1 Samuéu 22:1-23
22 Tawamhã Davi ma tô aimani ꞌriꞌahâ Gati na isisi hawimhã. Tahawa, ma tô mo, ꞌriꞌahâ Adulã na isisi ꞌrata ẽtẽ zahâpâ na abꞌre ꞌre ihâimana mono u. Tawamhã isisãnawã norĩ, õme ihâimana na te te waihuꞌu zaꞌra wamhã, ma tô itẽme aiꞌabaꞌré iꞌrata aꞌâ hâimana zaꞌra da isiré.
2 Uburé aibâ norĩ tãma iropire zaꞌra hã, dama rowaꞌâbâ suꞌu õ ꞌwa norĩ, duré robzei ãna ꞌre ihâimana zaꞌra mono norĩ hã ma tô uburé aiꞌrãꞌõtõ Davi ihâimanazéb u hã. Tawamhã uburé ta norĩ ma, ma tô Davi hã siꞌĩꞌrãnhoꞌu, 400 na aibâ norĩ ihâimana zaꞌra ma.
3 Tawamhã Davi, ta hawi watobro wamhã, ma tô mo, Mispa na ꞌriꞌahâ nhisi u, Moabi na romnhisi ꞌremhã. Tamomo wisi wamhã, ma tô tame tiꞌai waꞌõtõ nhoꞌõmo ꞌre, apito ma tinha ãne:
— Maꞌãpé ĩmama ma duré ĩna ma rowairébé, we ãwa neb da, suru na aꞌâ aime hâimana zahuré da ãme, ꞌRe ihâimana uꞌâsi mono za marĩ te te ĩma iꞌmanharĩzé hã za te iwaihuꞌuzéb u.
4 Tawamhã ãne te te ãma sadanharĩ wa, ma tô Davihi ma saꞌré, Moabi ãma apito hã. Tahawa, ma tô oto ime tihâimana zahuré imama norĩ hã ina me, Davi hã ẽtẽ zahâpâ na abꞌre ãma simaꞌuri ré.
5 Tawamhã ꞌRe ihâimana uꞌâsi mono zadawa ꞌmahârâꞌwa Gadi hã ma tô Davihi hâimanazéb u itẽme mo. Tawamhã te ãne tãma tinha:
— Ãmemhã aihâimana õ di za. Te za aimorĩ su, Zuda tiꞌai u hã.
Tahawa, ma tô Davi hã watobro oto ta hawimhã. Ma tô mo, Hereti na marã nhisi u hã.
6 Tawamhã Sau hã te tihâiba, Gibea ãma. Ẽtẽ nhisiwi te nhamra wede zahâpâ, isibꞌratamhã isiꞌuwazi ꞌrãꞌwa ré. Uburé ite dama ipire norĩ hã te iꞌwawimhã asimro. Tawamhã ta norĩ hã ma tô tãma rowasuꞌu zaꞌra, Davi hã tisiré aibâ norĩ ré ihâimana na hã nimame.
7 Tahawa, te Sau hã tite dama ipire norĩ ma nharĩ zaꞌra ãne:
— Bẽzamihĩ nhihudu norĩ, ĩwapari zaꞌra waꞌaba! E Davi hã, buru duré robꞌre uva ꞌru hã, te te aima sõmri zaꞌra waꞌaba da bâ, ma tô irosaꞌrata zaꞌra waꞌwa. Duré e ite dasiꞌwapéi ꞌmanharĩꞌwa norĩ nhibꞌihâꞌa da, te te aima pisutu aba da bâ, ma tô irosaꞌrata zaꞌra waꞌwa.
8 E taha wa, te a norĩ waꞌwa hã asima irosaꞌrata zaꞌra waꞌwa, ĩzada aihâimana zaꞌra waꞌaba da. Niꞌwa hã te te ĩma wasuꞌu õ di, ĩꞌra hã, Davihi me tinhimiropisudu te te sima iꞌmanharĩ zahuré zé hã. Duré niꞌwa hã ĩꞌãma hâtâꞌâ waihuꞌu õ di. Niꞌwa hã te te duré ĩma rowasuꞌu õ di, Davi ĩnhibꞌaꞌuwẽ siré nherẽ, te te ĩwĩrĩ da, ĩzô ꞌre irĩtĩ mono zém na hã. Duré tô ĩꞌra, ĩzada ihâimanazém na zama niꞌwa te te ĩma wasuꞌu õ di.
9 Tawamhã Doedi, Edõ tiꞌai waꞌõtõ nhoꞌõmo hawimhã te Sauhu ma robꞌmadâꞌâꞌwa norĩ siré tihâiba. Ta hã ma tô ãne tãma wasuꞌu zaꞌra:
— Wa hã wa tô ꞌmadâ Davi, Aimereti Aitubihi ꞌra ma, te te robzanhamri ré hã, Nobi ãma.
10 Tahawa, Aimereti hã ma tô Davihi ãma hã Wanhibꞌapito ꞌRe ihâimana uꞌâsi mono hã sadanha ãne: “E marĩ te za Davi iꞌuwaibaba hã ꞌmanha.” Tawamhã ãne pari, ma tô isa hã tãma tisõ, Davihi ma. Tahawa, Guliaha nhiꞌwa zama ma tô duré tãma tisõ.
