1 Samuéu 21:1-15
21 Tawamhã Dawi ma tô mo, sasedoti Aimeretihi ma te te nharĩ da, Nobi na ꞌri waꞌõtõ nhisi u. Tawamhã oto itẽme wisi wamhã, ma tô sasedoti rẽrẽꞌẽ sina itẽme watobro, Dawihi tẽmemhã. Tahawa, te ãne sadanha:
— E marĩ wa, te we asiwaprosi aimo ãwamhã.
2 Tawamhã Dawi ma ãma sadaꞌâ ãne:
— Apito zadawa para wa wei mo ãwamhã. Ta hã ma tô ĩma waihuꞌu, niꞌwai ma te wasuꞌu tõ da, marĩ te te ĩma iꞌru, za te iꞌmanharĩzé hã. Tahawa, ĩte dasiꞌwapéi ꞌmanharĩꞌwa norĩ ma wa tô ꞌru zaꞌra, nimame ĩzô simipari zaꞌra da, tame te te siwi ĩnhopẽtẽ da.
3 Maꞌãpé ĩma rowasuꞌu na, ãhã na awaꞌawi na hã: E marĩ iré hã za te iꞌrẽne da hã. Iꞌuꞌẽtẽ wapu imrotõ na ĩma sõmri, niha wamhã, siwaꞌru marĩ hâimana wamhã ĩma ꞌmanhomri.
4 Tawamhã sasedoti ma ãma sadaꞌâ ãne:
— Iꞌuꞌẽtẽ wapu tarére hã ĩma ꞌmaihâimana õ di. ꞌRe ihâimana uꞌâsi mono ma danhoprubzéb da si, te iꞌuꞌẽtẽ wapu iwazéb zahi hã ĩma tihâiba. Tane nherẽ, te za tawamhã tô ãma idu, ate dasiꞌwapéi ꞌmanharĩꞌwa norĩ nimosi piꞌõ na ãma hâimana zaꞌra õ wamhã.
5 Tawamhã Dawi ma duré ãma tãma waꞌrã ãne:
— Ma. Te te ꞌmanharĩ zaꞌra õ di tô, tane hã. Wa norĩ hã piꞌõ siré wahâimana zaꞌra õ di. Ĩte aibâ norĩ hã te wẽ na sihâiba uptob ãna ꞌre hâimana zaꞌra marĩ zô ꞌre wawairébé mono wamhã. Tahawa, ãhã na hã marĩ ipire zô wawairébé wa, te sihâiba uptob ãna hã tihâimana zaꞌra.
6 Ãne te te tãma wasuꞌu zaꞌra wa, ma tô sasedoti hã Dawihi ma sõmri zaꞌra, iꞌuꞌẽtẽ wapu iwazéb zahi hã. E marĩ wa. Taha si hâimana wa, Uburé Danhibꞌapito ma, ãma ꞌre isõpru mono zé hã. Iꞌuꞌẽtẽ wapu wedeza iwazéb zahi hawi da te iwaibu hã, iwaꞌrãmi da te saꞌra da, wedeza nhisiwi iwahâ hã.
7 Tawamhã Doedi, edomita norĩ siré hã Sauhu ma romhuriꞌwa hã ma tô taha bâtâ na hã dame tihâiba tame. E marĩ da. Te te ãma uwaimrami da, za marĩ te te iꞌmanharĩzém na, ꞌRe ihâimana uꞌâsi mono nhoꞌa.
8 Tawamhã Dawi te Aimereti sadanha ãne:
— E ate iré hã sibꞌézé ꞌwapa, niha wamhã, isiꞌuwazi ꞌrãꞌwa ĩma sõmri da hã aꞌâ. Wa hã te we âri õ di, ĩte sibꞌézé ꞌwapa hã, duré ihâiba amo ĩsiꞌwabꞌézé hã. Apito hã waptu na te te we ĩma robꞌrui wa, wa tô we ĩsiꞌabaꞌré na watobro, we ĩmorĩ da ãwamhã. Tahawa, ĩꞌubana hã wa tô wei mo.
9 Tawamhã Aimereti ma ãma tãma waꞌrã ãne:
— Iré hã filisteu Gulia iwĩrĩ nhiꞌwa Era na ẽtẽ siwaꞌaba nhisi ãma. Ta hã te ꞌre saꞌwari ubu pese na, sasedoti norĩ siꞌuzazé ꞌre isaꞌwari mono babarãi ãma. Wẽ wamhã, taha si âri. Taha si te ãmemhã ꞌre saꞌwari, dasiꞌwapézé hã.
Tawamhã Dawi te tãma tinha ãne:
— Tô aimawi iwẽ hã ꞌmaihâimana õ di isipai u hã. Tahawa, maꞌãpé taha si ĩma sõmri.
10 Tawamhã Dawi tô taha bâtâ na ma aimani, Sauhu wi hã. Tahawa, ma tô mo, apito Aqui na isisi zô, ꞌriꞌahâ Gati na isisi ãmab zô ꞌre rĩtĩ mono da.
11 Tawamhã ꞌriꞌahâ ꞌre dama ipire norĩ hã ma tô tãma wasuꞌu zaꞌra ãne, Aquihi ma:
— Oro ã hã Dawi, Izaraéu nhihudu norĩ nhiptiꞌai ãma apito za. Piꞌõ norĩ hã ma tô taha ãmamhã tinhoꞌre zaꞌra, siꞌrẽne sina ãne: “Sau hã ma tô dapã miu na, duré Dawi hã ma tô dapã 10 miu na.”
12 Tawamhã ãne te te tãma robꞌrãzarõtõ zaꞌra wa, ma tô Dawi hã isimirowasuꞌu zaꞌra ma aꞌrã. Tahawa, ma tô tãma tipahi, Aquihi ma hã.
13 Tahawa, uburé idahâimana zaꞌra norĩ nhoꞌre, ma tô iꞌrã siwamnarĩ ne tihâiba. Tawamhã duré te te siwi tété da, te te siwi âri pibui wamhã, ma tô iꞌrãsiwamnarĩ ne tihâimana. ꞌRidawa zaꞌẽne hã ꞌriꞌahâ u ꞌre idanhisisi mono zé hã ma te te wabza. Isadaꞌu tiwi watobro wa, ma duré ãma siwatasu upto.
14 Tahawa, ma tô Aqui hã tite robꞌmadâꞌâꞌwa norĩ ma nharĩ zaꞌra ãne:
— Ã hã aibâ hã iꞌrã siwamnarĩ! E marĩ da, ma tô we ãwa asiwi isaprõni ꞌwa.
15 E ãmemhã robaba bâ iꞌrã siwamnarĩ norĩ hã ma tô bété iꞌrãsiwamnarĩ amo hã we asiwi isaprõni ꞌwa ãwamhã, ꞌrãsiwamnarĩ da ĩnhoꞌremhã, duré nasi marĩ hã te te awamnarĩ da, ĩhâimanazéb ꞌremhã.
