ãna ĩhâimanazém na te uzusi wamhã, maꞌãpé asimiropisutuzé hã sena na ãma ĩma uwaimrami za. Duré ĩdâꞌâ wamhã,
15 maꞌãpé õne uꞌâ ĩsisãnawã norĩ hã iwẽ na ꞌre apawapto mono za. Duré nimahã na Wanhibꞌapito wanhitobꞌru norĩ hã uburé te te uprosi wamhã,
16 wa norĩ hã wa te wasima iropisutuzém na hã wa te ãma wasima upa tõ da. Tawamhã ãma upai wamhã a hã, te za ꞌRe ihâimana uꞌâsi mono aima robꞌmanha.
17 Tawamhã Zonata, Davihi zawizém na te duré tãma ꞌmanha, tinhimiropisudu hã. E marĩ wa, ꞌrâwi ꞌre isisawi pese mono ne, Davi hã tãma sawi uptabi wa.
18 Tahawa, te ãne tinha, Davihi ma:
— Awẽmhã aꞌamo itém na datoi wa, asô robaba wamhã, te za asô amrami zaꞌra ni, asãmrazé hã wedeza baba wa.
19 Awẽ amo na asô robaba wamhã, te za duré asô amrami zaꞌra ni. Ãne wa, te za aimo, aꞌubuni ãma aré iꞌaimaꞌurizéb u aꞌâ tame asãmra da, ẽtẽ tõmo wawẽ babarã na.
20 Tawamhã wa za tiꞌi na hã siꞌubdatõ ãma romnhimri za ẽtẽ tõmo wawẽ nhoꞌõmoi baba marĩ isa te ãma isimrimi ne hã.
21 Tawamhã wa za ĩma romhuriꞌwai ma tinha, te te waibu da sô morĩ da hã. Tawamhã ãne te tãma nharĩ wamhã: “Õhõta ti te we ã niwĩ aimasa. Maꞌãpé sô aimorĩ, waibu da”, tawamhã ã hã te wasuꞌu, za rowẽ na iꞌaihâimanazé hã. Tahawa, rowẽ na te za aiwato, iꞌaimaꞌurizém hawi. Wa hã Uburé Danhibꞌapito nhisi na wa ropisutu, taha zarina marĩ hã aiꞌãma ihâimanaꞌõ ãna hã za.
22 Tane nherẽ, duré ãne te tãma nharĩ wamhã, “Tiꞌi norĩ hã õhõta te romhâ na aimasa”, ãne wamhã, a hã aimani na za, Wanhibꞌapito hã te aima robꞌrui wa, aimorĩ da.
23 Ropisudu hã wa te wasima iꞌmanharĩ mono hã Wanhibꞌapito ꞌRe ihâimana uꞌâsi mono te za te te ꞌre wapawapto, wa te wasima ãma ꞌre uwaimrami uꞌâsi mono da hã.
24 Tawamhã ãne te te tãma nharĩ pari, ma tô oto Davi hã aimaꞌu aꞌubuni wi. Tawamhã apito Sau ma tô oto wi, aꞌamo itém na datoi u hã.
25 Tawamhã ma tô oto nhamra ꞌri naꞌrata ãma, ꞌre isimasisi uꞌâsi mono zéb ãma. Abine hã ma tô isababamhã nhamra, Zonata isõwamhã duré ma tô nhamra. Tane nherẽ, Davihi nhamrazéb da si te baba na tihâiba.
26 Tane nherẽ, tô taha bâtâ na Sau hã te te nharĩ õ di, te te taré rosaꞌrata wa ãne: “Ãté marĩ hã sô watobro. Tahawa te te tô dame ꞌmanharĩ õ di, datoi wa, ꞌre idasihâiba pese zaꞌra mono zé hã.”
27 Tawamhã maparane ãma dato aꞌamo itém na hâimana wamhã, ma tô duré Davihi nhamrazé hã baba na tihâiba. Tahawa, te Sau Zonata hã sadanha ãne:
— E marĩ wa, Davi hã we morĩ õ di ahâmhâ dame sa da hã, duré ã bâtâ na dame sa da hã.
28 Tawamhã iꞌra Zonata ma ãma sadaꞌâ ãne:
— Ma tô ĩwi rowaptẽ, morĩ da Belẽ u.
29 Te ĩma tinha ãne: “Ĩma robꞌru na ĩmorĩ da Belẽ u. E marĩ wa. Tame aꞌuwẽ norĩ hã te za dato isaꞌẽne hã siwi ꞌmanha ꞌRe ihâimana uꞌâsi mono ma danhimizama zata na tãma ꞌre idanhoprub zaꞌra mono zém na hã. Tahawa, ma tô ĩsisãnawã hã sitẽme ĩzô hâ, ĩzama dame ĩhâimana da hã. Tahawa, a hã sena na ĩsiwaihuꞌu wamhã, maꞌãpé ĩma rowairébé ĩmorĩ da, ĩsisãnawã norĩ te sabu zaꞌra da.”