11 Tawamhã apito Sau ma tô sô hâ, Aimeretihi zô. Duré uburé isisãnawã siwadi norĩ zô zama, Nobi ãma sasedoti na ꞌre ihâimana zaꞌra mono norĩ zô zama ma tô hâ. Ãne wa, ma tô itẽme aiꞌabaꞌré, apito u.
12 Tawamhã oto itẽme sihutu wamhã, ma tô Sau hã tãma tinha ãne, Aimeretihi ma:
— Aimereti, ĩwapari!
Tawamhã asa ma sadaꞌâ ãne:
— Maꞌãpé tô marĩ na hã wamhã.
13 Tawamhã Sau te sadanha ãne:
— E marĩ da, ma tô Davihi me ĩzada asihâiba wapto waꞌwa, rosaꞌrada hã ĩzada ꞌmanharĩ aba da. Duré e marĩ da, ma tô isa hã tãma isõ, duré sibꞌézé ꞌwapa hã. E marĩ da, ma tô duré ꞌRe ihâimana uꞌâsi mono hã ãma isadanha, Davi hã za marĩ te te iꞌmanharĩzéb da hã. Tahawa, ma tô ãhã na awaꞌawi na hã Davi ĩzada tiwasété. Tahawa, te oto duré ĩzada mare, te te ĩwĩrĩ da hã.
14 Tawamhã Aimereti ma tô ãma tãma waꞌrã ãne:
— Davi hã aima daꞌmadâꞌâꞌwa norĩ nhipai u, aima iꞌumnha te ꞌre hâimana. Duré õ hã asaꞌõmo uptabi, danhibꞌihâꞌa uburé tiꞌai waꞌõtõ nhoꞌõmo mono bâ isimiwazéb zaꞌẽne te ꞌre ihâimana.
15 E imorĩꞌrata na ꞌRe ihâimana uꞌâsi mono hã te sadanharĩ bâ, Davi za marĩ te te iꞌmanharĩzéb da hã. Imorĩꞌrata na hã te sadanharĩ õ di. Tahawa, ĩwasédé hã ĩꞌãma hiri õ di za, duré ĩsisãnawã siwadi norĩ ãmab zama iwasédé hã saꞌra õ di za, asada wahâimana zaꞌra da, rosaꞌrada hã wa te wasima iꞌmanharĩ zaꞌra na hã. Tahawa, tane na hã ĩma waihuꞌu õ di.
16 Tane nherẽ, te apito Sau hã ãne tãma tinha:
— Aimereti, uburé te za asisãnawã siwadi norĩ me aiꞌutõrĩ ꞌwa.
17 Taha pari, te daꞌmadâꞌâꞌwa ꞌrâwi iꞌrata isimasam norĩ ma ꞌru zaꞌra ãne:
— Mo oto simroi waꞌaba, ꞌRe ihâimana uꞌâsi mono te sasedoti norĩ hã. Õ norĩ hã, Davihi me ma tô ĩzada siꞌrãꞌõtõ. Isimanizé hã te te ĩma wasuꞌu zaꞌra õ di, tãma waihuꞌu pese zaꞌra nherẽ.
Tane nherẽ, daꞌmadâꞌâꞌwa norĩ, Uburé Danhibꞌapito te sasedoti, te te siwi uprosi tõ da, ma tô siwi sisisi zaꞌra.
18 Tawamhã te Sau, Doedihi ma tinha ãne:
— A hã pé, tane wamhã simro na.
Tahawa, imreme zarina ma tô Doedi hã simro. Taha bâtâ na hã 85 na ma simro ꞌRe ihâimana uꞌâsi mono te sasedoti hã.
19 Tawamhã Sau ma tô duré ꞌru zaꞌra, uburé Nobi ãma ꞌre ihâimana zaꞌra mono norĩ zama da te uprosi da hã, ꞌriꞌahâ sasedoti norĩ te ãmamhã, aibâ norĩ hã, piꞌõ norĩ hã, ꞌwatébrémi norĩ hã, baꞌõtõ norĩ hã, aiꞌuté norĩ hã, powawẽ norĩ hã, awaru poꞌrepore norĩ hã, duré poneꞌẽrebâ norĩ hã, uburé pese siꞌutõrĩ pese da hã, ma tô dama tiꞌru.
20 Tane nherẽ, Abiata, Aimeretihi ꞌra hã ma tô aimani. Tahawa, ma tô mo Davi ihâimanazéb u hã.
21 Itẽme wisi wamhã, ma tô tãma wasuꞌu, Sau, Uburé Danhibꞌapito te sasedoti norĩ te te iꞌuprosi na hã.
22 Tahawa, te Davi hã Abiataha ma tinha ãne:
— Taha bâtâ na Doedi õme hâimana ré te ꞌmadâꞌâ wamhã, wa tô waihuꞌu, Sauhu ma te te uburé tãma irowasuꞌuzé te te iꞌmairẽme õ zé hã. Ãne wa, wa hã wa tô duré ãma upa tô, asisãnawã norĩ isiꞌutõrĩzém na hã.
23 Tahawa, ãme ĩsiré aihâimana uꞌâsi. Aipahi tõ. Sau hã te sima wẽ, wa norĩ, wa zahuré te te wapãrĩ da. Tane nherẽ, te za ĩme ropipa hawimhã asisõꞌreptu.