Tawamhã te duré tãma tinha ãne:
— Tahawa, ãhã na hã hâimana õ di, tinhamrazéb ãma hã.
30 Tawamhã Sau ma tô sada abꞌrui pese, tiꞌra Zonataha da hã. Tahawa, te tãma tinha ãne:
— Piꞌõi wasété ꞌra, a hã! Wa tô aiwaihuꞌu ãhã na hã, saprĩ wa Davihi niwĩ iꞌaihâimana na hã. Taha na ma tô asiꞌupto wasé. Ana zama ma tô duré iꞌupto wasé.
31 Davi hã zahadu hâiba ré ꞌre hâimana mono ré hã, iꞌasiꞌapito da hã mare di za a hã, ã hã tiꞌai waꞌõtõ nhoꞌõmo ꞌremhã. Tahawa, maꞌãpé sô aimorĩ, we saprõni da ãwa. Dâꞌâ hâ!
32 Tawamhã Zonata te timama sadanha ãne:
— E marĩ wa, te za dârâ. E marĩ te te ꞌmanharĩ bâ.
33 Tawamhã ãne te te tãma nharĩ wa, ma tô Sau Zonata hã tite isiꞌuwazi ꞌrãꞌwa na hã ãma simri te te ãma wĩrĩ da. Ãne wa tawamhã, Zonata ma tô oto timama hâimanazé hã waihuꞌu, tô aré Davi te te wĩrĩ da, te te sima irosaꞌrata na hã.
34 Tahawa, Zonata hã sahi na ma tô tisazém hawimhã wahudu. Tahawa, tô taha bâtâ na hã sai õ di, maparane bâtâ ãma dato aꞌamo itém na ihâimana na hã. Tãma robzei õ uptabi di, imama Sau hã Davihi ãma te te wasété mono wa.
35 Tawamhã awẽm na ma tô aꞌubuni u mo, Davi te te sõpẽtẽ da hã, te te sima iwaihuꞌu zahuré zéb zarina. Morĩ wamhã, ma tô aiꞌrepudu hã siré saprõ.
36 Tawamhã taha ma, te ãne tãma tinha:
— Sô aiwara, ti te ime zô.
Tawamhã aiꞌrepudu hã ma tô oto sô wara. Taha ré, ma tô Zonata hã ti hã time, aiꞌreputu nhipai.
37 Tawamhã oto aiꞌrepudu hã ti iwaptãꞌãzéb u wisi wamhã, ma tô Zonata hã hâ, hârâ ꞌrãihâ na ãne:
— Ti hã ma tô waptãrã ãma asipai u.
38 Aimorĩ suꞌu, asimizazâri ãna!
Tawamhã aiꞌrepudu hã ma tô ti hã oto tiꞌâ. Taha pari, te apâ tinhibꞌihâꞌa u hã mo oto,
39 te te waihuꞌu ãna, marĩ te te iwasuꞌuzé hã. Zonata norĩ si Davihi me hã, ma tô waihuꞌu zahuré.
40 Tawamhã Zonata tite umnhiꞌã aiꞌreputu ma, ma tô tisõ, tiꞌi zama. Taha pari, te oto apâ iré satõ, te te âri da, ꞌriꞌahâ u.
41 Tawamhã aiꞌrepudu hã morĩ pari, ma tô oto Davi hã watobro, ẽtẽ tõmo wawẽ babarãi ãma isimaꞌurizém hawimhã. Tahawa, tiꞌai u waptãꞌã wamhã, ma tô siꞌubdatõ tiꞌubu na hã ropto, tiꞌai u hã. Tawamhã wawa sina ma tô sisawi zahuré, sitobꞌrata hârâ na hã. Tawamhã robzeiꞌõ hã saꞌẽtẽ uptabi di Davihi ma hã, Zonataha nhipai u.
42 Tawamhã Zonata te Davihi ma tinha ãne:
— Ĩma wẽ di, ꞌRe ihâimana uꞌâsi mono hã asiré ꞌre hâimana uꞌâsi mono da hã. Ĩma wẽ di duré Uburé Danhibꞌapito te te ꞌre wapawapto mono da, wanhihudu norĩ zama te te duré ꞌre pawaptob zaꞌra mono da, ropisudu wa te iꞌmanharĩzé hã wa te ãma wasima ꞌre uwaimrami uꞌâsi mono da si.
Ãne te te tãma waihuꞌu pari, ma tô Davi hã oto mo. Duré Zonata hã ma tô apâ mo, ꞌriꞌahâ u hã.
